1 CORINTIOS
CORINTO CONGREGACIONAR NAYRÏR QELLQAT CARTA

1 Naya Pablojj Diosan munañapat jawsatätwa, ukhamat Cristo Jesusan mä apostolopjam serviñataki.+ Sóstenes jilatasajj nayamp chikäskarakiwa. 2 Corinto+ markankir Diosan congregacionaparu ukhamarak taqe cheqan Jesucristo Tatitusan sutipjjar artʼasipki taqe ukanakaruw qellqanipjjsma.+ Jupasti jupanakansa jiwasansa Tatitusawa. Cristo Jesusamp mayakïpjjatam laykuw Diosajj jumanakar santor tukuyapjjtamjja, juparakiw santo serviripäpjjañamatakejj jawsapjjtamjja:+

3 Dios Awkisana ukhamarak Tatit Jesucriston wali khuyapayasiñapasa sumankañapas jumanakampïpan.

4 Nayajj jumanakat Diosar yuspärapuntwa, jupajj Cristo Jesús taypiw wal khuyaptʼayasipjjtamjja. 5 Cristompi mayakïpjjatam laykuw jumanakajj taqe kuns katoqapjjtajja, Diosan arunakap sum yatiyañsa, sum uñtʼañsa katoqapjjaraktawa.+ 6 Kunanakatejj Cristjjat yatiyaski uka yatiyäwinakajja,+ jumanak taypin suma saphintatarakiwa. 7 Taqe kunatï jumanakatak munaski ukanakajj janiw faltapktamti, ukañkamajja Jesucristo Tatitusan jutatapajj qhanpach amuyaskani uka tiempo puriniñapjja taqe chuymaw suyasipktajja.+ 8 Diosaw jumanakarojj tukuykam saytʼatäpjjañamatak yanaptʼapjjätam, ukhamat Jesucristo Tatitusan urupanjja jan khitis jumanakar juchañchañapataki.+ 9 Diosajj arunakap phoqeriwa,+ jupaw jumanakarojj Yoqapampi, mä arunjja Jesucristo Tatitusampi mayakïpjjañamatak jawsapjjtamjja.

10 Jilatanaka, Jesucristo Tatitusan sutipjjaruw nayajj ruwtʼanipjjsma, taqenis mä amtanik parltʼasipjjam, jan jumanak taypin tʼaqa tʼaq sarnaqañajj utjpanti,+ antisas mä wawak sarnaqasipjjam, amuyunsa ukhamarak lupʼiñansa.*+ 11 Jilatanaka, Cloe kullakan utapankirinakat mä qhawqhanejja jumanak taypin chʼajjwañanak utjatapwa yatiyapjjetu. 12 Nayajj ak sañ munapjjsma, kuna laykutejj jumanakajj akham sapjjtawa: “Nayajj Pablon arkiripätwa”, yaqhepasti: “Nayajj Apolosan+ arkiripätwa”, yaqhanakasti: “Nayajj Cefas* chachan arkiripätwa”, mayninakasti: “Nayajj Criston arkiripätwa” sasa. 13 ¿Criston congregacionapajj tʼaqjtatati? Janiw Pablojj jumanak layku lawar chʼakkatat* jiwayatäkänti, ¿janich ukhamäki? Jan ukajj ¿Pablon sutipjjaruch bautisayasipjjtajja? 14 Janiw nayajj jumanakat khitirus bautiskti, ukatwa Diosarojj yuspärtjja, nayajj Crispo,+ Gayo+ ukanakarukiw bautista. 15 Ukhamat jan khitis akham sañapataki: “Nayajj Pablon sutipjjar bautisatätwa” sasa. 16 Nayarakiw Estéfanas+ jilatan utapankirinakarus bautisayäta, ukat jukʼampejj janiw yaqhampir bautisatajat amtaskti. 17 Cristojj janiw bautisañajatak khitankituti, jan ukasti suma yatiyäwinak yatiyañatakiw khitanitu.+ Janiw wali yatjjatat jaqenakan arunakapampi yatiyañatak khitankituti, ukham lurirista ukhajja, tʼaqesiñ lawan* Cristojj jiwkäna ukajj inamayäspawa.

18 Tukjatäpkani ukanakatakejja, tʼaqesiñ lawat* yatiyasiski ukajj inamayakiwa.+ Ukampis salvatäkañäni ukanakatakejja, uka yatiyäwejj Diosan chʼamap uñachtʼayi.+ 19 Qellqatanjja akham siwa: “Yatiñan jaqenakan yatiñanakapjja qʼal chhaqtayäjja. Suma amuytʼani jaqenakan amuyunakapsa rechazäwa”+ sasa. 20 ¿Kawkinkis yatiñan jaqejja? ¿Kawkinkis escriba* jaqejja? ¿Kawkinkis akapachan* chʼajjwayir jaqejja? ¿Janit Diosajj aka mundonkir jaqenakan yatiñanakap jan kunatak servir tukuyki? 21 Aka mundonkir jaqenakajj pachpa yatiñanakapar confiyapjjatap+ laykojj janiw Diosar uñtʼapkiti.+ Kuntï jiwasajj yatiyktan ukajja, yaqhanakatakejj janis kunatak servirïkaspa ukhamawa, ukampis uka yatiyäwi taypiw Diosajj creyentenakar salvañ amti,+ ukhamatwa Diosan yatiñanïtapajj uñachtʼayasi.

22 Judionakajj milagronak* mayipjje,+ griegonakajj yatiñanïña thaqapjjaraki. 23 Ukampis jiwasajja Cristojj lawar chʼakkatatäkäna* uka toqetwa yatiytanjja. Ukajja judionakatakejj mä lanktʼayir qalar uñtatawa, yaqha markankirinakatakejj jan kunatak servirirakiwa.+ 24 Ukampis khitinakatejj jawsatäpki ukanakatakejja, judiöpas griegöpasa Cristo taypiw Diosan chʼamapasa yatiñanïtapas uñachtʼayasi.+ 25 Kunatï Diosankki ukajja, jaqetakejj jan kunatak serviri, jan chʼamani ukhamäspawa, ukampis ukanakajj jupanakat sipansa jukʼamp yatiñaniwa, jukʼamp chʼamanirakiwa.+

26 Jilatanaka, jumanak pachpaw amuyapjjtajja, jawsatäpki ukanak taypinjja, jaqen amuyuparjam+ wali yatiñan jaqet uñjatäpki ukanakatjja janiw waljanejj utjkiti, chʼamani jaqenakatsa reyin familiapat jutir jaqenakatsa* janirakiw waljanejj utjkiti.+ 27 Kunanakatï jan kunatak servirit uñjatäki ukanakwa Diosajj aka mundot ajlli, ukhamat yatiñani jaqenakar phenqʼachañataki. Kunanakatï jan chʼamanit uñjatäki ukanakwa Diosajj aka mundot ajlli, ukhamat chʼamaninakar phenqʼachañataki.+ 28 Kunanakatï jaqenakatakejj jan yäqatäki, jiskʼachatäki, jan kuna valoranïki ukanakwa Diosajj aka mundot ajlli, ukhamat wali valoranïki ukanak jan kunar tukuyañataki.+ 29 Ukhamat Dios nayraqatan jan khitis jachʼa jachʼa tukuñapataki. 30 Diosaw jumanakarojj Cristo Jesusamp mayakïpjjañamatak yanaptʼapjjtamjja. Jesusaw Diosan yatiñapsa cheqapar uñjirïtapsa+ uñachtʼayi. Jesús taypiw jiwasajj santo jaqer tuksna,+ juparakiw juchat kutsuyasajj* salvistaspa,+ 31 ukhamat kuntï qellqatan siski ukajj phoqasiñapataki, ukansti siwa: “Khititejj jachʼañchaski ukajj Jehová* Diosat jachʼañchaspan”+ sasa.

2 Jilatanaka, nayajj Diosan imantat amtap jumanakar yatiyir jutkayät ukhajja,+ janiw arunakamp musparayir jutkayätti,+ janirakiw yatiñajat jachʼañchasiris jutkayätti. 2 Jumanakampïskayäta ukhajja, Jesucristotakwa nayajj parlañ amtayäta ukhamarak jupajj lawar chʼakkatasin* jiwayatäkäna ukakwa parlañ amtayäta.+ 3 Jumanakan ukarojja, aynachtʼata, ajjsartʼasisa, wali khatattʼasisa ukhamaw nayajj jutayäta. 4 Parlapkayäsma ukhamarak yatiyapkayäsma ukhajja, janiw wali yatiñan jaqenakan musparayir arunakapampejj parlapkayäsmati, jan ukasti arunakajajj espíritu santon chʼamapwa uñachtʼayäna,+ 5 ukhamat jumanakajj jaqenakan yatiñapar jan confiyapjjañamataki,* jan ukasti Diosan chʼamapar confiyapjjañamataki.*

6 Khitinakatejj Diosar serviñan suma saytʼatäpki ukanak taypinwa jiwasajj yatiñanïñ toqet parltanjja.+ Ukampis janiw akapachan* yatiñapat parlktanti, ni akapachan utjki uka apnaqerinakan yatiñapatsa parlktanti, jupanakajj tukusjjapjjaniwa.+ 7 Antisas Diosan imantat amtapatwa jiwasajj parltanjja, mä arunjja Diosan imantat yatiñapatwa parltanjja.+ Janïr aka jan wali pachanakajj* utjkäna ukhatpachaw Diosajj uk lurañ amtjjäna, ukhamat jiwasajj jachʼañchatäñasataki. 8 Ukampis akapach* apnaqerinakatjja, janiw maynis Diosan yatiñap uñtʼapkänti.+ Jupanakatï uk uñtʼapjjaspäna ukhajja, janiw jachʼa Tatiturojj jiwayapkaspänti.* 9 Qellqatanjja akham siwa: “Nayrajj janiw uñjkiti, jiñchus janiw istʼkiti, kunanaktï Diosajj jupar munasirinakatak wakichkäna ukanakjja janiw jaqejj chuymapan amuykiti”+ sasa. 10 Ukampis Diosaw jiwasarojj espíritu santop taypejj+ ukanak qhanañchistu,+ espíritu santojj taqe kunwa qhanstayi, Diosan imantat yatiñapsa qhanstayarakiwa.+

11 Janiw khiti jaqes yaqha jaqen chuymap yatkaspati, jan ukasti sapa mayniw kunas chuymapan utji uk yati. Kunanakatï Diosankki ukanakampejj ukhamarakiwa, janiw khitis yatkaspati, jan ukasti Diosan espiritupakiw ukanak yati. 12 Jiwasajj janiw aka mundon espiritup katoqktanti, jan ukasti Diosan espiritup katoqtanjja,+ ukhamat kunanaktï Diosajj munasiñapat churkistu ukanak amuytʼañasataki. 13 Ukhamarus ukanakat parlktan ukhajja, janiw wali yatiñan jaqenakan yatichat arunakapampejj parlktanti,+ jan ukasti espíritu santon yatichat arunakampiw parltanjja.+ Diosat parlktan ukhajja, espíritu santot katoqktan uka arunakampiw qhanañchtanjja.

14 Ukampis munañapampi apayasir jaqejja, kunatï Diosan espíritu santopat jutki ukanakjja janiw katoqkiti, jupatakisti ukanakajj jan kunatak serviriwa, janirakiw ukanak amuykaspati, jupajj espíritu santon yanaptʼapampiw ukanak yatjjatañapa. 15 Ukampis espíritu santompi irpayasir jaqejja taqe kunwa yatjjati,+ janiw khiti jaqes juparojj juzgkaspati. 16 “¿Khitirak Jehová* Diosan amuyunakap uñtʼaspa, ukhamat jupar yatichañatakisti?”.+ Ukampis jiwasajj kunjamtï Cristojj amuyki uka pachpa amuyunïtanwa.+

3 Ukhamajj jilatanaka, janiw nayajj espíritu santompi irpayasir jaqenakarjam parlapksmati,+ jan ukasti akapachankir jaqenakarjamaw parlapjjsma. Criston thakipanjja jiskʼa wawanakarjamaw+ parlapjjsma. 2 Jumanakajj janïraw Diosar adorañan* suma saytʼatäpkayätati, janirakiw jichhas suma saytʼatäpktati, ukatwa nayajj waña manqʼa jan churapksmati, jan ukasti leche churapjjsmajja,+ 3 kuna laykutejj akapachankir jaqenakjamaw amuyasipkaktajja.+ Jumanak taypintï envidiasiñanakasa chʼajjwañanakasa utjaskakchejja, ¿janit jumanakajj akapachankir jaqenakjam amuyapkta,+ janirakit akapachankir jaqenakjam sarnaqapkta? 4 Jumanakat maynejj akham siwa: “Nayajj Pablon arkiripätwa”. Yaqhasti “nayajj Apolosan arkiripätwa”+ sasa. Ukham parlasajj ¿janit jumanakajj akapachankir jaqenakjam sarnaqapkta?

