Jueces
7 Ukatjja Jerubaal sat Gedeón+ chachampi taqe soldadonakapampejj wali alwat purisaw Harod cheqan uma jalsup jakʼan campamento saytʼayapjjäna, madianitanakan campamentopajj Gedeón chachan campamentopat alay toqenkänwa,* valle pampankir Moré sat jiskʼa qollu jakʼana. 2 Jehová Diosajj akham sasaw Gedeón chachar säna: “Madianitanakaru jumanakan amparamaru katuyañatakejj walja soldadonakanïtawa.+ Israelitanakajj akham sasaw jupanak pachpa jachʼañchasisajj sapjjetaspa: ‘Nayajj pachpa amparajampiw salvasta’+ sasa. 3 Mirä amp suma, jichhajj soldadonak nayraqatanwa akham sañama: ‘Kawkïritejj ajjsarañat khatatiskchi ukajja, utapar kuttʼjjpan’+ sasa”. Ukatwa Gedeón chachajj jupanakar yantʼäna. Ukhamatwa 22.000 soldadonakajj utanakapar kuttʼjjapjjäna, 10.000 soldadonakakiw jiltʼapjjäna.
4 Ukampis Jehová Diosajj Gedeonar akham saskakïnwa: “Soldadonakajj waljanïskakiwa. Jupanakarojj umäkis ukjar sarapjjañapatak mayim, ukanwa nayajj jupanakar yantʼäjja. Kunapachatï ‘jupaw jumamp chik sarani’ säma ukhajja, jupaw jumamp chik sarani, ukampis ‘janiw jupajj jumamp chik sarkaniti’ säma ukhajja, jupajj janiw jumamp chik sarkaniti” sasa. 5 Ukatwa jupajj soldadonak umar irpäna.
Ukatjja Jehová Diosajj akham sasaw Gedeonar säna: “Kawkïrinakatejj jawirat um phojjttasin umtʼapkani ukanakjja, mä lador ucham, kawkïrinakatejj uma umtʼañatak qonqortʼasipkani ukanakjja, yaqha lador ucharakim” sasa. 6 Kawkïrinakatejj um phojjttasin amparapat umtʼapkäna ukanakajja, 300 chachanakänwa. Ukat uksarojj qonqortʼasisaw umtʼapjjäna.
7 Jehová Diosajj akham sasaw Gedeonar sarakïna: “Kawkïrinakatejj amparapat umtʼapki uka 300 chachanakampiw salvapjjäma, madianitanakarojj amparamaruw katuyäma.+ Mayni soldadonakarojj utanakapar khitjjam” sasa. 8 Mayni soldadonakajj 300 chachanakar manqʼañanakapsa pututunakapsa churjjapjjäna uka qhepatjja, Gedeonajj mayni israelita soldadonakarojj utanakaparuw khitjjäna, 300 chachanakak jiltʼayäna. Madianitanakan campamentopasti jupat jukʼamp aynachankänwa, valle pampana.+
9 Uka arumasti akham sasaw Jehová Diosajj Gedeón chachar säna: “Sartasim, uka campamento tukjanim, juman amparamaruw katuysma.+ 10 Ukampis jumatejj tukjañ ajjsarstajja, Purá sat servirimamp uka campamentor saraqam. 11 Kunsa jupanakajj sapjje uk istʼäta, ukatjja uka campamento tukjañ janiw ajjsarjjätati”* sasa. Uk satasti Gedeonajj enemigon campamentop jakʼakamaw Purá sat serviripamp saraqäna.
12 Madianitanakasa, amalequitanakasa, inti jalsu toqenkir jaqenakasa+ langostanakar* uñtataw valle pampa phoqantapjjäna, camellonakapajj jan jaktʼkañänwa,+ lamar qota lakankir chʼallar uñtat waljanïpjjarakïnwa. 13 Gedeonajj purïna ukhajja, mä soldadow soldado masipar samkap cuentaskäna, akham sasa: “Nayajj akham samkasta. Cebadat lurata mä moroqʼo tʼantʼaw Madián oraqenkir campamentor muyukam purini. Mä carpar jaltʼasasti, wali chʼamampi puritap laykojj uka carpar tinkuyänwa.+ Cheqas uka tʼantʼajj carpar jaqokipänwa, uka carpajj mayak jaqotattarakïna” sasa. 14 Uk satasti soldado masipajj akham sasaw sarakïna: “Ukajj Joás chachan Gedeón+ yoqapan espadapampi sasiwa, jupajj Israel markankiriwa. Diosaw Madián oraqsa campamentopsa Gedeón chachan amparapar katuyani”+ sasa.
