¿Eluucüleimi ñi femal tami feipingeel?

1. ¿Chumngelu am cüdaungei taiñ inayal taiñ feipingeel?

¿CÜDAUNGEI inayal tami feipingeel? Femngechi rupai David, feimu feipifi ta Jehová: “Quelluen tañi eluucüleal ñi inayal tami feipin” (Sal. 51:12). David piuqueyefilu rume ta Jehová, quiñeque mu cüdautuquefui ñi inayal tañi feipin. Iñchiñ ca cüdautuafuiñ ñi feyentual, ¿chumngelu cai? Hunelu mu, culpafe chengeiñ. Epu, Satanás ayüniei taiñ caiñetuafiel ta Chau Jehová, fei reque (2 Cor. 11:3). Cüla, iñchiñ hualloñmanieiñmeu feyentuquenochi che (Efes. 2:2). Tüfachi cüla dungu mu cüdautuafuiñ taiñ feyentual, feimu nehuentuqueaiñ taiñ inayal Chau Jehová ñi feipin ca ti pu che ñi elufiel autoridad.

2. Eluucüleliyiñ femal taiñ feipingeel, ¿chumaiñ? (Santiago 3:17).

² (Papeltunge Santiago 3:17). Santiago feipi tati quimche “eluucülequei ñi femal tañi feipingeel”, feimu ¿chumaiñ? Eluucüleaiñ taiñ feyentuafiel feichi pu che Jehová ñi elueteu autoridad. Huelu cuñiutucuhuaiñ. Quiñe che feipieliyiñmu taiñ femal chem ñi ayüquenoel ta Jehová, femlayaiñ (Hech. 4:18-20).

3. Chau Jehová, ¿chumngelu am falintuquefi taiñ inayal ñi feipin pu nielu autoridad?

³ Chau Jehová ñi ngülam norngei, feimu cüdautuquelaiñ taiñ inayafiel (Sal. 19:7). Pu che huelulcaquei, feimu cüdaungei ñi inangeal ñi ngülam. Femngele rume, Chau Jehová eluyefi autoridad tati pu chau, pu gobernante ca pu loncolelu (Prov. 6:20; 1 Tes. 5:12; 1 Ped. 2:13, 14). Taiñ feyentuafiel Jehová, duamfali taiñ inayal ñi feipin tüfachi pu che. Quiñeque mu, tañi huercüel engün cüdautuafuiñ taiñ inayafiel, huelu ¿chumafuiñ taiñ feyentuafiel engün? Peafiyiñ.

FEYENTUAFIMI TAMI PU CHAU

4. Fantepu meu, ¿chumngelu am pu hueche allcütuquelafi tañi pu chau?

⁴ Fantepu meu, fentren hueche allcütuquelafingün tañi pu chau (2 Tim. 3:1, 2). ¿Chumngelu chi cai? Quiñeque chau ngülamtuquefingün tañi pu yall ca püñeñ, huelu inaquelaingün quisu tañi ngülam. Feimu pu hueche pefiel mu ca dungu ñi femquen tañi pu chau, allcütuquelafingün. Caquelu hueche feipiquei: “Müna cuifi tuhun-ngei ñi ngülamtuel tañi pu chau, catrütuqueneu tañi ayüqueel” piqueingün. Eimi hueche, ¿ca femngechi raquiduamqueimi? Cüdaungeafui tami inayal tüfachi huercün dungu ñi feipin Jehová: “Feyentuqueafimün tamün chau ca tamün ñuque chumngechi ayüniei ta Ñidol. Tüfa ta norngei Chau Ngünechen ñi adquiñ meu” (Efes. 6:1). ¿Chem quelluafeimu tami inayal tüfachi huercün dungu? Peafiyiñ.

5. ¿Chumngelu am inayentufali ta Jesús? (Lucas 2:46-52).