5 Ukhamajj ¿khitirak Apolosasti? ¿Khitirak Pablosti? Jupanakajj servirinakäpjjewa,+ jupanak taypirakiw creyentëjjapjjtajja, kunjamtï Tatitojj sapa maynir churki ukarjama. 6 Nayaw satantayäta,+ Apolosasti umampiw warjjattʼäna,+ ukampis Diosaw jiltayaskakïna. 7 Ukhamajj janiw satirisa ni umamp warjjatiris jachʼañchatäñapäkiti, jan ukasti jiltayki uka Diosaw jachʼañchatäñapa.+ 8 Satirimpi umamp warjjatirimpejj mä amtampikiw trabajipjje, ukampis sapa mayniruw Diosajj lurataparjam bendisini.+ 9 Kuna laykutejj nanakajj Diosamp chika trabajirïpjjtwa. Jumanakajj Diosan oraqepäpjjtawa, juparakiw uka oraqer yapuchaski, jumanakajj Diosan utapäpjjtawa.+

10 Diosaw nayat wal khuyapayasitu, ukatwa nayajj utanak luriri mä suma maestror uñtatajj cimiento uchta,+ ukampis yaqhaw uka cimientjjarojj utachaski. Ukhamajj sapa mayniw kunjamsa uka cimientjjar utachaski uk amuytʼasiñapa. 11 Janiw khitis uchatäjje uka cimiento lantejj yaqha cimiento uchkaspati, uchatäjje uka cimientojj Jesucristowa.+ 12 Maynejj uka cimientjjarojj qorimpi, qollqe metalampi, wali valorani qalanakampi, jan ukajj lawampi, pajampi, tʼuna pajampi ut luraspawa. 13 Ukampis yantʼa urojj purinkani ukhaw sapa maynin luratapajj qhan uñachtʼayasini. Sapa maynin luratapajj waliti janicha ukajj ninampiw yantʼasini.+ 14 Maynitï uka cimientjjar utachani, janirak ukajj ninamp nakhantkani ukhajja, uka jaqejj bendisitäniwa. 15 Maynin luratapatï ninampi nakhantani ukhajja, qʼal aptʼasini, ukampis jupajj salvatäniwa. Jupatï salvatäni ukhajja, kunjamtï mä jaqejj nina taypit escapki ukhamäniwa.

16 ¿Janit yatipkta? Jumanakajj Diosan templopäpjjtawa,+ Diosan espiritupas jumanak taypinkiwa.+ 17 Maynitï Diosan templop tʼunjani ukhajja, Diosajj jupar tʼunjarakiniwa. Diosan templopajj santowa, jumanakaw uka templöpjjtajja.+

18 Jan khitis jupa pachpajj engañjaspanti. Maynitï jumanak taypin wali yatiñanjam akapachan* amuyaschejja, janis yatiñanïkaspa ukham tukpan, ukhamat wali yatiñan jaqëñapataki. 19 Diosatakejj aka mundonkir jaqenakan yatiñapajj jan kunatak serviriwa. Qellqatanjja siwa: “Diosaw yatiñan jaqenakarojj jupanakan wakichat pachpa trampapar jaltʼayi”+ sasa. 20 Qellqatajj sarakiwa: “Jehová* Diosajj yatiwa, yatiñan jaqenakan amuyunakapajj inamayakïtapa”.+ 21 Ukhamajj jan khitis jaqen luratapat jachʼa jachʼa tukpanti, taqe kunas jumanakankiwa, 22 Pablosa, Apolosasa, Cefasasa,*+ aka mundosa, jakañasa, jiwañasa, kunanakatï jichhajj utjki ukanakasa, kunanakatï jutkani ukanakas jumanakankiwa, taqe kunaw jumanakanki. 23 Jumanakajj Cristonkapjjtawa,+ Cristosti Diosankarakiwa.

4 Nanakajj Criston servirinakapjamaw trabajisipkta, Diosan imantat amtanakapsa mä mayordomor uñtataw uñjasipkta,+ jaqenakajj ukham uñjapjjetaspa uk nanakajj munapjjta. 2 Mä mayordomojj lurañanakap suma phoqerïñapawa. 3 Jumanakasa jaqenakan tribunalapasa juzgasipkitpan, ukajj janiw nayatakejj importantëkiti. Janiw naya pachpas juzgaskti. 4 Concienciajajj qʼomawa. Ukampejj janiw nayajj cheqapar sarnaqer jaqëtwa sañ munkti, jan ukasti Jehová* Diosakiw luratajajj waliti janicha uk uñj-jjaspa.*+ 5 Ukhamajj Tatitojj jutkani ukapachkamajja, jan khitirus janïräkipan juzgapjjamti.+ Jupaw kunanakatejj chʼamakan imantatäki ukanak qhanar apsunini, juparakiw kunanaktï jaqenakajj chuymapan amtapki ukanaksa qhanstayani. Sapa mayniruw Diosajj lurataparjam jachʼañchani.+

6 Jilatanaka, jumanakar yanaptʼañatakiw nayampit Apolosampit+ parlasajj qellqanipjjsma, ukhamat jumanakajj nanakat yateqasisin aka arunakarjam sarnaqapjjañamataki: “Kunatï qellqatäki ukarjamakiw lurasiñapa”. Ukarjam phoqasajja, janiw jumanakpura jiskʼachasisajj jachʼa jachʼa tukupkätati.+ 7 ¿Khitis jumarojj mayninakat sipans jukʼamp jilar uchtamjja? ¿Janit jumajj taqe kunsa Diosat katoqkta?+ Jumatï taqe kuns Diosat katoqstajja, ¿kunatarak chʼamachasitamatsa katoqkasma ukham jachʼa jachʼa tuktasti?

8 ¿Niyat jumanakajj taqe kunanëjjapjjta? ¿Niyat jumanakajj qamirëjjapjjta? ¿Niyat jumanakajj jan nanakampi reyinakjam apnaqañ qalltjjapjjta?+ Nayajj muniriskayätwa jumanakajj reyinakjam apnaqañ qalltapjjañama, ukhamat nanakas jumanakamp chika reyinakjam apnaqañataki.+ 9 Amuyatajatjja, Diosaw jaqenakan uñchʼukitäñatakejj apostolonakar mä teatror irpantapjjetu, kunjamtï qhep qhepa mantir gruporojj jiwayañatak irpantaski ukhama.+ Nanakarojj taqeniw aka mundon uñchʼukipjjetu,+ angelanakasa jaqenakasa. 10 Nanakajj Cristo laykojj jan amuytʼasir jaqenakäpjjtwa,+ ukampis jumanakajj Cristor arkasajj amuytʼasir jaqenakäpjjtawa. Nanakajj jan chʼamanïpjjtwa, ukampis jumanakajj chʼamanïpjjtawa; jumanakajj jachʼañchatäpjjtawa, ukampis nanakajj jiskʼachatäpjjtwa. 11 Jichhakamaw nanakajj manqʼat awtjata,+ umat pharjata,*+ jukʼa isini,* nuwjata,*+ jan utani ukham uñjasipjjta, 12 pachpa amparanakajampiw wal trabajipjjta.+ Insultapjjetu ukhajja,+ nanakajj bendisipjjtwa, jan waltʼayañatak arknaqapjjetu ukhasti pacienciampiw aguantapjjta,+ 13 kʼarintapjjetu ukhasa nanakajj suma arunakampiw jupanakar parljjayapjjta.*+ Jichhakamajja jaqenakatakejj aka mundon basurapar uñtatakïpjjtwa, taqe kunan jiltʼapakïpjjtwa.

14 Janiw nayajj jumanakar phenqʼachañatakejj ukanak qellqanipksmati, jan ukasti wali munat wawanakajarjam ewjjtʼañatakiw qellqanipjjsma. 15 Cristor arkañatakejj 10.000 yatichirinakas* jumanakan utjkchejja, janiw walja awkinïpktati. Cristo Jesusampi mayakïsajja, nayaw suma yatiyäwinak yatichasajj jumanakan awkimar tukuwayta.+ 16 Ukhamajj nayat yateqasipjjañamatakiw ruwtʼanipjjsma.+ 17 Ukatwa nayajj Timoteor khitanipjjsma, jupajj nayan munat wawajawa, taqe chuymaw Tatiturus serviskaraki. Juparakiw Cristo Jesusar serviñatakejj kunanaksa nayajj luraskta ukanak amtayapjjätam,+ kunjamtï nayajj taqe congregacionanakan yatichaskta ukhama.

18 Jumanakat yaqhepajja, jachʼa jachʼaw tukupjjtajja, akham sapjjaraktawa: “Janiw jupajj jutkaniti” sasa. 19 Ukampis Jehová* Diosatï munanejja, akat mä qhawqha tiempotjja jumanakar visittʼiriw jutäjja. Janiw jachʼa jachʼa tukurinakan arunakap yatiñatakejj jutkäti, jan ukasti Diosan chʼamapampit irpayasisipki janicha uk yatiñatakiw jutäjja. 20 Diosan Reinopajj* qhanaw maynin jakäwipan uñjasi, ukampis janiw arunakapan amuyaskiti, jan ukasti luratanakapanwa Diosan chʼamapajj amuyasi. 21 ¿Kunsa jumanakajj munapjjasma? ¿Lawampi jutañajti,+ jan ukajj munasiñampi llampʼu chuymampi* jutañajcha? 

5 Jumanak taypinjja qʼañu jucha*+ utjatapaw yatisi, mä jaqejj awkipan esposapampiw jakaski sasaw yatiyapjjetu, janiw yaqha markanak taypinsa ukham qʼañu juchajj* uñjaskiti.+ 2 ¿Uka jucha utjatap laykuti jumanakajj jachʼa jachʼa tukupjjta? ¿Janit llakitäpjjañamäki?+ ¿Janit uka jucha lurir jaqerojj jumanak taypit apsupjjañamäki?+ 3 Nayajj janis jumanakampi chikäkstjja, amuyujajj jumanakampi chikäskiwa,* niyarakiw nayajj uka jan wali lurir jaqerojj juchañchjjta, jumanak chikäkiristsa ukhama. 4 Jumanakajj tantachasipkta ukhajja, nayan amuyujasa Jesús Tatitusan chʼamapasa jumanakampïskiwa. Ukhamajj Jesús Tatitusan sutipjjarusti, 5 uka jan wali lurir jaqerojj Supayar* katuyapjjam,+ ukhamat kuna juchtï jupajj congregacionar apantanki uk chhaqtayañataki, ukhamarak Tatitun urupanjja suma chuymanïñajj congregación taypin utjaskakiñapataki.+

6 Jachʼa jachʼa tukupjjañamajj janiw walïkiti. ¿Kunjamsa mä jukʼa levadurajj taqpach masar poqtayi uk janit yatipkta?+ 7 Ukhamajj uka levadura apsupjjam, ukhamat machaq masar tukupjjañamataki, jumanakajj jan levadurani masar uñtatäpjjtawa. Cristow jakañap sacrificiot loqtasïna,+ ukhamatwa jiwasan Pascua corderosar+ tukuwayi. 8 Ukhamajj Pascua fiesta pasatat apaski uka fiestampejj* phoqapjjañäni,+ uka fiestanjja janiw levadura apnaqañasäkiti, janirakiw jan wali lurañanakampi ni sinti jan wali lurañanakampi uñtasitäki uka levadursa apnaqañasäkiti. Antisas jan levadurani tʼantʼa manqʼapjjañäni, ukajj cheqa chuymanïñampi kunatï cheqäki ukampi sasiwa.

