Iñchiñ rumel mongeleafuiñ

1. Doi raquiduamliyiñ Jehová tañi feipicünuel mu, ¿chumaiñ?

JEHOVÁ feipicünui pu che tañi feyentuqueteu ñi rumel mongeleal (Rom. 6:23). Doi raquiduamliyiñ taiñ maneluhun mu, doi piuqueyeafiyiñ ta Jehová. Jehová ca piuqueyeiñmu, feimu ayüniei taiñ rumel mongeleal ca taiñ quiñeucüleal quisu mu.

2. Ñi feipicünuel Jehová taiñ rumel mongeleal, ¿chumngechi quelluqueiñmu?

² Jehová feipicünueiñmu taiñ rumel mongeleal, tüfa quelluqueiñmu taiñ nehuencüleal rupaliyiñ rume huesaque dungu mu. Taiñ pu caiñe ayüle rume taiñ langümaeteu, fentecünulayaiñ taiñ poyeafiel Jehová. Cüme quimnieiñ langümngeliyiñ rume taiñ serfifiel mu Jehová, quisu huiñomongeltuaiñmu ca eluaiñmu rumel mongen (Juan 5:28, 29; 1 Cor. 15:55-58; Heb. 2:15). ¿Chumngelu maneluhuafuiñ taiñ rumel mongeleal? Peafiyiñ.

JEHOVÁ RUMEL MÜLEQUEI

3. ¿Chumngelu quimnieiñ Jehová taiñ eluaeteu rumel mongen? (Salmo 102:12, 24, 27).

³ Jehová mu cüpai ti mongen ca quisu rumel mongelequei, feimu quimnieiñ taiñ eluafeteu rumel mongen (Sal. 36:9). Biblia pengeli Jehová rumel mülequei ca rumel müleai, femngechi feipi Salmo 90:2 ca Salmo 102 (papeltunge Salmo 102:12, 24, 27). Ti profeta Habacuc ca feipi: “Ahuem Jehová, eimi ¿afquentu mülequelaimi am? Ahuem tañi Chau Ngünechen, tati Lifngelu, eimi laquelaimi” (Hab. 1:12).

4. Cüme adümnoliyiñ ñi rumel mülequen Jehová, ¿huesa dungu tüfa?

⁴ ¿Cüdautuqueimi tami raquiduamal Jehová ñi rumel mülequen? (Is. 40:28). Fentren che ca felequei. Elihú ca feipi iñchiñ adümlayafuiñ tunteñma ñi mülequen Jehová (Job 36:26). Huelu adümnoliyiñ rume, tüfa feipilai ñi mülenon ta Chau Jehová. Raquiduamnge tüfa, iñchiñ quimnieiñ ñi mülen señal de celular cüme adümnoliyiñ rume chumngechi ñi funcionaquen. Ca femngechi cüme adümlayafuiñ Jehová ñi rumel mülequen, ¿huelu feipiafuiñ ñi rüfngenon tüfa? Femlai. Jehová rumel mülequei ca rumel müleai, adümnoliyiñ rume tañi alüpüralen (Rom. 11:33-36). Petu ñi deumangenon chem no rume, Chau Jehová deu mülequei. Jehová feipi ñi deumafiel tati mapu ca ñi mülen petu ñi mülenon callfü huenu (Jer. 51:15; Hech. 17:24). ¿Ca chumngechi quimafuiñ taiñ rumel mongeleal? Peafiyiñ.

DEUMANGEIÑ ÑI RUMEL MONGELEAL

5. ¿Chem maneluhun niefuingu Adán ca Eva?

⁵ Jehová deumafilu com dungu, pu che müten elufi tañi rumel mongeleal. Huelu Jehová feipifi ta Adán: “Iquefilnge ti anümca hulquelu ñi quimngeal ti cüme dungu ca ti huesa dungu. Iquefilnge tüyechi anümca ñi fün, fei ifilmi tati, rüf feingei tami layal” (Gén. 2:17). Adán ca Eva feyentufile ta Jehová, lalayafuingu. Feimu Jehová eluafeyu engu ñi iyafiel ti anümca hulquelu mongen ñi fün, femngechi cüme quimtucuafuingu ñi rumel mongeleal engu (Gén. 3:22).b

6, 7. 1) ¿Chem pengeli iñchiñ deumangelaiñ taiñ layal? 2) ¿Chem ayünieimi tami femal ayüfalngele mapu? (Pefinge ti adentun).

⁶ Jehová deumalaeiñmu taiñ mongeleal 70, 80 tripantu müten. Peaiñ ñi inaduamün pu cientifico taiñ müllo mu. Pu cientifico inaduamfingün taiñ müllo loncontucuafui fentren dungu. Tüfa trürümngeafui ñi pengelngeel television mu 300 tripantu mu. Tüfa afmatufali. Feimu Jehová deumafi taiñ müllo taiñ loncontucual doi fentren dungu taiñ quimürpuafel 70, 80 tripantu mu müten (Sal. 90:10).

