2 CORINTIOS
CORINTO CONGREGACIONAR PAYÏR QELLQAT CARTA

1 Naya Pablojja Diosan munañapatwa Cristo Jesusan apostolopätjja. Timoteo+ jilatasampi chikaw nayajj Corintonkiri Diosan congregacionapar aka carta qellqanta, Acayankiri+ taqe santo jilatanakarus ukhamaraki.

2 Dios Awkisana ukhamaraki Jesucristo Tatituna wali khuyapayasiñapasa sumankañapasa jumanakampïpan.

3 Jesucristo Tatitusan Dios Awkipajj jachʼañchatäpan,+ jupaw wali munasiñampi khuyaptʼayasiri Awkejja,+ taqe kunan chuymachtʼasiri Diosarakiwa.+ 4 Jupaw taqe llakinakasan* chuymachistu,*+ ukhamat kunayman llakinakan* uñjasirinakar chuymachañasataki,+ kunjamtï Diosajj chuymachkistu ukhama.+ 5 Kunjamtï Cristo laykojj walja tʼaqesiñanakan uñjasktanjja,+ ukhamarakiw Cristo taypejj walja chuymachäwi katoqtanjja. 6 Ukhamajj nanakatï llakinakan* uñjasipjjstjja, jumanakan chuymachatäpjjañamatakiwa ukhamarak salvatäpjjañamataki. Nanakatï chuymachäwi katoqapjjstjja, jumanakan chuymachatäpjjañamatakiwa. Uka chuymachäwiw nanakajj tʼaqesipkta uka pachpa tʼaqesiñanak aguantañ yanaptʼapjjtamjja. 7 Nanakajj jumanakar wal confiyapjjsma. Yatipjjaraktwa, kunjamtï jumanakajj nanakjam tʼaqesisipktajja, ukhamarakiw jumanakajj nanakjam chuymachatäpjjäta.+

8 Jilatanaka, kuna problemanakantï nanakajj Asia+ provincian uñjasipkayäta ukanak yatipjjañamwa munapjjta. Ukanjja sinti jan waltʼäwinakanwa uñjasipjjayäta, janiw chʼamanakajampikejj aguantapkiriskayätti, inas jiwjjchiñäni sasaw sapjjarakiyäta.+ 9 Jiwañar apjjaruyat jaqenakjamaw amuyasipjjayäta. Ukampis ukajja jan nanak pachpar confiyasipjjañajatakiw pasäna, jan ukasti jiwatanak jaktayir Diosar confiyapjjañajatakiw pasäna.+ 10 Jupaw ukham jiwañat salvapjjetu, wasitat salvasipkakitaniwa. Juparuw nanakajj confiyasipjjta, jupajj salvasipkakitaniwa.+ 11 Jumanakajj ukhamarakiw oracionanak lurasajj yanaptʼapjjetasma.+ Waljanitejj nanakatak Diosar mayipjjanejja, Diosajj istʼaniwa, yanaptʼapjjarakitaniwa, ukhamatwa waljanejj yuspärapjjarakini.+

12 Nanakajj suma conciencianïpjjtwa, kuna laykutejj aka mundonkir jaqenak taypinkasasa, jukʼampis jumanak taypinkasajja, nanakajj wali qʼoma chuymampi ukhamaraki Diosajj yatichki uka cheqa chuymampiw sarnaqapjjta, janiw jaqen yatiñaparjamajja,+ jan ukasti Diosan wali khuyapayasiñaparjamaw sarnaqapjjta, ukatwa nanakajj jachʼañchasipjjta. 13 Kunanakatï jumanakatak liytʼañjamäki,* amuytʼañjamäkaraki ukanakwa nanakajj qellqanipjjsma. Ukanak taqpacha* sum amuytʼasipkakisma ukwa nayajj suyarakta. 14 Kunjamtï jumanakat yaqhepajj amuyjjapjjtajja, jumanakajj nanakatwa jachʼañchasipjjtajja, nanakajj ukhamarakiw Jesús Tatitusan urupanjja jumanakat jachʼañchasipjjäjja.

