1 Crónicas
12 Kunapachatï Davidajj Quis chachan Saúl+ sat yoqap kawsajj escapaskäna ukhajja, aka chachanakaw Ziclag+ markarojj Davidan ukar jutapjjäna. Jupanakasti Davidar nuwasiñan yanaptʼapkäna uka guerran nuwasir chʼamani chachanak taypinkapjjarakïnwa.+ 2 Jupanakajj flechtʼañ arconakamp armantatäpjjänwa, chʼeqa amparampi kupi amparampiw qalanak+ jaqtʼapjjerïna,+ arcompis flechanak flechtʼapjjerïna. Jupanakajj Benjamín+ tribunkirïpjjänwa, Saúl chachan jilanakapäpjjarakïnwa.* 3 Ahiézer chachaw jupanakar pʼeqtʼäna, ukjjarusti Joás chachaw pʼeqtʼarakïna. Jupanak paninejj Semaá sat guibeatita+ chachan yoqanakapäpjjänwa. Azmávet+ chachan Jeziel ukhamarak Pélet sat yoqanakapampi, Beracá chachampi, Jehú sat anatotita chachampi, 4 Ismayá sat gabaonita+ chachampi, jupajj 30 pʼeqtʼirinak taypin guerran nuwasir mä chʼamani chachänwa,+ 30 pʼeqtʼiri chachanakaruw pʼeqtʼarakïna; Jeremías, Jahaziel, Johanán sat chachanakampi, Jozabad sat guederatita chachampi, 5 Eluzái, Jerimot, Bealías, Semarías sat chachanakampi, Sefatías sat harifita chachampi, 6 Elcaná, Isías, Azarel, Joézer, Jasobeam sat coreíta+ chachanakampi; 7 Joelá chachampi Zebadías chachampi, jupanakajj Guedor lugarankir Jeroham chachan yoqanakapänwa.
8 Gaditanakat yaqhepanakajja, wasarankir imantasiñ cheqanwa David toqet saytʼasipjjäna.+ Jupanakajj guerran nuwasir chʼamani chachanakäpjjänwa, guerran nuwasiñatak yatichat soldadonakäpjjänwa, jachʼa escudompi lanzampi nuwasiñatakis wakichtʼatäpjjänwa. Jupanakan ajanunakapajj leonanakan ajanunakapar uñtasitänwa, qollunakan tʼijnaqeri gacela animalanakar uñtasitaw ratuk tʼijupjjerïna. 9 Ézer chachaw pʼeqtʼäna, payïrejj Abdías chachänwa, kimsïrejj Eliab chachänwa, 10 pusïrejj Mismaná chachänwa, phesqërejj Jeremías chachänwa, 11 sojjtïrejj Atái chachänwa, paqallqörejj Eliel chachänwa, 12 kimsaqallqörejj Johanán chachänwa, llätunkïrejj Elzabad chachänwa, 13 tunkïrejj Jeremías chachänwa, tunka mayanïristi Macbanái chachänwa. 14 Jupanakaw gaditanakat+ ejército pʼeqtʼirïpjjäna. Jukʼa chʼamanejj 100 soldadonakamp sasïnwa, jila chʼamanisti 1.000 soldadonakamp sasirakïnwa.+ 15 Kunapachatï Jordán jawirajj wali phoqa jilaras mantaskäna uka nayrïri phajjsinjja, uka chachanakaw Jordán jawira paskatapjjäna, taqe khitinakatï pampa oraqen jakapkäna ukanakarojj inti jalsu ukhamarak inti jalanta toqenakaruw escapayapjjäna.
16 Benjamín tribunkiri Judá tribunkiri yaqhep chachanakasti, imantasiskäna uka cheqaruw Davidan ukar jutapjjäna.+ 17 Ukhamasti Davidajj jupanak nayraqatar mistunisajj akham sänwa: “Jumanakatejj sumankañataki nayar yanaptʼir jutapjjstajja, amigöñäniwa. Ukampis jumanakatejj nayan jan kuna jan wal lurkipans enemigonakajar katuyañatak jutapjjstajja, nayra awkinakasan Diosapay uk uñjasin juzgpan”+ sasa. 18 Ukatsti Diosan espiritupajj Amasái+ sat 30 chachanakar pʼeqtʼiri chachjjaruw jutäna, jupasti akham sarakïnwa:
“David, nanakajj jumankapjjtwa, Jesé chachan yoqapa, jumampïpjjaraktwa.+
Sumankañasa, sumankañas jumampïpan, sumankañajj yanaptʼapktam ukanakampirakïpan,
Diosamajj jumar yanaptʼaskatap layku”+ sasa.
Ukatwa Davidajj jupanakar katoqäna, tropanak pʼeqtʼapjjañapatakiw uttʼayarakïna.
