1 Crónicas
5 Akanakaw Israel chachan Rubén+ sat jilïr yoqapan wawanakapajja. Rubenaw jilïr yoqänjja, ukampis jupajj tatapan concubinapampiw ikintasïna,*+ ukatwa derechot waktʼkäna uka jilïr wawäñajj Israelan José sat yoqapan wawanakapar churatäjjäna,+ janirakiw familiapan listapan jilïr wawjamajj listankjjänti. 2 Judá+ chachajj jilanakapat sipansa jilankänwa, jupatwa jutïrin pʼeqtʼañapäki ukas jutaraki,+ ukhampachas derechot waktʼkäna uka jilïr wawäñajj José chachar churatäjjänwa. 3 Israel chachan Rubén sat jilïr yoqapan wawanakapajj Hanok, Palú, Hezrón, Carmí+ ukanakänwa. 4 Joel chachan yoqanakapajj Semaya chachänwa, jupan yoqapajj Gog chachänwa, jupan yoqapajj Simeí chachänwa, 5 jupan yoqapajj Miqueas chachänwa, jupan yoqapajj Reayá chachänwa, jupan yoqapajj Baal chachänwa, 6 jupan yoqapajj Beerá chachänwa. Beerá chacharojj Tilgat-Pilnéser+ sat Asirian reyipaw preso apasjjäna. Beerá chachajj rubenitanakan mä pʼeqtʼiripänwa. 7 Beerá chachan jilanakapajj familianakapan listaparjamajj akanakänwa: Jeiel sat pʼeqtʼiri, Zacarías, 8 Azaz chachan Bela yoqapa, jupajj Sema chachan allchhipänwa, Sema chachajj Joel chachan yoqapänwa. Bela chachajj Aroer+ markanwa jakäna, Nebo ukhamarak Baal-Meón+ sat markanakkama. 9 Jupan uywanakapajj Galaad+ oraqen wal mirtatap laykusti inti jalsu toqenwa jakañ qalltäna, Éufrates+ jawira jakʼankki uka wasarkama. 10 Jupanakasti Saúl chachan urunakapanwa hagritanak contra guerran nuwasipjjäna, hagritanakajj atipjataw uñjasipjjäna, ukhamatwa jupanakajj Galaad markat inti jalsu toqenkir taqpach oraqenakan carpanakapan jakapjjäna.
11 Ukatjja Gad chachat jutirinakajj Rubén chachat jutirinakan ladopanwa jakapjjäna. Jupanakajj Basán oraqenwa jakapjjäna, Salecá+ markakama. 12 Basán oraqenjja, Joel chachaw pʼeqtʼirïnjja, ukjjarusti Safam chachänwa, Janái chachampi Safat chachampejj pʼeqtʼirïpjjarakïnwa. 13 Jupanakan familiaranakapajj Miguel, Mesulam, Seba, Jorái, Jacán, Zía, Éber ukanakänwa. Taqpachanejj paqallqonïnwa. 14 Abihail chachan yoqanakapajj akanakänwa: Abihail chachajj Hurí chachan yoqapänwa, jupajj Jaróah chachan yoqapänwa, jupajj Galaad chachan yoqapänwa, jupajj Miguel chachan yoqapänwa, jupajj Jesisái chachan yoqapänwa, jupajj Jahdó chachan yoqapänwa, jupajj Buz chachan yoqaparakïnwa. 15 Jupanakan familiap pʼeqtʼirejj Abdiel chachan Ahí sat yoqapänwa, Abdiel chachasti Guní sat chachan yoqapänwa. 16 Jupanakasti Galaad+ markana, Basán+ oraqena ukhamarak uksa toqenkir jiskʼa markanakanwa jakapjjäna, kawkjarutï Sarón toqenkir pastonakajj tukuyki ukjakama. 17 Taqe jupanakajja kunapachatï Judá markan Jotán+ sat reyipampi Israel markan Jeroboán*+ sat reyipamp apnaqapkäna uka urunakanwa familiapan sutinakapajj registratäjjäna.
18 Rubenitanakampina, gaditanakampina, Manasesan chikat tribupampin ejercitopanjja, guerran nuwasir 44.760 chʼamani chachanakaw utjäna. Jupanakajj escudonakani, espadanakani ukhamarak flechtʼañ arconakanïpjjänwa, guerran nuwasiñatakis suma yatichatäpjjarakïnwa. 19 Jupanakasti hagritanak+ contra, Jetur chachat jutirinak contra, Nafís+ chachat jutirinak contra ukhamarak Nodab chachat jutirinak contraw guerran nuwasipjjäna. 20 Guerran nuwaskasajj Diosaruw jupanakajj yanaptʼa mayipjjäna, Diosasti jupar confiyapjjatap uñjasajj istʼarakïnwa, ukatwa hagritanakarusa hagritanakampïpkäna taqe ukanakarus jupanakan amparapar katuyäna.+ 21 Uywanakaps qʼal katuntapjjäna, jupanakajj 50.000 camellonakampi, 250.000 ovejanakampi, 2.000 asnonakampi apasipjjäna, 100.000 jaqenakamp* kun apasipjjarakïna. 22 Niyakejjay cheqpach Diosajj guerran nuwaschïnjja,+ waljaniw jiwarapjjäna. Ukatjja preso apat uñjasipkäna ukapachkamaw jupanakajj uka oraqen jakapjjäna.+
23 Manasesan chikat tribupat+ jutirïpkäna ukanakajja, Basán toqet qalltasajj Baal-Hermón, Senir ukhamarak Hermón+ sat qollunakkamaw jakapjjäna. Jupanakajj sinti waljapunïpjjänwa. 24 Jupanakan familia pʼeqtʼirinakapajj akanakänwa: Éfer, Isí, Eliel, Azriel, Jeremías, Hodavías, Jahdiel. Jupanakajj guerran nuwasir chʼamani chachanakäpjjänwa, wali uñtʼatäpjjänwa, nayra awkinakapan familianakap pʼeqtʼirïpjjarakïnwa. 25 Ukampis jupanakajj nayra awkinakapan Diosap contraw juchachasipjjäna, uka markanakankir jaqenakan diosanakapampiw prostitutanakjam sarnaqapjjäna.+ Uka markankir jaqenakarusti Diosaw jupanak nayraqatat tukjäna. 26 Ukatjja Israelan Diosapajj Asiria markan Pul sat reyipan chuymaparuw mä amuyu uchäna+ (mä arunjja Asiria markan Tilgat-Pilnéser+ reyipan chuymaparu), ukatwa uka reyejj rubenitanakarusa, gaditanakarusa, Manasesan chikat tribuparusa preso katuntasin Halá, Habor, Hará sat lugaranakaru ukhamarak Gozán+ sat jawir jakʼar apasjjäna, jichhürkamaw jupanakajj ukankasipkaraki.