1 Crónicas
26 Porteronakajj grup grupow+ akham jaljatäpjjäna: coreitanakatjja, Meselemías,+ jupajj Asaf chachan wawanakapat Coré chachan yoqapänwa. 2 Meselemías chachajj yoqanakanïnwa: jilïr yoqapajj Zacarías chachänwa, payïristi Jediael, kimsïristi Zebadías, pusïristi Jatniel, 3 phesqëristi Elam, sojjtïristi Jehohanán, paqallqöristi Elieho-Enái. 4 Obed-Edom chachajj yoqanakanïnwa: jilïr yoqapajj Semaya chachänwa, payïristi Jehozabad, kimsïristi Joá, pusïristi Sacar, phesqëristi Netanel, 5 sojjtïristi Amiel, paqallqöristi Isacar, kimsaqallqöristi Peuletái. Diosaw Obed-Edom chacharojj uka wawanakamp bendisïna.
6 Semaya sat yoqapajj yoqanakanirakïnwa, jupatak nasir yoqanakapajj confiykañ chʼamani chachanakäpjjänwa, jupanakarakiw familianakap pʼeqtʼapjjäna. 7 Semaya chachan yoqanakapajj Otní, Refael, Obed, Elzabad ukanakänwa; Elzabad chachan familiaranakapajj Elihú chachampi Semakías chachampïnwa, jupanakasti confiykañ chachanakäpjjarakïnwa. 8 Taqe jupanakaw Obed-Edom chachan yoqanakapänjja; jupanakasa, yoqanakapasa, jilanakapas confiykañ chachanakäpjjänwa, serviñatakis wakichtʼatäpjjarakïnwa. Obed-Edom chachat familiapatsti 62 ukhanïpjjänwa. 9 Meselemías+ chachajj yoqanakanïnwa, jilanakanirakïnwa, confiykañ 18 chachanakäpjjänwa. 10 Merarí chachan yoqanakapatjja, Hosá sat chachajj yoqanakanïnwa. Simrí chachaw pʼeqtʼirïnjja, jupajj janis jilïr wawäkchïnjja, tatapajj juparuw familia pʼeqtʼañapatak uttʼayäna, 11 payïristi Hilquías, kimsïristi Tebalías, pusïristi Zacarías. Hosá chachan yoqanakapasa jilanakapas taqpachanejj tunka kimsanïpjjänwa.
12 Grup grupo jaljatäpkäna uka porteronakatjja, pʼeqtʼirinakajj jilanakapjam lurañanakanïpjjarakïnwa, jupanakajj Jehová Diosan utapanwa servipjjäna. 13 Jupanakajj suertenak willtapjjäna,+ jiskʼa familianakasa jachʼa familianakas mä igualakiw sapa mä punkutak suertenak willtapjjäna. 14 Selemías chachatak suertenak willtapjjäna ukhajja, inti jalsu toqenkir punkuw juparojj waktʼäna. Ukatsti Zacarías yoqapatakiw suertenak willtapjjarakïna, juparojj alay toqenkkäna* uka punkuw waktʼäna, jupajj wali yatiñani amuytʼayiri chachänwa. 15 Aynach toqenkkäna* uka punkusti Obed-Edom chacharuw waktʼarakïna, yoqanakaparojj+ imañ utanak uñjapjjañapatakiw uchapjjäna. 16 Inti jalant toqenkkäna uka punkusti Supim chachampiru Hosá+ chachampiruw waktʼäna, uka punkojj Saléket Punku jakʼankänwa, alayar makatki uka thaki jakʼankarakïnwa, mä grupo guardiajj mayni grupo guardia ladonkänwa. 17 Inti jalsu toqensti sojjta levitanakaw utjäna; alay toqensti* sapürojj pusiniw ukankapjjäna; aynach toqensti* sapürojj pusiniraki; imañ utanak uñjañatakisti+ pä guardianakaw utjäna, jupanakajj yaqha pä guardia ladon saytʼatäpjjarakïnwa. 18 Inti jalanta toqenkkäna uka pórtico* sat mantañ cheqanjja, pusiniw thaki jakʼan utjäna,+ pórtico sat mantañ cheqansti paniniw utjarakïna. 19 Coreitanakampin meraritanakampin yoqanakapatjja, porteronakajj ukham grup grupo jaljatäpjjänwa.
