Job
18 Bildad+ sat suhita chachajj akham sarakïnwa:
2 “¿Kunapachkamas ukham parlapjjäta?
Wal amuytʼasirïpjjatam uñachtʼayapjjam, ukjjaruw parltʼarakiñäni.
3 ¿Kunatsa jumanakajj animalanakarjam uñjapjjesta?+
¿Kunatsa jumanakajj jan amuytʼasiri jaqet* uñjapjjesta?
4 Jumajj jiskʼa jiskʼas colerasiñaman tukjasiskstajja,
¿juma kawsat oraqejj jaytanukutäni?
Jan ukajj ¿qarqanakach* lugarapat onjjtayatäni?
5 Cheqpachansa jan wali jaqen qhanapajj chhaqtayatäniwa,
ninapas janiw jukʼamp nakjjaniti.+
6 Carpapan qhanapajj cheqpachapuniw chʼamaktʼayatäni,
lamparapas jiwtʼjjaniwa.
7 Sarnaqañatakejj janiw chʼamanëjjaniti,
amtanakapas jan waltʼañaruw puriyi.+
8 Kuna laykutejj pachpa kayunakapaw qänar* puriyani,
muyunaqaniwa, qänaruw jaltʼarakini.
9 Mä trampaw kayu talonapat katuntani.
Mä trampaw juparojj katuntani.+
10 Jupatakejj mä pitaw* oraqen imantatäski,
thakipansti mä trampaw utjaraki.
11 Wali ajjsarkañanakaw juparojj taqe toqet wal ajjsarayaraki,+
kayu wintut niya takjjatirjamaw jupar arktaraki.
13 Jañchipajj tukusiskiwa,
amparanakaparusa charanakaparus mä jiwayir usuw* tukuntaski.
14 Juparojj carpapan jan ajjsaras jakañatwa apsupjje,+
ukatsti wali ajjsarkañanakan reyipäki ukhakamaw sarayapjje.*
15 Extranjeronakaw carpapan jakapjjani.*
Utapajj ninampi* tukjatäniwa.+
16 Mä qoqar* uñtataw jupan saphinakapajj wañsjjani,
ramanakapas suwartjjarakini.
17 Aka oraqensti janiw jupat amtasjjapjjaniti,
janirakiw sutipajj callenakan uñtʼatäkaniti.*
18 Juparojj qhanat chʼamakaruw apapjjani,
juparojj jayaruw oraqet alisnukupjjani.
19 Jupasti markap taypin janiw wawanakanïkaniti, janirakiw jupat jutir wawanakas utjkaniti,
kawkjantï jupajj jakki* uka cheqanjja, janiw ni mä jakiris jupatak utjkaniti.
20 Kunapachatï jupan jan waltʼäwi urupajj purinkani ukhajja, inti jalanta toqenkir jaqenakajj wal sustjasipjjani,
inti jalsu toqenkir jaqenakasti, wali ajjsarañampi katuntatäpjjarakiniwa.
21 Ukhamaw jan wal luriri jaqen carpaparojj pasi,
ukhamaw Diosar jan uñtʼki uka jaqerojj pasaraki”.