⁵ Tami feyentuafiel tami pu chau, inayentufinge ta Jesús (1 Ped. 2:21-24). Jesús turpu culpalai, huelu tañi pu chau culpafengefuingu. Fei engu huelulcauquefui quiñeque mu, ca pepil-lafuingu ta Jesús. Femlu rume, Jesús yamquefeyu engu (Éx. 20:12). Inaduamnge ñi rupan Jesús nielu mari epu tripantu (papeltunge Lucas 2:46-52). Jesús ca tañi pu che amuingün Jerusalén huaria ñi conal ti fiesta Pascua mu. Aflu tati fiesta, fei petu huiñotulu tañi ruca mu engün, José engu María ngüneduamlaingu ñi mülenon ta Jesús. Fei engu mülefui ñi quimal cheu ñi miyahun tañi pichi huentru. Huelu petufilu, María culpatufi ta Jesús. ¿Chumngelu iñche ta culpatuen ñuque? feipilai ta Jesús, doi mai yamün mu cüme huiñoldungueyu engu. Huelu “José ca María quimlaingu ñi chem pieteu Jesús”. Femlu rume, huelu Jesús “amulefui ñi feyentuniefiel engu”.

6, 7. ¿Chem quelluafeyu tati pu hueche ñi feyentuafiel tañi pu chau?

⁶ Hueche, huelulcaule tami pu chau cam pepilnoelmu, cüdautuafuimi tami feyentuafiel. ¿Chem quelluafeimu? Hunelu mu, raquiduamnge chum duamquei Jehová. Biblia feipi feyentuafimi tami pu chau, “tüfachi dungu ayüquei ta Ñidol” (Col. 3:20). Jehová quimniei quiñeque mu tami pu chau entendelayaimu, ca feipiafeimu ñi femal tami ayüquenoel. Huelu femfule rume, feyentufilmi müten, ayühuai ta Chau Jehová.

⁷ Epu, raquiduamnge chum duamquei tami pu chau. Allcütufilmi, ayühuelafimi engu ca doi maneluhuai eimi mu (Prov. 23:22-25). Ca doi quiñeucüleaimün. Alexandre, quiñe peñi Bélgica mapu tuulu, feipi: “Feyentufilu tañi pu chau, doi cüme yeucüleiñ, fülmaucüleiñ ca doi ayüucüleiñ”.b Cüla, loncontucunge: feyentulmi feula, quelluaimu cüpalechi antü mu. Paulo, Brasil mapu tuulu, feipi: “Ñi feyentuniefiel mu tañi pu chau quelluqueneu ñi feyentunieafiel Jehová ca caquelu che nielu autoridad. Chau Dios ñi Dungu feipi feyentufilmi tami pu chau, “cüme mongen nieaimi ca alüntu müleaimi mapu mu” (Efes. 6:2, 3). Feimu fente falin-ngei tami feyentuafiel tami pu chau.

8. Ñi feipin quiñeque hueche, ¿chumngelu feyentuquefingün tañi pu chau?

⁸ Fentren huechequeche loncontucuingün ñi feyentuniefiel tañi pu chau cüme tripaqueingün. Peaiñ ñi rupan quiñe üllcha domo Luiza pingelu, Brasil mapu mu. Tañi pu chau, petu nielayaimi celular pieyu. Luiza ayülai tañi feipieteu tañi pu chau. Com hueche nieingün quiñe celular, ¿chumngelu am nielayafun iñche? piquefui. Luiza quimtucui tañi pu chau ñi ngülam catrütuquelaeyu, doi mai cuñiutucuqueyu. Ca peaiñ ñi rupan Elizabeth, 18 tripantu niei, Estados Unidos mapu mu mülei. Fei petu cüdautuquei tañi feyentuafiel tañi pu chau. ¿Chem quellueyu? Quisu feipi: “Quiñeque mu adümquelafiñ tañi huercün dungu ñi feipieteu tañi pu chau, huelu raquiduamquen chumngechi cuñiutucuqueneu inayal tañi feipin engu”. Ca peaiñ ñi rupan quiñe üllcha domo, Monica pingelu, Armenia mapu mu mülelu. Quisu feipi tañi feyentuniefiel tañi pu chau cüme tripaquei, feyentunofile cüme tripalayai.