9 Apayanipksma uka cartajanjja, qʼañu juchan* sarnaqer jaqenakampejj jan jukʼampi chikachasipjjañamatakiw qellqanipjjayäsma. 10 Ukampejj janiw sapkayäsmati, aka mundon qʼañu juchan* sarnaqer jaqenakampi, taqe kun munir jaqenakampi, mayninakat kʼarimp kʼarimpi apaqerinakampi, idolonakar adorir* jaqenakampejj janipuniw kunäkipans chikachasipjjätati sasajja.+ Ukhamäspa ukhajja, aka mundot mistjjapjjañamaw wakisispa.+ 11 Jichhasti qellqanipjjsmawa, maynitï jilatäkasina qʼañu juchan* sarnaqerïchi, taqe kun munir jaqëchi,+ idolonakar adorirïchi,* yaqhanakar jiskʼachjir jaqëchi, machirïchi,+ jan ukajj lunthatasirïchi+ ukhajja, jan jukʼampi uka jaqempejj chikachasipjjamti+ janirak manqʼapjjamsa. 12 Jan congregacionankapki ukanakar juzgañajj janiw nayar waktʼkituti. Congregacionankapki ukanakarojj jumanakaw juzgapjjañama, 13 akapachankir jaqenakarojj Diosaw juzgaskani.+ Ukhamajj “jan wali jaqerojj jumanak taypit apsupjjam”.+

6 ¿Kunatsa jumanakajj maynimpi chʼajjwasajj+ tribunalanakaru sarasin Diosan leyinakap jan phoqer jaqenakar quejasipjjta? ¿Janit santo jilatanakan ukar sarapjjañamäki? 2 ¿Janit jumanakajj yatipkta? Khitinakatejj santöpki ukanakaw aka mundor juzgapjjani.+ Niyakejjay aka mundojj jumanakan juzgatächinejja, ¿janit uka jiskʼa jan waltʼäwinak juzguirjamäpkta? 3 ¿Janit jumanakajj yatipkta? Jiwasajj angelanakaruw juzgañäni.+ Ukhamajj jakäwin utjki uka jan waltʼäwinakjja askicharaksnawa. 4 Jakäwin utjki uka jan waltʼäwinakatejj askichañächejja,+ ¿kunataraki congregacionajj jan walit uñjki uka jaqenakar juezanakjam ajllisipjjtasti? 5 Nayajj phenqʼasipjjañamatakiw ukanak parlaskta. ¿Janit jumanak taypin mä yatiñan jaqes utjki, ukhamat jilatanakap taypin problemanak utjki ukanak juzgañapataki? 6 Uk lurañat sipansa, mä jilatajj tribunalar sarasaw yaqha jilat contrajj quejasiski, janiw ukakïkiti, khitinakatï jan creyentëpki uka jaqenakan ukaruw quejasir sari.

7 Jumanakkam quejar mantasajja jumanak pachpaw phenqʼachat uñjasipjjtajja. ¿Kunatsa jan wal luratajj jan aguantasipkta?+ ¿Kunatsa kʼarimp kʼarimpi aparatajj jan aguantasipkta? 8 Antisaw jumanakajj jan walinak lurapjjtajja, kʼarimp kʼarimpiw mayninakar aparapjjtajja, yamas pachpa jilatanakamaruw ukham lurapjjtajja.

9 ¿Janit jumanakajj yatipkta? Jan cheqapar sarnaqer jaqenakajj janiw Diosan Reinopjja* katoqapkaniti.+ Jan jumanak pachpajj engañjasipjjamti.* Qʼañu juchan* sarnaqerinakasa,+ idolonakar adoririnakasa,*+ adulterio juchan* sarnaqerinakasa,+ warmir tukurinakasa,*+ chachapura ikintasirinakasa,+ 10 lunthatanakasa, taqe kun munirinakasa,+ machirinakasa,+ jaqe masipar jiskʼachjirinakasa, mayninakat kʼarimp kʼarimpi apaqerinakasa, janiw Diosan Reinop* katoqapkaniti.+ 11 Jumanakat yaqhepajj ukhamäpjjayätawa. Ukampis jumanakajj qʼomachatäjjapjjtawa,+ santo jaqenakar tukuyatäjjapjjtawa,+ Tatit Jesucriston sutipjjarusa Diosasan espiritupampisa cheqap sarnaqer jaqet uñjatäjjapjjtawa.+

12 Taqe kunas nayatakejj walikïskiwa, ukampis janiw taqe kunas yanaptʼkistaspati.+ Taqe kunas nayatakejj walikïskiwa, ukampis janipuniw kunampis apnaqayaskäti. 13 Manqʼajj purakatakiwa, purakajj manqʼatakirakiwa, ukampis Diosajj manqʼarus purakarus ina chʼusaruw tukuyani.+ Cuerpojj janiw qʼañu jucha* lurañatakïkiti, jan ukasti Tatitutakiwa.+ Tatitusti cuerpotakirakiwa. 14 Diosaw chʼamapampejj+ Tatitur jaktayäna,+ ukhamarakiw jiwasarojj jiwatat jaktayistani.+

15 ¿Janit jumanakajj yatipkta? Cuerponakamajj Criston cuerpopamp mayachatawa.+ Ukhamajj ¿Criston cuerpopat mä parte apaqasati mä prostituta warmimpi mayachäjja? ¡Janiwa! 16 ¿Janit jumanakajj yatipkta? Kunapachatï maynejj mä prostituta warmimpi mayachaski ukhajja, uka warmimpejj mä cuerpokëjjapjjewa. Diosajj akham siwa: “Panipajj mä jañchikëjjapjjaniwa”+ sasa. 17 Ukampis khititejj Tatitur mayachaski ukajja, jupampejj mä pachpa amuyunikëjjewa.+ 18 Ukhamasti qʼañu juchat* jitheqtapjjam.*+ Khititejj yaqha juchanak lurki ukajja, yaqha jaqenakaruw jan waltʼayaspa, ukampis khititejj qʼañu jucha lurki ukajja, pachpa cuerpop contraw jucha luraski.+ 19 ¿Janit yatipkta? Jumanakajj mä cuerpokïpjjtawa, uka cuerpojj espíritu santon templopawa,+ uka espíritu santojj jumanak manqhankiwa,+ Diosatwa uk katoqapjjaraktajja. Ukhamarus jumanakajj Diosankapjjtawa,+ 20 Diosaw jumanakarojj wali jila alampi alasipjjtamjja.+ Ukhamajj Diosaruy cuerponakamampi+ jachʼañchapjjam.*+

7 Jichhajj qellqanipkista uka jisktʼanakaruw nayajj qhanañchtʼasinkta, mä chachatakejja warmi jan llamktʼañapajj jukʼamp walïspawa.* 2 Ukampis qʼañu jucha* lurañanak wal utjatap laykojja, chachajj warminïpan,+ warmis chachanirakïpan.+ 3 Kuntï chachajj warmipamp phoqañapäki uk phoqpan, warmejj uka pachparaki chachapampejj lurpan.+ 4 Chachan warmejja janiw pachpa cuerpopjjarojj munañanëjjeti, jan ukasti chachapaw cuerpopjjarojj munañanëjje. Warmin chachajja janirakiw pachpa cuerpopjjarojj munañanëjjeti, jan ukasti warmipaw cuerpopjjarojj munañanëjje. 5 Chacha warmjam ikthapiñatjja jan jumanakajj janiw sasipjjamti. Ukampis jumanakatejj oración lurañataki mä qhawqha tiempo jan ikthapiñataki amtapjjstajja, ukajj waliwa. Ukatjja chacha warmjamajj wasitat ikthapipjjasmawa, ukhamat munañanakamar jan apnaqañ puedipjjatam laykojja, Supayajj* jan jumanakar yantʼañapataki. 6 Kuntï nayajj sapksma ukjja jumanakajj lurapjjasmawa, ukampis ukajj janiw mä leyïkiti. 7 Taqenis nayjamäpjjaspa ukwa nayajj munirista. Ukampis sapa mayniw Diosatjja mä regalo katoqe,+ maynejj akhamata, maynejj ukhamataraki.

8 Jan casaratanakarusa viudanakarusa nayajj saraktwa, jupanakatakejj jukʼamp walïspaw nayjam sapakïsipkañapajja.+ 9 Ukampis jupanakatejj munañanakapar jan apnaqerjamäpkchi ukhajja, casarasipjjpan, jukʼampi waliw casarasiñajja, warmi munañampi jan ukajj chacha munañampi apayasiñat sipansa.+

10 Casadonakarojj nayajj saraktwa, janiw nayajja, jan ukasti Tatituwa: mä warmejja janiw chachapat jaljtañapäkiti.+ 11 Jupatï chachapat jaljtanejja, jan yaqhamp casaraspanti, jan ukasti chachapampi sumankthapjjpan; chachajj janirakiw warmipar jaytanukuñapäkiti.+

12 Mayninakarojj nayajj saraktwa, jïsa, nayaw sista, janiw Tatitojja:+ mä jilatatejj jan creyente warminïchi, warmipajj jupampi jakañ munchi ukhajja, janiw jaytanukuñapäkiti. 13 Mä warmitejj jan creyente chachanïchi, chachapajj jupampi jakañ munarakchi ukhajja, janiw chachapar jaytanukuñapäkiti. 14 Jan creyentëki uka chachajja, warmipampi juntöskatap laykojj santowa, jan creyentëki uka warmejja, creyente chachapampi juntöskatap laykojj santarakiwa. Janitejj ukhamäkaspajja, wawanakapajj janiw santöpkaspati, ukampis jichhajj santöpjjewa. 15 Jan creyentëki ukatejj sarjjañ amtchejja,* sarjjpan. Jilatasa jan ukajj kullakasa janiw jupamp jakañatakejj obligatäjjeti, ukampis Diosaw jumanakarojja sumankañar jawsapjjtamjja.+ 16 Jumatejj casarat warmïstajja, ¿kunjamaraki chachamar salvätati janicha uk yatismasti?+ Jumatejj casarat chachästajja, ¿kunjamaraki warmimar salvätati janicha uk yatismasti?

17 Kuntï Jehová* Diosajj sapa maynir churki, kunjamtï Diosajj jawskaraki ukarjam sapa maynis sarnaqpan.+ Taqe congregacionansa uka ewjjanakwa nayajj churarakta. 18 Mä chachatejj circuncidatäkasin* Diosan jawsatächejja,+ ukhamakïskpan. Mä chachatejj jan circuncidatäkasin Diosan jawsatächejja, jan circuncidaskpanti.+ 19 Circuncidatäñasa jan circuncidatäñas janiw importantëkiti,+ Diosan mandamientonakap phoqañaw jukʼamp importantejja.+ 20 Sapa maynisa kunjamtï Diosajj jawski ukhamakïskpan.+ 21 ¿Esclavökasati jumajj jawsatäyäta? Jan ukat llakisimti.+ Ukampis jumatï jichhajj libre jakasirjamästajja, jan ukhamak pasayamti. 22 Tatitun mä arkiripatejj esclavökasina jawsatächejja, librëjjewa,* Tatitunkjjarakiwa.+ Khititejj libre jaqëkasina jawsatächi ukajja, Criston esclavoparakiwa. 23 Jumanakajj wali jila alampi alatäpjjtawa,+ ukhamajj jan jukʼamp jaqenakan esclavopäjjapjjamti. 24 Jilatanaka, kunjamtï sapa maynejj jawsatäpktajja, Dios nayraqatanjj ukhamäsipkakim.

25 Khitinakatejj sapäsipki* ukanakatakejja, janiw Tatitun mandamientopajj utjkituti. Niyakejjay Tatitojj nayat khuyaptʼayaschejja, kuntï nayajj sapksma ukarojj confiyapjjasmawa.+ 26 Niyakejjay jan wali tiemponakan jakstanjja, nayajj akham amuyta: mä chachatejj casadöchi jan ukajj solteröchi ukhajja, jukʼamp walïspawa ukhamäskakiñapajja. 27 Jumatejj mä warmir chinkatatästajja, jan jaljtañ thaqamti.+ Jumatejj mä warmir jan chinkatatäkstajja, jan warm thaqamti. 28 Ukampis jumatejj casarasïtajja, janiw kuna juchäkaspasa. Sapäski* ukatejj casarasispajja, janirakiw kuna juchäkaspasa. Ukampis khitinakatejj casarasipkani ukanakajja, jan waltʼäwinakanwa uñjasipjjani.* Uka tʼaqesiñatwa nayajj salvañ munapjjsmajja.

