Nehemías

13 Uka urunjja markan istʼkañaw Moisesan libropajj liytʼasïna.+ Ukan qellqatäkäna ukarjamajja, janipuniw mä ammonitasa ni mä moabitasa+ cheqpach Diosan congregacionapan katoqatäñapäkänti,+ 2 kuna laykutejj janiw jupanakajj israelitanakar ni tʼantʼsa ni umsa churapkataynati, antisas israelitanakar maldisiñapatakejj Balaam chacharuw contratasipjjatayna.+ Ukampis jiwasan Diosasajj uka maldición mä bendicionaruw tukuyatayna.+ 3 Kunapachatï israelitanakajj Leyin liytʼasitap istʼapjjäna ukhajja, jankʼakiw jupanakajj taqe khitinakatï extranjero jaqenakat jutirïpkäna ukanakar Israel markat yaqhachjjapjjäna.+

4 Uka nayrasti Diosasan utapan*+ utjkäna uka imañ utanakat* encargatajj Eliasib+ sacerdotënwa, jupajj Tobías+ chachan familiarapänwa. 5 Eliasib chachajj Tobías chacharojj mä jachʼa imañ uta* churäna, uka utaruw nayrajj grano ofrendanakasa, janqʼo inciensosa, kunanakatï templon serviñatakejj wakiski ukanakasa, granonakat diezmosa, machaq vinot diezmosa, aceitet+ diezmos uchasïna. Taqe ukanakajj levitanakaru,+ cantirinakaru, porteronakaruw waktʼäna. Uka imañ utarurakiw sacerdotenakatak churaskäna uka contribucionanakajj uchasïna.+

6 Taqe uka tiemponsti nayajj janiw Jerusalén markankkayätti, kuna laykutejj Babilonia markan Artajerjes+ reyipajj 32 maranak apnaqaskäna+ ukhaw nayajj reyin ukar kuttʼayäta. Ukampis mä qhawqha tiempotjja, kuttʼañajkamajj mä permiso reyir mayisirakiyäta. 7 Ukatjja nayajj Jerusalén markaruw jutayäta, purinisasti kuntï Eliasib+ sacerdotejj Tobías+ layku lurkatayna uka sinti jan wal uñjta. Jupasti cheqpach Diosapan utapan utjkäna uka patioparuw mä imañ uta Tobías chachatak wakicharapitayna. 8 Ukajj walpun nayar colertʼayitäna, ukatwa Tobías chachan utjkäna taqe uka mueblenakap imañ utat* jaqsuraniyäta. 9 Ukatsti qʼomachapjjañapatakiw mayirakiyäta, ukatwa jupanakajj uka imañ utanak* qʼomachapjjäna. Nayasti kunanakatï cheqpach Diosan utapan serviñatakejj wakiskäna ukanaksa,+ grano ofrendsa, janqʼo incienssa ukaruw uchjjarakiyäta.+

10 Kunanakatï levitanakarojj churasiñapäkäna+ ukanakajj jan churasjjatapwa yatirakiyäta,+ ukatwa ukan servisipkäna uka levitanakasa cantirinakasa pachpa oraqenakapar+ trabajasir sarjjapjjatayna. 11 Uk yatisaw nayajj sullka apnaqerinakarojj+ toqenoqta, jupanakarusti akham saraktwa: “¿Kunatsa cheqpach Diosan utap ina ukhamak jaytapjjta?”+ sasa. Ukatjja jupanakar* tantachtʼasajj pachpa lurañanakapan trabajipjjañapatakiw ucharakta. 12 Taqpach Judá tribunkirinakasti, imañ utanakaruw+ granonakatsa, machaq vinotsa, aceitetsa diezmonak+ apanipjjäna. 13 Ukatsti nayajj Selemías sacerdotempiru, copianak lurirïki* uka Sadoc chachampiru ukhamarak Pedaya sat levitampiruw imañ utanakat encargasiñapatak uttʼayayäta, jupanakar yanapañapatakejj Matanías chachan allchhipäki Zacur chachan yoqapäkaraki uka Hanán chacharuw uttʼayarakiyäta, kuna laykutejj jupanakajj confiykañ chachanakäpjjänwa. Jupanakaw qhawqhatï jilanakapar waktʼkäna uk churapjjañapäna.

