Jueces
19 Kunapachatï Israelan mä reyejj jan utjkäna uka urunakanjja,+ mä levita chachaw utjäna, Efraín+ tribun qollunak toqenwa wali jayankir mä jiskʼa markan jakarakïna, jupasti warmipäñapatakejj Judá toqenkir Belén+ markatwa mä concubina katusïna. 2 Ukampis concubinapajj qʼañu jucha luräna. Jupasti tatapan utapar sarañatakiw chachapar jaytjjäna, tatapan utapajj Judá toqenkir Belén markankänwa. Pusi phajjsinakaw jupajj ukan quedasirakïna. 3 Ukatsti chachapajj jupan qhepap sarasaw kuttʼanjjañapatak suma arunakamp parlir saräna. Chachapajj serviripampi pä asnonakampiw saräna. Warmisti tatapan utaparuw chachapar irpantäna, tatapasti jupar uñjasajj wal kusisïna. 4 Ukatwa suegropajja, mä arunjja tawaqon tatapajj kimsa uru ukan quedasiñapatak jupar iyaw sayäna. Ukanwa manqʼapjjäna, umapjjäna, ukanwa jupajj ikirakïna.
5 Pusïri urunjja sarjjañatakiw jupanakajj wali alwat sartasipjjäna, tawaqon tatapasti akham sasaw tollqapar sarakïna: “Chʼam katjjaruñatakejj manqtʼasim, ukatwa sarjjapjjäta” sasa. 6 Ukatwa jupanakajj qontʼasisin, manqʼapjjäna, umapjjarakïna. Ukatsti tawaqon tatapajj akham sasaw uka chachar säna: “Mirä amp suma, jichha arumajj akan iktʼam, kusistʼarakim”* sasa. 7 Uka chachajj sarjjañampëjjäna ukhajja, suegropajj ruwtʼaskakïnwa, ukhamatwa jupajj mä arumamp ukan ikirakïna.
8 Phesqëri urun wali alwat sarjjañatak sartäna ukhajja, akham sasaw tawaqon tatapajj jupar säna: “Mirä amp suma, chʼam katjjaruñatak manqtʼasim” sasa. Jupanakasti jaypʼukamaw ukankapjjäna, manqʼasipkakïnwa. 9 Uka chachajj concubinapampi serviripampi sarjjañampëjjäna ukhajja, tawaqon tatapäki uka suegropajj akham sasaw jupar säna: “¡Uñjam! Niyaw arumäjjani. Mirä amp suma, jichha arumamp iktʼawayapjjam. Niyaw chʼamakthapiski. Akan iktʼam, kusistʼarakim. Qharüruw viajiñatak alwat sartapjjäta, utamaruw* sarjjarakïta” sasa. 10 Ukampis uka chachajj janiw mä arumamp ukan quedasiñ munkänti, ukatwa sartasajj Jebús markar viajet sarjjäna, mä arunjja Jerusalén markaruw sarjjäna.+ Jupajj pä karuntʼat asnompi, concubinapampi, serviripampi ukhamaw sarjjäna.
11 Jebús marka jakʼankjjapjjäna ukhajja, niyaw intejj jalantañampïskäna. Ukatwa serviripajj uywiripar akham säna: “¿Jebuseonakan aka markapanti quedassna? ¿Ukanti jichha arumajj ikiraksna?” sasa. 12 Uywiripasti akham sasaw jupar säna: “Janiw extranjero jaqenakan markapan quedasksnati, jupanakajj janiw israelitanakäpkiti. Guibeá+ markakam saraskakiñäni” sasa. 13 Serviriparojj akham sarakïnwa: “Guibeá markaru jan ukajj Ramá+ markar puriñkam saraskakiñäni, uka markanakat kawkïrins iktʼapuniñäniwa” sasa. 14 Ukatwa jupanakajj sarasipkakïna, Benjamín tribun oraqepankir Guibeá markar jakʼachasjjapjjäna ukhaw intejj jalantjjäna.