29 Jilatanaka, nayajj akham saraktwa, jukʼa tiempokiw utj-jje.+ Jichhat uksarusti khitinakatejj warminïpki ukanakajja, janis warminïpkaspa ukhamäpjjpan. 30 Khitinakatejj jachapki ukanakajja, jan jachapki ukanakjamäpjjpan. Khitinakatejj kusisipki ukanakajja, jan kusisipki ukanakjamäpjjpan. Khitinakatejj alapki ukanakajja, jan alatanïpki ukanakjamäpjjpan. 31 Khitinakatejj aka mundot beneficiasipki ukanakajja, aka mundot jan phoqatpach beneficiasipki ukanakjamäpjjpan. Kuna laykutejj kunanakatejj aka mundon pasaski ukanakajj mayjtʼaskiwa. 32 Jumanakajj jan kuna llakinïpjjasma ukwa nayajj munta. Jan casarat chachajja, kunanakatï Tatitunkki ukanakatwa llakisi, mä arunjja kunjamsa Tatitur kusisiyaspa uka toqetwa llakisi. 33 Ukampis casarat chachajja, kunanakatï aka mundonkki ukanakatwa llakisi,+ mä arunjja kunjamsa warmipar kusisiyaspa uka toqetwa llakisi, 34 amuyupansa tʼaqjtatäjjarakiwa. Ukhamarus jan casarat warmisa mä virgen tawaqosa kunanakatï Tatitunkki ukanakatwa llakisi,+ ukhamat jupan cuerpopasa amuyupasa santöñapataki. Ukampis casarat warmejja, kunanakatï aka mundonkki ukanakatwa llakisi, mä arunjja kunjamsa chachapar kusisiyaspa uka toqetwa llakisi. 35 Ukanakjja jumanakar yanaptʼañatakiw nayajj sapjjsma, janiw jumanakar jarkʼañ laykojja jan ukasti chʼamañchtʼapjjsmawa, kunatï walïki ukanak lurapjjañamataki, sapürus Tatitur jan kunamp jarkʼata taqe chuyma servipjjañamataki.

36 Ukampis maynitejj solterökasin cuerpon munañanakapar jan atipirjamäkchi, qʼajjo wayna tiempsa qʼajjo tawaq tiempsa* pasjjarakchi ukhajja, ak lurañapawa: kuntï jupajj lurañ amtki uk lurpan, janiw kuna juchsa lurkiti. Casarasipjjpan.+ 37 Ukampis maynitejj chuymapan amtjjchi, janirak amuyuparjamajj casarasiñajj wakiskchi, cuerpopan munañanakapar apnaqerjamarakïchi, chuymapansa sapakïskañ amtarakchi ukhajja, ukham amtatapajj walïniwa.+ 38 Ukhamarakipï maynitejj casaraschi ukhajja, walïniw ukham luratapajja, ukampis maynitejj jan casaraschi ukhajja, jukʼamp walïniw ukham luratapajja.+

39 Mä warmejja chachap jakkipanjja chachapar chinkatatawa.+ Ukampis chachapatejj jiwañan iktʼjjchejja, khitimpiy casarasiñ munchi ukampi casarasiñatakejj librëjjewa, ukampis Tatitun arkiripampikiw casarasiñapa.+ 40 Nayajj saraktwa, jupatejj wasitat jan casaraskanejja, jukʼamp kusisitäniwa. Nayajj Diosan espiritupampi irpatarakïtwa, uka toqet janiw payachaskti.

8 Jichhajj idolonakar loqtatäki uka manqʼanakatwa+ jumanakar qellqanipjjsma. Jiwasajj taqeniw uka toqet yattanjja.+ Ukampis yatiñajj jachʼa jachʼa tukuyiriwa, munasiñasti chʼamañchtʼiriwa.+ 2 Maynitejj kunsa yatkaspa ukham amuyaschejja, janïraw jupajj uka toqet taqpachpun yatkiti. 3 Ukampis maynitejj Diosar munaschejja, jupajj Diosan uñtʼatawa.

4 Jichhajj idolonakar loqtatäki uka manqʼanakat parltʼañäni. Jiwasajj yattanwa, aka mundonjja idolonakajj janiw kunäkisa,+ janirakiw yaqha diosajj utjkiti jan ukasti mä cheqpach Diosakiw utji.+ 5 Alajjpachansa oraqensa kunayman diosanakaw utji sasaw jaqenakajj sapjje.+ Ukhamasti jaqenakatakejj walja “diosanaka”, walja “tatitunakaw” utji, 6 jiwasatakejj mä sapa Diosakiw utji,+ jupajj alajjpachankir Awkisawa,+ jupatwa taqe kunas juti, jupatakiw jiwasajj jakaraktanjja.+ Mä Tatitukiw utjaraki, jupajj Jesucristowa, jupa taypiw taqe kunas utji,+ jiwasas jupa taypiw utjaraktanjja.

7 Janiw taqenejj uk yatipkiti.+ Yaqhepanakajj idolonakaruw nayrajj adorapjjerïna,* ukatwa manqʼapjje ukhajja, uka manqʼarojj idolonakar loqtat manqʼäkaspas+ ukham uñjapjje, aynachtʼat concienciapas qʼañuchatäjjarakiwa.+ 8 Ukampis manqʼajj janiw Diosar jukʼamp jakʼachkistaniti.+ Jiwasatï jan manqʼkañänejja janiw minusankkañäniti, jiwasatï manqʼañänejja janiw jilankkañäniti.+ 9 Ukampis amuyasipjjapunim, jan jumanakajj nayajj derechonïtwa sasajj aynachtʼat conciencianïpki ukanakatakejj mä lanktʼayir qalar tukupjjamti.+ 10 Jumatejj uka toqenakat yatisksta, ukampis aynachtʼat conciencianïki ukatejj idolonakan templopan manqʼaskir uñjiristam ukhajja, ¿janit jupajj idolonakar loqtat manqʼanak manqʼkarakini? 11 Ukhamajj kunanaktï jumajj yatkta uka kawsaw aynachtʼat concienciani mä jaqejj jan walir purtʼasiski, uka jilatam laykuw Cristojj jiwarakïna.+ 12 Kunapachatï jumanakajj jilatanakam contra ukham jucha lurapjjta, ukhamarak aynachtʼat concienciaparus jan waltʼayapjjta ukhajja,+ Cristo contraw juch lurasipktajja. 13 Ukhamajj kuntï manqʼkta ukatejj jilatajar lanktʼaychejja, janipuniw mä kutimpis aycha manqʼjjäti, ukhamat jilatajar jan lanktʼayañataki.+

9 ¿Janit nayajj librëktjja? ¿Janit nayajj apostolöktjja? ¿Janit Jesús Tatitusar uñjkaraktjja?+ ¿Janit jumanakajj kuntï nayajj Tatitur servisajj jikjjatawaykta ukäpkta? 2 Janisay yaqhanakatakejj mä apostolökstjja, ¡cheqpachansa jumanakatakejj mä apostolötwa! Tatitun apostolopjam servitaj-jja jumanak pachpaw mä sellor uñtata qhan uñachtʼayapjjtajja.

3 Khitinakatejj nayar kʼumipkitu ukanakarojj akham saraktwa: 4 nanakajj manqʼañatakisa umañatakisa derechonïpjjtwa,* ¿janich ukhamäki? 5 Kunjamtï mayni apostolonakasa, Tatitun jilanakapasa,+ Cefasasa*+ derechonïpkejja, ukhamarakiw nanakajj mä creyente kullakampi casarasiñatakisa,+ jupamp viajiñatakis derechonïpjjta, ¿janich ukhamäki? 6 Jan ukajj ¿Bernabeampi+ nayampikicha jakañatak trabajiñatakejj jan derechonïpktjja? 7 ¿Khiti soldados pachpa qollqepampejj ejerciton servispa? Jan ukajj ¿khiti jaqes uvas yapuchasajj uvasan achupat jan manqʼkaspa?+ Jan ukajj ¿khiti jaqes oveja awatisajj mä jukʼa leche jan umtʼkaspa?

8 Ukanak parlasajj ¿jaqenakan amuyuparjamat nayajj parlasktjja? ¿Janit Leyejj ukanakat parlkaraki? 9 Moisesan Leyipanjja akham qellqatawa: “Mä torotejj trigo takiskchejja, janiw ñukuntayañamäkiti”*+ sasa. ¿Diosajj toronakatti llakisi? 10 Jan ukajj ¿jiwas laykuch uk sispacha? Cheqas jiwas laykuw ukajj qellqasïna, oraqe qholliri jaqesa trigo takiyir jaqesa, trigo katoqañ suyasaw trabajiñapa.

11 Niyakejjay nanakajj Diosat jutki ukanak jumanak taypir satantapjjstjja, ¿kunanakatï nanakatak munaski ukanak jumanakar mayiñajj janit walïki?+ 12 Yaqha jaqenakatï jumanakar yanapa mayiñatak derechonïpjjchejja, ¿janit nanakajj jukʼampi derechonïpktjja? Derechonïkasas* janiw kunsa mayipksmati,+ jan ukasti taqe kunwa nanakajj aguantapjjta, ukhamat Cristjjat suma yatiyäwinak jan jarkʼañataki.+ 13 ¿Janit jumanakajj yatipkta? Sagrado lurañanakampi phoqapki ukanakajja, templon utjki ukanakwa manqʼapjje. Altaran trabajipki ukanakasti, kunanakatï loqtaski ukanakatwa altarat katoqapjje.+ 14 Khitinakatï suma yatiyäwinak yatiyapki ukanakajja, suma yatiyäwinakat jakapjjpan sasaw Tatitojj sarakïna.+

15 Ukampis janiw nayajj kunsa jumanakar mayipksmati.+ Janirakiw nayaru kun churapjjañamatakis akanak qellqankti. Jukʼamp walïspawa nayan jiwañajajja, ukanak lurañat sipansa. Nayajj jan kun mayisaki suma yatiyäwinak yatiyatajatwa jachʼañchasta, janiw khitis uk apaqkitaspati.+ 16 Nayatejj suma yatiyäwinak yatiystjja, janiw ukajj nayan jachʼañchasiñajatakïkiti, nayan yatiyañajajj wakisipuniwa. Nayatejj suma yatiyäwinak jan yatiykiristjja, ¡ay nayat kunakïkaspa!+ 17 Nayatejj taqe chuyma uk luräjja, mä premiow nayatakejj utji. Nayatejj jan munkasas uka luräwimpi phoqäjja, Tatitojj churkitu uka lurañampiw nayajj phoqaskta.+ 18 Ukhamajj ¿kuna premios nayatakejj utji? Suma yatiyäwinak gratisak yatiyañaw nayan premiojajja, ukhamat suma yatiyäwinak yatiyañatak kun mayiñatak derechonïkasas* jan mayiñajataki.

19 Nayajj libre jaqëkasinsa, taqe jaqen esclavoparuw tukta, ukhamat qhawqhaniruy Criston thakipar irpaniñjamächi ukhanir irpaniñataki. 20 Judionakatakejj judioruw nayajj tukta, ukhamat judionakaru Criston thakipar irpaniñataki.+ Janis nayajj Leyirjam sarnaqkstjja, Leyirjam sarnaqapki ukanakatakejj Leyirjamas sarnaqkirista ukhamaw tukta, ukhamat Leyirjam sarnaqapki ukanakaru Criston thakipar irpaniñataki.+ 21 Nayajj Diosan leyiparjama ukhamarak Criston leyiparjamaw sarnaqta, ukampis Leyirjam jan sarnaqapki ukanakatakejja, janis Leyirjam sarnaqkirista ukhamaw nayajj tukta,+ ukhamat Leyirjam jan sarnaqapki ukanakar Criston thakipar irpaniñataki. 22 Aynachtʼatanakatakejja, aynachtʼatäkiristsa ukhamaw nayajj tukta, ukhamat aynachtʼatanakar Criston thakipar irpaniñataki.+ Kunaymani jaqenakar yanaptʼañatakejja taqe kunaruw nayajj tukta, ukhamat mä qhawqhanir kunjamatsa salvañataki. 23 Suma yatiyäwinak laykuw nayajj taqe kun lurta, ukhamat yaqha jaqenakar suma yatiyäwinak yatiyañataki.+

24 ¿Janit jumanakajj yatipkta? Mä tʼijuñanjja taqe tʼijurinakaw tʼijupjje, ukampis premio katoqerejj maynikiwa. Ukhamajj premio katoqañkamay tʼijupjjam.+ 25 Taqe khitinakatï mä tʼijuñan tʼijupki ukanakajja, taqe kunanwa munañanakapampi jan apnaqayasirïpjjatap uñachtʼayapjje. Jupanakajj tukusir corona katoqañ laykuw uk lurapjje,+ ukampis jiwasajj jan tukusir corona katoqañ laykuw uk lurtanjja.+ 26 Ukhamajj janiw nayajj tʼijkarakti janis kawksar puriñsa yatkirista ukhamjja.+ Janiw nayajj chʼakuntkarakti ina chʼusarus chʼakkirista ukhamjja. 27 Antisas nayajj cuerpojarojj nuwjtwa,*+ mä esclavorjamaw apnaqarakta, janitejj ukham lurkiristjja, kapasakiw yaqhanakar yatiykasas Diosampi apanukut uñjasirista.