INAYAFIYIÑ ÑI FEIPIN “PU AUTORIDAD”

9. Quiñeque ley ñi elcünuel pu gobierno, ¿chem raquiduamquei pu che?

⁹ Biblia nütramcai “pu autoridad taiñ ngünenieteu”, tüfa ti pu gobierno (Rom. 13:1). Quiñeque che inaquefi quiñeque ley ñi feipin ti gobierno, huelu caquelu ley dungu ayüquelafi, feimu inaquelafi. Por ejemplo, ti ley ñi cullial impuesto. Quiñe pais Europa mapu mu, fentren che raquiduamquei quiñeque impuesto ñi elcünuel ti gobierno cümelai ñi cullingeal. Feimu feichi pais mu pu che culliquelai com ti impuesto ñi elcünuel ti gobierno.

10. Müte ayünofiliyiñ rume pu gobierno ñi ley, ¿chumngelu am inaquefiyiñ?

¹⁰ Biblia feipi ti Huecüfü adniefi pu gobierno, feimu cutrancachequeingün. Huelu pichiñma mu, apümngeaingün (Sal. 110:5, 6; Ecl. 8:9; Luc. 4:5, 6). Femlu rume, iñchiñ mülei taiñ feyentuafiel, ¿chumngelu? Biblia feipi tati “caiñetufilu ti autoridad, caiñetuquefi Chau Ngünechen ñi elcünuel”. Chau Dios pichiñma mu elcünufi pu gobierno ñi ngünenieafiel pu che, femngechi ñi pofolcaunoal engün. Feimu mülei taiñ ‘eluafiel chem ñi llohual’ engün, tüfa tati impuesto, yamühun ca inayal tañi feipin engün (Rom. 13:1-7). Fei quiñeque ley ñi elcünuel ti gobierno cümelai, norngelai, rume fali ñi inangeal piafuiñ. Huelu Jehová feipieiñmu taiñ feyentuafiel pu gobierno, feimu feyentuafiyiñ müten. Huelu huercüngeliyiñ taiñ femal chem ñi ayüquenoel ta Jehová, femlayaiñ (Hech. 5:29).

11, 12. Ti lonco ülmen entulu quiñe ley, ¿chumingu José engu María? Ca, ¿chum tripai ñi femün engu? (Lucas 2:1-6; ca inaduamnge ti adentun).

¹¹ José engu María eluucülefui tañi inayal ñi feipin ti autoridad cüdaungefulu rume (papeltunge Lucas 2:1-6). Feichi mu, ti lonco ülmen Augusto pingelu entui quiñe ley. Feitachi ley feipi com che ñi ngünenieteu pu Roma che mülefui ñi huiñotual quisuque ñi huaria mu engün, femngechi ñi huirintucuñmangeal ñi üi. Feimu José engu María mülefui ñi amual Belén huaria mu, 150 kilometro camapulefui. Müna cüdaungefui ñi miyahual feichi rüpü püle. María ailla cüyen amulefui ñi niepüñeñcülen. Feimu ¿cüdautupelai ñi amual Belén huaria mu? Fei engu fill raquiduamcülefui tañi chumleal ta María ca tañi püñeñ. ¡Rüpü püle choyüngerumefule ti püñeñ nga! Feichi pichiche Mesías ngerquealu, feimu María rume falichi püñeñ tüfa, duamfal-lai tañi inayal ñi feipin ti gobierno piafui. Huelu ¿chumi?

¹² María epe choyünielu rume ñi püñeñ, feitachi curehuen inafi müten ñi feipin ti lonco ülmen. Jehová rume ayühui tañi femün mu engu ca cuñiutucueyu. Cüme puhuingu Belén huaria mu, fei María choyüfi ti pichiche. Cafei María tañi femün femtripai quiñe dungu ñi feipicünuel Biblia (Miq. 5:2).