19 Kunapachatï Davidajj filisteonakamp chik Saúl contra nuwasir saräna ukhajja, Manasés tribunkiri yaqhep chachanakajj David toqetwa saytʼasipjjäna. Ukampis Davidajj janiw filisteonakar+ yanaptʼkänti, kuna laykutejj filisteonakan apnaqerinakapajj aruskipasaw jupar khitanukjjapjjäna, akham sasa: “Jupajj Saúl reyip toqet saytʼasjjani, jiwasanakajj jiwañaruw purtʼasiraksna”+ sasa. 20 Kunapachatï Davidajj Ziclag+ markar saräna ukhajja, Manasés tribunkir chachanakat akanakaw jupa toqet saytʼasipjjäna: Adná, Jozabad, Jediael, Miguel, Jozabad, Elihú, Ziletái. Jupanakajj Manasés tribunkirinakat 1.000 chachanakaruw pʼeqtʼapjjäna.+ 21 Taqe jupanakajj wali chʼamani, jan ajjsartʼiri ukhamarak ejército pʼeqtʼiri chachanakäpjjänwa,+ ukatwa Davidarojj saqueyjir tropanak contra saytʼañatak yanaptʼapjjäna. 22 Urut urutjamaw jaqenakajj Davidar+ yanaptʼañatak jupan ukar jutasipkakïna, wali jachʼa ejercitöjjarakïnwa, Diosan ejercitopar uñtata.+
23 Guerran nuwasiñatak armantat chachanakajj akhanïpjjänwa. Jupanakaw Hebrón+ markan Davidan ukar jutapjjäna, ukhamat Saúl lanti jupar reyit uttʼayañataki, kunjamtï Jehová Diosajj siskän ukarjama.+ 24 Judá tribunkapki uka jachʼa escudompi lanzampi apirinakajj 6.800 chachanakäpjjänwa, guerran nuwasiñatak armantatäpjjarakïnwa. 25 Simeonitanakatsti, chʼamani jan ajjsartʼiri chachanakajj 7.100 ukhanïpjjänwa.
26 Levitanakatsti 4.600 ukhanïpjjänwa. 27 Jehoiadá+ chachajj Aarón+ chachan yoqanakapan pʼeqtʼiripänwa, jupamp chikajj 3.700 ukhanïpjjänwa. 28 Sadoc+ chachajj wali chʼamani waynänwa, jan ajjsartʼiri ukhamarakïnwa, nayra awkinakapan familia pʼeqtʼirinakapat 22 chachanakaw jupamp chikajj jutapjjarakïna.
29 Benjamín tribunkirïpki Saúl+ chachan jilanakapäpkaraki* ukanakatsti, 3.000 ukhanïpjjänwa. Ukapachkamasti jupanakat jilapartejj janiw Saúl reyitsa ni familiapatsa jitheqtapkänti. 30 Efraimitanakatsti 20.800 chʼamani chachanakänwa, familianakapat jan ajjsartʼiri, wali uñtʼata chachanakäpjjänwa.
31 Manasesan chikat tribupatsti, Davidan ukar jutasin jupar reyit uttʼayañatakejj 18.000 ukhaniw ajllitäpjjäna. 32 Isacar tributsti 200 pʼeqtʼiri chachanakaw utjäna, jupanakajj kuna tiemponkapjjänsa uk sum amuyapjjäna, kunsa Israel markajj lurañapäna uks yatipjjarakïnwa. Jupanakajj taqe jilanakaparuw* uñjapjjarakïna. 33 Zabulón tributsti 50.000 chachanakaw utjäna. Jupanakajj ejerciton serviñatakejj listokïpjjänwa, guerrar sarañatak armanakampi armantatäpjjarakïnwa, taqenirakiw Davidarojj taqe chuyma apoyapjjäna.* 34 Neftalí tributsti 1.000 pʼeqtʼirinakaw utjäna, jupanakamp chikasti jachʼa escudoni lanzani 37.000 chachanakaw utjarakïna. 35 Danitanakatsti guerran nuwasiñatakejj 28.600 wakichtʼat chachanakaw utjäna. 36 Aser tributsti 40.000 chachanakaw utjäna, jupanakajj ejerciton serviñatakisa guerran nuwasiñatakis listokïpjjarakïnwa.
37 Jordán jawira khurkatankiri+ Rubén tributsa, Gad tributsa, Manasesan chikat tribupatsa, 120.000 soldadonakaw utjäna, jupanakajj guerran nuwasiñatak kunayman armanakamp armantatäpjjänwa. 38 Taqe jupanakajj guerran nuwasir chachanakäpjjänwa, guerran nuwasiñatakiw formtʼasipjjarakïna. Jupanakajj taqe chuymaw Hebrón markar jutapjjäna, ukhamat Davidarojj Israel markpachan reyit uttʼayañataki, taqe Israel markpachaw Davidar reyit uttʼayañatak mayachtʼatäpjjäna.*+ 39 Jupanakajj Davidamp chikaw kimsa urunak ukankapjjäna, kunanaktï jilanakapajj wakichapkäna ukanakwa manqʼapjjäna, umapjjarakïna. 40 Ukhamarus jupanak jakʼan jakirinakasa, Isacar, Zabulón, Neftalí sat tribunakatpachaw jutapjjäna. Jupanakajj asnonakata, camellonakata, mulanakata ukhamarak vacanakatwa manqʼañanak apanipjjäna: jakʼu, wañsut higosanakamp lurat tʼantʼanaka, uvas pasasanaka, vino, aceite. Ukhamarus vacanaksa ovejanaksa waljpun apanipjjäna, Israel markan wali kusisiñ utjatap layku.