Zacarías
12 Akasti Diosan arsut arunakawa:
“Aka arunakajja Israel marka toqet Jehová Diosan arsut arunakapawa” siw Jehová Diosajja,
jupaw alajjpachanak mä telar uñtat janatatäna,+
jupaw oraqen cimientonakapsa uchäna,+
jupaw jaqen espiritup* lurarakïna.
2 “Jerusalenarojja vino coparuw nayajj tukuyäjja, ukhamat uka jakʼankir taqe markanakajj khatatipjjañapataki, enemigonakaw Judá markarus Jerusalén markarus muyuntapjjani.+ 3 Uka urunjja, Jerusalenarojj mä jathi qaläkaspas ukhamwa taqe markanakatakejj tukuyäjja. Taqe khitinakatï jupar aptapkani ukanakajja, qʼala usuchjataw uñjasipjjani,+ oraqenkir taqe markanakasa jupa contra nuwasiñatakiw tantachthapitäpjjani.+ 4 Jehová Diosajj akham siwa: uka urunjja, taqpach caballonakaruw sustjaräjja, caballonakjjat sarir jaqenakarus loqheruw tukuyäjja. Nayasti nayranakajwa jistʼaräjja, Judá markarojj sum uñjäjja, ukampis markanakan taqe caballonakaparojj juykhuptayäwa. 5 Judá markan tribu pʼeqtʼirinakapajja, chuymanakapan akham sapjjaniwa: ‘Jerusalén markankirinakaw jiwasan chʼamasajja, uka chʼamasti ejercitonakan Jehová Diosapatwa juti, mä arunjja jupanakan Diosapatwa juti’+ sasa. 6 Uka urunjja, Judá markan tribup pʼeqtʼirinakaparojja phäña taypin mä braserilloruw tukuyäjja, yawit trigo taypinjja nakhaskir antorcharuw tukuyarakëjja,+ jupanakajj uka jakʼankir taqe markanakaruw tukjapjjani, kupi toqenkir markanakarusa chʼeqa toqenkir markanakarus tukjapjjaniwa,+ Jerusalenankir jaqenakajj mayampiw pachpa lugarapan jakjjapjjani, mä arunjja Jerusalén markana.+
7 ”Nayraqatjja Judá markan carpanakapwa Jehová Diosajj salvani, ukhamat Davidat jutir wawanakan jachʼañchäwipasa* Jerusalén markan jakir jaqenakan jachʼañchäwipasa* Judá markan jachʼañchäwipat sipansa jan jukʼampïñapataki. 8 Uka urunjja Jehová Diosajj Jerusalén markankir jaqenakarojj arjjataniwa,+ uka urunjja khititï jupanak taypit jukʼamp debiläki* ukajja Davidjam chʼamanïniwa, Davidat jutir wawanakasti markapar irpir Jehová Diosan angelapjamäpjjaniwa.+ 9 Uka urunjja Jerusalén marka contra jutapkani taqe uka markanakarojj cheqpachapuniw nayajj tukjäjja.+
10 ”Nayasti Davidat jutir wawanakjjarusa Jerusalén markan jakir jaqenakjjarusa espiritujwa warjjatäjja, nayasti jupanakarojj sumwa uñjarakëjja, nayaruw ruwtʼasipjjarakitani, khitirutï jununtapkäna+ ukaruw jupanakajj uñtapjjarakini, kunjamtï mä sapa wawatjamajj wararipkaspa ukhamwa jupatjam wararipjjani, kunjamtï mä jilïr wawatjamajj wal jachapkaspa ukhamwa jupatjam wal jachapjjarakini. 11 Uka urunjja Jerusalén markan wali jachʼatwa wararipjjani, kunjamtï Hadadrimón lugaran warariñajj utjkäna ukhama, ukasti Meguidó+ toqenkir valle pampankiwa. 12 Markajj warariniwa, sapa familiaw yaqh yaqha wararipjjani, Davidan familiapat taqeniw wararipjjani, chachanakasa warminakas yaqh yaqhwa wararipjjani, Natán+ chachan familiapat taqeniw wararipjjani, chachanakasa warminakas yaqh yaqhwa wararipjjani, 13 Leví+ chachan familiapat taqeniw wararipjjani, chachanakasa warminakas yaqh yaqhwa wararipjjani, simeitanakan+ familiapat taqeniw wararipjjani, chachanakasa warminakas yaqh yaqhwa wararipjjani, 14 jiltʼapkani uka familianakat taqeniw wararipjjani, chachanakasa warminakas yaqh yaqhwa wararipjjani.