13. Inafiliyiñ ti ley, ¿chumngechi quelluafuiñ taiñ pu peñi ca pu lamngen?

¹³ Inaliyiñ ñi feipin pu autoridad, quisutu cümelcauqueiñ ca quelluquefiyiñ caquelu. ¿Chumngelu feipiqueiñ? Hunelu mu, castigangelayaiñ taiñ inanofiel ti ley (Rom. 13:4). Inaliyiñ ñi feipin pu autoridad quimngeai pu testigo ñi cümeque chengen. Femngechi dungu rupai Nigeria mapu cuifi. Quiñe troquiñ soltau quintuyahulfui pu che culliquenolu impuesto. Fei conpuingün Trahunhue Ruca mu. Huelu ti loncolechi soltau feipieyu engün: “Tripatumün, pu testigo culliquei ti impuesto”. Feimu llemai, inaliyiñ ñi feipin ti autoridad, quelluntucuaiñ ñi cüme dungungeal pu testigo. Femngechi incayafiyiñ taiñ pu peñi ca pu lamngen (Mat. 5:16).

14. ¿Chumi quiñe lamngen tañi inanieafiel pu autoridad ñi feipin?

¹⁴ Cüdaungeafui taiñ inayal pu gobierno ñi feipin. Peafiyiñ ñi feipin Joanna, Estados Unidos mu mülelu. “Pu autoridad ñi duam mu tañi pu che rume cutrancahui, feimu cüdautuquefun tañi inanieafiel”. Joanna ngüneduami ñi cacünutual tañi raquiduam, ¿chumi? Fentecünui ñi peal redes sociales mu feichi mensaje dunguyequefilu pu autoridad (Prov. 20:3). Ca llellipufi Jehová ñi maneluhual quisu mu ca ñi maneluunoal pu gobierno ñi cüme elcünutual ti dungu (Sal. 9:9, 10). Cafei papeltui ñi chem pin Jehová ñi troquiñche chumngechi taiñ reyüconnoal politica dungu mu (Juan 17:16). Joanna tañi inaniefiel mu pu autoridad ñi feipin, tüngcületui ca ayüucületui.

INAYAIÑ ÑI FEIPIN JEHOVÁ ÑI TROQUIÑCHE

15. Quiñeque mu, ¿chumngelu am cüdautuafuiñ taiñ feyentuafiel Jehová ñi troquiñche?

¹⁵ Jehová feipi taiñ allcütuafiel feichi pu loncolelu taiñ adnieteu (Heb. 13:17). Taiñ Ñidol Jesús turpu culpaquelai, huelu pu loncolelu ñi elcünuel huelulcaqueingün. Feimu cüdaungeafui ñi inayal tañi feipin engün, doyelchi mai ayünoliyiñ taiñ feipieteu. Femngechi rupai ti apostol Pedro. Quiñe cüme püllü feipieyu ñi iyal quiñe culliñ ünufalngelu chumngechi feipi Moisés ñi ley, huelu Pedro ayülafui. Feimu cüla rupa “femlayan” pi (Hech. 10:9-16). Tañi feipieteu ti cüme püllü turpu femngechi femquelafui, feimu cümelu troquilafi. Pedro cüdautui ñi inayafiel quiñe cüme püllü, doyelchi mai cüdautuafuiñ iñchiñ inayafiel pu culpanche huentru ñi feipin.

16. ¿Chumi Pablo calefulu rume tañi feipingeel? (Hechos 21:23, 24, 26).