15 Samkampi ukhamarak kun sañsa ukajj muni uk istʼasajja,+ Gedeonajj jankʼakiw altʼasisin Diosar adoräna.* Ukatjja israelitanakan campamentopar kuttʼasajj akham sänwa: “Sartasipjjam, Jehová Diosajj amparanakamaruw madianitanakan campamentop katuyapjjtam” sasa. 16 Ukatsti 300 chachanakarojj kimsa gruponakaruw jaljäna, taqeniruw pututunakampi+ chʼusa jachʼa wakullanakampi churäna, uka wakullanakajj antorchanakan uchatarakïnwa. 17 Ukatjja jupanakarojj sarakïnwa: “Sum uñjapjjeta, kunjamtï nayajj lurkäjja, ukhampun jumanakajj lurapjjam. Campamento jakʼaru purkä ukhajja, jumanakajj kunjamtï nayajj lurkä ukham lurapjjañamawa. 18 Kunapachatï nayasa nayamp chika saririnakas pututu phustʼapjjani ukhajja, jumanakajj campamentor muyuntataw pututunakam phustʼapjjañama, akham sasaw artʼasipjjañamaraki: ‘¡Nuwasiñajj Jehová Diosankiwa, Gedeonankarakiwa!’ sasa”.
19 Chika arumaru guardia lurañajj qalltjjänwa,* guardianakas niyaw lugaranakapankjjapjjäna, ukhamaruw Gedeonampi jupamp chik sariri 100 chachanakampejj campamento jakʼar puripjjäna. Jupanakajj pututu phustʼasipjjäna,+ amparanakapankkäna uka jachʼa uma wakullanaksa pʼakirapjjarakïnwa.+ 20 Ukatwa kimsa gruponakar jaljat soldadonakajj pututu phustʼapjjäna, jachʼa wakullanaksa pʼakirapjjarakïnwa. Jupanakajj chʼeqa amparampiw antorchanak katjjarupjjäna, kupi amparapankir pututunak phustʼasasti, akham sasaw artʼapjjarakïna: “¡Nuwasiñajj Jehová Diosankiwa, Gedeonankarakiwa!” sasa. 21 Sapa mayni chachanakaw campamentor muyuntat pachpa lugarapan saytʼatäsipkäna, madianitanakan taqpach ejercitopaw escapjjäna, arnaqasisaw escapapjjarakïna.+ 22 Uka 300 soldadonakajj pututunak phustʼasipkakïnwa. Jehová Diosajj sapa mayniruw campamenton jupanakpura saytʼasiyäna, jupanakkamaw espadamp jiwarayasipjjäna.+ Ejercitojj Bet-Sitá markakamaw escapjjäna, Zererá toqekama, Tabat jakʼankir Abel-Meholá+ cheqan jakʼanakapkama.
23 Neftalí, Aser, Manasés+ tribunkirinakat taqe israelit soldadonakaruw jawsthapisïna, jupanakajj madianitanakan qhepap arktapjjarakïna. 24 Gedeón chachajj Efraín tribun qollunakap toqen taqe jakirinakaruw mensajeronak khitäna, akham sasa: “Madianitanak contra nuwasiñatak saraqapjjam, jupanakat nayrtʼasajj Bet-Bará cheqakam sarapjjam, kawkjatï Jordán jawirajj paskatañjamäki uka cheqanak jarkʼantapjjam” sasa. Ukatwa Efraín tribunkir taqe soldadonakajj tantachtʼasisin Bet-Bará cheqakam sarapjjäna, kawkjatï Jordán jawirajj paskatañjamäki uka cheqanaksa jarkʼantapjjarakïnwa. 25 Madián oraqen Oreb, Zeeb sat pä principenakaparus katjapjjarakïnwa. Jupanakajj Oreb+ sat mä qarqa* patjjaruw Oreb chachar jiwayapjjäna, Zeeb chacharojj Zeeb sutini uvas chʼirwañ lugaranwa jiwayapjjarakïna. Jupanakajj madianitanakar+ arktasipkakïnwa, Oreb, Zeeb sat chachanakan pʼeqenakapsti Gedeonan ukaruw apapjjäna, Jordán jawir jakʼaru.