Jueces
21 Israelita chachanakajj akham sasaw Mizpá+ markan mä juramento lurapjjäna: “Janiw jiwasanakat khitis mä benjaminita chacharojj warmipäñapatak phuchap churkaniti”+ sasa. 2 Ukatjja israelitanakajj Betel+ markaruw sarapjjäna, ukanwa cheqpach Dios nayraqatan jaypʼukam qontʼasipjjäna, jupanakajj wal arnaqasipjjäna, chuymas kawkstʼataw wal jachapjjarakïna. 3 Jupanakajj akham sapjjänwa: “Israelan Jehová Diosapa, ¿kunatsa Israelan ukanakajj pasi? ¿Kunatsa Israelan mä tribupajj jichhürun chhaqti?” sasa. 4 Qhepürusti markpachaw alwat sartasipjjäna, ukanwa nakhantayat ofrendanakampi sumankañ ofrendanakampi+ loqtañatakejj mä altar lurapjjäna.
5 Ukatjja israelitanakajj markpachaw akham sapjjäna: “¿Israelan taqe tribunakapat kawkïris Jehová Dios nayraqatan jiwasamp chik tantachtʼasirejj Mizpá markar jan makatkänjja?” sasa. Jupanakasti kawkïritejj Jehová Dios nayraqatan tantachtʼasiñatak Mizpá markar jan makatki ukar jiwayañatakiw mä juramento lurapjjäna. 6 Israelitanakajj kunatï benjaminita jilanakapar paskäna uk yatisajj wal llakisipjjäna. Jupanakajj akham sapjjänwa: “Jichhürojj Israelan mä tribupaw qʼal chhaqti. 7 Jiwasajj Jehová Dios nayraqatanwa jupanakar phuchanakas jan churañatakejj mä juramento lurayätanjja,+ ukhamajj ¿kawkitsa jiltʼki uka benjaminita jilanakasatak warminak jikjjatsna?”+ sasa.
8 Jupanakajj akham sasaw jisktʼapjjäna: “¿Israelan taqe tribunakapat kawkïris Jehová Dios nayraqatan jiwasamp chik tantachtʼasirejj Mizpá markar jan makatkänjja?”+ sasa. Jupanakasti campamenton tantachtʼasitäpkäna ukarojj Jabés-Galaad markat jan khitin saratapwa amuyapjjäna. 9 Israelitanakajj jaqenak jaktʼapjjäna, ukhamatwa Jabés-Galaad markan jakirinakat jan khitin saratap yatipjjäna. 10 Ukatwa tantachtʼasitäpkäna ukanakajj wali chʼamani chachanakat 12.000 chachanak uka markar khitapjjäna. Uka chachanakarojj akham sapjjarakïnwa: “Sarapjjam, Jabés-Galaad markankirinakarojj espadamp jiwarayanipjjam, warminaksa wawanaksa qʼal jiwarayanipjjam.+ 11 Jumanakajj ak lurapjjañamawa: taqe chachanakampiru warminakampiruw qʼal jiwarayapjjañama, mä chachamp jan ikthapki uka warmirukiw jan jiwayapjjañamäkiti” sasa. 12 Jabés-Galaad markan jakirinakatjja, 400 virgen tawaqonakwa katupjjäna, jupanakajj janipuniw kunapachas mä chachampi ikthapipkataynati. Ukatwa jupanakarojj Canaán oraqer Siló+ markankir campamentor apanipjjäna.
13 Ukatjja tantachtʼasit taqe israelitanakajj Rimón jachʼa qarqankir*+ benjaminitanakarojj sumankthapiñatakiw mä yatiyäwi apayapjjäna. 14 Ukatwa benjaminitanakajj oraqepar kuttʼanjjapjjäna. Israelitanakajj Jabés-Galaad+ markan jan jiwayatäkäna uka warminakaruw jupanakar churapjjäna, ukampis janiw taqenitakjamäkänti. 15 Jehová Diosajj Israelan tribunakapwa tʼaqjjtayaskäna, ukatwa israelitanakajj kunatï Benjamín tribur paskäna+ uk yatisin wal llakisipjjäna. 16 Tantachtʼasit israelitanakan ancianonakapajj akham sapjjänwa: “Taqe benjaminita warminakaw jiwarayatäpjje, ¿kunsa jichhajj benjaminita jilanakasat jiltʼki ukanakan warminïpjjañapatak lursna?” sasa. 17 Jupanakajj sapjjarakïnwa: “Benjaminitanakat jan jiwapki ukanakatakejj oraqepaw herenciat utjañapa, ukhamat Israel taypin mä tribujj jan chhaqtañapataki. 18 Ukampis janiw jiwasajj phuchanakasat warmipäñapatak churksnati, israelitanakajj markpachaw mä juramentomp akham arsüna: ‘Benjamín tribunkirinakar warmi churirejj maldisitäpan’+ sasa”.
19 Ukatsti jupanakajj sapjjarakïnwa: “Sapa maraw fiestajj Jehová Diosatak Siló+ markan utji, uka markajj Betel markat alay toqenkiwa,* Betel markat Siquem markar makatki uka thakit inti jalsu toqena, Leboná cheqat aynachana”* sasa. 20 Ukatwa jupanakajj benjaminita chachanakar akham sapjjäna: “Sarapjjam, uvas yapunakar imantasinipjjam. 21 Kunapachatï Siló markankir tawaqonakaru thoqoñatak mistunir uñjapjjäta ukhajja, jumanakajj uvas yapunakat mistunipjjañama, sapa maynirakiw Siló markankir tawaqonakarojj warmimäñapatak katuntapjjañama, ukatjja benjaminita oraqeruw kuttʼjjapjjañamaraki. 22 Jupanakan tatanakapatï jan ukajj jilanakapatï nanak contra quejasir jutapjjani ukhajja, nanakajj akham sapjjäwa: ‘Benjaminitanak laykojj khuyaptʼayasipjjakitaya, nanakajj janiw guerran nuwasisajj taqenir mä warmi churapkti,+ jupanakar warmi churasajj janiw juramentomp arsupkta uk pʼakintapktati’+ sasa”.
23 Benjaminita chachanakasti kunjamtï jupanakar sapkäna ukhamwa lurapjjäna, sapa maynirakiw thoqosipkäna uka tawaqonakat warmipäñapatak irpasipjjäna. Ukatsti herenciat katoqapkäna uka oraqeruw jupanakajj kuttʼjjapjjäna,+ ukanwa markanakap wasitat saytʼayasisajj jakapjjarakïna.
24 Uka tiemponsti israelitanakajj uka lugarat aywitatjjapjjänwa, sapa mayniw tribuparu familiaparu sarjjäna. Uka lugarat sartasajj herenciat katoqapkäna uka oraqenakaparuw sarjjapjjarakïna.
25 Uka urunakanjja Israel markan janiw mä reyejj utjkänti,+ sapa mayniw kunatï amuyuparjamajj walïki uk lurirïna.