JONÁS

1 Jehová Diosajj Amitái chachan Jonás*+ yoqaparojj akham sänwa: 2 “Nínive+ jachʼa markar saram, aka markajj juchañchatäniwa sasin yatiyanim. Kuna laykutejj uka markan jan wali luratanakapatwa nayajj istʼta” sasa.

3 Ukampis Jonasajj Jehová Diosar jan istʼasaw Tarsis toqer escapjjäna, Jope puertor saraqasajja Tarsis toqer sariri mä barco jikjjatäna. Pasaje pagasasti barcoruw makatjjäna, ukhamat ukankir jaqenakamp Tarsis toqer sarjjañataki ukhamarak Jehová Diosat jayar escapjjañataki.

4 Ukatsti Jehová Diosajj mä jachʼa thaya lamar qotan sartayäna. Lamar qotan wali jachʼa thaya sartatapatsa jalluntatapatsa, barcojj niya allthaptirpachänwa. 5 Barco apnaqerinakajj wal sustjasipjjäna, sapa mayniw yanap mayiñatakejj diosapar artʼasipjjäna. Ukatjja barcon utjkäna uka carganakwa lamar qotar jaqontapjjäna, ukhamat barcojj phisnaptañapataki.+ Ukampis Jonasajj barco manqharuw mantjjatayna, winktʼasisinwa ukan wal iktʼaskäna. 6 Barcon capitanapajja Jonasar jakʼachasisajj akham sänwa: “¿Kunatsa ikiskta? ¡Sartam, diosamar artʼasim! Inas cheqpach Diosajj khuyaptʼayaschistani, ukhamat jan jiwañasataki”+ sasa.

7 Barco apnaqerinakajj jupanakkamaw akham sasipjjäna: “Jutapjjam, suertenak willtapjjañäni,+ ukhamatwa khitin juchapatsa aka jan waltʼäwin uñjastan uk yatiñäni” sasa. Ukatwa suertenak willtapjjäna, suertejj Jonasaruw waktʼäna.+ 8 Jupanakasti Jonasarojj sapjjänwa: “Mirä amp suma, sapjjetaya, ¿jumat aka jan waltʼäwi utjañapatakejj juchanïta? ¿Kunansa trabajta? ¿Kawkitsa jutta? ¿Kawki markatatäsa, kuna familiat jutirïtasa?” sasa.

9 Jonasasti sänwa: “Nayajj hebreo jaqëtwa, alajjpachankir Jehová Diosaruw nayajj adortjja,* khititï lamar qotsa oraqsa lurki uka Diosaru” sasa.

10 Uka chachanakajj jukʼampiw ajjsarapjjäna, akham sasaw Jonasar jisktʼapjjarakïna: “¿Kunatsa uk lurta?” sasa. (Jupanakajj Jonasan Jehová Diosat escapatap yatipjjänwa, Jonasaw uk jupanakar yatiyatayna). 11 Lamar qotanjja jachʼa thayajj jukʼampiw sartäna, ukatwa jupanakajj Jonasar akham sapjjäna: “¿Lamar qotan tʼakurañapatakejj kunsa jumampejj lurapjjerista?” sasa. 12 Jupajj sarakïnwa: “Lamar qotar jaqontapjjeta, ukhamatwa lamar qotajj tʼakurjjani. Naya kawsaw aka jachʼa thayajj jumanakjjar juti” sasa. 13 Lamar qota lakar barco kuttʼayañatakejja uka chachanakajj wal chʼamachasipjjäna, ukampis jachʼa thaya jukʼamp sartatapatjja janiw puedipkänti.

