Jeremías
28 Uka pachpa maransti, kunapachatï Judá markan Sedequías+ reyipajj apnaqañ qalltaskäna uka pusïr marana, phesqëri phajjsinjja, Gabaón+ markankiri Azur chachan Hananías sat profeta yoqapaw sacerdotenakana ukhamarak taqpach marka nayraqatan Jehová Diosan utapan parlitäna, akham sasa: 2 “Israelan Diosapäki uka ejercitonakan Jehová Diosapajj akham siwa: ‘Nayajj Babilonia markan reyipan yukup pʼakjäjja.+ 3 Pä maratsti, kunanakatï Jehová Diosan utapan serviñatak wakiski taqe ukanakjja, aka lugararuw kuttʼayanjjäjja. Babilonia markan Nabucodonosor reyipaw ukanak aka lugarat apasajj Babiloniar apäna’+ sasa”. 4 “‘Ukatsti nayajj Jehoiaquim+ chachan yoqapäki Judá markan reyipäkaraki uka Jeconiasarojj+ aka lugararuw kuttʼayanjjäjja, Babilonia markar apatäpkäna taqe ukanakarus ukhamaraki’,+ siw Jehová Diosajja, ‘kuna laykutejj Babilonia markan reyipan yukup nayajj pʼakjäjja’”.
5 Ukatjja Jeremías profetajj Jehová Diosan utapan saytʼatäsipkäna uka sacerdotenakampin taqpach markampin nayraqatapanwa Hananías profetarojj parläna. 6 Jeremías profetajj akham sänwa: “¡Amén!* ¡Jehová Diosajj ukham lurpan! ¡Jumajj arskta uka profecía arunak Jehová Diosajj phoqpan, kunanakatï Jehová Diosan utapan serviñatak wakiski ukanaksa, preso katuntat apatäpkäna taqe uka jaqenakarus Babilonia markat kuttʼayanjjarakpan! 7 Ukampis mirä amp suma, kuntï nayajj juman istʼkatas taqpach markan istʼkatas parlkta uk istʼam. 8 Nayat nayra utjapkäna jumat nayra utjapkäna uka nayra profetanakajja, walja markanakatakisa jachʼa reinonakatakisa* guerranakjjata, jan waltʼäwinakata, usunakatwa* profecianakapan arsupjjerïna. 9 Mä profetatï sumankañjjat parlir profecía arunak arsuspa, ukatsti uka profetan arupajj phoqasirakispa ukhajja, uka profetajj cheqpachapun Jehová Diosan khitanitätapaw yatisirakispa” sasa.
10 Uk satasti Hananías profetajj Jeremías profetan kunkapankkäna uka yuku apaqasaw pʼakjäna.+ 11 Ukatjja Hananías profetajj taqpach marka nayraqatanwa akham säna: “Jehová Diosajj akham siwa: ‘Akat pä mararojj Babilonia markan Nabucodonosor reyipajj taqe markanakan kunkanakapjjar uchki uka yukjja, uka pachparak pʼakjäjja’+ sasa.” Ukatsti Jeremías profetajj thakip sarjjäna.
12 Hananías profetajj Jeremías profetan kunkapankir yuku pʼakjäna uka qhepatjja, Jehová Diosajj akham sasaw Jeremiasar säna: 13 “Jumajj Hananiasan ukar sarasajj akham sasaw jupar säta: ‘Jehová Diosajj akham siwa: “Jumajj lawat lurat mä yuku pʼakjtajja,+ jichhasti uka lantejj hierrotwa yaqha yuku luräta” sasa. 14 Kuna laykutejj Israelan Diosapäki uka ejercitonakan Jehová Diosapajj akham siwa: “Taqe aka markanakan kunkaparojj hierrot lurat mä yuku uchäjja, ukhamat Babiloniankir Nabucodonosor reyir servipjjañapataki, jupanakasti juparuw servipjjarakini.+ Salvaje animalanakamppach jupar katuyäjja”+ sasa’”.
15 Ukatsti Jeremías profetajj akham sasaw Hananías+ profetar säna: “¡Hananías, mirä amp suma, istʼam! Jehová Diosajj janiw jumar khitanktamti, ukampirus kunatï kʼarïki ukaruw aka markar confiyasiytajja.+ 16 Jehová Diosasti akham siwa: ‘Jumarojj aka oraqet chhaqtayämawa. Jichha maraw jumajj jiwäta, naya Jehová Dios contra saytʼasipjjañapatak aka markar parlatam layku’+ sasa”.
17 Hananías profetasti uka maraw jiwjjäna, paqallqöri phajjsina.