Nehemías
1 Aka arunakajj Hacalías chachan Nehemías*+ yoqapan arunakapawa. Kunapachatï kislev* phajjsïkäna, reyis* 20 maranak apnaqaskarakïna ukhajja, nayajj Susa*+ markan utjki uka castillonkaskayätwa.* 2 Uka tiemponsti nayan jilanakajat Hananí+ jilajaw yaqha chachanakamp chik Judá markat purinipjjäna, ukatjja jupanakarojj preso apatäsin+ kuttʼjjapjjäna uka jiltʼir judionakampita Jerusalén markampitwa jisktʼasta. 3 Jupanakajj akham sapjjänwa: “Preso apatäsin kuttʼapki, jichhajj Judá provincian jakasipkaraki uka jaqenakajja, jan waltʼäwinakana jiskʼachata ukhamaw uñjasipjje.+ Jerusalén markan murallanakapajj qʼala tukjatawa,+ punkunakapsa phichantapjjarakiwa”+ sasa.
4 Uka arunak istʼasasti qontʼasisaw wal jacharakta. Walja urunakaw wali llakitapun uñjasta, ayunaraktwa,+ alajjpachankir Dios nayraqatansa mayisiraktwa. 5 Nayajj akham sistwa: “Alajjpachankir Jehová Dios Tata, jumajj jachʼa musparkañ Diosätawa. Khitinakatï jumar munasipktam mandamientonakamsa phoqapkaraki ukanakarojj munasiñat jan jaytjasirïtamwa uñachtʼaytajja, pacto luratamsa phoqaraktawa.+ 6 Mirä amp suma, jiñchunakamampejj istʼanikitaya, nayranakamampejj uñtanikitaya,* naya servirimajj jichhürun jumar maytʼasinksma ukarojj jaysanikitaya. Uruy arumaw+ nayajj juman israelita servirinakam laykojj oración luransma, Israel markajj juma contra juchanak lurki ukanaksa arsuraktwa. Nayasa awkijan familiapas juchachasipjjtwa.+ 7 Moisés servirimar churkayäta uka mandamientonaka,+ leyinaka, kunanaktï jumajj Juezjamajj amtkta ukanak jan phoqasajja, nanakajj cheqpachapuniw juma contrajj jan walinak lurapjjta.+
8 ”Mirä amp suma, kuntï Moisés servirimarojj siskayäta uka arunakat amtasikimaya, juparojj akham sayätawa: ‘Jumanakatï nayar apanukupjjetätajja, nayajj markanak taypiruw ananukupjjäma.+ 9 Ukampis jumanakatï nayan ukar kuttʼanjjapjjäta, mandamientonakajsa phoqapjjarakïta ukhajja, oraq tukuskam ananukutas uñjasipkchïtajj uka cheqatpachwa tantachtʼapjjäma,+ sutij jachʼañchañatak ajlliskta uka lugararuw kuttʼayanjjapjjarakïma’+ sasa. 10 Jupanakajj juman servirinakamawa, juman markamarakiwa. Jumaw jachʼa chʼamamampi chʼamani amparamampi jupanakar salvtajja.+ 11 Jehová Dios Tata, mirä amp suma, naya serviriman oracionajsa juman sutim taqe chuym ajjsarapki uka servirinakaman oracionapsa amuyumpiy istʼam. Mirä amp suma, jichhürojj naya servirimatakejj taqe kunas sumarukiy sarpan, reyis nayat khuyaptʼayasikitpanaya”+ sasa.
Ukapachasti nayajj reyin coperopäyätwa.+