Job
20 Zofar+ sat naamatita chachajj akham sasaw sarakïna:
2 “Ukatwa nayan llaki amuyunakajajj jaysañatak obliguitu,
kuna laykutejj wali llakitätwa.
3 Nayar insultir cheqañchäwi istʼarakta.
Nayan amuyujajj jaysañatakiw nuktʼitu.
4 Cheqpachans jumajj aka toqet yatipunpachäyätawa,
jaqejj* luratäjjäna ukhatpachaw ukhamäjjäna,+
5 jan wali jaqen kusisiñat arnaqasitapajj mä jukʼatakikiwa,
6 Jupan jachʼañchasitapajj alajjpachkamas makatkchi,
pʼeqepajj qenayanakkamarak purchi ukhajja,
7 jupajj pachpa wanupjamaw wiñayatak chhaqtani.
Jupar uñjirinakajj ‘¿kawkinkis jupajja?’ sasaw sapjjarakini.
8 Jupajj kunjamtï mä samkajj chaqtki ukhamaw chhaqtani, janirakiw jukʼamp uñj-jjapjjaniti,
jupajj aruman uñstiri visionar uñtataw chhaqtjjarakini.
9 Jupar uñjapkäna uka nayranakajj janiw jukʼamp uñj-jjapjjaniti,
janirakiw juparojj mayampis utapan uñj-jjapjjaniti.+
10 Pachpa wawanakapaw pobrenakarojj yanaptʼa mayipjjani,
pachpa amparanakapaw walja utjirinakap kuttʼayjjani.+
11 Jupajj* mä waynan chʼamapampi phoqtʼatänwa,
ukampis taqpach chʼamapamp chikaw jiwjjani.
12 Jupatakisti, jan walïki uk lurañajj lakapankir mojjsa manqʼañampi sasiwa,
lajjrap manqhanwa umatatayaraki.
13 Jupajj lakaparuw katjjäsi,
mosqʼartʼasisajj janirakiw antutkiti.
14 Ukampis purakapar purjjepanjja, kunatï mosqʼäki ukajj kʼaskʼäjjaniwa.
Cobra sat asirun* venenopjamaw jupa manqhan tukjjani.
15 Jupajj wali valoraninak oqonti,* ukampis kutsuyaniniwa.
Diosaw jupan purakapat uk qʼal apsuni.
16 Cobra sat asirunakan* venenop uka jaqejj chʼamsuni.
Mä asiruw juparojj achutatasin jiwayani.
17 Jupajj janipuniw miskʼimpit lechempit disfrutkaniti,
ukanakajj jalir umar uñtasitawa.
18 Jupajj jan apaqasaw* utjirinakap kuttʼayjjani,
janirakiw negocionakapajj utjayki uka wali valoraninakat disfrutkaniti.+
19 Jupajj mä pobrer tukjiwa, apanukurakiwa.
Jupan jan luratäki uka utsa katuntasirakiwa.
20 Ukampis jupajj janiw chuymas chuymäkaniti,
utjiripas janiw juparojj jan waltʼäwit escapañ yanaptʼkaniti.
21 Jupan manqʼantañapatakejj janiw kunas jiltʼkiti,
ukatwa jupan nayrar sartatapajj jan jaya tiempotakïkaniti.
22 Kunapachatï jupan utjiripajj jukʼamp waljäjjani ukhajj wali llakitäniwa.
Taqe jan walinakaw jupa contrajj jutani.
23 Kunapachatï jan wali jaqejj purakap phoqtʼaykani ukhajja,
Diosajj* wali colerasiñapwa jupatakejj apayanini.
Jallur uñtataw jan walinakajj jupjjar jutani.
24 Kunapachatï hierrot lurat armanakat escapkani ukhajja,
cobret lurat mä arcon flechanakapaw juparojj junuranttani.
25 Jupajj jikhanipankki uka flecha apsusi,
higadopat* jupajj mä kʼajkir flech apsusi.
Wali ajjsarañaw jupar katuntaraki.+
26 Jupan wali valoraninakapajj wali chʼamakampi chhaqtayatäniwa.
Jan khitin naktayatäki uka ninaw jupar nakhantjjani.
Carpapan jan jiwapki ukanakarojj jan waltʼäwinakaw suyaski.
27 Alajjpachajj jupan pantjasitapwa qhanstayani,
oraqejj jupa contraw saytʼarakini.
28 Uman wal sartatapaw utap qʼal apasjjani,
Diosan* colerasiñap urunsti chʼamamp jalir umäjjarakiniwa.
29 Jan wali jaqerojj ukampiw Diosajj pagui,
Diosajj jupatak arski uka herenciarakiwa”.