¹⁶ Ti apostol Pablo eluucülefui ñi inayal tañi feipingeel calefulu rume. Quiñeque cristiano judio allcüntucuingün ñi huesa dunguyengeel ta Pablo, respetaquelafi Moisés ñi ley pingei. Feipiquefi caquelu ñi inahuenoafiel (Hech. 21:21). Fei pu loncolelu Jerusalén huaria mu feipieyu ñi quimfalcünual tañi inaquefiel Moisés ñi ley. Feimu Pablo mülefui ñi yeal meli huentru Jehová ñi ruca mu ca fei mu ñi liftuhual, chumngechi feipi Moisés ñi ley. Pablo quimniefui feichi mu inangehuelai Moisés ñi ley, ca chem huesa femlafui rume. Huelu inafemi ñi feipieteu pu loncolelu. “Ca antü, Pablo yetufi tüfachi pu huentru, fei liftuhuingün chumngechi ñi feipiel Moisés ñi ley” (papeltunge Hechos 21:23, 24, 26). Pablo ñi feyentuquen quelluntucui ñi quiñeucüleal ti trahunche (Rom. 14:19, 21).

17. Stephanie ñi rupan, ¿chem quimeltueiñmu?

¹⁷ Peaiñ ñi rupan quiñe lamngen Stephanie pingelu. Fei ca tañi huentru ayüucülefuingu tañi mülen quiñe troquiñche ca quehun dungulu. Huelu Betel ruca feipi ñi mülehuenoal feiti troquiñche, fei huiñotuaimu ti trahunche quisu tamu quehun mu pingeingu. Huelu Stephanie cüdautui tañi inayal ñi feipingeel. Quisu feipi: “Hueñancülefun. Ti trahunche quisu tañi quehun mu duamnielai ta quellu” pi Stephanie. Femlu rume, inai tañi feipingeel. Ca feipi: “Rupachi antü mu, cümelu troquirpufiñ tañi feipin pu loncolelu mülelu Betel ruca mu. Trahunche mu, quiñeque lamngen cuñifallcüleingün reque, feimu yafültucufiyiñ engün ca familia reque troquirpufiyiñ. Quiñe lamngen amuldunguhuelafui, hue eluhui tañi amuldungutual, fei iñche chillcatulquefiñ Biblia. Feula iñche doi nien tiempo tañi estudiayal ti Biblia. Eluhun ñi femal chem rume tañi feipingeel, feimu tüngcülei tañi raquiduam”.

18. ¿Chumngelu cümei ñi inayal taiñ feipingeel?

¹⁸ Com iñchiñ quim feyenturpuafuiñ. “Jesús cutrancahun mu quim feyenturpui” (Heb. 5:8). Iñchiñ Jesús reque, ca quim feyenturpuafuiñ cüdaungechi dungu mu rupaliyiñ. Raquiduamaiñ ñi rupan hue conlu ti COVID-19. Amuhuelayaimün Trahunhue Ruca mu ca amuldunguhuelayaimün fill ruca püle pingeiñ. ¿Cüdautuimi tami femhuenoal? Huelu tami feyentufiel ñi feipin Jehová ñi troquiñche cuñiutucueimu. Ca quellufimi ñi quiñeucüleal ti trahunche ca ayühuelfimi ta Jehová. Fei tüfa quellueiñmu taiñ pepicaucüleal acule ti fütra cutrancahun. Inayaiñ chem taiñ feipingeel, fei montulaiñ taiñ mongen (Job 36:11).

19. ¿Chumngelu eluucüleimi ñi inayal tami feipingeel?

¹⁹ Inaliyiñ taiñ feipingeel, cüme tripaqueiñ. Iñchiñ feyentuquefiyiñ ta Chau Jehová fente ñi piuqueyeniefiel ca cüpa ayühuelquefiyiñ (1 Juan 5:3). Turpu pepi cullilayafiyiñ ta Chau Jehová com taiñ elueteu (Sal. 116:12). Huelu quiñe dungu femafuiñ: inayafiyiñ ñi feipin ta Jehová ca pu autoridadcülelu. Femngechi pengelaiñ taiñ quim chengen, fei ayühuelafiyiñ ta Chau Jehová (Prov. 27:11).