Job
27 Job chachajj akham sasaw arsuskakïna:
2 “¡Kunjamtï Diosajj cheqpachapun jakkir Diosäkejja, jupajj janiw nayarojj cheqaparjam uñjkituti,+
kunjamtï Taqe Chʼamani Diosajj cheqpachapun jakkir Diosäkejja, jupaw nayarojj llakisiyitu.+
3 Nayan samsuñajkamasa,
Diosan samanapajj naya manqhankañapkamasa,+
4 lakajajj janiw kunatï jan cheqapäki ukanak arskaniti,
lajjrajas janirakiw engañonak parlkaniti!
5 ¡Janipuniw kunapachas razonanïpjjtawa sasin siskäti!
¡Jiwañajkamajj janipuniw Diosar taqpach chuymamp serviñ apanukkäti!+
6 Nayan cheqap jaqëtaj arsukipunïwa, cheqaparjamaw sarnaqaskakëjja.+
Nayan jiwañajkamajj* janirakiw chuymajajj juchañchkitaniti.
7 Enemigojajj jan wali jaqjam tukuspan,
naya contra saytʼirinakas jan cheqapar sarnaqerinakjam tukusirakpan.
9 Kunapachatï wali llakisiñankkani ukhajja,
¿Diosajj jupan wal arnaqasitap istʼaniti?+
10 Jan ukajj ¿Taqe Chʼamani Diosar adorasach* kusisini?
¿Taqe horasanti jupajj Diosat ruwtʼasini?
11 Nayaw jumanakarojj Diosan chʼamapat* yatichapjjäma.
Janiw kunsa Taqe Chʼamani Diosat imtʼapkämati.
12 Taqe jumanakatï visionanak uñjapjjstajja,
¿kunatsa arsutanakamajj jan kunatak servir arunakakejja?
13 Diosajj akwa jan wali jaqetakejj wakichi,+
tʼaqesiyir jaqenakaw Taqe Chʼamani Diosat uka herencia katoqapjje.
14 Wawanakapajj waljäpkchinisa, espadampi jiwayatäpjjaniwa,+
jupat jutir wawanakapajj jukʼa manqʼanikïpjjaniwa.
15 Jiltʼir wawanakaparojj mä jiwayir usuw imtʼjjani,
viudanakapas janirakiw jupanakatjam jachapkaniti.
16 Jupajj walja qollqe metalanaksa laqʼa montonanakjam montontʼaskpan,
ñeqʼëkaspas ukhamsa suma isinak imkataskpan,
17 jupas uk apthapiskpan,
cheqap jaqew uk isisini,+
jan juchani jaqenakaw taqpach qollqe metalanakap jaljasipjjani.
18 Jupan lurat utasti, thuthan tapapjam tukusirikiwa,
mä vigilirejj saytʼayki uka carpar+ uñtasitakiwa.
19 Jupajj qamirïkasaw ikintani, ukampis janiw kuns apthapkaniti.
Nayranakap jistʼarani ukhajja, janiw kunas ukan utjkaniti.
20 Wal ajjsarañaw juparojj walja umanakjam mä akatjamat katjani.
Arumarusti mä jachʼa thayaw apasjjarakini.+
21 Inti jalsu toqet jutir mä thayaw juparojj apasjjani, jupajj janiw utj-jjaniti,
kawkjantï jupajj jakki uka lugarapatwa pichanukuni.+