El Cantar de los Cantares
5 “Jardinajaruw nayajj mantta,+
kullakitaja, nayan noviaja.
Mirraja ukhamarak suma olorani alijwa nayajj apthapta.+
Abejanakajj miskʼichki uka miskʼijwa manqtʼasta.
Vinojata ukhamarak lechejatwa umtʼarakta”.+
“¡Munat amigonaka, manqʼapjjam!
¡Umtʼasipjjam, munasiñ uñachtʼayir arunakamp machjasipjjam!”.+
2 “Nayajj ikiskayätwa, ukampis chuymajajj uñnaqaskänwa.+
¡Munatajan leqtʼasinitapwa nayajj istʼayäta!
Akham sasaw jupajj leqtʼasinïna: ‘¡Kullakitaja, nayan munataja, llawirtʼita,
jan kuna kamachtʼat palomitaja!
Kuna laykutejj pʼeqejajj sullampi chʼarantʼatawa,
arumajj humedad utjatapatjja ñikʼutajajj chʼarantʼatawa’+ sasa.
3 Nayajj isij apsusjjtwa.
¿Mayampit isthapisëjja?
Kayunakajsa jareqasjjtwa.
¿Mayampit qʼañuchasëjja?
4 Punku cerrojotjja nayan munatajajj amparap ayaqasjjewa,
chuymajajj walpun putuqetäna.
5 Munatajar punku llawirañatakiw sartasiyäta,
amparanakajatjja mirraw chʼaqaräna,
ampar lukʼananakajatjja mirra aceitew chʼaqaräna,
punku cerrojon katuñanakapjjaruw chʼaqaräna.
6 Munatajarojj punkwa llawirayäta,
ukampis munatajajj kuttʼawayjjataynawa, sarjjataynawa.
Jupajj sarjjäna ukhajja, qʼalpun aynachtʼayäta.
Thaqtayätwa, ukampis janiw jikjjatkayätti.+
Jawsayätwa, ukampis janiw jupajj jayskitänti.
7 Marka muytir guardianakaw jikjjatapjjetäna.
Jupanakajj nuwjapjjetänwa, usuchjapjjetänwa.
Murallanakankir guardianakasti mantillajwa* aparapjjetäna.
8 Jerusalenankir warminaka, mä juramento lurarapipjjeta:
jumanakatï munatajamp jikisipjjäta ukhajja,
ak awisarapipjjeta, jupar wal munasitaj laykojj wali usuntatätwa”.
9 “Taqe warminakat sipansa wali suma uñnaqtʼani tawaqo,
¿mayni chachanakat sipansa kunanarak munatamajj jilankisti?
¿Mayni chachanakat sipansa kunanarak munatamajj jilankisti,
nanakar mä juramento lurayañamatakisti?”.
10 “Munatajajj wali suma uñnaqtʼaniwa, jañchipas wila colorarakiwa,
tunka waranqa chachanak taypinjja jupaw jilankejja.
11 Pʼeqepajj qoriwa, wali suma qoriwa.
Ñikʼutapajj onoqeskir palmera qoqan* laphinakapar* uñtasitawa,
ñikʼutapajj cuervo jamachʼjam chʼiyararakiwa.
12 Nayranakapajj jalir umanak jakʼankir palomanakjamawa,
lechen jarisir palomanakjamawa,
uma phoqarir estanque jakʼan* sayaraskir palomanakjamawa.
13 Mejillanakapajja suma olorani alinak jilayañ almacigor uñtasitawa,+
suma olorani alinakajj jilki uka jiskʼa qollunakar uñtasitawa.
Lakapajja mirra aceite chʼaqarir lirio panqaranakawa.+
14 Amparanakapan lukʼananakapajj qoriwa, sillunakapajj crisólito* suma qalawa.
Purakapajja llijtayat marfil suma qalawa, zafiro suma qalanakampi kʼachachtʼatarakiwa.
15 Kayunakapajj mármol qalat lurat columnanakawa, wali suma qorit lurat basenakjjar uchat columnanakawa.
Jupajja Líbano qollunakjam wali suma uñnaqtʼaniwa, cedro qoqanakjam*+ jan kikpaniwa.
16 Lakapajja miskʼjam mojjsawa,
jupajj wali munkañawa.+
Jerusalenankir warminaka, jupaw nayan munatajajja, jupaw nayan wali munatajajja”.