11 Kuna laykutejj Jehová Diosaw Jacobur salvani,+
khitinakatï jupat sipans jukʼamp chʼamanïpki ukanakan amparapatwa salvani.+
12 Jupanakajj jutasaw Sion Qollu patjjan kusisiñat arnaqasipjjani,+
jupanakajj kʼajtapjjaniw Jehová Diosan munasiñapatsa,
granonakatsa, machaq vinotsa,+ aceitetsa,
ovejanakampin vacanakampin qallunakapatsa.+
Jupanakajj wali suma qarpat jardinar uñtasitäpjjaniwa,+
janipuniw mayampis jan chʼaman uñjasipkaniti”.+