Jeremías
42 Ukatsti ejerciton taqpach jilïrinakapasa, Caréah chachan Johanán+ yoqapasa, Hosaya chachan Jezanías* yoqapasa, taqpach jaqenakas jiskʼat jachʼakam Jeremiasar jakʼachasipjjäna, 2 ukatsti Jeremías profetarojj akham sapjjänwa: “Mirä amp suma, nanakan wal ruwtʼasitaj istʼapjjakitaya. Jehová Diosamaruy akan jiltʼapkta taqe ukanakatakejj oracionan maytʼarapipjjeta. Kunjamtï uñjktajja, waljanïpkayäta ukanakat mä jukʼanikiw jiltʼjjapjjta.+ 3 Jehová Diosamay kawki thaksa sarapjjañajäspa, kunsa lurapjjañajäspa uk sapjjetpan” sasa.
4 Jeremías profetajj akham sasaw jupanakar säna: “Walikiwa. Nayaw kuntï mayipkista ukarjamajj jumanakan Jehová Diosamarojj oracionan mayëjja. Kuntï Jehová Diosajj jumanakatak siskani ukjja, ukhampach yatiyapjjarakïma. Janiw nayajj ni mä arsa imtʼapkämati” sasa.
5 Jupanakajj akham sasaw Jeremiasar sapjjäna: “Nanakatejj kuntï Jehová Diosajj juma taypi arskani uk jan sum phoqapkäjja, Jehová Diosay nanak contrajj mä confiykañ testigot saytʼpan. 6 Walïpansa jan walïpansa, khitin ukarutï khitasipksma uka Jehová Diosajan arunakap istʼapjjäwa. Ukhamatwa nanakan Jehová Diosajar istʼapjjatajat walikïsipkäjja” sasa.
7 Tunka urunak pasatatwa Jehová Diosajj Jeremiasar parläna. 8 Ukatwa Jeremiasajj Caréah chachan Johanán yoqaparusa, jupamp chikäpkäna uka ejerciton taqpach pʼeqtʼirinakaparusa, taqpach jaqenakarus jiskʼat jachʼakam jawsayäna.+ 9 Jeremiasajj akham sasaw jupanakar säna: “Jumanakan ruwtʼasitanakam jupar yatiyañajatak khitapkista uka Israelan Jehová Diosapajj akham siwa: 10 ‘Jumanakatï aka oraqen jakasipkakïtajja, nayajj jumanakjjar mä jan waltʼäwi apanitajat llakthapisïwa,+ jumanakarojj saytʼayapjjämawa, janiw tʼunjapkämati, ayruntapjjämawa,* janiw jikʼinukupkämati. 11 Jumanakajj ajjsarapkta uka Babilonian reyiparojj jan ajjsarapjjamti’.+
”‘Jan juparojj ajjsarapjjamti’, siw Jehová Diosajja, ‘nayaw jumanakampïskta, nayaw jupan amparapat salvapjjäma, antutayapjjarakïma. 12 Nayajj jumanakat khuyaptʼayasipjjämawa,+ jupasti jumanakat khuyaptʼayasipjjarakïtamwa, markamaruw kuttʼayanjjapjjätam.
13 ”’Ukampis jumanakatï “¡janiwa, nanakajj janiw aka markan quedasipkäti!” sapjjäta, ukatsti janirak jumanakan Jehová Diosaman arunakapar istʼasipkäta, 14 jumanakajj “janiwa, ukat sipans nanakajj Egipto oraqeruw sarjjapjjäjja,+ ukan janiw nanakajj guerranak uñjapkäti, janiw soldadonakan guerrar sarañapatakejj pututu phustʼasir istʼapkäti, janirakiw manqʼat pistʼapkäti, ukanwa nanakajj jakapjjäjja” sapjjarakïta ukhajja, 15 Judá markan jiltʼirinaka, Jehová Diosan arunakap istʼapjjam. Israelan Diosapäki uka ejercitonakan Jehová Diosapajj akham siwa: “Jumanakatï Egiptor sarañatak amtapjjapunsta, ukatsti ukar jakiri sarjjapjjarakïta* ukhajja, 16 Egiptonkasipkäta ukhaw ajjsarapkta uka enemigomajj espadampi jumanak contra jutani, jumanakajj ajjsarapkta uka manqʼat pistʼañaw Egipton utjani, ukanwa jiwarapjjarakïta.+ 17 Khitinakatï Egiptor sarañatak amtatäpki, ukan jakapkarakini taqe uka chachanakajja, espadampi, manqʼat pistʼañampi, usumpiw* jiwarapjjani. Jupanakjjar apankä uka jan waltʼäwit janiw ni maynis jupanakat salvaskaniti, ni escapkanisa” sasa’.
18 ”Israelan Diosapäki uka ejercitonakan Jehová Diosapajj akham siwa: ‘Kunjamtï nayan colerasiñajasa wal colerasitajasa Jerusalén markan jakirinakjjar jutkänjja, ukhamarakiw Egiptor sarapjjät ukhajj nayan wal colerasitajajj jumanakjjar jutani.+ Jumanakajj maldisitäpjjätawa, wali ajjsarkañaruw tukupjjäta, insultapjjätamwa,+ jiskʼachapjjarakïtamwa, janirakiw mayampis aka lugar uñj-jjapjjätati’ sasa.
19 ”Judá markan jiltʼirinaka, Jehová Diosaw jumanak contrajj arsu. Jan jumanakajj Egiptor sarapjjamti. Amtasipjjapunim, jumanakarojj jichhüruw ewjjtʼasipksma, 20 jumanakatï pantjasipjjätajja, vidanakam aptʼasipjjäta. Jumanakaw Jehová Diosar akham sasin jisktʼañajatak mayipjjestajja: ‘Jehová Diosamaruy nanakatakejj oracionan maytʼarapipjjeta. Kuntï Jehová Diosamajj siskätam ukanak ukhampach sapjjetäta, nanakasti ukarjamaw lurapjjarakëjja’+ sasa. 21 Jichhüruw nayajj jumanakar sasipksmajja, ukampis jumanakajj janiw Jehová Diosaman arunakapar istʼasipkätati, ni kuntï jupajj jumanakar sañatak siskitu uksa lurapkätati.+ 22 Ukhamasti kawkjarutï jakir sarañ munapkta uka lugaranjja, cheqpachans espadampi, manqʼat pistʼañampi, usumpiw* jiwapjjäta”.+