10 Jilatanaka, ak yatipjjañamwa nayajj munta, nayra awkinakasajj taqeniw mä qenayan chʼiwjjatat sarapjjäna,+ taqenirakiw qotnam pasapjjäna.+ 2 Kunapachatï qenayajj jupanakjjankkäna ukhamaraki qotnam sarapkäna ukhaw taqe jupanakajj Moisesan arkiripjam bautisatäpjjäna. 3 Taqenirakiw Diosajj churkäna uka pachpa manqʼat manqʼapjjäna,+ 4 taqenirakiw Diosajj churkäna uka pachpa umat umapjjäna.+ Diosajj churkäna uka qarqatwa* jupanakajj umapjjerïna, uka qarqajj jupanakamp chikaw saräna. Uka qarqasti Cristompi sasïnwa.*+ 5 Ukampis jupanakat waljanejj janiw Diosarojj kusisiyapkänti, ukatwa jupanakajj wasaran jiwarapjjäna.+

6 Ukanakajj jiwasan amuyasiñasatakiwa, ukhamat kunanakatejj jan walïki ukanak jan munañasataki, kunjamtï jupanakajj munapkäna ukhama.+ 7 Janiraki idolonakar adorapjjañäniti,* kunjamtï jupanakat yaqhepajj idolonakar adorapkäna ukhama. Kunjamtï qellqatan siskejja: “Jaqenakajj manqtʼasiñataki umtʼasiñatakiw qontʼasipjjäna, kusistʼañatakejj saytʼasipjjarakïnwa”.+ 8 Janiraki qʼañu jucha* lurañäniti, kunjamtï jupanakat yaqhepajj qʼañu jucha lurapkäna ukhamjja, ukatwa jupanak taypitjja 23.000 jaqenakajj mä urunak jiwarapjjäna.+ 9 Janiraki Jehová* Diosarojj yantʼañäniti,+ kunjamtï jupanakat yaqhepajj yantʼapkäna ukhamjja, ukatwa jupanakajj asirunakan* achjat jiwarapjjäna.+ 10 Janirak jiwasajj khiti contras parlañäniti, kunjamtï jupanakat yaqhepajj mayninak contra parlapkäna ukhama,+ ukatwa jupanakarojj Diosan angelapajj jiwarayäna.*+ 11 Kunanakatejj jupanakar paskäna ukanakajja, jiwasar yatichañatakïnwa, jiwasan amuyasiñasatakiw ukanakajj qellqasirakïna,+ khitinakatejj akapachanakan tukusiñapan* jakasktan ukanakataki.

12 Khititejj suma saytʼatäkaspas ukham amuyaski ukajja, wal amuyaspan, ukataraki tinkuskaspa.+ 13 Kuna yantʼanakantï taqe jaqenakajj uñjasipki uka pachpa yantʼanakanwa jumanakajj uñjasipjjtajja.+ Ukampis Diosajj arunakap phoqeriwa, jupajj janiw munkaniti jumanakajj jan aguantirjamäpkta ukat jukʼampi yantʼatäpjjañamjja.+ Jupaw yantʼanakan aguantapjjañamatakejj yanaptʼapjjätam.+

14 Ukhamajj munat jilatanakaja, idolonakar adorañat* jitheqtapjjam.*+ 15 Amuytʼasir jaqenakarjamaw nayajj jumanakar parlasipksma, ukhamajj kuntï nayajj siskta ukajj cheqati janicha uk jumanak pachpa amuytʼapjjam. 16 Diosar yuspärktan uka bendisiñ copajja, Criston wilapampi sasiwa ¿janich ukhamäki?+ Jiwasajj pachjktan uka tʼantʼajja, Criston cuerpopampi sasirakiwa ¿janich ukhamäki?+ 17 Mä tʼantʼakiw utji, jiwasajj waljanïskstansa mä sapa cuerpokïtanwa,+ taqeniw uka mä sapa tʼantʼat manqʼaraktanjja.

18 Israelitanakat amuytʼapjjam. Altaran loqtat sacrificionakat manqʼasajj ¿janit Diosampis manqʼapkaspa ukhamäkänjja?+ 19 Ukampejj ¿kamsañsa nayajj muntjja? ¿Mä idolowa jan ukajj idolor loqtat aychaw jukʼamp walejja sañti muntjja? 20 Janiwa. Antisas ak sañ munta, kuntï yaqha markankirinakajj sacrificiot loqtapki ukjja, demonionakaruw loqtapjje, janiw Diosar loqtapkiti.+ Nayajj janiw demonionakampi chikachasipjjañam munkti.+ 21 Janiw jumanakajj Jehová* Diosan copapampita demonionakan copapampit umapkasmati, janirakiw “Jehová* Diosan mesapampita”+ demonionakan mesapampit manqʼapkasmati. 22 Jan ukajj ¿Jehová* Diosaruch colerayasktanjja?+ ¿Janejjay jiwasajj jupat sipansa jukʼamp chʼamanïktantejja?

23 Taqe kunas walikïskiwa, ukampis janiw taqe kunas yanaptʼkiti. Taqe kunas walikïskiwa, ukampis janiw taqe kunas chʼamañchtʼkiti.+ 24 Jan khitis jupan askipak thaqpanti, jan ukasti mayninakan askip thaqpan.+

25 Taqe kunanakatï aycha qhatun aljapki ukanak manqʼasipkakim, conciencianakam laykojj jan jiskhipjjamti, 26 kuna laykutejj “oraqesa taqe kunanakatï ukan utjki ukanakas Jehová* Diosankiwa”.+ 27 Jan creyente mä jaqetejj manqtʼasiñatak invitapjjätam, jumanakajj sarañ munapjjarakïta ukhajja, kuntï jumanak nayraqatar uchkani uk manqtʼasipjjam, conciencianakam laykojj jan jiskhipjjamti. 28 Ukampis maynitejj “aka aychajj idolonakar loqtatawa” sapjjätam ukhajja, khititejj uk sapktam uka laykusa conciencia laykusa jan manqʼapjjamti.+ 29 Janiw nayajj juman concienciamat parlkti, jan ukasti jaqha jaqen concienciapatwa parlaskta. Nayajj kun lurañatakis librëtwa, ukampis libre jaqëtaj laykojja janiw yaqha jaqen concienciapampi juchañchatäñ munkti.+ 30 Nayatejj Diosar yuspärasin manqʼsta, ukampis yaqhanakajj ukham luratajat jan wal parlapjjchi ukhajja, ¿ukham manqʼañajajj walikïskaspati?+

31 Ukhamajj manqʼkasasa, umkasasa, jan ukajj kun lurkasasa taqe kunsa Diosar jachʼañchañatak lurapjjam.+ 32 Jan jumanakajj judionakarusa, griegonakarusa, ni Diosan congregacionaparus lanktʼayapjjamti,+ 33 kunjamtï nayajj taqe kunansa taqe jaqenakar kusisiyañatak chʼamachasiskta ukhama. Janiw nayajj kunatï nayatak walïki uk thaqkti,+ jan ukasti kunatï walja jaqenakatak walïki uk thaqaskta, ukhamat jupanakajj salvatäpjjañapataki.+

11 Jumanakajj nayat yateqasipjjeta, kunjamtï nayajj Cristot yateqaskta ukhama.+

2 Jilatanaka, jumanakajj taqe kunansa nayat amtasipjjapunistawa, kunjamtï nayajj yatichapksma ukarjamapuniw taqe kunsa lurasipktajja, ukatwa nayajj felicittʼapjjsma. 3 Ukampis ak yatipjjañamwa nayajj munta, taqe chachan pʼeqepajj Cristowa,+ warmin pʼeqepasti chachawa,+ Criston pʼeqepasti Diosawa.+ 4 Kunapachatï mä chachajj pʼeqe chʼoqtʼata oración luri jan ukajj profecía arunak parli ukhajja, pʼeqeparuw phenqʼachi, 5 ukampis mä warmejj pʼeqep jan chʼoqtʼasis oración luri, jan ukajj profecía arunak parli ukhajja,+ pʼeqeparuw phenqʼachi, pʼeqsa afeitaskaspa ukhamawa. 6 Mä warmitejj pʼeq jan chʼoqtʼaskchejja, ñikʼutap khuchurasiñapawa, ukampis niyakejjay warmitakejj ñikʼut khuchurasiñasa jan ukajj pʼeq afeitasiñas mä phenqʼächejja, chʼoqtʼasiñapawa.

7 Mä chachajj janiw pʼeqep chʼoqtʼasiñapäkiti, jupajj Diosar uñtasit luratawa,+ Diosaruw jachʼañcharaki, warmisti chacharuw jachʼañcharaki. 8 Kuna laykutejj chachajj janiw warmit jutkiti, jan ukasti warmiw chachat juti.+ 9 Ukhamarus chachajj janiw warmi kawsa luratäkiti, jan ukasti warmiw chacha kawsa luratajja.+ 10 Ukatpï mä warmejj pʼeqep chʼoqtʼasiñapajja, ukaw chachapar istʼatap mä señalar uñtat uñachtʼayi, ukjja angelanak laykuw lurañapa.+

11 Ukhamarus Tatitun arkirinakap taypinjja, janitï chachajj utjkaspajja janiw warmejj utjkaspati, janitï warmejj utjkaspajja janirakiw chachajj utjkaspati. 12 Kunjamtï warmejj chachat jutkejja,+ ukhamarakiw chachajj warmit juti, ukampis taqe kunas Diosatwa juti.+ 13 Jumanak pachpa amuytʼapjjam: ¿mä warmin jan pʼeqe chʼoqtʼata Diosar oración lurañapajj walikïskiti? 14 Jaqenakajj kunjam luratäpjjesa ukajj ¿janit yatichapktamjja? Chachatakejj jachʼa ñikʼutanïñajj mä phenqʼawa, 15 ukampis mä warmitakejj jachʼa ñikʼutanïñajj jupatakejj mä honrawa. Mä chʼoqañ lantejj ñikʼutaw juparojj churasi. 16 Maynitejj yaqha costumbrenak arjjatañ munchi ukhajja, ak yatiñapawa: janiw jiwasansa ni Diosan congregacionanakapansa yaqha costumbrejj utjkiti.

17 Kunanaktï sapksma ukampejja, janiw felicitapksmati, jumanakajj janiw yanaptʼasiñatak tantachasipktati, jan ukasti jan waltʼayasiñatakiw tantachasipjjtajja. 18 Nayraqatjja congregacionan tantachasipkta ukhajja, jumanak taypin tʼaqa tʼaqa sarnaqañ utjatapwa nayajj istʼta. Ukajj cheqäpachaw siristwa. 19 Jumanak taypin sectanakaw uñstani,+ ukhamat jumanak taypin khitinakas Dios nayraqatan suma uñjatäpjje ukajj qhan amuyasiñapataki.

20 Kunapachatï mä lugaran tantachasipkta ukhajja, janiw Tatitun Cenapa+ manqʼañatak tantachasipktati. 21 Tatitun Cenapa manqʼapkta ukhajja, yaqhepanakajj janïräkipanwa cenap manqʼasjjapjje, ukatwa maynejj manqʼat awtjatäski, maynisti machantatäjjaraki. 22 ¿Janit jumanakajj manqʼañatakisa umañatakisa utanïpkta? Jan ukajj ¿Diosan congregacionaparojj jiskʼachapjjtacha, jan kunanïpki ukanakarojj phenqʼachapjjaraktacha? ¿Kamsapjjarakirismasti? ¿Felicittʼapjjämati? Janiw nayajj felicittʼapkirismati. 