⁷ Biblia ca feipi Chau Dios deumaeiñmu ‘taiñ ayünieal taiñ rumel mongeleal’ (Ecl. 3:11). Feimu tati lan dungu caiñe reque troquiquefiyiñ (1 Cor. 15:26). Raquiduamnge tüfa. Eimi cutrancülelmi, chumafuimi rume tami tremotual. Amuafuimi doctor tami lahuentuñmangeal, eimi ayülaimi tami layal. Cafei quiñe che taiñ piuqueyenieel lale, iñchiñ rume hueñancüafuiñ (Juan 11:32, 33). Feimu llemai chumngechi ngüneduampeiñ quimürpuafuiñ fentren dungu rumel mu, ca ayünieiñ ñi rumel mongeleal, femngechi deumaeiñmu Jehová, feimu quimnieiñ taiñ eluaeteu rumel mongen. ¿Ca chumngelu maneluhuafuiñ taiñ rumel mongeleal? Peaiñ Jehová ñi femquefel cuifi mu ca ñi femmequen famülque mu.

JEHOVÁ ÑI AYÜQUEEL CALETUQUELAI

8. ¿Chem quimeltueiñmu Isaías 55:11?

⁸ Adán engu Eva ñi culpan mu com iñchiñ laqueiñ, huelu Jehová cacünulai ñi raquiduam (papeltunge Isaías 55:11). Jehová ayüniei pu che ñi feyentunieteu ñi rumel mongeleal, ¿chumngechi quimiyiñ? Ngüneduamaiñ quiñeque dungu ñi feipin ca ñi femquen ta Jehová. Femngechi ñi huechurpual tañi ayünieel.

9. ¿Chem dungu feipicünui ta Jehová? (Daniel 12:2, 13).

⁹ Jehová feipicünui ñi huiñomongeltuafiel pu layelu ca ñi eluafiel rumel mongen (Hech. 24:15; Tito 1:1, 2). Job quimniequefui Jehová ayüniefui ñi mongeltuafiel pu layelu (Job 14:14, 15). Profeta Daniel quimniequefui pu layelu ñi huiñomongetual, fei ñi nietual rumel mongen (Sal. 37:29; papeltunge Daniel 12:2, 13). Jesús ñi antü mu, pu judio quimniequefui Jehová ñi eluafiel “rumel mongen” tañi pu che (Luc. 10:25; 18:18). Jesús fentrenque rupa feipi ñi huiñomongetual pu layelu. Jesús cafei lalu, huiñomongeltueyu ñi Chau (Mat. 19:29; 22:31, 32; Luc. 18:30; Juan 11:25).

10. Pu che ñi huiñomongetun cuifi, ¿chem quimeltueiñmu Jehová mu? (Pefinge ti adentun).

¹⁰ Jehová elueiñmu ta mongen, feimu laliyiñ rume ca huiñoleltuafeiñmu taiñ mongen. Jehová tati profeta Elías elufi nehuen ñi mongeltuafiel quiñe lantu domo ñi püñeñ (1 Rey. 17:21-23). Eliseo Jehová ca femngechi elueyu ta nehuen ñi mongeltuafiel quiñe domo ñi püñeñ mülelu Sunem mapu mu (2 Rey. 4:18-20, 34-37). Biblia ca feipi caquelu che ñi huiñomongetun. Com tüfa pengeli Jehová niei fütra nehuen ñi mongeltuafiel pu layelu. Cafei Jesús mülepalu mapu mu, Jehová ca elueyu nehuen ñi huiñomongeltuafiel pu layelu (Juan 11:23-25, 43, 44). Feula Jesús müleputui huenu mu, ca elfalcünulelngei “com ñi mülen ta huenu ca nag mapu mu”, feimu niei nehuen ñi huiñomongeltuafiel “com tati pu che mülelu rüngan eltun mu” ca ñi eluafiel rumel mongen (Mat. 28:18; Juan 5:25-29).

11. ¿Chumngelu am feipiafuiñ Jesús ñi lan eluaiñmu rumel mongen?

¹¹ ¿Chumngelu am Jehová eluñmafi ñi layal ñi fotüm cutrancahun mu? Jesús feipi: “Chau Ngünechen fente ñi piuqueyefiel mapu müleyechi pu che, hulcünui tañi quiñen Fotüm. Femngechi tuchi feyentule quisu meu, apümcangelayai. Huelu mai nieai rumel mongen” (Juan 3:16). Jehová huli tañi fotüm layal taiñ montulaeteu iñchiñ taiñ culpan mu, femngechi nierpuaiñ rumel mongen (Mat. 20:28). Apostol Pablo feipi tüfachi dungu: “Quiñe huentru mu müten tuhui ti lan dungu. Ca femngechi ti huiñomongetun tuhui quiñe huentru meu müten. Adán ñi duam meu com pu che laquei. Huelu Cristo ñi duam mu com pu che llohuai mongen” (1 Cor. 15:21, 22).

