1 Crónicas

11 Tiempompejj taqe israelitanakaw Hebrón+ markan Davidampi tantachtʼasipjjäna, jupanakasti akham sapjjänwa: “Nanakajj juman jilanakamäpjjtwa.+ 2 Saúl chachajj reyit apnaqkäna ukapachajja, jumaw Israel markarojj guerran nuwasiñan pʼeqtʼayätajja.+ Jehová Diosamajj akham sayätamwa: ‘Jumaw Israel markajarojj uñjarapitäta, jumarakiw Israel markajan pʼeqtʼiripäyäta’+ sasa”. 3 Ukatwa Israel markan taqe ancianonakapajj* Hebrón markan reyin ukar jutapjjäna, David reyisti Hebrón markanwa Jehová Dios nayraqatan jupanakamp mä pacto luräna. Ukatsti kunjamtï Jehová Diosajj Samuel taypi arskäna+ ukarjamaw jupanakajj Israel markan reyipäñapatak Davidar uttʼayapjjäna.*+

4 Uka qhepatsti Davidampi taqpach Israel markampejj Jerusalén markaruw sarapjjäna, mä arunjja Jebús+ markaruw sarapjjäna, kawkjantï jebuseonakajj+ jakapkäna uka oraqeru. 5 Jebús markan jakirinakajj akham sasaw Davidat burlasipjjäna: “¡Janipuniw jumajj akar mantankätati!”+ sasa. Ukampis Davidajj jachʼa perqanakamp muyuntat Sion katuntäna,+ qhepatjja uka lugarajj Davidan Markapa+ satäjjänwa. 6 Ukatwa Davidajj akham säna: “Kawkïritejj jebuseonak contra nayraqat saytʼkani ukaw jilïrini, principerakïni” sasa. Ukatjja Zeruyá warmin Joab+ sat yoqapaw nayraqat makatäna, ukhamatwa jupajj jilïrëjjäna. 7 Ukatjja Davidajj jachʼa perqanakamp muyuntat markanwa jakjjäna. Ukatwa uka markarojj Davidan Markapa sasin sapjjäna. 8 Davidasti markan murallanakapampi yaqha construccionanakamp markpachan luräna, Montículo* sat lugarat uka jakʼankir cheqanakkama. Ukat uksarojj Joab chachaw mark wasitat saytʼayäna. 9 Ukhamatwa Davidajj jukʼampi chʼamanir tukuskäna,+ ejercitonakan Jehová Diosapas jupampirakïnwa.

10 Aka chachanakaw Davidankkäna uka guerran nuwasir chʼamani chachanakarojj pʼeqtʼapjjäna, jupanakaw taqe israelitanakampejj Davidarojj reyit apnaqañapatak yanaptʼapjjäna, kunjamtï Jehová Diosajj Israel markarojj mä promesa lurasin arskäna ukarjamaw juparojj reyit uttʼayapjjäna.+ 11 Davidan guerran nuwasir chʼamani chachanakan listapajj akawa: Jasobeam+ sat mä hacmonitan yoqapa, jupaw kimsanir pʼeqtʼäna.+ Mä kutejja Jasobeam chachajj 300 chachanakaruw lanzapamp jiwarayäna.+ 12 Ukjjarusti Dodó sat ahohíta+ chachan Eleazar+ yoqapa, jupajj guerran nuwasir chʼamani kimsa chachanak taypinkänwa. 13 Eleazar chachajj Davidamp chikaw Pas-Damim+ sat cheqankäna, ukhamat filisteonak contra guerran nuwasiñataki. Uka cheqanjja cebada yapuni mä oraqew utjäna, soldadonakajj filisteonakat escapjjapjjarakïnwa. 14 Ukampis Eleazar chachajj uka pachpa oraqer saytʼasisaw filisteonakar jiwarayaskakïna, janirakiw filisteonakarojj uka oraqe katuntaykänti, ukhamatwa Jehová Diosajj israelitanakar atipjayäna.*+

15 Qarqa* cheqarusti, 30 pʼeqtʼirinakat kimsa chachanakaw Adulam sat qollu pʼiyar+ Davidan ukar saraqapjjäna. Ukañkamajj filisteonakan ejercitopaw Refaím+ vallen campamentopankaskäna. 16 Davidajj imantasiñ cheqankaskänwa, filisteonakan tropapajj Belén markankaskarakïnwa. 17 Ukapachaw Davidajj kuntï wal munkäna uk akham sasin arsüna: “Belén markan punkup jakʼan utjki uka uma estanquen umap mä jukʼaks umtʼirista,+ nayajj walpun kusisirista” sasa. 18 Uk istʼasasti kimspachaniw filisteonakamp nuwasisajj uka campamentopar mantapjjäna, ukatjja Belén markan punkup jakʼan utjki uka uma estanquetwa um waysupjjäna. Uka umsti Davidan ukaruw apapjjarakïna, ukampis Davidajj janiw uka um umtʼañ munkänti, antisas Jehová Diosatakiw uka um wartäna. 19 Davidajj akham sänwa: “¡Diosar respetataj laykojj janipuniw uk lurañajajj walïkaspati! ¿Kunjamaraki nayajj niyapun vidap aptʼasipki uka chachanakan wilap umtʼiriststi?+ Jupanakajj vidaps aptʼasirpachaw aka um aptir sarapjje” sasa. Ukhamasti jupajj uka um janiw umtʼañ munkänti. Ukanakwa guerran nuwasir chʼamani kimsa chachanakajj lurapjjäna.