14 Ukatwa jupanakajj Jehová Diosar akham sasin artʼasipjjäna: “¡Jehová Dios Tata, mirä amp suma, janikiy aka jaqe* kawsajj jiwayapjjestati! Janikiy aka jan juchan jaqer jiwayapjjatajat juchañchapjjestati. Jehová Dios Tata, ukanakajj juman munañamatwa lurasi” sasa. 15 Ukatsti Jonasarojj lamar qotaruw jaqontapjjäna, ukhamatwa lamar qotajj tʼakurjjäna. 16 Barco apnaqerinakajj jukʼampiw Jehová Diosar ajjsarapjjäna.+ Sacrificionakwa Jehová Diosar loqtapjjäna, promesanaksa lurapjjarakïnwa.

17 Jehová Diosajj mä jachʼa chawllampiw Jonasar manqʼantayäna, ukhamatwa Jonasajj kimsa urumpi kimsa arumampejj chawllan purakapankäna.+

2 Ukatsti Jonasajj chawlla purak manqhatpachwa Jehová Diosar oración luräna,+ 2 akham sasa:

“Jachʼa llakin uñjaskasaw nayajj Jehová Diosar artʼasta, jupasti jaysanituwa.+

Sepultura* manqhatpachwa* yanap mayiñatak jachʼat artʼasta.+

Jumasti artʼasitaj istʼistawa.

Jachʼa oladanakamas walpun jawqʼsutäna.+

 4 Nayasti sayätwa: ‘¡Juma nayraqatat alisnukutaw uñjasta!

¿Kunjamaraki santo templom wasitat uñjästi?’ sasa.

 5 Umajj qʼal chhaqantaykitäna ukhajja, niyapuniw nayajj jiwta.+

Wali manqharupuniw puriyäta.

Lamar qotankir alinakas pʼeqetwa muyuntitäna.

 6 Qollunakan kayupäki uka manqhakamaw nayajj purta.

Sepulturan* punkunakapas wiñayatakiw jistʼantaskitäna.

Ukampis Jehová Dios Tata, nayan Diosaja, jumaw nayar waysusistajja.*+

 7 Jakäwijajj* aynachtʼaskäna ukhaw Jehová Diosat amtasta.+

Jumajj santo templomanwa oracionaj istʼtajja.+

 8 Khitinakatï jan kunatak serviri idolonakar adorapki* ukanakajja, munasiñat jan jaytjasir Diosarojj apanukupjjewa.*

 9 Ukampis nayajj yuspärasaw sacrificionak jumar loqtäma.

Arsutajsa phoqarakïwa.+

Jehová, jumaw nayan salvirijätajja”.+

10 Ukatjja chawllajj waña oraqeruw Jonasarojj lakapat jaqsunjjäna, ukasti kunjamtï Jehová Diosajj siskäna ukhamaw lurasïna.

3 Ukatjja Jehová Diosajj mayampiw Jonasar akham säna:+ 2 “Nínive+ jachʼa markar saram, kuntï siskäma uk yatiyanim” sasa.

3 Jonasajj Jehová Diosar istʼasaw Nínive+ markar saräna.+ Nínive markajj wali jachʼänwa,* uka marka muytañatakejj* kimsa uruw munasïna. 4 Ukatjja Jonasajj Nínive markaruw mantäna, uru jurnälaw Diosan arunakap yatiyasajj sarnaqäna, akham sasa: “Pusi tunka urunakatjja, Nínive markajj tʼunjatäniwa” sasa.

5 Nínive markankir jaqenakajja Diosaruw confiyjjapjjäna,*+ ayuno lurañatakiw ordenapjjarakïna. Wawanakasa jilïrinakasa taqeniw llakisiñ isimpi* uchasipjjäna. 6 Kunapachatï Nínive markankir reyirojj Jonasan yatiyäwipat awisapjjäna ukhajja, tronopat sartasaw reyi isip apsusïna, llakisiñ isimpi uchasisasti qhella patjjaruw qontʼasirakïna. 7 Ukatsti Nínive markpacharuw akham sasin yatiyäna:

