Jeremías
26 Judá markan reyipäkäna Josías reyin yoqapäkarakïna uka Jehoiaquim+ reyejj apnaqañ qalltaskäna ukhajja, Jehová Diosan aka arunakapaw Jeremiasar jutäna: 2 “Jehová Diosajj akham siwa: ‘Jehová Diosan utapan utjki uka patiopan saytʼasim, ukatsti Jehová Diosan utapan adorañatak* jutapki taqe uka Judá oraqen markanakapankir* jaqenakar parlam. Taqe kunanaktï jumar siskäma ukanakwa jupanakar sañama, janiw ni mä arsa apaqañamäkiti. 3 Jupanakajj inas istʼapjjchini, sapa maynis jan wali thakip apanukupjjarakchini, ukatsti nayajj kuna jan waltʼäwtï jupanakan jan wali luratanakapat apaniñ amtkta uks mayjtʼayarakiristwa.+ 4 Jupanakarojj akham sañamawa: “Jehová Diosajj akham siwa: ‘Jumanakatï churapksma uka leyij* phoqañan jan istʼapkitäta, 5 jumanakan ukar kutin kutin khitankta* uka nayar serviri profetanakajan arunakap jan istʼapkätajja,+ 6 nayajj aka utarojj Siló+ markar uñtasit tukuyäjja, aka markarojj tukjäwa, oraqenkir taqe markanakarakiw jupanakarojj maldicionanakapan aytasipjjani’ sasa”’”.+
7 Sacerdotenakasa, profetanakasa, taqpach markas Jehová Diosan utapanwa Jeremiasarojj uka arunak parlir istʼapjjäna.+ 8 Kunapachatï Jeremiasajj taqpach markar kuntï sañapatak Jehová Diosajj maykäna taqe uka arunak parlañ tukuyjjäna ukhajja, sacerdotenakasa, profetanakasa, taqpach markas jupar katuntasaw akham sapjjäna: “Jumajj cheqpachans jiwätawa. 9 ¿Kunatsa jumajj ‘aka utajj Siló markar uñtasit tukuyatäniwa, aka markas jan khiti jakirini qʼala tukjatäniwa’ sasin Jehová Diosan sutipjjar uka profecía arunak arsta?” sasa. Ukatjja taqpach markarakiw Jehová Diosan utapan Jeremiasar muyuntat tantachasipjjäna.
10 Kunapachatï Judá markan principenakapajj uka arunak istʼapjjäna ukhajja, reyin utapat* Jehová Diosan utaparuw sarapjjäna, Jehová Diosan utapankki uka machaq punkun mantañaparuw qontʼasipjjarakïna.+ 11 Sacerdotenakampi profetanakampejj principenakarusa taqpach markarus akham sapjjänwa: “Aka chachajj jiwañapatak juchañchatäñapawa,+ kuna laykutejj aka marka contraw jupajj profecianak parli, kunjamtï jumanak pachpa istʼapkta ukhama”+ sasa.
12 Ukatsti Jeremiasajj principenakampiru taqpach markampirojj akham sänwa: “Jehová Diosaw nayarojj aka uta contrasa aka marka contras profecía arunak arsuñajatak khitanitu, taqe uka arunakwa istʼapjjaraktajja.+ 13 Ukhamasti jichhajj thakinakamsa luratanakamsa askichapjjam, jumanakan Jehová Diosaman arup istʼapjjam, Jehová Diosasti kuna jan waltʼäwinaktï jumanak contrajj arski uka amuyup mayjtʼayarakiniwa.+ 14 Ukampis nayajj jumanakan amparanakamanktwa. Kunatï jumanakatak walïki cheqaparjamäki uk nayar lurasipkakita. 15 Ukampis jumanakatï nayar jiwayapjjetätajja, jumanakasa, aka markasa, aka markan jakirinakasa jan juchan jaqer jiwayapjjatamat juchanïpjjätawa, cheqas Jehová Diosaw kuna arunaktï istʼapkta taqe uka arunak parlañajatak nayar khitanitu” sasa.
16 Ukatsti principenakasa taqpach markas akham sasaw sacerdotenakarusa profetanakarus sapjjäna: “Aka chachajj janiw jiwañapatak juchañchatäñapäkiti, jupajj Jehová Diosasan sutipjjaruw parlistu” sasa.
17 Ukhamarus markan yaqhep ancianonakapajja, sartasaw tantachtʼat taqpach markarojj akham sapjjäna: 18 “Judá markan Ezequías+ reyipajj apnaqkäna uka urunakanjja, Moréset markankir Miqueas+ profetajj akham sasaw taqpach Judá markarojj säna: ‘Ejercitonakan Jehová Diosapajj akham siwa:
“Sionajj mä oraqjam qhollitäniwa,
Jerusalenajj qʼala tukjatäniwa,+
qollu patjjankir templosti, qoqanakan* phoqantat mä jiskʼa qollur uñtasitarakïniwa”+ sasa’.
19 ”¿Judá markan Ezequías reyipas taqpach Judá markas jupar jiwayapjjänti? ¿Janit reyejj Jehová Diosar ajjsarkänjja, Jehová Diosarus wal ruwtʼaskarakïnjja, ukhamat Jehová Diosajj kuna jan waltʼäwtï jupanak contra arskäna uk mayjtʼaykarakïnjja?+ Ukhamajj jiwas pachpaw mä jan waltʼäwi jiwasanakjjar apjjatasiñampïsktanjja.
20 ”Ukatjja Jehová Diosan sutipjjar profecía arunak arsur yaqha chachaw utjarakïna, Quiryat-Jearim+ markankir Semaya chachan Uriya sat yoqapänwa, jupasti aka marka contrasa aka oraq contrasa Jeremiasan profecía arunakap kikpa arsurakïna. 21 Jehoiaquim+ reyisa, guerran nuwasir chʼamani taqe jaqenakapasa, taqe principenakas arunakap istʼapjjänwa, reyisti jupar jiwayañwa amtarakïna.+ Uk istʼasasti Uriya profetajj ajjsarayasïnwa, ukatwa Egiptor escapjjäna. 22 Ukatjja Jehoiaquim reyejj Acbor chachan Elnatán+ sat yoqaparuw yaqha chachanakamp chik Egipto markar khitäna. 23 Jupanakajj Uriya profetar Egiptot apanisajj Jehoiaquim reyin ukaruw apapjjäna, uka reyisti espadampiw jupar jiwayäna,+ jiwat cuerpopsti aleq jaqenakan sepulturaparuw liwintarakïna”.
24 Ukampis Safán+ chachan Ahicam+ sat yoqapaw Jeremiasar yanaptʼäna, ukhamatwa jupajj markankir jaqenakarojj jiwayatäñatak jan katuyatäkänti.+