Job
8 Bildad+ sat suhita+ chachajj akham sasaw sarakïna:
2 “¿Kunapachkamas jumajj ukham parlaskakïta?+
¡Lakaman arsut arunakajj ina chʼusa arunakakiwa!*
3 ¿Kunanaktï Juezjamajj amtki ukanak Diosajj maysarut qʼewjani?
Jan ukajj ¿Taqe Chʼamani Diosajj kunatï cheqapäki ukcha maysar qʼewjani?
4 Yoqanakamaw jupa contra juch lurapjjpacha,
ukatwa kutkatasirïpjjatapat jupanakar castigaraki.
5 Ukampis jumatï Diosar jakʼachasisma,+
ukatsti Taqe Chʼamani Diosan sinttʼasiñap ruwtʼasirakisma,
6 jumatï cheqpachapun qʼoma ukhamarak cheqap jaqësmajja,+
jupajj jaysiristamwa,*
kunjamtï nayrajj jakaskayäta ukaruw kuttʼayjjeristam.
7 Qalltan jumajj jukʼa utjirinikïchiyätasa,
jutïrin wali utjirinëjjätawa.+
8 Mirä amp suma, nayra jaqenakaruy jisktʼasim,
kunanaktï jupanakan awkinakapajj jikjjatapkäna ukanaksa sum amuytʼarakim.+
9 Jiwasajj masürukiw nastanjja, janirakiw kuns yatktanti,
kuna laykutejj vidanakasajj aka oraqen mä chʼiwikiwa.
10 ¿Nayra jaqenakajj janit jumar yatichapkätamjja?
¿Janit jupanakajj kuntï yatipki ukanak sapkätamjja?*
11 ¿Papiro* alejj jan siniya* lugaran jilaspati?
¿Mä cañajj jan umampejj jilaspati?
12 Kunapachatï papiro* alimpi cañampejj niya panqarañampïski, janïra khuchuratäkaraki ukhajja,
yaqha alinakat sipans jukʼamp nayraw wañsjjani.
13 Taqe khitinakatï Diosat armasipki ukanakampejj uka pachparakiwa,*
kuntï jan wali* jaqejj suyki ukajj janipuniw phoqaskaniti.
14 Jupan confiyatapajj inamayakiwa,
jupan confiyatapajj mä kusikusin simpapar* uñtasitakiwa.
15 Jupajj kusikusin simpaparuw* apoytʼasini, ukampis uka simpajj tʼaqartaniwa.
Jupajj uka simparuw katthapisiñ yantʼani, ukampis uka simpajj janiw aguantkaniti.
16 Jupasti lupinjj mä chʼojjña alikiwa,
ramanakapajj jardín taypiruw saratati.+
17 Mä qala montonanjja saphinakapajj kʼanantasiwa,
qalanak taypinsti mä uta thaqaraki.*
18 Ukampis lugarapat apsutäjjani ukhajja,
uka lugarajj janiw mayampis jupar katoqañ munjjaniti, ‘janiw nayajj jumar uñtʼksmati’+ sasaw sarakini.
19 Jïsa, ukhamaw jupajj chhaqtjjani.*+
Ukatsti yaqha alinakaw laqʼat jilsunipjjani.
20 Cheqpachansa Diosajj taqpach chuymamp servir* jaqenakarojj janiw apanukkaniti,
jan walinak lurir jaqenakarusti janiw yanaptʼkaniti.*
21 Diosasti wasitat jumarojj lartʼayätam,
wasitatarak wali kusisiñampi arnaqasiyätam.
22 Uñisirinakamajj phenqʼachatäñamp isthapiyatäniwa,
jan wali jaqenakan carpapajj wiñayatakiw chhaqtarakini”.