12. Jehová, ¿chumngechi fementuai tañi ayüqueel?

¹² Jesús quimeltufi tañi pu discipulo ñi llellipuafiel engün ta Jehová cüpape tami ngünenietual mapu, ca femngepe tami ayüqueel mapu mu (Mat. 6:9, 10). Jehová ayüniei rumel mongeleal pu che mapu meu. Feimu Jehová loncocünufi ta Jesús tañi Gobierno mu ca dullifi 144.000 pu che quiñentrür cüdahuaingün Jesús engün ñi huechutripayal Jehová ñi ayüqueel (Apoc. 5:9, 10).

13. ¿Chummequei am Jehová famülque mu? Ca, ¿chem mülei taiñ femal?

¹³ Famülque mu Jehová trahulniefi quiñe “fütra troquiñche”, petu pepicafi engün tañi ngünenieaeteu Chau Dios ñi Gobierno (Apoc. 7:9, 10; Sant. 2:8). Tüfachi mapu mu rume mülei üdehun ca quehuan, huelu feitachi fütra troquiñche coneltuquelai tüfachi dungu mu. Famentuquefingün tati üdehun ca chumngechi ñi feipin Biblia tañi fütraque cuchillo araungetui reque (Miq. 4:3). Feitachi troquiñche coneltuquelai quehuan dungu mu, huelu mai quimeltulelfi fentren che Chau Dios mu ca tañi ayüqueel mu. Femngechi ñi nierpual engün “tati rüfngechi mongen” (1 Tim. 6:19). Pu che coneltulelu feitachi troquiñche mu quelluntucufi Chau Dios ñi Gobierno, feimu tañi pu familia caiñetuafeyu engün. Ca quiñeque mu niequelafuingün chi plata, huelu Jehová eluniequeyu com tañi duamyenieel engün (Mat. 6:25, 30-33; Luc. 18:29, 30). Com tüfa pengeli Jehová ñi femtripamequen tañi ayüqueel, fei maneluhuafuiñ ñi femtripayal cüpalechi antü meu.

CÜPALEI CÜMEQUE DUNGU

14, 15. Jehová, ¿chumngechi apümcayafi tati lan dungu?

¹⁴ Jesús deu ngüneniei huenu Chau Dios ñi Gobierno mu. Quisu huechunentuai com ñi feipicünuel ta Jehová (2 Cor. 1:20). Feichi 1914 tripantu mu ca fantepu meu Jesús hueuquefi tañi pu caiñe (Sal. 110:1, 2). Pichin antü mu müten, Jesús ca pu 144.000 apümcayafingün mapu mu huesaque che (Apoc. 6:2).

¹⁵ Ngünenielu Jesús huaranca tripantu mu, com pu laquelu mongeltuafi. Cafei quelluafi tati com quim feyentulu fei tañi culpanchengehuenoal. Afle ti huaranca tripantu neicümngetuai ti Huecüfü, fei huelulcayafi pu che. Fei ti norngelu Jehová eluaeyu ti mapu “ñi ngen-ngeal engün, ca rumel müleaingün fei mu” (Sal. 37:10, 11, 29). Ca “apümcangeai ti quiñelehuechi caiñe, ti lan dungu” (1 Cor. 15:26). ¡Müna cüme dungu tüfa! ¿Felelai am?

16. ¿Chumngelu am püntütripaquelaiñ Jehová mu?

¹⁶ Chumngechi taiñ pefiel tati Biblia elueiñmu maneluhun taiñ rumel mongeleal. Tüfachi maneluhun quelluqueiñmu taiñ püntütripanoal Jehová mu rupaliyiñ rume huesaque dungu mu. Iñchiñ püntütripaquelaiñ Jehová ca Jesús mu re taiñ montulngenoal, doi mai fente taiñ piuqueyeniefiel (2 Cor. 5:14, 15). Feimu lle inayentuquefiyiñ Jehová ca Jesús ca nütramcaquefiyiñ pu che taiñ maneluhun mu (Rom. 10:13-15). Femliyiñ com tüfa, ayühuelafiyiñ ta Jehová, fei quisu hueniyeaiñmu (Heb. 13:16).

17. Quisuque iñchiñ, ¿chumaiñ am? (Mateo 7:13, 14).

¹⁷ ¿Com iñchiñ lloupeaiñ mai rumel mongen? Femngechi inayafiyiñ ti rüpü hulquelu rumel mongen (papeltunge Mateo 7:13, 14). Fei elungeliyiñ rumel mongen, ¿chumletuaiñ chi? Cangelu troquiñ mu peafiyiñ.