57 Wali jaypʼöjjäna ukhajja, Arimatea markankir mä qamir jaqew jutäna, José sutini. Jupasti Jesusan discipulopäjjarakïnwa.+ 58 Uka jaqesti Pilaton ukar sarasaw Jesusan cuerpop mayïna.+ Pilatosti churanipjjam sasaw sarakïna.+ 59 Joseajj jiwat cuerpo apaqasajj suma linot lurat mä qʼoma telampiw llawuntäna.+ 60 Ukatjja jupan machaq sepulturaparuw+ imjjäna, qarqar* lurat sepulturaparu. Ukatjja mä jachʼa qalampi sepultur punkur nukkatasaw sarjjäna.

43 Arimatea markankir mä jaqew jutäna, José sutini. Jupasti Judionakan Jachʼa Tribunalapan* wali respetat jaqënwa, Diosan Reinopsa* suyarakïnwa. Jupajj jan ajjsartʼasaw Pilaton ukar sarasajj Jesusan cuerpop mayïna.+ 44 Ukampis Pilatojj Jesusajj jiwatäjjet janicha ukwa yatiñ munäna, ukatwa ejerciton oficialapar jawsayäna, jiwatäjjeti janicha sasaw jisktʼäna. 45 Jiwatäjjatap yatisasti, iyaw sasaw Pilatojj Josear jiwat cuerpo churjjäna. 46 Joseasti suma linot lurat mä tela aläna, ukampiw jiwat cuerpo apaqasajj llawuntäna. Ukatjja qarqar* lurat mä sepulturaruw imjjäna.+ Mä jachʼa qalampiw uka sepulturarojj punkut nukkatarakïna.+

38 Ukanak qhepatjja Arimatea markankir Joseaw Jesusan cuerpop apasjjañatak Pilator mayïna. Uka Joseajj Jesusan discipulopänwa, judionakar ajjsarañatwa jupar creyitap yaqhanakar jan arskänti.+ Pilatojj Jesusan cuerpop apjjañapatakiw permiso churäna, ukatwa Joseajj jutasin cuerpop apjjäna.+