15 Uka confianzampiw nayajj jumanakar nayraqat visitir jutañ munayäta, ukhamat jumanakajj payïr kutin kusisipjjañamataki.* 16 Nayajj Macedoniar jutkasaw jumanakar visitañ munayäta, Macedoniat kuttʼanjjasinsti ukhamarakiw jumanakar visitirejj wasitat jutañ munayäta. Ukatsti Judear sarkasinwa jumanakamp chikajj thaknam mä rat sarañ munarakiyäta.+ 17 Jumanakan ukar jutañ munkayäta ukhajja, janiw aleq ukhamakejj jutäwa sasajj parlkayätti. Jan ukajj ¿munañajarjamas nayajj amtkirista ukhamcha amuyapjjta? Janiw nayajj “jïsa, jïsa” sasinjja, “janiwa, janiwa” siskiristti. 18 Ukampis Diosaw aka toqet confiykañajja, nanakajj janiw “jïsa” sasajj “janiwa” sapksmati. 19 Diosan Jesucristo Yoqapajja, mä arunjja khitittejj nayasa, Silvanosa,* Timoteosa+ yatiyapksmajja, janiw “jïsa” sasinjja “janiwa” siskiti, jan ukasti “jïsa” sasajj “jïsa” sapuniwa. 20 Diosan promesanakapajj qhawqhäpasa, Jesús taypiw phoqasiwayi.+ Jupa taypirakiw amén sasajj Diosar sistanjja,+ ukhamat Diosar jachʼañchañasataki. 21 Ukampis khititejj jumanakarus nanakarus Cristonkapjjtawa sasin mä garantía churkistu, ajlliskarakistu ukajj Diosawa.+ 22 Juparakiw sellopampi selljjatistu.+ Uka sellojj chuymasankki uka espíritu santowa,+ ukajj kunatï jutkani ukan mä garantiapawa.

23 Jichhajj nayajj Diosaruw artʼasta, naya contra mä testigjam saytʼañapataki: nayajj janiw jukʼamp llakisiyañ munapkayäsmati, ukatwa janïrajj Corinto markar jutkti. 24 Jumanakajj Diosaruw confiyapjjtajja,* janiw nanakajj ukjjar munañanïpkti,+ jan ukasti trabajir masinakamäpjjtwa, ukhamat kusisitäpjjañamataki. Jumanakajj Diosar confiyapjjatam* laykuw suma saytʼatäsipktajja.

2 Ukatwa nayajj jumanakar wasitat visitir jutkä ukhajja, jan llakimpi jutañ amtta. 2 Nayatejj jumanakar llakisiyapjjerisma, mä arunjja khitinakatï kusisiyapkitu ukanakar llakisiyirista ukhajja, ¿khitirak nayarojj kusisiyitaspasti? 3 Ukatwa nayajj qellqanipjjayäsma, ukhamat jumanakan ukar jutasajja, jan jumanak kawsajj llakisiñajataki, jan ukasti kusisiñajataki. Nayajj janiw aka toqet payachaskti: kunanakatï nayarojj kusisiykitu ukanakajja ukhamarakiw taqe jumanakar kusisiyapjjtamjja. 4 Nayajj wali tʼaqesita chuymajansa wali llaktʼata ukhamaw jumanakarojj wali jachtʼasisa qellqanipjjayäsma. Ukampis janiw llakisiyañatakejja,+ jan ukasti qhawqsa jumanakar munasipjjsma uk yatipjjañamatakiw qellqanipjjayäsma.

