Zacarías
5 Nayajj mayampiw mä visión uñjayäta, altnam jalaskir mä rollo uñjayäta. 2 Ukatjja angelajj akham sasaw jisktʼitäna: “¿Kunsa uñjta?” sasa.
Nayasti sarakiyätwa: “Altnam jalaskir mä rollo uñjta, uka rollosti largorojj niya 9 metronakaniwa,* anchorusti 4 metro 50 centimetroniwa”* sasa.
3 Jupasti sarakitänwa: “Uka rollon qellqatäki uka arunakajja oraqpachar saratataski uka maldicionawa, kuna laykutejj taqe khititejj lunthataski+ ukajja janiw castigatäkiti, kunjamtï rollon mä ladopan qellqatäki ukhama. Taqe khititejj falso juramento+ lurki ukajja janiw castigatäkiti, kunjamtï rollon maysäjj ladopan qellqatäki ukhama. 4 Ejercitonakan Jehová Diosapajj akham siwa: ‘Nayaw uka maldición apayanta, uka maldicionaw lunthatan utaparusa nayan sutij-jjar falso juramento luririn utaparus mantani, uka utanakanwa uka maldicionajj quedasirakini, qʼalwa tʼunjarakini, maderanakapsa qalanakapsa qʼal tukjarakini’ sasa”.
5 Ukatjja nayamp parlkäna uka angelaw jakʼachasinïna, akham sarakitänwa: “Mirä amp suma uñtam, kunatï uñstasinki uk uñtam” sasa.
6 Ukatwa nayajj akham sasin jisktʼayäta: “¿Kunas ukajja?” sasa.
Jupasti sarakïnwa: “Uñstasinki ukajja mediñatak canastawa”* sasa. Jupajj akham saskakïnwa: “Oraqpachankir jan wali jaqenakajj ukar uñtasitäpjjewa” sasa. 7 Ukatsti nayajj ak uñjarakiyäta: mayniw plomo sat metalat lurat moroqʼo tapa aptäna, mä warmiw uka canasta manqhan qontʼatäskäna. 8 Uka angelasti akham sänwa: “Uka warmejj Jan Walimpi sasiwa” sasa. Ukatsti mayampiw uka warmirojj mediñatak canasta manqhar nukhuntäna, plomo sat metalat lurat tapampiw uka canastarojj* wali chʼamamp tapjjatarakïna.
9 Uñtasasti pä warminakaruw jakʼachasisinkir nayajj uñjayäta, jupanakajj thayan apataw altnam jalasinipkäna. Chheqanakapajj cigüeña jamachʼin chheqanakapjamänwa. Jupanakaw mediñatak canastjja waytasiwayjjapjjäna. 10 Ukatwa nayamp parlkäna uka angelarojj akham sasin jisktʼayäta: “¿Kawkirus mediñatak canasta* apasipki?” sasa.
11 Jupasti akham sitänwa: “Sinar*+ oraqeruw apasipki, ukhamat uka warmitak mä uta lurarapiñataki, kunapachatï uka utajj wakichtʼatäjjani ukhajja, uka warmejj ukaruw uchatäjjani, kawkinkañapäkitejj ukaruw uchatäjjani” sasa.