1 Crónicas
18 Mä qhawqha tiempotjja, Davidajj filisteonakar+ atipjasajj jupanakaruw apnaqjjäna, filisteonakarojj Gat+ markampi uka jakʼankir markanakampwa aparäna. 2 Ukatsti Davidajj moabitanakaruw+ atipjarakïna, ukhamatwa moabitanakajj Davidar servipjjäna, juparuw impuesto pagapjjarakïna.+
3 Zobá+ markan Hadadézer+ sat reyipajj Éufrates+ jawirkam apnaqañatakiw saraskäna, ukhaw Davidajj Hamat+ marka jakʼan jupar atipjäna. 4 Davidajj Hadadézer reyin 1.000 carronakapampiru, caballot sariri 7.000 chachanakapampiru ukhamarak kayuk* sariri 20.000 soldadonakapampiruw katuntäna.+ Ukatsti Davidajj carronak qatatir caballonakan kayunakap usuchjäna, 100 caballonakarukiw jan usuchjkänti.+ 5 Kunapachatï Damasco markankiri sirionakajj Zobá markan Hadadézer reyipar yanaptʼañatak jutapjjäna ukhajja, Davidajj 22.000 sirionakaruw jiwarayäna.+ 6 Ukatjja Davidajj Siria markankir Damasco markanwa tropanak uchäna, sirionakajj Davidan serviripäjjapjjänwa, juparuw impuesto pagapjjarakïna. Kawkirutï Davidajj sarkäna ukanjja, Jehová Diosajj jupar atipjayapunïnwa.*+ 7 Davidajj Hadadézer reyin servirinakapan qorit lurat escudonakap apararakïnwa, ukatsti Jerusalén markaruw ukanak apäna. 8 Hadadézer reyin Tibhat ukhamarak Cun sat markanakapatjja, Davidajj walja cobre apasirakïna. Uka cobretwa Salomonajj cobret lurat Lamar Qota+ sat uma estanquempi, columnanakampi, cobret lurat yaqha ukhamanakamp luräna.+
9 Hamat markan Tou sat reyipasti, Davidajj Zobá+ markan Hadadézer+ reyipan taqpach ejercitopar tukjatapwa istʼäna. 10 Ukatwa Tou sat reyejj Davidan ukar Hadoram* sat yoqapar jankʼak khitäna, ukhamat Davidar aruntañapataki ukhamarak Hadadézer reyimp nuwasitamas atipjatamas walikipuniwa sañapataki (Hadadézer reyejj sapa kutiw Tou sat reyi contrajj nuwasirïna). Hadoram chachajj qollqeta, qorita, cobreta kunayman luratanakwa Davidatak aparapïna. 11 David reyejj taqe ukanak Jehová Diosatakiw sagrador tukuyäna.+ Kunjamtï taqe markanakat aparankäna uka qollqempi qorimpi sagrador tukuykäna ukhama. Jupajj Edom markata, Moab markata, ammonitanakata,+ filisteonakata+ ukhamarak amalequitanakatwa+ aparanïna.
12 Zeruyá+ warmin Abisái+ sat yoqapasti, Jayu+ sat vallen 18.000 edomitanakaruw jiwarayäna. 13 Abisái chachajj Edom markan tropanak uchäna. Cheqas taqe Edom markpachanwa jupajj tropanak uchäna, taqe edomitanakarakiw Davidan serviripäjjapjjäna.+ Kawkirutï Davidajj sarkäna ukanjja, Jehová Diosajj jupar atipjayapunïnwa.*+ 14 Davidajj taqe Israel markpachar apnaqaskakïnwa.+ Jupasti cheqaparuw taqpach markaparojj juzgarakïna.+ 15 Zeruyá warmin Joab yoqapaw David reyin ejercitop pʼeqtʼäna,+ Ahilud chachan Jehosafat+ yoqapajj reyin registriripänwa. 16 Ahitub chachan Sadoc yoqapampi Abiatar chachan Ahimélec yoqapampejj sacerdotëpjjänwa, Savsá chachasti secretariorakïnwa. 17 Jehoiadá chachan Benaya yoqapajj keretitanakampiru+ peletitanakampiruw*+ pʼeqtʼäna. Davidan yoqanakapasti reyi nayraqatan pʼeqtʼirinakat uñjatäpjjänwa.