15 Jupanakajj Guibeá markaruw quedasipjjäna, uka markan iktʼañatakiw ukar mantapjjarakïna. Ukar mantasajj markan plazapanwa qontʼasipjjäna, ukampis janiw khitis uka arumajj utapan iktʼapjjañapatak jawskänti.+ 16 Ukatsti arumarojj mä awki jaqew yapupan trabajinisajj kuttʼasinkäna. Jupajj Efraín+ tribun qollunak toqenkir chachänwa, ukampis Guibeá markanwa mä qhawqha tiempo jakäna. Uka markankirinakajj benjaminita+ jaqenakäpjjänwa. 17 Kunapachatï uka awki jaqejj viajkäna uka chachar markan plazapan uñjäna ukhajja, akham sasaw jupar jisktʼäna: “¿Kawkirus saraskta? ¿Kawkitsa jutta?” sasa. 18 Uk satasti jupajj sarakïnwa: “Nanakajj Judá toqenkir Belén markat jutasajja, Efraín tribun qollunakap toqen utji uka wali jayankir mä jiskʼa markaruw viajisipkta, nayajj uka markatätwa. Judá toqenkir Belén+ markaruw sarta, jichhajj Jehová Diosan tabernaculoparuw* saraskta,* janirakiw khitis utapar jawskituti. 19 Qhawqha manqʼañatejj asnonakajatak wakiski ukajj utjasipkituwa,+ nayatakisa, warmijatakisa, servirijatakis tʼantʼampi+ vinompejj utjasipkarakituwa, janiw kunas faltapkituti” sasa. 20 Ukampis uka awki jaqejj akham sasaw jupar säna: “¡Walikpun juttajja! Kunatï jumatak wakiski uk nayaw churäma. Janikiy plazan ikimti” sasa. 21 Ukhamatwa jupanakarojj utapar irpantäna, asnonakarusti manqʼa* churarakïna. Jupanakasti kayunakap jareqasisajj manqtʼasipjjänwa, umtʼapjjarakïnwa.
22 Jupanakajj kusistʼasipkäna ukhajja, mä qhawqha jan wali chachanakaw* uka utar muyuntapjjäna, wali chʼamampiw uta punku leqʼentapjjarakïna. Utani awki jaqerusti, kutin kutiniw akham sapjjäna: “Utamar mantki uka chachar irpsunim, jupamp ikintasipjjañajataki”+ sasa. 23 Ukatwa utanejj mistunisin akham säna: “Janikiy jilatanaka, mirä amp suma, jan kuna jan walsa lurapjjamti. Uka chachajj utajan alojatawa. Jan uka phenqʼaskañ luräwi lurapjjamti. 24 Akankaskiw virgen phuchajasa uka chachan concubinapasa. Jupanakar irpsunirapipjjäma, kuntï jupanakar lurañ munapkta ukwa jupanakar lurapjjarakisma.*+ Ukampis uka chacharojj janiw kuna phenqʼaskañ luräwsa lurapjjañamäkiti” sasa.
25 Ukampis uka chachanakajj janiw utanir istʼañ munapkänti, ukatwa levita chachajj concubinapar+ katusajj uka chachanakan ukarojj anqar irpsüna. Jupanakajj alwakamaw arum paqar uka warmirojj violapjjäna, abusapjjarakïna. Qhantatëjjäna ukhaw uka warmir khitjjapjjäna. 26 Wali alwäkäna ukhajja, kawkjankkäntï chachapajj* uka utar jutasaw uka warmejj punku mantañan jaqotattäna, qhanjtaniñapkamaw ukankaskarakïna. 27 Kunapachatï chachapajj alwat sartasin viajet saraskakiñatak uta punkunak llawiräna ukhajja, concubinaparuw uñjäna, warmisti uta punkun jaqosiskäna, amparanakapas punkun marcopankarakïnwa. 28 Ukatjja warmirojj akham sänwa: “Sartjjamaya, sarjjañäni” sasa. Ukampis warmejj janiw arskänti. Chachasti warmir aptasajj asnopjjaruw apjjatäna, utaparuw sarjjarakïna.
29 Utapar purisasti jupajj uywa khariñ cuchillo aptäna, concubinapan jiwat cuerpop katusajj 12 partenakaruw kharinoqarakïna. Ukatsti Israelan sapa tribuparuw mä partekam apayäna. 30 Uk uñjirinakasti taqeniw akham sapjjäna: “Israelitanakajj Egipto oraqet makatanipki uka urut jichhürkamajja, janipuniw kunapachas ukhamajj pasirïkänti, ni uñjasirïkänsa. Amuykipapjjam, parlakipapjjam,+ kunsa amuyapjjta uk sapjjarakita” sasa.