14 Diosajay, janikiy nayat armasistati,+ janikiy akat armasimti, kunjamsa nayajj utamarusa ukan serviñarus* munasiñat jan jaytjasirïtaj uñachtʼayta uks janikiy pʼeqemat chhaqtayamti.+

15 Uka urunakansti, jaqenakarojj sábado urun vino lurañatak uvas chʼirwasipkatapwa*+ uñjayäta. Sábado urunsti granonak montón montón apthapisajj asnonakjjaruw khumjjatapjjäna, Jerusalenarojj vinompi, uvasanakampi, higosanakampi ukhamarak kunayman achunakampi apanipjjatap uñjarakiyäta.+ Ukatwa jupanakarojj sábado urun jan kuna manqʼañanaks aljapjjañapatak ewjjtʼayäta.* 16 Markan jakiri tirionakasti, sábado urunwa chawllanakampi kunayman aljañanakampi apanisajj Judá tribunkirinakar Jerusalén markan aljapjjäna.+ 17 Ukatwa nayajj Judá tribunkir pʼeqtʼirinakarojj toqenoqayäta, akham sasa: “¿Kunatsa aka jan wal lurapjjta? ¡Jumanakajj sábado urun leyip pʼakintasipktajja! 18 ¿Janit nayra awkinakasajj uka pachpa lurapkänjja? ¿Janit Diosasajj ukham lurapjjepan jiwasarus aka markarus castigkistänjja? Jichhajj ¿kunatsa jumanakajj sábado urun leyip pʼakintapjjta? ¿Jukʼampit Diosarojj Israel contra colerayañ munapjjta?”+ sasa.

19 Ukatwa nayajj janïra sábado urükipana ukhamarak janïra arumäkipan Jerusalenan punkunakap llawintasiñapatak mayiyäta. Ukatsti sábado uru pasatat llawirasiñapatakiw mayirakiyäta. Punkunak uñjapjjañapatakejj yanapirinakajaruw ukar ucharakiyäta, ukhamat sábado urun jan kuna aljañs apanipjjañapataki. 20 Ukatwa negociantenakasa kunayman aljañanak apanirinakasa mä kuti jan ukajj pä kuti Jerusalén marka anqäjjan arumajj ikipjjäna. 21 Ukatsti akham sasaw jupanakar qhan sarakiyäta: “¿Kunatsa arumajj murall uñkatasin ikisipkta? Jumanakatï mayamp uk lurapjjätajja, munkir jan munkir jumanakar akat alisnukupjjäma” sasa. Ukat uksarojj janiw mayampis jupanakajj sábado urun jutjjapjjänti.

22 Levitanakarusti qʼomäpjjañapataki ukhamarak punkunak uñjapjjañapatakiw mayirakiyäta, ukhamat sábado urojj sagradöñapataki.+ Diosajay, nayat amtasisajj janikiy ak armasimti. Wali munasiñat jan jaytjasir Diosätam laykojj nayat sinttʼasikitaya.+

23 Uka urunakansti judionakajj asdodita,+ ammonita, moabita+ warminakampi casaratäpjjatapwa* uñjarakiyäta.+ 24 Wawanakapat chikatanejj asdodita aru parlapjjäna, chikatanisti yaqha markanakan arunakap parlapjjäna, janirakiw ni maynis judionakan arup parlañ yatkänti. 25 Ukatwa jupanakarojj toqenoqasin maldisiyäta, yaqhep chachanakarojj nuwanoqayätwa,+ ñikʼutanaks jikʼirayätwa, Diosan sutipjjarojj mä juramento lurayarakiyäta. Ukatsti jupanakarojj akham sarakiyätwa: “Janiw phuchanakamarojj jupanakan yoqanakapamp casarapjjañamäkiti. Janirakiw yoqanakamarojj jupanakan phuchanakapamp casarapjjañamäkiti, ni jumanakas phuchanakapamp casarasipjjañamäkiti.+ 26 ¿Janit ukanak kawsajj Israelan Salomón reyipajj juchachaskänjja? Taqe yaqha markanak taypin janiw jupjam reyejj utjkänti.+ Diosapajj wal jupar munasïna,+ ukatwa juparojj taqe Israel markjjar reyit uttʼayäna. Ukhampachas juparojj extranjera warminakapaw juchachasiyapjjäna.+ 27 Akajj janiw cheqaw sañjamäkiti. Jumanakajj jan phenqʼanipuniw extranjera warminakamp casarasisajj Diosar apanukupjjtajja”+ sasa.

28 Eliasib+ sat jachʼa jilïr sacerdoten yoqapäki uka Joiadá+ chachan yoqanakapatjja, mä yoqapaw Sanbalat+ sat horonita chachan tollqapäjjäna, ukatwa juparojj munkir jan munkir nayan ukat alisnukta.

29 Diosajay, janikiy jupanakat armasimti, jupanakajj sacerdotet serviñarusa sacerdotenakampi+ levitanakampi+ pacto lurataparus phenqʼachapjjewa.

30 Ukatsti nayajj extranjero jaqenakan jan wali luratanakapatwa markankirinakarojj qʼomachta. Sacerdotenakarusa levitanakarus sapa mayniruw lugaranakapan servipjjañapatak uchta,+ 31 kunapachas lawanaksa+ nayrïri achunaksa apanipjjani uks wakicharaktwa.

Diosajay, janikiy nayat armtʼasistati, bendisikitaya.+