Salmos
Directorataki. Seminit* ukarjam afinata. Davidan salmopa.
12 Jehová Dios Tata, salvakitaya, kuna laykutejj jan jaytjasir jaqejj janiw utj-jjeti,
confiykañ jaqenakas jaqenak taypit tukusjjewa.
2 Jupanakajj kʼarinakwa jupanakkamajj parlapjje,
lakanakapampis jachʼañchtʼapjjewa, jaqenakarus engañjapjjarakiwa.*+
3 Jehová Diosajj yaqhanakar jachʼañchtʼir taqe lakanakwa chhaqtayani,
jachʼañchasir lajjranaksa chhaqtayarakiniwa.+
4 Akham sirinakarojj jupajj tʼunjaniwa: “Lajjranakajajj wali chʼamaniwa.
Lakanakajsa munañanakajarjamaw apnaqapjjta,
janiw nanakatakejj khitis patronäkaspati”.+
5 Jehová Diosajj akham siwa: “Llakitanakan tʼaqesiyatäpjjatapatsa
pobrenakan llakirtʼasipjjatapatsa,+
nayajj sartasïwa.
Nayaw jupanakarojj jiskʼachirinakapat salväjja” sasa.
6 Jehová Diosan arunakapajj qʼomawa,+
arunakapajj hornor* qʼomachat qollqer uñtasitäpjjewa, paqallq kuti qʼomachatäpjjewa.
7 Jehová Dios Tata, jumaw jupanakarojj imäta,+
aka tiempon jakir jaqenakat jumaw sapa maynir wiñayatak jarkʼaqäta.
8 Jan wali jaqenakajj munañaparjamakiw sarnaqapjje,
kuna laykutejj jaqenakan wawanakapajj jan walinak lurañaruw chʼamañchapjje.+