¿Chem quelluafeimu tami chillcatual fill semana?
¿CÜDAUTUPEIMI mai tami estudiayal Biblia fill semana? ¿Müte ayühuelquelaeimu tami papeltual Biblia? Com iñchiñ femngechi raquiduamiyiñ quiñeque mu. Raquiduamnge tüfa: eimi rumel müñetuqueimi fill antü. Tami femal, elantücünuaimi, huelu deu müñetulmi, doi cüme duamcüleaimi. Ca femngechi taiñ chillcatual Biblia, mülei taiñ elantücünual. Huelu femliyiñ, doi cüme duamcüleaiñ (Efes. 5:26). ¿Chem quelluafeiñmu?
Elantücünuaimi. Iñchiñ taiñ cristianongen, mülei taiñ quisuque chillcatual ta Biblia, tüfa ta rume falin dungu (Filip. 1:10). Tami ngoimanoal, huirintucuaimi quiñe papel mu chem antü ca chem hora estudiayaimi, fei elcünuaimi ti papel tami adquiñ mu. Cam tami celular mu elcünuafuimi quiñe alarma tami acordayaeteu pichi faltale tami chillcatual.
Raquiduamnge tunteñmayai tami chillcatun. Quiñeque doi alüñmayafui tañi estudiayal. Ca quiñeque doi pichin estudiayafui, huelu doi quiñeque rupa femafui. Eimi quimnieimi chumngechi doi cüme tripayafui tami chillcatun, feimu cüme adcünuafimi. Puule tami dullielchi horario, huelu müte eluucülenolmi tami estudiayal, mari minuto müten femafuimi. Pichiñmafule rume, alün dungu quimürpuafuimi. Fei fente tami ayühueleteu ti chillcatun, eluhuafuimi tami doi chillcatual (Filip. 2:13).
Raquiduamnge chem dungu chillcatuaimi. Acule ti antü, fei quimnolmi chem dungu tami chillcatual, ngünamcayafuimi tami tiempo (Efes. 5:16). Feimu raquiduamafuimi chem dungu ayüafuimi tami chillcatual, fei huirintucunge. Müte adümnofilmi quiñe dungu fei nielmi ramtun, huirintucuafimi. Cafei petu tami chillcatumequen tripale ca dungu tami cüme adümnofiel, huirintucuafuimi, fei ca antü chillcatuafuimi.
Duamfalngele, cacünutuafuimi quiñeque dungu. Rume falin-ngei tami chillcatunieafiel Biblia fill semana mu. Tami femal, quiñeque mu cacünutuafuimi chi ti antü, ti hora. Cafei cacünutuafuimi chem tami chillcatual ca tunteñma mu tami femal.
Fillque semana chillcatuliyiñ, doi fülconaiñ Jehová mu, quimchengerpuafuiñ ca yafüluucüleaiñ (Jos. 1:8).