5 Maynitejj llakisiyapjjstamjja,+ janiw nayarojj llakisiykituti, jan ukasti taqe jumanakaruw llakisiyapjjtamjja. Janiw nayajj arunakajampi sinti qhorüñ* munkti. 6 Uka jaqerojj niya taqeniw cheqañchjjapjjtajja, ukhak cheqañchjjapjjam. 7 Antisas munasiñampi perdonapjjam, chuymachtʼapjjarakim,+ ukhamat wal llakisitap layku jan aynachtʼañapataki.*+ 8 Qhawqsa juparojj munasipjjta uk uñachtʼayapjjañamatakiw nayajj ewjjtʼanipjjsma.+ 9 Ukatarakwa nayajj qellqanipjjayäsma: taqe kunansa istʼasirïpjjtati janicha uk yatiñataki. 10 Jumanakatï maynirojj mä kunatsa perdonapjjstajja, nayajj perdonaraktwa. Nayatejj kuna jan walitsa perdonstjja, jumanak laykuw Cristo nayraqatan perdontjja, 11 ukhamat jiwasajj Supayampi* jan engañjayasiñasataki,+ kuna laykutejj jan wali amtanakap jiwasajj sum yattanjja.+

12 Kunawrasatejj Cristjjat suma yatiyäwinak yatiyañatak Troas+ markar purta, ukhamaraki Tatitur serviñataki mä punkojj nayatak llawirasi ukhajja, 13 Tito+ jilajamp jan jikisisajja chuymajan wal llaktʼasiyäta. Ukhamajj jupanakat despidtʼasisajj Macedoniaruw+ jutjjta.

14 ¡Diosajj yuspäratäpan! Jupaw guerran atipjasin kuttʼanipki uka soldadonakarjamajj Cristomp chik irpistu. Diosat yatiñajja mä suma olorar uñtasitawa, jiwasanak taypirakiw Diosajj taqe cheqanakar uk puriyaski. 15 Cristjjat yatiyirinakajja, Diosatakejj mä suma olorar uñtasitätanwa. Uka suma olorasti salvatäpkani ukanakampiru jiwarayatäpkani ukanakampiruw puri. 16 Jiwarayatäpkani ukanakatakejja, ukajj jiwañan olorapawa, jiwañarurakiw api.+ Salvatäpkani ukanakatakisti, ukajj jakañan olorapawa, jakañarurakiw api. Ukhamajj ¿khitisa ukanakatakejj wali suma wakichtʼatajja? 17 Nanakaw wakichtʼatäpjjta. Nanakajj janiw Diosan arunakapa muyuyas aljirinakäpkti,*+ kunjamtï walja jaqenakajj lurapki ukhamjja. Jan ukasti cheqa chuymampiw Diosan khitatanakapjam parlapjjta, Dios nayraqatanjja Criston discipulonakapjamaw parlapjjarakta.

3 ¿Nanakajj mayampit jumanakar recomendasipjjäjja? ¿Nanakjjat sum parliri cartanakti jumanakar churapjjäma, kunjamtï yaqhep jaqenakajj lurapki ukhama? Jan ukajj ¿jumanakarucha uka cartanak mayipjjäma? 2 Jumanak pachpaw nanakjjat parliri cartäpjjtajja,+ ukasti chuymanakajan qellqantatawa, taqe jaqenakaw uk uñtʼapjje, liytʼapjjaraki. 3 Jumanakaw Criston cartapäpjjtajja, ukajj qhanaw amuyasi. Ukasti nanakan qellqatarakiwa,+ jïsa, Diosan servirinakap taypi qellqatawa. Janirakiw tintampi qellqatäkiti, jan ukasti jakkir Diosan espiritupampi qellqatawa, janiw tʼalpha qalanakar qellqatäkiti, jan ukasti jañchit lurat tʼalpha qalanakaru,+ mä arunjja chuymanakaru qellqantatawa.+