“Reyina ukhamarak oficialanakan amtapajj akawa: jaqenakasa, uywanakasa, vacanakasa, ovejanakas janiw kunsa manqʼapjjañapäkiti. Janipuniw manqʼsa manqʼapjjañapäkiti ni umsa umapjjañapäkiti. 8 Taqe jaqenakajj llakisiñ isimpi uchasipjjpan, uywanakaparus llakisiñ isimpi janjjatapjjpan, Diosarus taqe chuyma artʼasipjjpan, jan wali thakinakapatsa jan wali luratanakapatsa kuttʼanjjapjjpan. 9 Inas ukhamat cheqpach Diosajj kuntï lurañ amtki uk jan lurjjchiniti, inas jachʼa colerasiñapsa apjtayaschini, ukhamat jan jiwañasataki” sasa.

10 Kunjamsa ninivitanakajj jan wali thakinakapat kuttʼanjjapjjäna uk uñjasajja,+ kuna castigtï cheqpach Diosajj jupanakjjar apaniñ arskäna ukjja janiw apanjjänti.+

4 Ukajja Jonasatakejj sinti jan walipunïnwa, ukatwa jupajj wal colerasïna. 2 Akham sasaw Jehová Diosar oración lurarakïna: “Jehová, oraqejankkayäta ukhajja, ak pasañap nayajj yatjjayätwa. Jumajj sinttʼasiri, khuyaptʼayasiri, pacienciani,* wali munasiñat jan jaytjasiri,+ jan castiguiri Diosätawa, uk nayajj yatjjayätwa. Ukatwa Tarsis toqer escapjjayäta.+ 3 Jehová Dios Tata, mirä amp suma, jakäwij* apaqjjakita, jakañat sipansa jiwañakiw nayatakejj jukʼamp walëjjaspa”+ sasa.

4 Jehová Diosajj akham sasaw Jonasar jisktʼäna: “¿Ukham wali colerasitamajj walikïskiti?” sasa.

5 Jonasasti Nínive markat mistusajja, uka markat inti jalsu toqenwa qontʼasïna. Ukatjja ramanakampi laphinakampwa mä chʼiwirtʼasiñ lurasïna, ukanwa qontʼasirakïna, ukhamat kunas Nínive markampejj pasani uk uñjañataki.+ 6 Ukatsti Jonasar chʼiwtʼayañatakisa ukhamarak kuna jan walintï uñjaskäna ukamp yanaptʼañatakisa, Jehová Diosajj mä calabaza vinatera ali* jilsuyäna. Uka alin utjatapatjja Jonasajj walpun kusisïna.

7 Ukampis qhepür qhantatejja, cheqpach Diosajj mä laqʼompiw uka calabaza vinatera aljja manqʼsuyäna, ukhamatwa uka alejj wañsjjäna. 8 Kunapachatï intejj wal qhantʼanïna ukhajja, Diosajj inti jalsu toqetwa nakhantir juntʼu thaya thaytʼayanïna, lupis walpun luptʼanirakïna. Jonasasti niya desmayirpachänwa. Jupajj jiwañ mayiskakïnwa,* akham saskakïnwa: “Jakañat sipansa jiwañakiw nayatakejj jukʼamp walëjjaspa”+ sasa.

9 Diosajj akham sasaw Jonasar jisktʼäna: “¿Calabaza vinatera alin wañsutapat wali colerasitamajj walikïskiti?”+ sasa.

Jonasajj sarakïnwa: “Colerasiñatakejj razonaw utjitu, wali coleratätwa, ukatwa jiwañ munta” sasa. 10 Jehová Diosajj akham sarakïnwa: “Calabaza vinatera alitjja jumajj sinttʼastawa, ukampis uka aljja janiw jumajj satktati ni jilayktasa. Uka alejj mä arumanakwa jilsüna, mä arumanakwa jiwsjjarakïna. 11 Ukhamajj ¿janit nayajj Nínive jachʼa markatsa+ uywanakapatsa khuyaptʼayaskäjja?+ Uka markanjja 120.000 jila jaqenakaw utji, jupanakajj janiw kunatï walïki jan walïki ukjja yatipkiti”* sasa.