Jeremías
20 Kunapachatï Jeremiasajj taqe uka profecianak arsuskäna ukhajja, sacerdotëkäna, Jehová Diosan utapan uñjirinakat jilïrïkäna, Imer chachan yoqapäkarakïna uka Pasjur chachaw istʼaskäna. 2 Ukatsti Pasjur chachajj Jeremiasaruw nuwantäna, juparusti Benjaminan Alto Punkupan utjkäna uka ceporuw* ucharakïna,+ ukajj Jehová Diosan utapankänwa. 3 Qhepürusti Pasjur chachajj Jeremiasar cepot apsjjäna ukhajja, Jeremiasajj akham sasaw jupar säna:
“Jehová Diosasti Pasjur suti lantejj Magormisabib* sutimpiw uchtamjja.+ 4 Kuna laykutejj Jehová Diosajj akham siwa: ‘Juma pachpatakisa taqe amigonakamatakis ajjsarañaruw tukuyäma. Jupanakajj enemigonakapan espadapamp tukjatäpjjaniwa, nayranakamaw uk uñjarakini.+ Nayaw taqe Judá markarojj Babilonia markan reyipan amparapar katuyäjja, jupaw jumanakarojj Babilonia markar katuntat apasjjapjjätam, espadampiw jiwarayapjjarakïtam.+ 5 Ukatsti aka markan taqe wali valoraninakapsa, taqe utjirinakapsa, taqe kunanakatï sumäki ukanaksa, Judá markan reyinakapan wali valoraninakapsa enemigonakapan amparaparuw churäjja.+ Jupanakaw taqe ukanak saqueyjapjjani, katuntasipjjani, Babilonia markaruw ukanak apasjjapjjarakini.+ 6 Juma Pasjur chachasa utaman taqe jakirinakas yaqha markar preso apataw uñjasipjjäta. Jumasti Babiloniaruw saräta, ukanwa jiwäta, ukanwa taqe amigonakamamp chik imtʼjjapjjarakïtam, kʼari profecianak arsutam layku’+ sasa”.
7 Jehová Dios Tata, nayajj yaqha amuyunïkchiyätsa, jumaw iyawsayistajja.
Jumajj nayat sipans jukʼamp chʼamanïtam uñachtʼaytajja, atipjarakistawa.+
Jichhasti jurnälpachaw nayat larusipjjetu,
taqeniw burlasipjjetu.+
8 Arunakamat sapa kuti parlkta ukhajja, nayajj jachʼat arnaqasiñajawa, akham sasin yatiyañajarakiwa:
“¡Nuwasiñampi tukjañampi!” sasa.
Jehová Diosan arunakap laykuw nayajj insultat uñjasta, jurnälpachaw nayat burlasipjje.+
9 Ukatwa nayajj akham sista: “Nayajj janiw jupat parljjäti,
janipuniw sutipjjarojj jukʼamp parljjäti”+ sasa.
Ukampis chuymajanjja, arunakapajj chʼakhaj manqhankir mä nakhir ninjamänwa.
Nayajj amukïñat qaritäjjayätwa,
janipuniw amuktʼirjamäjjayätti.+
10 Jaqenakarojj jan walinak parlirwa nayajj istʼta,
wal sustjasiñaw nayar muyuntitäna.+
Jupanakajj akham sapjjewa: “¡Jupar juchañchapjjam! ¡Juchañchapjjañäni!” sasa.
Khitinakatï nayamp sumankkaspas ukham tukupki ukanakajja, nayan jan wal lurañaj suyasipkäna:+
“Inas jupajj jan amuytʼasis pantjaschini,
jiwasanakajj atipjasaw jupat vengasiraksna” sasa.
11 Ukampis Jehová Diosaw guerran nuwasiri mä ajjsarkañ chachar uñtasit nayampïskäna.+
Ukatwa nayar arknaqerinakajj lanktʼasipjjani, janirakiw atipjapkaniti.+
Jupanakajj wali phenqʼachataw uñjasipjjani, kunanaktï lurapkani ukajj janiw sumar sarkaniti.
Wiñayatakiw jupanakajj jiskʼachat uñjasipjjani, janipuniw ukajj armatäkaniti.+
12 Ukampis Tatay, ejercitonakan Jehová Diosapa, jumaw cheqap jaqerojj uñakipasktajja.
Jumaw amuyunaksa* chuymsa uñanttajja.+
13 ¡Jehová Diosar cantapjjam! ¡Jehová Diosar jachʼañchapjjam!
Jupaw pobre jaqenakarojj jan walinak lurir jaqenakan amparapat salvi.
14 ¡Naskta uka urojj maldisitäpan!
¡Mamajajj wawachaskitäna uka urojj janirak bendisitäkpanti!+
15 Tatajar suma yatiyäwinak yatiyir jaqejj maldisitäpan, jupasti sänwa:
“¡Mä yoqall wawaw nasiraptam, mä yoqall wawawa!” sasa.
Ukhamatwa tatajar wal kusisiyäna.
16 Uka jaqejj Jehová Diosajj jan sinttʼasis tukjki uka markanakjamäpan.
Alwanjja jupajj arnaqasiñanak istʼpan, chika ururusti guerran nuwasiñatak mä señal istʼarakpan.
17 ¿Kunatsa jupajj matrizankkayäta ukhajj nayar jan jiwaykitu?
Mamajan matrizapajj mä sepulturar uñtasitäspänwa,
mamajajj wiñayatakiw usur jaqëskasapäna.+
18 ¿Kunatsa nayajj mamajan matrizapat mistpachäta,
ukhamat tʼaqesiñampi llakisiñampi uñjañataki,
urunakajs wali phenqʼachat tukuyañajataki?+