4 Nanakajj Cristo taypiw Diosar confiyapjjta. 5 Janiw nanakajj nanak pachpasa kun lurañatak suma wakichtʼatäpkirista ukham amuyasipkti, jan ukasti Diosaw nanakarojj suma wakichtʼatäñatak yanaptʼapjjetu.+ 6 Jupaw nanakarojj machaq pacton+ servipjjañajatakejj sum wakichtʼapjjetu, janiw qellqat Leyir+ serviñatakejja, jan ukasti espíritu santor serviñataki. Qellqat Leyejj jiwañar apiriwa,+ ukampis Diosan espiritupajj jakañ chuririwa.+

7 Jiwañar apiri qalar qellqata Leyejja,+ mä suma kʼajkir qhanampi churatänwa, Israelan wawanakapas janiw Moisesan ajanup uñkatirjamäpkänti, ajanupajj wal kʼajatap layku.+ Ukampis uka kʼajkir qhanajj chhaqtayatäñapänwa. 8 Ukhamajj ¿janit espíritu santon luräwipajj jukʼampi kʼajkirïñapäki?+ 9 Jiwañar apiri Leyitejj+ kʼajkirïchïnjja,+ ¡jaqenakar cheqap sarnaqerir tukuyki uka luräwejj jukʼamp kʼajkirïñapawa!+ 10 Jukʼamp kʼajkiri utjatap laykojja, kunatï mä tiempon kʼajkirïkäna ukan kʼajatapajj apaqatäjjewa.+ 11 Kunatï chhaqtañapäkäna ukatejj kʼajkir qhanampi churatächïnjja,+ ¡machaq pacton qhanapajj jukʼampi kʼajkiriwa!+

12 Niyakejjay ukar wal confiystanjja,+ jiwasajj qhana arunakampiw parltanjja, 13 janirakiw Moisesjam lurktanti, jupajj mä velompiw ajanupar uchasïna,+ ukhamat Israelan wawanakapajj kunatï chhaqtayatäñapäkäna uka kʼajkir qhana jan uñjapjjañapataki. 14 Jupanakajj janiw amuytʼañ munapkänti.+ Jichhakamas amuyunakapajj uka telampi imjjatatakïskiwa,+ janirakiw nayra pactotsa amuyapkiti, uka telajj Cristo taypikiw apaqatäspa.+ 15 Jichhürkamas chuymanakapajj mä telampjam imjjatatakïskiwa,+ ukatwa Moisesan qellqatanakap jan amuyirjamäpkiti.+ 16 Ukampis maynejj Jehová* Diosan ukar kuttʼanjje ukhajja, telajj apaqatäjjewa.+ 17 Jehová* Diosajj Espirituwa,+ kawkjankkitejj Jehová* Diosan espiritupajja, ukan libre jakasiñaw utji.+ 18 Taqe jiwasanakajj ajanus jan kuna telampi imjjatasisaw Jehová* Diosan kʼajkir qhanap espejonakar uñtat qhantʼaytanjja. Ukham qhantʼkasajja, kunjamäkitejj jupajj ukarjam tukusaw jiwasajj jukʼamp jukʼampi qhantʼasktanjja, kunjamarutï Jehová* Diosajja, mä arunjja Espiritojja* tukuykistu ukarjama.+

4 Niyakejjay nanakajj Diosan khuyapayasiñapat ukham serviñ katoqapjjstjja, janiw aynachtʼapkti. 2 Antisas kunanakatejj jamasan lurañäki, phenqʼaskayäki ukanakjja apanukupjjtwa, janirakiw engañjapkti, ni Diosan arunakapsa mayjtʼayapkti,+ jan ukasti kunatï cheqäki ukwa yatiyapjjta, ukhamatwa Dios nayraqatanjja taqe jaqenakan concienciapatakejj yateqaskay sarnaqerit uñtʼayasipjjta.+ 3 Nanakajj yatiyapkta uka suma yatiyäwinakatejj telampi chʼamaktʼayatächejja, khitinakatejj jiwapkani ukanak taypinwa telampi chʼamaktʼayatäski, 4 jupanak taypinwa akapachan* diosapajj+ jan creyentëpki ukanakan amuyunakap chʼamaktʼayi,+ ukhamat Cristjjat parlki uka kʼajkir yatiyäwinakan qhanapajj jan jupanakjjar qhantʼañapataki,+ Cristow kunjamäkitejj Diosajj uk uñachtʼayi.+ 5 Nanakajj janiw nanak pachpat yatiyapkti, jan ukasti Jesucristow Tatitojja sasaw yatiyapjjta, jumanakan esclavonakamar uñtatarakiw Jesús layku yatiyapjjta. 6 Dios pachpaw akham säna: “Chʼamak taypit qhanajj qhantʼpan”+ sasa. Diosaw qhanapampejj chuymanakajar qhantʼayani,+ ukhamat jupjjat yatiñajj Criston ajanup taypi chuymanakajan qhantʼañapataki.