20 Mayni levitanakatjja, Ahíya sat chachaw cheqpach Diosan utapankir wali valoraninak imañ cheqanakampita ukhamarak kunanakatï sagrador tukuyatäki* uka wali valoraninak imañ cheqanakampit encargatäna.+ 21 Guersonitanakan familiapat jutiri Ladán chachan yoqanakapatjja, Jehielí+ chachaw ukankäna. Jupaw Ladán chachan familia pʼeqtʼirinakapat maynïrïnjja. 22 Jehielí chachan yoqanakapäkäna uka Zetam chachas Joel sat jilapas ukankarakïnwa. Jupanakaw Jehová Diosan utapankir wali valoraninak imañ cheqanakat encargatäpjjäna.+ 23 Amramitanakatsa, izharitanakatsa, hebronitanakatsa, uzielitanakatsa,+ 24 Guersom chachan yoqapäkäna Moisés chachan allchhipäkarakïna uka Sebuel chachaw imañ utanakat encargasiñan pʼeqtʼäna. 25 Khitinakatejj Eliezer+ chachat jutirïpkäna uka jilanakapajja, Rehabías,+ Jesayá, Joram, Zicrí, Selomot ukanakänwa. 26 Selomot chachasa jilanakapasa kunanakatï sagrador tukuyatäkäna uka wali valoraninak imañ taqe cheqanakat encargatäpjjänwa.+ David reyimpi,+ familianakan pʼeqtʼirinakapampi,+ 1.000 chachanakampiru 100 chachanakampir pʼeqtʼirinakampi ukhamarak ejerciton pʼeqtʼirinakapampiw taqe ukanak sagrador tukuyapjjäna. 27 Kunanaktï guerranakan+ nuwasisajj aparanipkäna+ ukanakatjja, Jehová Diosan utap askichañatakiw mä qhawqhanak sagrador tukuyapjjäna. 28 Taqe kunanaktï visionanak amuytʼiri Samuel+ chachasa, Quis chachan Saúl yoqapasa, Ner chachan Abner+ yoqapasa, Zeruyá+ warmin Joab+ yoqapasa sagrador tukuyapkäna ukanakats encargatäpjjarakïnwa. Taqe kunanaktï maynejj sagrador tukuykäna ukanakjja, Selomit* chachampi jilanakapampiw uñjapjjäna.
29 Izharitanakatjja,+ Kenanías chachampi yoqanakapampejj kunanakatï Diosan utap anqäjjan luraskäna uka lurañanakanwa pʼeqtʼirinakat juezanakat+ Israelan servipjjäna.
30 Hebronitanakatjja,+ Hasabías chachampi jilanakapampejj confiykañ 1.700 chachanakäpjjänwa. Jupanakaw Jordán jawirat inti jalanta toqen Israel markat encargatäpjjäna, kuna trabajonakatï Jehová Diosan utapan serviñatakisa reyir serviñatakis wakiskäna ukanakwa uñjapjjäna. 31 Hebrón chachan familiapat jutirinakatjja, Jeriya+ chachaw pʼeqtʼirïnjja. Kunapachatï David reyejj 40 maranak reyit apnaqaskäna+ ukhajja, jupanak taypit thaqtasajj confiykañ wali chʼamani chachanakwa Galaad toqenkir Jazer+ markan jikjjatapjjäna. 32 Jilanakapasti confiykañ 2.700 chachanakäpjjänwa, familianakap pʼeqtʼirïpjjarakïnwa. David reyisti rubenitanakampiru, gaditanakampiru, manasitanakan chikat tribupampir pʼeqtʼapjjañapatakiw jupanakar uttʼayäna, ukhamat cheqpach Diosampin reyimpin taqe lurañanakap uñjapjjañapataki.