El Cantar de los Cantares
3 ”Ikiñajanjja arumanakajj
munatajaruw nayajj thaqta.+
Juparojj thaqtwa, ukampis janiw jikjjatkti.+
2 Sartasisaw nayajj marka muytanëjja.
Callenakana, plazanakanwa
munatajarojj thaqtanëjja.
Juparojj thaqtwa, ukampis janiw jikjjatkti.
3 Marka muytir guardianakampiw nayajj jikista.+
Jupanakarojj akham sasaw jisktʼasta: ‘¿Janit munatajar uñjapkta?’ sasa.
4 Jupanakamp jikisisin sarjjaskayäta ukhajja,
munatajaruw jikjjatayäta.
Jupat katuntasisajj janiw antutkayätti,
mamajan utapar irpañajkama,+
nayar ususir mamajan cuartopar irpantañajkama.
5 Jerusalenankir warminaka, mä juramento lurarapipjjeta,
camponkir gacelanakjjaru venadonakjjaru* juramento lurarapipjjeta:
maynir munasiñajatï jan utjkchitu ukhajja, munasiñajatakejj jan chʼamañchapjjestati”.+
6 “¿Kunarak jewqʼe qenayar uñtat wasarat makatasinki ukasti?
Mirrampi janqʼo inciensompi perfumatawa,
mä comerciante jaqen taqe kasta perfumenakampi perfumatawa”.+
7 “¡Uñtapjjam! Salomón reyin kallnaqañ qonuñapawa,*
ukasti wali chʼamani sojjta tunka chachanakamp muytatawa,
Israelankir wali chʼaman chachanakamp muytatawa.+
8 Taqe jupanakajj sapa mayniw mä espadampi armantatäpjje,
taqe jupanakajj guerratak wakichtʼatäpjjewa,
sapa mayniw cinturapan mä espadanïpjje,
ukhamat arumajj utjki uka jan walinakat jupar jarkʼaqañataki”.
9 “Salomón reyin kallnaqañ qonuñapawa,
uksti Líbano qollunakankir qoqanakan* lawanakapampiw jupajj luräna.+
10 Sayirinakapjja qollqe metalatwa luräna,
espalderapsa ampar apoytʼasiñapsa qoritwa luräna.
Jupajj qontʼaski ukajja morado chʼankhat luratawa,
manqhäjjapajj munasiñampi kʼachachtʼatawa,
Jerusalenankir warminakan kʼachachtʼatawa”.