7 Ñeqʼet lurata vasor+ uñtasitäpkstsa, nanakanjja kunatï wali valoranïki+ ukaw utjapjjetu, ukhamat jaqen chʼamapat jilankki uka chʼama katoqapjjatajajj qhan amuyasiñapataki, uka chʼamajj Diosatwa juti, janiw nanakat jutkiti.+ 8 Nanakajj kunayman jan waltʼañanakampi muyuntatäpjjtwa, ukampis janiw jan onjjtirjamäpkti. Jan kun kamachirjamaw uñjasipjjta, ukampis ukanakat mistuñajj utjakipuniwa.*+ 9 Jan waltʼayañatakiw arknaqapjjetu, ukampis janiw jaytanukutäpkti.+ Tinkuyapjjetuwa, ukampis janiw tukjatäpkti.+ 10 Kawkirutejj sarapkta ukanjja, sapa kutiw niya jiwayata uñjasipjjta, kunjamtï Jesusajj tʼaqeskäna ukhama,+ ukampis nanakajj cuerponakajan aguantasipkaktwa, ukhamat kunjamtï Jesusajj jakkäna ukajja cuerponakajan qhan amuyasiñapataki. 11 Jakkasinjja Jesús laykojj sapa kutiw niya jiwayat uñjasipjjta,+ ukhamat kunjamtï Jesusajj jakkäna ukajja jiwir cuerponakajan qhan amuyasiñapataki. 12 Nanakajj sapa kutiw niya jiwayat uñjasipjjta, ukampis jakañajj jumanakatakiwa.

13 Kunjamtï qellqatan siskejja ukhamarakiw nanakajj Diosar confiyapjjta,* ukansti siwa: “Nayajj Diosaruw confiyta,* ukatwa parlta”+ sasa. Nanakajj Diosaruw confiyapjjarakta,* ukatwa parlapjjta. 14 Nanakajj yatipjjtwa, khititejj Jesusar jaktaykäna ukarakiw nanakarojj Jesusarjam jaktayapjjetani, ukatjja jumanakampi chikaw Jesús nayraqatar irpapjjetani.+ 15 Taqe ukanakajj jumanakan askimatakiwa, ukhamat Diosan wali khuyapayasiñapajj jukʼampi jiljjattaskakiñapataki, walja jaqenakan jupar yuspärapjjatap layku, ukhamatwa Diosarojj jachʼañchasi.+

16 Ukhamajj jiwasajj janiw rendisktanti, cuerposajj merqʼesiskchisa, chuymasasa amuyusasa urut urutjamaw machaqar tukuski. 17 Tʼaqesiñajj* mä qhawqha tiempotakikiwa, janirakiw kunäkisa, ukampis uka tʼaqesiñajj jukʼampi jachʼa bendicionanakwa jiwasatakejj apani, uka bendicionanakajj wiñayatakiwa.+ 18 Jiwasajj janiw kunanakatï uñjaski ukanakar chuym churktanti, jan ukasti kunanakatï jan uñjaski ukanakaruw chuym churtanjja.+ Kunanakatï uñjaski ukajj mä qhawqha tiempotakikiwa, kunanakatï jan uñjaski ukanakasti wiñayatakiwa.

