1 Crónicas

20 Kunapachatï marajj qalltaskäna,* reyinakas guerran nuwasir mistupjjäna ukhajja, Joab+ chachajj guerran nuwasiñanwa pʼeqtʼäna, ammonitanakan oraqenakap tukjarakïna. Jupasti purisajj Rabá+ markaruw muyuntäna, ukañkamasti Davidajj Jerusalén+ markankaskänwa. Joab chachajj Rabá marka contra saytʼasajj tʼunjarakïnwa.+ 2 Davidajj Malcam sat idolon pʼeqepatwa coronap apaqäna. Ukatjja uka coronajj qorit luratätapa, 34 kilonak* pesonïtapa ukhamarak suma qalanakanïtapwa uñjäna. Ukatsti Davidan pʼeqeparuw uk uchapjjäna. Kunanakatï uka markan utjkäna ukanaksa Davidajj waljpun katuntarakïna.+ 3 Uka markankir jaqenakar apsunisajja, qalanak khuchjañanwa jupanakar trabajiyäna,+ hierro lurat puntani herramientanakampi, hachanakampiw trabajiyäna. Davidajj taqe ukanakwa ammonitanakan taqpach markanakapan luräna. Qhepatjja Davidasa taqe soldadonakas Jerusalén markaruw kuttʼjjapjjäna.

4 Uka qhepatjja israelitanakajj Guézer markanwa filisteonakamp guerran nuwasipjjäna. Ukapachaw Sibecái+ sat husatita chachajj refaím+ jaqenakat jutirïkäna uka Sipái* sat jaqer atipjasin jiwayäna, ukhamatwa filisteonakajj atipjat uñjasipjjäna.

5 Filisteonakampi israelitanakampejj mä kutimpiw guerran nuwasipjjäna. Ukatjja Jaír chachan Elhanán yoqapaw Goliat+ sat guitita chachan Lahmí sat jilapar jiwayäna, uka jaqen lanzapan lawapajj telaramp trabajirinakan lawapjam jachʼänwa.+

6 Ukatsti wasitatwa mä guerran nuwasiñajj utjäna. Gat+ markanwa nuwasipjjäna, ukanjja refaím jaqenakat jutiri+ mä jachʼa jaqew utjäna,+ sapa amparapanjja 6 lukʼananakaw utjäna, sapa kayupansti 6 lukʼananakaw utjarakïna, ukhamasti jupajj 24 lukʼananakanïnwa. 7 Uka jaqesti Israel marka contra saytʼasajj jiskʼachaskakïnwa.+ Ukatwa David reyin Simeá+ jilapan Jonatán yoqapajj uka jaqer jiwayäna.

8 Gat+ markansti uka jaqenakaw refaím+ jaqenakat jutirïpjjäna, jupanakajj Davidampi servirinakapampi jiwayataw uñjasipjjäna.