Jueces
17 Efraín+ tribun qollunakap toqenjja mä chachaw utjäna, Miqueas sutini. 2 Jupasti akham sasaw mamapar säna: “¿1.100 qollqe metalanak aparapkayätam uk amtasktati? Aparkayätam ukarojj maldisiyätawa, nayasti uk istʼarakiyätwa. Ukampis uka qollqe metalanakajj nayamp chikäskiwa. Nayaw aptarakiyäta” sasa. Uk satasti mamapajj akham sänwa: “Jehová Diosajj yoqajar bendispan” sasa. 3 Ukatsti jupajj 1.100 qollqe metalanak mamaparuw kuttʼayjjäna, mamapasti akham sarakïnwa: “Amparajampiw Jehová Diosatak aka qollqe metalanak sagrador tukuyäjja, ukhamat yoqajajj mä idolompi mä estatuampi lurañapataki.+ Jichhajj jumaruw kuttʼayjjsma” sasa.
4 Qollqe metalanak mamapar kuttʼaykäna uka qhepatjja, mamapajj 200 qollqe metalanak katusajj qollqe metalamp trabajiriruw churäna. Ukatwa jupajj qollqe metalanakat mä idolompi mä estatuampi luräna, ukanakajj Miqueas chachan utapanwa uchasirakïna. 5 Miqueas chachajj idolonakani utanïnwa,* jupaw mä efod+ isimpi terafim idolonakampi*+ luräna, yoqanakapat maynirusti sacerdotëñapatakiw uttʼayarakïna.*+ 6 Uka urunakanjja Israel markan janiw mä reyejj utjkänti,+ sapa mayniw kunatï amuyuparjamajj walïki uk lurirïna.+
7 Judá toqenkir Belén+ markanjja, Judá familiankir mä waynaw utjäna. Jupajj mä levitänwa,+ mä qhawqha tiempokiw Judá toqenkir Belén markan jakarakïna. 8 Jupasti Judá toqenkir Belén markat yaqha cheqaruw jakañatak mä lugar thaqer saräna. Viajkasasti Efraín tribun qollunakap toqeruw purïna, Miqueas+ chachan utaparu. 9 Miqueas chachasti juparojj sarakïnwa: “¿Kawkitsa jutta?” sasa. Waynasti akham sarakïnwa: “Judá toqenkir Belén markankirïtwa, mä levitätwa, mä lugar jakasiñatak thaqaskta” sasa. 10 Miqueas chachajj jupar sarakïnwa: “Nayan ukar quedasim, nayatakejj mä awkjamäyätawa,* sacerdoterakïyätawa. Nayajj tunka qollqe metalanak mä maran churäma, wakiski uka isinaksa, manqʼsa churarakïmawa” sasa. Ukatwa uka levitajj utar mantäna. 11 Ukhamwa levita waynajj Miqueasan utapan quedasiñ amtäna, waynasti jupan mä yoqapäkaspas ukhamarakïnwa. 12 Ukatjja Miqueasajj sacerdotëñapatakiw jupar uttʼayäna,*+ Miqueasan utapanwa jakarakïna. 13 Miqueasajj akham sarakïnwa: “Jichhasti Jehová Diosajj bendisitaniwa, mä levitaw nayan sacerdotejajja” sasa.