Jeremías
24 Kunapachatï Babilonia markan Nabucodonosor* sat reyipajj Jehoiaquim+ chachan yoqapäki uka Judá markan Jeconías*+ sat reyiparojj principenakapampiru, artesanonakampiru, metalamp trabajirinakampir* Jerusalenat Babilonia markar preso katuntat apjjäna uka qhepatjja,+ Jehová Diosan templop nayräjjan uchat higonakan pä canastanakwa Jehová Diosajj uñachtʼayitäna. 2 Mä canastajj nayrïr poqtʼat wali suma higonakanïnwa, ukampis mä canastasti jan manqtʼañjam sinti jan wali higonakanirakïnwa.
3 Ukatsti Jehová Diosajj akham sasaw jisktʼitäna: “Jeremías, ¿kuns uñjta?” sasa. Uk satasti nayajj akham sarakiyätwa: “Nayajj higonak uñjta, suma higonakajj sumapuniwa, jan wali higonakajj sinti jan walipuniwa, sinti jan walïtapat janirakiw manqtʼañjamäkiti”+ sasa.
4 Ukatjja Jehová Diosajj akham sitänwa: 5 “Israelan naya Jehová Diosapajj akham sistwa: ‘Aka suma higonakar uñtasitaw nayajj Judá markat preso apatäpki ukanakarojj kunatï sumäki uk luräjja, khitinakarutï nayajj aka lugarat caldeonakan oraqepar apaykta ukanakaru. 6 Nayranakajajj kunatï jupanakatak sumäki uk lurañatakiw jupanakar uñchʼukini, aka oraqeruw jupanakar kuttʼayanirakëjja.+ Nayajj jupanakar saytʼayäwa, janiw tinkuykäti, jupanakarojj ayruntäwa,* janiw jikʼinukkäti.+ 7 Nayasti jupanakarojj nayar sum uñtʼañ munir chuym churäjja, ukhamat Jehová Diosätaj yatipjjañapataki.+ Jupanakajj markajäpjjaniwa, nayasti jupanakan Diosaparakïyäwa,+ kuna laykutejj taqe chuymaw nayar kuttʼanjjapjjani.+
8 ”’Ukampis sinti jan walïtapat jan manqtʼañjamäki uka jan wali higonakatjja,+ Jehová Diosajj akham siwa: “Judá markan Sedequías+ reyiparusa, principenakaparusa, aka oraqen jiltʼapki uka Jerusalén markankirinakarusa, khitinakatï Egipto oraqen jakapki ukanakarus ukhamarak uñjäjja.+ 9 Kunapachatï aka oraqenkir taqe reinonakajj* kunjamsa jupanakjjar mä jan waltʼäwi apanï uk uñjapjjani ukhajja,+ jupanakajj wali ajjsarkañaruw tukupjjani. Jaqenakajj jupanakar insultapjjaniwa, jan waltʼäwimp tʼaqesiyat jaqenakarjamaw uñjapjjani, kawkirutï jupanakar anatatkä uka lugaranakansti,+ jupanakat burlasipjjaniwa, maldisipjjarakiniwa.+ 10 Ukatsti jupanak contrajj espadampi,+ manqʼat awtjatäñampi, usumpi* apayäjja,+ jupanakampiru nayra awkinakapampir churkta uka oraqet jupanakar chhaqtaykä ukapachkama” sasa’”.