23 Kunanaktï nayajj Tatitut katoqkta uka pachparakwa jumanakar yatichapjjsma: kunapachatï Tatit Jesusajj aljantat uñjasiñapäkäna uka arumajja,+ mä tʼantʼa jupajj irtäna, 24 Diosar yuspärasajj pachjasaw akham säna: “Akajj cuerpoja sañ muni,+ jumanak layku churatawa. Akjja nayat amtasisin lurasipkakim”+ sasa. 25 Cena tukuyasajj ukhamarakiw copampejj luräna,+ akham sasa: “Aka copajj machaq pacto sañ muni,+ wilajampiw uka pactor mantasini.+ Sapa kuti aka copat umtʼapkäta ukhajja, nayat amtasisin ak lurasipkakim”+ sasa. 26 Sapa kuti uka tʼantʼat manqʼapkäta ukhasa jan ukajj uka copat umtʼapkäta ukhasa, jaqenakaruw Tatitun jiwatapat yatiyasipktajja, jupajj jutkani ukapachkama.

27 Khititejj jan respetompi Tatitun tʼantʼapat manqʼki jan ukajj copapat umtʼki ukajja, Tatitun cuerpop contra ukhamarak wilap contraw juch luraski. 28 Nayraqatajj sapa mayniw chuymap uñakipasiñapa, ukhamat kuntï lurki ukajj walikïskiti uk segurasiñataki,+ ukhamatakwa jupajj tʼantʼat manqʼaspa, copatsa umtʼaspa. 29 Khititejj Tatitun cuerpopajj kunamp sasisa uk jan sum amuytʼasin manqʼani jan ukajj umani ukajja, jupa pachpa juchañchasiñatakiw manqʼanisa umanisa. 30 Ukatwa jumanakat waljanejj debiläpjjtajja, usutäpjjaraktajja, waljanirakiw jumanakat jiwatäjjapjjtajja.*+ 31 Jiwasatejj kunjamätansa uk sum amuytʼassnajja, janiw juzgatäksnati. 32 Ukampis juzgatäktan ukhajja, Jehová* Diosaw cheqañchistu,+ ukhamat jan aka mundomp chika juchañchatäñataki.+ 33 Ukhamajj jilatanaka, uka manqʼa manqʼañatak tantachasipkäta ukhajja, maynit maynikam suyasipjjam. 34 Maynitejj manqʼat awtjatächejja, utapan manqʼaspan, ukhamat tantachasipkäta ukhajj jan juchañchatäpjjañamataki.+ Ukampis yaqha asuntonakjja, ukar purinisaw nayajj askichäjja.

12 Jilatanaka, kunanaktï Diosajj churki ukanakat+ sum yatipjjañamwa nayajj munta. 2 Jumanakajj yatipjjtawa, yaqha markanakankir jaqëpkayäta* ukhajja, jan parliri idolonakamp engañjatäpjjayätawa,+ ukanakaruw adorapjjayätajja,* arkapjjarakiyätajja. 3 Ukhamajj ak yatipjjañamwa nayajj munta, Diosan espiritupan yanaptʼapampi parlirinakatjja janiw khitis “¡Jesusajj maldisitawa!” siskaspati. Antisas espíritu santon yanaptʼapampikiw maynejj “¡Jesusajj Tatituwa!” saspajja.+

4 Espíritu santojj kunaymaninak lurañatakiw chʼam churistu, ukampis mä sapa espíritu santokiw utji;+ 5 yaqhanakar yanaptʼañatakejj kunayman lurañanakaw utji,+ ukampis mä sapa Tatitukiw utji; 6 kunaymaninak lurañatakiw espíritu santojj jaqenakar yanaptʼi, ukampis mä sapa Diosakiw utji, jupaw taqe jaqenakarojj taqe ukanak lurapjjañapatak yanaptʼi.+ 7 Espíritu santon yanaptʼapajj qhanaw sapa maynin amuyasi, Diosarakiw taqenir yanaptʼañatakejj uk churi.+ 8 Uka espíritu santo taypiw maynirojj yatiñampi parlañapatak chʼam churasi,* yaqharusti uka pachpa espíritu santo taypirakiw kunanaktï mayninakajj jan yatipki ukanak parlañapatakejj chʼam churasi, 9 yaqharusti uka pachpa espíritu santow Diosar confiyañ* yanaptʼi,+ yaqharusti uka espíritu santorakiw qollañatakejj chʼam churi,+ 10 yaqharusti milagronak lurañapataki,+ yaqharusti profecía arunak parlañapataki, yaqharusti amuytʼayat arunakajj Diosatti juti janicha uk amuytʼañapataki,+ yaqharusti kunayman arunakat parlañapataki,+ yaqharusti arunak jaqokipañapataki.+ 11 Ukampis taqe uka luräwinakajja, mä sapa espíritu santo taypikiw lurasi, uka espíritu santojj munañaparjamaw sapa maynir chʼam churaraki.

12 Mä sapa cuerpokis utjchejja, walja partenakaniwa, uka cuerpon taqe partenakapajj waljäkchisa mä sapa cuerpokïpjjewa,+ Cristompejj ukhamarakiwa. 13 Mä sapa espíritu santompiw taqenis bautisastanjja, ukhamat mä sapa cuerpokïñasataki, judiöskañänisa griegöskañänisa, esclavöskañänisa librëskañänisa taqeniw uka espíritu santo katoqtanjja.

14 Cheqpachansa cuerpojj janiw mä partenikïkiti, jan ukasti walja partenakaniwa.+ 15 Kayutejj “janiw nayajj amparäkti, ukatwa janejj cuerpon partepäkti” saspajja, janiw uka laykojj cuerpon jan partepäkaspati. 16 Jiñchutejj “janiw nayajj nayräkti, ukatwa janejj cuerpon partepäkti” saspajja, janiw uka laykojj cuerpon jan partepäkaspati. 17 Taqpach cuerpotejj nayräspajja, ¿kunampirak istʼsnasti? Taqpach cuerpotejj jiñchüspajja, ¿kunampirak muktʼsnasti? 18 Ukampis Diosajja munkäna ukarjamaw cuerpon partenakap lugarapar uchäna.

19 Cuerpon taqpach partenakapatejj mä kikpakïspajja, ¿cuerpojj kunjamäjjarakispasti? 20 Cuerpon partenakapajj waljäkchisa, mä cuerpokiw utji. 21 Nayrasti janiw ampararojj siskaspati: “Janiw nayajj jumar necesitksmati” sasajja. Pʼeqesti janirakiw kayunakarojj siskaspati: “Janiw nayajj necesitapksmati” sasajja. 22 Antisas cuerpon partenakapat kawkïrinakatejj jan wakisirjamäki uka partenakajj wali wakiskiriwa, 23 cuerpon kawkïr partenakapatejj amuyusarjam jan suma uñjatäki uka partenakarojj sum isthapiytanjja.+ Cuerposan partenakapat kawkïrinakatejj phenqʼaskayäki uka partenakajj wali respetompi uñjatawa, 24 kawkïr partenakatejj cuerposan wali suma uñjatäki uka partenakarojj janiw kʼachachtʼañajj wakiskiti. Diosaw cuerporojj ukham luräna, ukhamat kawkïr partenakatejj cuerposan jan suma uñjatäki uka partenakajj jukʼamp suma uñjatäñapataki, 25 janirak cuerpon tʼaqanoqtañas utjañapataki, antisas cuerpon partenakapajj taqeni jupanakpura cuidasipjjañapataki.+ 26 Cuerpon mä partepatejj tʼaqeschejja, mayni partenakajj taqenirakiw jupampi chikajj tʼaqesipjje.+ Cuerpon mä partepatejj jachʼañchatächejja, mayni partenakajj taqenirakiw jupampi chikajj kusisipjje.+

27 Jumanakajj Criston cuerpopäpjjtawa,+ sapa maynirakiw uka cuerpon mä partepäpjjtajja.+ 28 Diosaw congregacionan uttʼayi: nayraqatjja apostolonaka,+ ukjjarojj profetanaka,+ ukjjarojj yatichirinaka,+ ukjjarojj milagronak luririnaka,+ ukjjarojj qollirinaka,+ ukjjarusti mayninakar yanapirinaka, irpirinaka,+ kunayman aru parlirinaka.+ 29 ¿Janejjay taqenis apostolöpkitejja? ¿Janejjay taqenis profetäpkitejja? ¿Janejjay taqenis yatichirïpkitejja? ¿Janejjay taqenis milagronak lurirïpkitejja? 30 ¿Janejjay taqenis qollañatak chʼam katoqapkitejja? ¿Janejjay taqenis yaqha arunak parlirïpkitejja?+ ¿Janejjay taqenis arunak jaqokipirïpkitejja?*+ 31 Jumanakajj jukʼamp suma bendicionanak katoqañatakejj chʼamachasisipkakim.*+ Nayaw taqe thakinakat sipansa jukʼamp suma thaki uñachtʼayapjjäma.+

13 Nayatejj jaqenakana ukhamarak angelanakan arunakap parlirista, ukampis janiraki munasiñajj nayan utjkaspa ukhajja, mä latar uñtataw tojjoqerista jan ukajj platillor uñtataw chholloqerista. 2 Nayatejj profecía arunak parlirista, Diosan imantat amtanakapatsa taqpach amuyirista, taqe kun yatirista,+ qollunak onjjtayañatakis* Diosar confiyatajajj* wali jachʼarakïspa, ukampis janirak munasiñajj nayan utjkaspa ukhajja, janiw nayajj kunäkiristsa.*+ 3 Nayatejj taqe kunatï utjkitu ukanak yaqhanakar manqʼayañatak churirista,+ jachʼañchasiñatakis jakañaj churirista, ukampis janirak munasiñajj nayan utjkaspa ukhajja,+ taqe ukanakajj inamayakïspawa.

4 Munasir+ jaqejj paciencianiwa,+ khuyapayasiriwa.+ Munasir jaqejj janiw envidiasirïkiti,*+ janiw jachʼa jachʼa tukurïkiti, janiw wali wal tukurïkiti,+ 5 janiw kunatï jan lurañäki ukanak lurkiti,+ janiw kunatï jupatak walïki ukak thaqkiti,+ janirakiw jankʼak coleraskiti.+ Kuna jan wal luratas janiw amjjäskiti.+ 6 Kunatï jan cheqapäki ukatjja janiw kusiskiti,+ jan ukasti kunatejj cheqäki ukatwa kusisi. 7 Munasir jaqejj taqe kunansa amukiw tʼaqesi,+ taqe kun creyiraki,+ taqe kun suytʼi,+ taqe kun aguanti.+

8 Munasiñajj janipuniw tukuskiti.* Ukampis profecía arunak parlañas utjchejja chhaqtayatäjjaniwa, yaqha arunak parlañas* utjchejja tukusjjaniwa, yatiñas utjchejja chhaqtayatäjjaniwa. 9 Kuna laykutejj jiwasajj janiw phoqatpach yatktanti,+ profecía arunak parlatasas janirakiw phoqatäkiti. 10 Ukampis kunatï phoqatäki ukajj purinkani ukhajja, kunatï jan phoqatäki ukajj chhaqtayatäjjaniwa. 11 Nayajj wawäkayäta ukhajja, wawjamaw parlirïta, wawjamaw piensayäta, wawjamarakiw amuytʼirïta. Ukampis niyakejjay jichhajj jilïr jaqëjjstjja, kunanaktejj wawanakajj lurapki ukanak apanukjjtwa. 12 Jichhajja metalat lurat mä espejotsa uñjksna ukhamwa jiwasajj chhayphu chhayphuk* uñjtanjja, ukampis qhepatjja wali qhan uñj-jjañäni. Jichhajj janiw phoqatpach nayajj yatkti, jutïrinwa phoqatpach yatjjäjja, kunjamtï Diosajj nayar sum uñtʼkitu ukhama. 13 Ukhamarus Diosar confiyañasa,* suytʼañasa, munasiñasa utjaskakiniwa, ukampis uka kimsatjja munasiñaw jilanki.+

14 Maynit maynikam wal munasipjjam, kunanaktï Diosajj churki ukanak katoqañatakis chʼamachasisipkakim,* ukampis profecía arunak+ parlañatak jukʼamp chʼamachasipjjam. 2 Kunayman arunak parlañatak Diosan chʼamap katoqki uka jaqen parlatapjja janiw khitis amuykiti, Diosakiw amuyi,+ jupajj espíritu santo taypis Diosan imantat amtanakap+ parlkchejja janiw khitis parlatap amuykiti. 3 Ukampis profecía arunak parlirejja, arunakapampiw jaqenakarojj chʼamañchi, yanaptʼi, chuymachtʼaraki. 4 Yaqha aru parlirejj jupa pachpaw chʼamañchasi, profecía arunak parlirejj congregacionaruw chʼamañcharaki. 5 Nayajj muniristwa jumanakajj taqeni yaqha arunak parlapjjañama,+ ukampis profecía arunak parlapjjañamwa jukʼamp muntjja.+ Maynitï yaqha arunak parlchi, janirak congregacionar chʼamañchtʼañatak uka arunak jaqokipkchi* ukhajja, profecía arunak parliriw jupat sipansa jilanki. 6 Jilatanaka, nayatï jichhajj yaqha arunak parlas jumanakan ukar jutiristjja, ¿kunjamarak ukajj yanaptʼapjjeristamsti? Jumanakar yanaptʼañatakejja, Diosat katoqat arunakata,+ yatiñata,+ mä profeciata, mä yatichäwit parlañajaw wakisispa.