20 Joab+ chachan Abisái+ sat jilapajj yaqha kimsa chachanakaruw pʼeqtʼarakïna. Mä kutejja Abisái chachajj 300 chachanakaruw lanzapamp jiwarayäna, jupajj guerran nuwasiñatak chʼamani kimsa chachanakjam wali uñtʼatarakïnwa.+ 21 Uka kimsa chachanakat sipansa, Abisái chachaw mayni pä chachanakat sipans wali mintat jaqënjja, juparakiw jupanakan pʼeqtʼiripänjja. Ukampis jupajj janiw mayni kimsa chachanakjamäkänti.

22 Jehoiadá chachan Benaya+ sat yoqapajj jan ajjsariri chachänwa,* jupajj walja musparkañ luräwinakwa Cabzeel+ markan luräna. Jupaw Moab toqenkir Ariel chachan pä yoqanakaparojj jiwarayäna, juparakiw khununtaskir urun mä estanquer mantasajj mä leonar jiwayäna.+ 23 Jupaw mä egipcio jachʼa jaqerojj jiwayarakïna, uka jaqejj mä 2 metro 20 centimetronïnwa.*+ Uka egipcio jaqejj amparapan mä lanzanïnwa, lanzapan lawapas telaramp trabajirinakan lawapjam jachʼarakïnwa,+ ukampis Benaya chachajj mä lawampikiw uka egipcio jaqemp nuwasiñatak jakʼachasïna. Ukatsti egipcion amparapat lanza aparasajj uka pachpa lanzapampiw jupar jiwayäna.+ 24 Taqe ukanakwa Jehoiadá chachan Benaya yoqapajj luräna, guerran nuwasir chʼamani kimsa chachanakjam wali uñtʼatarakïnwa. 25 Jupajj 30 chachanakat sipans wali aytatäkchïnsa, janiw guerran nuwasir chʼamani mayni kimsa chachanakjamäkänti.+ Ukampirus Davidajj jupar uñjiri guardianakapar pʼeqtʼañapatakiw uttʼayäna.

26 Ejercitonakan guerran nuwasiri chʼamani chachanakajj akanakänwa: Joab chachan Asahel+ jilapa, Belén markankir Dodó chachan Elhanán yoqapa,+ 27 Samot sat harorita chachampi, Hélez sat pelonita chachampi, 28 Iqués sat tecoíta chachan Irá+ sat yoqapampi, Abí-Ézer+ sat anatotita chachampi, 29 Sibecái+ sat husatita chachampi, Ilái sat ahohíta chachampi, 30 Maharái+ sat netofatita chachampi, Baaná sat netofatita chachan Héled+ yoqapampi, 31 benjaminitanakan+ oraqepankkäna uka Guibeá markankir Ribái sat chachan Itái yoqapampi, Benaya sat piratonita chachampi, 32 Gaas+ sat jawiranak toqenkir Hurái chachampi, Abiel sat arbatita chachampi, 33 Azmávet sat baharumita chachampi, Eliahbá sat saalbonita chachampi, 34 Hasem sat guizonita chachan yoqanakapampi, Sagué sat hararita chachan Jonatán yoqapampi, 35 Sacar sat hararita chachan Ahiam yoqapampi, Ur chachan Elifal sat yoqapampi, 36 Héfer sat mekeratita chachampi, Ahíya sat pelonita chachampi, 37 Hezró sat carmelita chachampi, Ezbái chachan Naarái sat yoqapampi, 38 Natán chachan Joel jilapampi, Hagrí chachan Mibhar sat yoqapampi, 39 Zélec sat ammonita chachampi, Naharái sat berotita chachampi, jupajj Zeruyá warmin Joab sat yoqapan armadurap apirïnwa. 40 Irá sat itrita chachampi, Gareb sat itrita chachampi, 41 Urías+ sat hitita chachampi, Ahlái chachan Zabad sat yoqapampi, 42 Sizá sat rubenita chachan Adiná sat yoqapampi, jupajj rubenitanakan mä pʼeqtʼiripänwa, jupamp chikasti 30 chachanakaw utjäna. 43 Maacá chachan Hanán sat yoqapampi, Josafat sat mitnita chachampi, 44 Uzía sat asteratita chachampi, Hotam sat aroerita chachan Sama, Jeiel sat yoqanakapampi, 45 Simrí chachan Jediael yoqapampi, Johá sat tizita jilapampi, 46 Eliel sat mahavita chachampi, Elnaam chachan Jeribái, Josavías sat yoqanakapampi, Itmá sat moabita chachampi, 47 Eliel, Obed chachanakampi, Jaasiel sat mezobaíta chachampi.