Jeremías
47 Faraonajj Gaza markar janïr atackäna ukhajja, Jeremías profetajj aka arunakwa filisteonakjjat+ Jehová Diosat katoqäna. 2 Jehová Diosajj akham siwa:
“Alay toqet* umanakaw juti.
Uka umanakajj jilarkir umanakaruw tukuni,
oraqeruw uka umanakajj chhaqtayani, taqe kunatï ukan utjki ukarusa,
markarusa ukan jakirinakarusa.
Jaqenakajj arnaqasipjjaniwa,
markan taqe jakirinakasa jachapjjaniwa.
3 Caballonakan kayunakap oraqer taktʼasipjjatap istʼasasa,
guerran nuwasiñatak carronakapan chholloqetap istʼasasa,
ruedanakapan suynatap istʼasasa,
janiw awkinakas wawanakapar yanaptʼañatakejj qhepar uñtapkaniti,
amparanakapajj jan chʼamanëjjatap layku.
4 Cheqas puriniñampïski uka urojj taqpach filisteonakaruw tukjani,+
Tiro+ markampin Sidón+ markampin jiltʼapki, jupamp mayachtʼasipki taqe jupanakaruw tukjani.
5 Pʼeq qʼaräñajj* Gaza markaruw purini.
Asquelón markajj amuktʼayatawa.+
Valle pampanakapan jiltʼirinaka,
¿kunapachkamas jumanak pachpajj kharinoqasipjjäta?+
6 ¡Jehová Diosan espadapa!+
¿Kunapachkamas jan aleqtʼkäta?
Espada imañamar kuttʼjjam.
Samartʼasajj amuktʼam.
7 ¿Kunjamarak aleqtʼanisti?
¿Janit Jehová Diosajj mä orden churki?
Jupaw Asquelón contra qota jakʼankir contra nuwasiñapatakejj+
espadar ordeni”.