7 Music tukañ instrumentonakampejj ukhamarakiwa, mä arunjja flauta phusañampisa arpa tukañampisa ukhamarakiwa. Maynitejj notanakarjam jan sum tukkaspa ukhajja, kuna musicas flautampisa jan ukajj arpampisa tuktʼasiski ukajj ¿kunjamarak yatisispasti? 8 Maynitejj trompeta jan qhan tuktʼaspa ukhajja, ¿khitirak guerratak wakichasispasti? 9 Ukhamarakiwa, janitï jumanakajj fácil amuykañ arunakamp parlapkätajja, ¿kunjamarak maynejj parlatanakam amuyanisti? Thayarus parlasipkasma ukhamäniwa. 10 Aka mundonjja walja arunakaw parlasi, taqpach uka arunakajja amuykañarakiwa. 11 Maynitejj yaqha arut parlitaspa, janirak entiendkirista ukhajja, parlki ukatakejja nayajj extranjero jaqëkiristsa ukhamäspawa, jupasa nayatakejj extranjero jaqëkaspas ukhamarakïspawa. 12 Jumanakampejj ukhamarakiwa, niyakejjay kunanaktï espíritu santojj churki ukanak katoqañ wal munapjjstajja, kunanakatï congregacionar chʼamañchkaspa ukanak jukʼamp katoqañatak chʼamachasipjjam.+

13 Khititï yaqha aru parlki ukajja, parlatap jaqokipañataki*+ oración lurpan. 14 Nayatï yaqha arut oración lurstjja, janiw nayajj parlkti jan ukasti kuntï espíritu santot katoqta ukaw parlaski, ukhamajj kuntï nayajj parlkta uk janiw amuykti. 15 Ukhamajj ¿kun lurañas wakisispa? Kuntï espíritu santojj churkitu ukarjamaw oración luräjja, entiendkañ arunakampiw oración lurarakëjja. Kuntï espíritu santojj churkitu ukarjamaw alabanzanak Diosar cantäjja, entiendkañ arunakampiw cantarakëjja. 16 Ukampis jumatï espíritu santojj churki ukarjam Diosar jachʼañchäta ukhajja, Diosar oracionan yuspäratam jan amuyasajj ¿kunjamarak jumanak taypin mä aleq jaqejj “Amén” saspasti? 17 Cheqas wali sumsa yuspärstajja, uka jaqejj janiw chʼamañchtʼatäkiti. 18 Taqe jumanakat sipansa jukʼamp arunak parlataj laykuw nayajj Diosar yuspärta. 19 Ukampis congregacionanjja, tunka waranqa arunaka yaqha arut parlañat sipansa, nayajj mä phesqa entiendkañ arunakakwa parlañ munta, ukhamat yaqhanakar yatichañataki.+

20 Jilatanaka, jan wawanakjam amuyapjjamti,+ antisas jan walinak jan lurañatakejj wawanakjamäpjjam,+ jilïr jaqenakjam amuytʼasirïpjjam.+ 21 Leyinjja akham qellqatawa: “‘Aka markarojj extranjero jaqenakan arunakapampi jan uñtʼat jaqenakan arunakapampiw nayajj parläjja, ukhamäkipansa janiw istʼañ munapkitaniti’ siw Jehová* Diosajja”.+ 22 Yaqha arunak parlañajja, janiw creyentenakatakejj mä señaläkiti,+ jan ukasti jan creyentenakatakiw mä señalajja. Profecía arunakajj janiw jan creyentëpki ukanakatakïkiti, jan ukasti creyentenakatakiwa. 23 Ukhamajj taqpach congregacionatejj mä lugaran tantachasini, taqenis yaqha arunak parlapjjarakini ukhajja, ¿janit ukar mantanir aleq jaqenakasa jan creyentenakasa akanakajj loqheratäpjjewa sapkani? 24 Ukampis jumanakatï profecía arunak parlapjjäta, ukat mä jan creyente jaqesa jan ukajj mä aleq jaqes ukar mantanini ukhajja, arunakamajj cheqañchasiñapatakiw yanaptʼani, jupa pachpa sum amuykiptʼasiñapatakiw yanaptʼarakini. 25 Kunanakatï chuymapan imantatäki ukanaksa amuyasiniwa, ukatsti oraqer puriñkamaw altʼasini, akham sasaw Diosar adorarakini:* “Cheqapuniw Diosajj jumanakampïski”+ sasa.

26 Jilatanaka, ukhamajj ¿kun lurañas wakisispa? Kunapachatï jumanakajj tantachasipjjta ukhajja, maynejj salmonak canti, maynejj yaticharakiwa, maynisti Diosat katoqat arunak arsuraki, maynejj yaqha arunakwa parlaraki, maynisti mä arut yaqha aruruw jaqokiparaki.+ Taqe kunsa maynit maynikam chʼamañchtʼasiñatak lurapjjam. 27 Yaqha arunak parlirinakatejj utjchejja, paniniki jan ukajj kimsaniki parlapjjpan, parlañatakejj turnasipjjarakpan, ukatjja mayniw jaqokipañaparaki.*+ 28 Jaqokipiritejj* jan utjkchejja, jupanakajj congregacionan amukïpjjañapawa, Diosaruw chuymapan parlapjjañaparaki. 29 Profetanakatejj utjchejja, panini jan ukajj kimsani parlapjjpan,+ mayninakasti uka arunakajj kamsañs muni uk amuytʼapjjpan. 30 Ukampis maynitï ukan qontʼatäkasin Diosan arunakap katoqchejja, nayraqat parlirejj amukëjjpan, ukhamat Diosan arunakap katoqerejj parlañapataki. 31 Jumanakajj profecía arunak parlañatakejj taqeniw turnasipjjasma, ukhamat taqeni yateqapjjañamataki ukhamarak taqeni chʼamañchtʼasipjjañamataki.+ 32 Kunanaktï profetanakajj espíritu santot katoqapki ukanakjja, profetanak pachpaw apnaqapjjañapa. 33 Diosajj sumankañ utjayir Diosawa,+ taqe kunsa suma organiztʼat lurir Diosarakiwa.

Kunjamtejj santo jilatanakan taqe congregacionanakapan luraskejja, 34 warminakajj congregacionanakan amukïpjjpan, janiw jupanakan parlapjjañapajj wakiskiti.+ Antisas chachanakar istʼapjjpan,+ kunjamtï Leyejj siski ukhama. 35 Jupanakatï kun yatiñs munapjjchi ukhajja, chachanakapar utan jisktʼasipjjpan, mä warmitakejj congregacionan parlañajj phenqʼawa.

36 ¿Diosan arunakapajj jumanakatti qalltäna? ¿Jumanakan ukarukit Diosan arunakapajj purïnjja?

37 Maynitejj profetätapa jan ukajj kuntï espíritu santojj churki uk katoqerjamätap amuyaschi ukhajja, kunanaktejj nayajj qellqanipksma ukanak katoqasiñapawa, ukanakajj Tatitun mandamientonakapawa. 38 Ukampis maynitejj uk jan yäqkani ukhajja, jupajj jan yäqatarakïniwa.* 39 Ukhamajj jilatanaka, profecía arunak parlañatak chʼamachasisipkakim,+ janirak mayninakar yaqha arunak parlañjja jarkʼapjjamti.+ 40 Taqe kunsa wali suma, yäparu* lurapjjam.+

15 Jilatanaka, kuna suma yatiyäwinaktï nayajj yatiyapksma ukanakatwa jichhajj amtayanipjjsma,+ ukanaksti jumanakajj katoqasipjjtawa, ukanak laykurakiw suma saytʼatäsipktajja. 2 Nayajj yatiyapksma uka suma yatiyäwinakat sum katjjarusipjjäta ukhajja, salvasipjjätawa. Janitï ukham lurapkätajja, inamay creyentekïpjjätawa.

3 Kunanaktï nayajj nayraqat jumanakar yatichapkayasma ukanakjja nayajj katoqarakiyätwa, ukanakasti akanakawa: Qellqatanakarjamaw Cristojj juchanakas layku jiwäna,+ 4 ukatjja imatäjjarakïnwa.+ Jïsa, jupajj Qellqatanakarjamaw+ kimsïr urun+ jaktayatäjjäna,+ 5 ukatjja Cefasaruw* uñstäna,+ ukjjarojj Tunka Payani apostolonakaruw uñstarakïna.+ 6 Ukatjja mä pachpa lugaran tantachtʼat 500 jukʼampi jilatanakaruw uñstäna,+ jupanakat jilapartejj jiwasanakamp chikäsipkiwa, yaqhepasti jiwañanwa iktʼjjapjjaraki. 7 Ukjjarojj Santiagoruw uñstäna,+ ukatjja taqe apostolonakaruw uñstarakïna.+ 8 Qheparusti nayaruw uñstarakitäna,+ janïr horasäkipan nasit wawäkiristsa ukhama.

9 Nayajj apostolonak taypitjja jukʼamp sullkätwa, janirakiw apóstol satäñatakis walïkti, kuna laykutejj Diosan congregacionaparuw nayajj jan waltʼayañatak arknaqayäta.+ 10 Ukampis Diosan wali khuyapayasiñapatwa nayajj apostoljam serviskta. Diosajj nayat wal khuyaptʼayaskitu ukajj janiw inamayäkiti, kuna laykutejj mayni apostolonakat sipansa jukʼampiw nayajj trabajiwayta, ukampis janiw nayan pachpa chʼamajampejja, jan ukasti Diosan wali khuyapayasiñapatwa ukham trabajiwayta. 11 Nayasa jan ukajj mayni apostolonakasa mä yatiyäwikwa yatiyapjjta, jumanakajj uka yatiyäwirojj creyipjjaraktawa.

12 Cristojj jiwatanak taypit jaktayatänwa sasaw yatiyasktanjja,+ ukhamajj ¿kuntarak jumanakat yaqhepanakajj janiw jiwatat jaktañajj utjkiti sasin sapjjtasti? 13 Jiwatat jaktañatejj jan utjkchejja, janirakipï Cristos jaktayatäkäntejja. 14 Ukampis Cristotejj jan jaktayatäkchejja, yatiyatasajj inamayakiwa, jumanakan Diosar confiyapjjatamas* inamayakirakiwa. 15 Janitejj jiwatanakajj jaktayatäpkani ukhajja, janirakipï Diosajj Cristor jaktaykäntejja, ukhamajj jiwasatï Diosaw Cristor jaktayäna sissnajja,+ Dios contras kʼarinak parlksna ukhamaspawa.+ 16 Jiwatanakatejj jan jaktayatäpkchinejja, janirakipï Cristojj jaktayatäkäntejja. 17 Cristotejj jan jaktayatäkchïnjja, jumanakan Diosar confiyapjjatamajj* inamayakiwa, juchanakamas janiw perdonatäkiti.+ 18 Khitinakatï Criston discipulonakapjam jiwañan iktʼjjapjje ukanakajja, jan mayampitakiw jiwjjapjje.+ 19 Jiwasatejj aka vidanaki Cristor suyaskstanjja, yaqha jaqenakat sipansa jukʼampi sintkañätanwa.

