Jueces
15 Mä qhawqha tiempotjja, trigo yawthapiñ tiempökäna ukhaw Sansón chachajj mä cabritos aptʼasit warmipar visitir saräna. Jupasti akham sänwa: “Warmijan ukaruw cuartopar mantañ munta” sasa. Ukampis warmin tatapajj janiw jupar mantaykänti. 2 Warmin tatapasti juparojj akham sänwa: “‘Jupar uñispachawa’+ sasaw amuytjja. Ukatwa compañkayätam uka waynanakat maynir churjjta.+ Ukampis ¿janit sullka kullakapajj jupat sipansa jukʼamp suma uñnaqtʼanïki? Mirä amp suma, jupa lantejj sullkapampiy casarasim” sasa. 3 Ukampis Sansonajj jupar akham sänwa: “Filisteonakar jan wal lurkä ukatjja, janiw kuna juchanïkäsa” sasa.
4 Ukatwa Sansonajj sarasin 300 qamaqenak* katjäna. Ukatsti antorchanak katusajja, qamaqenak payakam chinthapïna, wichʼinkapat chinthapisasti wichʼinkanak taypiruw antorchanak uchäna. 5 Ukatjja antorchanakar nina naktayasasti, qamaqenakarojj* filisteonakan grano yapunakaparuw antʼäna. Yawit granonaksa, jan yawit granonaksa, uvas alinaksa, olivo qoqanaksa* qʼal ninamp phichantäna.
6 Filisteonakajj akham sasaw jisktʼasipjjäna: “¿Khitis akanak luri?” sasa. Jupanakarojj akham sapjjarakïnwa: “Timnita jaqen Sansón sat tollqapaw akanak luri, kuna laykutejj jupaw Sansonan warmip apaqasajj Sansonar compañapkäna uka waynanakat maynir churatayna”+ sasa. Ukatwa filisteonakajj makatasin uka warmimpir tatapampir phichantapjjäna.+ 7 Ukatsti Sansonajj akham sänwa: “Jumanakatï ukham lurapjjstajja, jumanakat vengasiñajkamajj janiw inaktʼkäti”+ sasa. 8 Ukatjja jupanakarojj mayat maya jiwarayäna, qʼal jiwarayasasti saraqasaw Etam sat jachʼa qarqa* pʼiyan quedasïna.
9 Uka qhepatsti filisteonakajj makatasinwa Judá oraqen campamento saytʼayapjjäna, taqpach Lehí+ sat cheqansti inakiw uksar aksar muynaqasipkäna. 10 Ukatjja Judá tribunkir chachanakajj akham sapjjänwa: “¿Kunatsa nanak contra makatanipjjta?” sasa. Jupanakasti sapjjarakïnwa: “Sansón chachar katuntañatakiw* makatanipjjta, kuntï lurapkitu uka kikpa jupar lurañataki” sasa. 11 Ukatwa Judá tribunkir 3.000 chachanakajj Etam sat jachʼa qarqa* pʼiyar saraqapjjäna, Sansonarusti akham sapjjänwa: “¿Janit filisteonakan jiwasar apnaqaskatap yatkta?+ Ukhamajj ¿kunatsa nanakar ak lurapjjesta?” sasa. Sansonasti jupanakar akham sarakïnwa: “Kuntï nayar lurapkitu uka kikparak jupanakar lurtjja” sasa. 12 Jupanakasti akham sapjjarakïnwa: “Jumar katuntasin* filisteonakar katuyjjañatakiw jutapjjta” sasa. Sansonasti akham sarakïnwa: “Nayar jan jiwayapjjañamatakejj mä juramento arsupjjam” sasa. 13 Jupanakasti sapjjarakïnwa: “Janiw jiwayapkämati, ñachʼantasakiw* jupanakar katuyapjjäma” sasa.
Ukatwa pä machaq pitanakamp* ñachʼantasajj jachʼa qarqa* pʼiyat apsunipjjäna. 14 Lehí sat cheqar purïna ukhajja, Sansonar uñjasajj kusisiñatwa filisteonakajj arnaqasipjjäna. Ukapachaw Jehová Diosan espiritupajj jupar chʼam churäna,+ jupar ñachʼantatäkäna uka pitanakasti* facilak ninamp phichantat lino hilor uñtat tʼaqartäna, cadenanakas amparapat jalartjjänwa.+ 15 Sansonasti asnon mä quijada chʼakhap uñjäna, uka quijada katusasti ukampiw 1.000 chachanakar jiwarayäna.+ 16 Ukatsti Sansonajj sarakïnwa:
“¡Asnon mä quijada chʼakhapampisti..., mä montón pä montón montontʼarakta!
Asnon mä quijadapampiw 1.000 chachanakar jiwarayta”+ sasa.
17 Ukham arsusasti asnon quijadap jaqtjjänwa, ukatsti uka cheqarojj Ramat-Lehí*+ sutimpiw ucharakïna. 18 Ukatjja Sansonajj umat wal pharjayasïna,* ukatwa Jehová Diosar akham sas artʼasïna: “Jumïpanwa taqenirus atipjta. Jichhajja ¿umat pharjayasisat jiwäjja? ¿Jan circuncidat* jaqenakamp katuntatat uñjasëjja?” sasa. 19 Ukatwa Diosajj Lehí sat cheqan utjir mä pʼiya partjäna, uka pʼiyatsti umaw jalsunïna.+ Um umtʼäna ukhajja, mayampiw chʼamanëjjäna, jakatatarakïnwa. Ukatwa jupajj uka cheqarojj En-Hacore* suti uchäna, ukasti jichhürkamaw Lehí sat cheqanki.
20 Filisteonakan urunakapanjja, 20 maranakaw Sansón chachajj Israelan juezapäna.+