Ñi feipin Jesús, ¿chumül afai ti huesaque dungu?

RAQUIDUAMNGE ÑI EPU DUNGU ÑI FEIPIN TA JESÚS:

‘Eimün felei tamün trepeleal reque, quimnolu am eimün tati antü ca ti hora no rume’ (MATEO 25:13).

“Trepeluucülemün ta eimün ca llihuatuleaimün ca ngillatuleaimün, quimnolu am eimün chumül ñi acual feichi antü” (MARCOS 13:33).

Chem che no rume quimlai chumül ñi afal ti huesaque dungu. Huelu Dios elcünui quiñe antü chumül ñi afal ti huesaque dungu (Mateo 24:36). Iñchiñ ca quimürpuafuiñ ñi fentre faltalen cam pichi faltalen ñi afal ti huesaque dungu. Jesús quimeltufi tañi pu inanieteu, ‘pefilmün ti pequenoelchi huesaque dungu ñi rupamequen, fei quimfali ñi pürüm afal ti huesaque dungu’.

¿CHEM PI JESÚS TAÑI RUPAYAL?

Jesús feipicünui itrofill dungu ñi rupayal epe puule ñi afal ti huesaque dungu. Feipi: “Quiñe troquiñ mapu ta hueichayalu cangelu troquiñ mapu engu ca fütra troquiñ mapu hueichayai cangelu fütra troquiñ mapu engu. Ca müleai ta ngüñün, ca müleai nüyün fill troquiñque mapu meu” (Mateo 24:3, 7). Jesús ca feipicünui ñi müleal ta“cutran fill mapu püle” (Lucas 21:11). Eimi, ¿chem piafuimi? ¿Femngechi tripalei Jesús ñi feipicünun?

Famülque mu ñi mülen aucan ca fütraque nüyün, ngüñün ca fillque cutran, femngechi fentrenque che rume cutrancauquei. Quiñe ejemplo, 2004 tripantu mu rupai quiñe fütra nüyün Océano Índico mu, tripan mu ti lafquen langümfi 225.000 che. Ca femngechi ti COVID-19 doi cüla tripantu mu, langümfi epe regle millon che com Mapu meu. Jesús feipi tüfachi dungu rupale, fei püllelepai ñi afal tati huesaque dungu.

‘AFAELCHI ANTÜ’

Feichi antü epe afcülele ti huesaque dungu, ‘afaelchi antü’ pingei ta Biblia mu (2 Pedro 3:3, 4). Dios feipicünui 2 Timoteo 3:1-5 mu doi huesa mongen ñi nierpual ta che, epe puule ñi afal ti antü (inaduamnge ti huichulechi dungu “¿Chem dungu ñi rupayal afaelchi antü mu?”). Famülque mu fentren che quisutu duamuuquei müten, quehuatufengeingün, rume diñmatuquefi ta plata ca poyechequelaingün rume. Tüfa ca pengeli pichilehuei müten tañi afal huesaque dungu.

Biblia feipi alüñmalayai tañi afal chi antü, fei Chau Dios apümafi com “tati pu üñfituquefilu ta mapu” (Apocalipsis 11:15-18; 12:12).

PÜRÜM CÜME MÜLEHUENGETUAI TI MAPU

Chau Dios deu elcünui quiñe antü ñi apümafiel com huesaque dungu (Mateo 24:36). Huelu Chau Dios ‘ayülelai inei no rume ñi layal’ (2 Pedro 3:9). Fei llemai, apümcangele com huesaque dungu, Chau Dios ayüniei taiñ mongetripayal. Feimu eluqueiñmu taiñ quimafiel ca taiñ inayafiel ñi feipin. Femliyiñ, doi cüme mongen nierputuafuiñ cüpalechi antü mu.

Chau Dios adcünui com che tañi quimeltungeal chem chumal tañi mongetripayal. Jesús feipicünui ti cümeque dungu Chau Ngünechen ñi Gobierno mu, quimelngeai ta “com troquiñque mapu meu” (Mateo 24:14). 2019 tripantu mu, pu Dunguquelu Ineingen Jehová quimeltuingün com Mapu mu Biblia ñi hulqueelchi maneluhun. Fentren 2.000 millon hora femingün tüfachi cüdau. Jesús feipicünui ñi quimelngeal che com Mapu meu, fei hula acuai ñi afal ta huesaque dungu.

Chumngechi ngüneduampeiñ, pichilehuei ñi afal pu che ñi gobierno. Apümngeai com huesaque che ca com huesaque dungu, huelu mongetripayafuiñ tati. Com Mapu cüme mülehuengetuai, ¡müna cüme dungu! Inalechi troquiñ mu peafiyiñ chem mülei taiñ femal taiñ mongetripayal.