20 Ukampis Cristojj jiwatanak taypit jaktayatäjjewa, jupajj khitinakatï jiwañan iktʼjjapjje ukanakatjja jupaw nayraqat jaktayatäna.*+ 21 Niyakejjay jiwañajj mä jaqe taypi utjchejja,+ jiwatat jaktañajj mä jaqe taypiw utjaraki.+ 22 Kunjamtï taqenis Adán kawsajj jiwarasipkejja,+ ukhamarakiw taqenis Cristo taypejj jaktayatäpjjani.+ 23 Sapa mayniw horasapar jaktani: Cristow nayraqat jaktayatänjja,*+ ukjjarusti khitinakatï Cristonkapki ukanakaw jaktanipjjani, jupajj kuttʼankani uka tiempona.*+ 24 Tukuyarojja, jupajj Dios Awkiparuw Reino* katuyjjani. Kunapachatï jupajj taqe gobiernonakaru, taqe autoridadanïpki, chʼamanïpki ukanakar qʼal tukj-jjani ukapachaw ukajj pasani.+ 25 Cristojj reyjam apnaqañapawa, Diosajj taqe enemigonakaparu kayunakapampi takjjataykani ukapachkama.+ 26 Jiwañajja, mä arunjja qhepïri enemigojj tukjatäjjaniwa.+ 27 Diosajj “taqe kunwa Criston kayunakapar katuyäna”.+ ‘Taqe kunwa katuyäna’ sasinjja,+ janiw sañ munkiti taqe kun katuykäna uka Diosamppachas jupar katuyaskaspa ukhamjja.+ 28 Diosajj taqe kunsa Yoqapar katuyjjani ukhajja, Yoqajja taqe kun katuyir Awkiparuw katuyasjjarakini,+ ukhamat Diosajj taqeniru apnaqjjañapataki.+

29 Jiwatanakatejj jan jaktayatäpkchinejja, jiwatäjjañatak amtampi bautisasirinakajj ¿kamachapjjanisa?+ Jiwatanakatejj jan jaktanipkchinejja, ¿kunatarak jupanakajj uka amtampi bautisasipjjesti? 30 ¿Kunatarak jiwasajj taqe horasansa jakañ aptʼasirjam jaktansti?+ 31 Jilatanaka, nayajj sapüruw jiwañar saykatta, ukajj cheqäskapuniwa, kunjamtï nayajj Cristo Jesús Tatitusan discipulopäpjjatam layku jachʼañchasktjja* ukhama. 32 Nayatejj mayni jaqenakjama,* salvaje animalanakampi Éfeso markan nuwasstjja,+ ¿kuna walirak nayatakisti? Jiwatanakatejj jan jaktayatäpkchini ukhajja, mayni jaqenakjamarakiy sapjjañäni: “Manqtʼasiñäni, umtʼasiñäni, qharürojj jiwjjchiñänejjaya”+ sasa. 33 Jan engañayasipjjamti. Jumanakatejj jan wali jaqenakampi chikachasipjjätajja, kuna suma luräwinaktï lurasipkta ukjja armasjjapjjätawa.+ 34 Amuytʼasipjjam, kunatï cheqapäki uk lurapjjam, jan juchanak lurapjjamti, yaqhepanakajj janiw Diosar uñtʼapkiti. Jumanakan phenqʼasipjjañamatakiw nayajj ukanak sapjjsma.

35 Maynejj akham saspawa: “¿Kunjamsa jiwatanakajj jaktanipjjani? ¿Kuna kasta cuerponis jiwatanakajj sartanipjjani?”+ sasa. 36 ¡Jan amuytʼasir jaqe! Kuntï jumajj phawkta ukajj janiw jaktkaspati, janitejj nayraqat jiwkaspa ukhajja. 37 Jumajj phawkta ukhajja, janiw mä jiltat ali* uchktati, jan ukasti jathakwa phawtajja, trigöpasa jan ukajj yaqha jathäpasa. 38 Ukampis Diosajj kunjamtï munki ukarjamaw cuerpo churi, sapa jatharuw cuerpop churaraki. 39 Janiw taqe cuerponakajj mä kikpäkiti, jaqen cuerpopajj yaqhawa, animalanakan cuerpopas yaqhawa, jamachʼinakan cuerpopas yaqhawa, chawllan cuerpopas yaqharakiwa. 40 Ukhamarakiw utji, alajjpachankiri cuerponakasa+ aka oraqenkir cuerponakasa.+ Ukampis alajjpachankir cuerponakan suma uñnaqapajj yaqhawa, aka oraqenkir cuerponakan suma uñnaqapas yaqharakiwa. 41 Intin qhanatapajj yaqhawa, phajjsin qhanatapas yaqharakiwa, warawaranakan kʼajatapas yaqharakiwa, cheqas sapa warawaran kʼajatapaw mayjajja.

42 Jiwatat jaktañampejj ukhamarakiwa. Tukusir cuerpow imantasi,* jan tukusir cuerpow jaktaniraki. 43 Jan jachʼañchat cuerpow imantasi,* jachʼañchat cuerpow jaktaniraki. Jan chʼamani cuerpow imantasi,* chʼamani cuerpow jaktaniraki. 44 Jañchi cuerpow imantasi,* espíritu cuerpow jaktaniraki. Jañchi cuerpotejj utjchejja, espíritu cuerpojj utjarakiwa. 45 Qellqatanjja sarakiwa: “Nayrïr Adán chachajj jakkiri jaqeruw* tuküna” sasa. Qhepïri Adanajja jakañ churir espirituruw tukurakïna. 46 Ukampis espiritojj janiw nayrïrïkiti, jan ukasti jañchiw nayrïrejja, espiritojj ukjjarüskiwa. 47 Nayrïr jaqejj oraqetawa, laqʼat luratarakiwa, payïri jaqejj alajjpachatawa. 48 Laqʼat luratanakajja, laqʼat luratäkäna uka jaqjamäpjjarakiwa, alajjpachankapki ukanakajja, khititejj alajjpachat jutkäna jupjamäpjjarakiwa. 49 Kunjamatï jiwasajj laqʼat luratäki ukar uñtasitäktanjja, ukhamarakiw jiwasajj alajjpachankirïki ukar uñtasitäñäni.

50 Ukampis nayajj ak sañ munapjjsma, jilatanaka, jañchimpi wilampejj janiw Diosan Reinop* katoqkaspati, janirakiw tukusir cuerpojj jan tukusir cuerpo katoqkaspati. 51 Diosan imantat amtapatwa nayajj yatiyañ munapjjsma: janiw taqenejj jiwañan iktʼkañäniti, ukampis taqeniw cambiatäñäni, 52 qhep qhepa trompetajj tuktʼaskani uka tiemponjja, mayaki, mä chʼipjjtanaki taqenis cambiatäñäni. Kunapachatï trompetajj tuktʼaskani ukhajja, jiwatanakajj jan tukusir cuerponiw jaktapjjani, jiwasas cambiatarakïñäniwa. 53 Tukusir cuerpojj jan tukusir cuerpor cambiatäñapawa, jiwir cuerpojj jan jiwir cuerpor cambiatäñaparakiwa. 54 Kunapachatï tukusir cuerpojj jan tukusir cuerpor cambiasjjani, jiwir cuerpos jan jiwir cuerpor cambiasjjani ukhajja, aka qellqat arunakaw phoqasini: “Jiwañajja wiñayatak chhaqtayatawa”.* 55 “Jiwaña, ¿kawkinkaraki atipjañamasti? Jiwaña, ¿kawkinkaraki venenomasti?”.* 56 Jiwaña utjayir venenojj* juchawa, juchan chʼamapasti Leyiwa.* 57 ¡Diosar yuspärapjjañäni, jupaw Jesucristo Tatitus taypejj atipjañ churistu!

58 Ukhamajj munat jilatanaka, suma thurtʼatäsipkakim, suma saytʼatäsipkakim, Tatitur serviñansa walja lurañanakampi ocupatäpjjam. Jumanakajj yatipjjtawa, Tatitur servipjjatamajj janiw inamayäkiti.

16 Santo jilatanakataki qollqe apthapiñ toqetjja,+ kunanaktï Galaciankir congregacionanakar nayajj siskayäta ukarjam lurapjjam. 2 Sapa semanan nayrïr urupanjja sapa mayniw jumanakajj mä qhawqha qollqe iraqtʼapjjañama, qhawqtï puedipkta ukarjama, ukhamat kunapachatï nayajj purinkä ukhajj jan apthapisiskañapataki. 3 Jumanakan ukar purinkä ukhajja, cartanakaman ajllipkäta uka chachanakaruw+ Jerusalenar khitäjja, ukhamat kuntï munasiñat churapkta uk apapjjañapataki. 4 Ukampis nayan sarañajatï wakisinejja, jupanakajj nayamp chikaw sarapjjarakini.

5 Macedonia marknam sarkä ukhaw jumanakar visitapjjäma, nayasti Macedonia+ marknamaw saräjja, 6 inas jumanakamp mä qhawqha tiempo quedaschï, jan ukajj inas juyphipachajj jumanakamp paschï, ukhamat kawkirutï sarkä uka thaknam mä rato nayar compañtʼapjjañamataki. 7 Janiw nayajj paskasakejj jumanakamp jikisiñ munkti, antisas Jehová* Diosatejj munanejja, mä qhawqha tiempo jumanakamp quedasiñwa munirista.+ 8 Ukampis Pentecostés Fiestakamaw nayajj Éfeso+ markankaskäjja, 9 kuna laykutejj jukʼamp trabajiñatak mä jachʼa punkuw nayatakejj llawirasi,+ ukampis waljaniw naya contra saytʼasirinakajj utji.

10 Timoteojj+ purinkani ukhajj yanaptʼapjjam, ukhamat jumanak taypin jan kunatsa ajjsarañapataki, jupajj nayjamarakiw Jehová* Diosan lurañanakap phoqaski.+ 11 Ukhamajj jan khitis jupar jiskʼachpanti. Nayan ukar sumaki jutjjañapatak khitanjjapjjam, nayajj jilatanakampiw akan suyaskta.

12 Apolos+ jilatasarojj jilatanakamp chik jumanakar visitañapatakiw nayajj kutin kutin sista. Janïraw jichhajj jumanakan ukar jutañ amtkiti, ukampis kunapachay jutirjamächini ukhaw jutani.

13 Amuyasipjjapunim,+ Diosar confiyañanjja* suma saytʼatäpjjam,+ jan ajjsarirïpjjamti,+ chʼamani saytʼasipjjam.+ 14 Taqe kunsa munasiñampi lurapjjam.+

15 Jumanakajj yatipjjtawa, Acaya markanjja Estéfanas jilatan utapankirinakaw nayrïr discipulonakänjja, jupanakarakiw santo jilatanakar yanaptʼañatak* chʼamachasipjjäna. Ukhamajj jilatanaka, nayajj chʼamañchtʼanipjjsmawa: 16 ukham jaqenakarojj istʼasipkakim, taqe khitinakatï yanaptʼasipki, wal trabajtʼasipki ukanakarus ukhamaraki.+ 17 Estéfanas,+ Fortunato, Acaico jilatanakan akankapjjatapat wal nayajj kusista, jupanakaw jumanak lantejj nayar wal yanaptʼapjjetu. 18 Jupanakarakiw chuymajsa* qhanartayapjjetu, jumanakan chuymanakamsa ukhamaraki. Ukham jaqenakarojj wali valoranit uñjapjjam.

19 Asiankir congregacionanakajj aruntanakapwa apayanipjjtamjja. Aquilasa, Priscasa,* utapankir congregacionasa+ Tatitun discipulonakapjamaw wali munasiñampi aruntanipjjtamjja. 20 Taqe jilatanakaw aruntanipjjtamjja. Jumanakajj maynit maynikam jampʼattʼasisa* aruntasipjjam.

21 Naya Pablojj ukhamarakiw aruntaj pachpa amparajampi qellqtʼas apayanipjjsma.

22 Khititejj Tatitur jan munaski ukajja, maldisitäpan. ¡Nanakan Tatituja, jutamaya! 23 Tatit Jesusan wali khuyapayasiñapajj jumanakampïpan. 24 Cristo Jesusan discipulonakapa, munasiñajajj taqe jumanakampïpan.