5 Jiwasajj yattanwa, oraqenkiri utasajja, mä arunjja aka carpajja tinkuyatäniwa,+ ukatjja Diosaw mä uta alajjpachan churistani, uka utajj janiw jaqen amparampi luratäkiti,+ wiñayatakirakiwa. 2 Aka utansti jiwasajj wal ayqtanjja, ukatwa alajjpachankirïki ukampi* isthapisiñ taqe chuyma suyasktanjja,+ 3 ukhamatwa ukampi isthapiskañäni ukhajj jan qʼalaläkañäniti. 4 Khitinakatï aka carpanktan ukanakajja, wali llaktʼataw ayqosktanjja. Jiwasajj janiw aka carpa apsusiñ munktanti, jan ukasti alajjpachankirïki ukampiw isthapisiñ muntanjja,+ ukhamat kunatï jiwirïki ukajja jakañampi manqʼantatäñapataki.+ 5 Diosaw ukham jakañasatakejj wakichistu,+ juparakiw espíritu santo churistu, ukasti kunatï jutkani ukan mä garantiapawa.+

6 Jiwasajj taqe chuymaw confiytanjja, yatiraktanwa, aka jañchi cuerpon jakkasajja, Tatitut jayankañäniwa,+ 7 jiwasajj janiw uñjatas laykojj sarnaqktanti, jan ukasti Diosar confiyatas* laykuw sarnaqtanjja. 8 Jiwasajj taqe chuymaw confiytanjja, aka cuerpon jakañat sipansa Tatitumpi chikaw jakañ muntanjja.+ 9 Ukhamajj jupampi chikas jakchiñäni jan ukajj jupat jayankchiñänisa, jupamp suma uñjatäñatak chʼamachasiskakiñäni. 10 Cristojj juzgañatak qontʼaski uka nayraqatan taqeniw uñstañasajja, ukhamat sapa maynejj jañchi cuerpon jakkasajj wal luratapatsa jan wal luratapatsa kunatï wakiski uk katoqañapataki.+

11 Tatitur ajjsarañajj kunja wakiskirisa ukjja nanakajj yatipjjtwa, ukatwa jaqenakar amuytʼayasipkakta. Diosajj sum nanakarojj uñtʼapjjetu, jumanakas sum uñtʼapjjetasma* ukwa munarakta. 12 Nanakajj janiw mayamp nanakjjat sum parlañ munapksmati, jan ukasti nanakjjat jachʼañchasipjjañamatakiw chʼamañchtʼanipjjsma, ukhamat khitinakatejj jaqen uñnaqapat jachʼañchasipki ukanakar jaysapjjañamataki,+ jupanakajj janiw kunatï chuyman utjki ukarjam jachʼañchasipkiti. 13 Nanakatï jan amuytʼasir jaqjam kunsa lurapjjstjja,+ Diosatakiw lurapjjta. Nanakatï amuytʼasir jaqjam lurapjjstjja, jumanakar yanaptʼañatakiw lurapjjta. 14 Criston munasiñapaw obligapjjetu. Nanakajj akwa amuyapjjta, mä jaqew taqe jaqenak laykojj jiwäna,+ ukajj wakisïnwa taqe jaqenakan jiwapjjatap layku. 15 Jupajj taqenitakiw jiwäna, ukhamat khitinakatï jakasipki ukanakajja, jan jupanak pachpataki jakjjapjjañapataki,+ jan ukasti khititï jupanak layku jiwki, jaktayatäkaraki uka Cristotak jakjjapjjañapataki.

16 Ukhamajj jichhat uksarojja janiw jiwasajj khitirus jaqen amuyuparjamajj uñj-jjtanti.+ Nayra tiemponjja jaqen amuyuparjamas Cristorojj uñjapkchiyätanjja,* janiw jichhajj ukham uñj-jjtanti.+ 17 Maynitejj Cristomp mayakïchejja, jupajj Diosan machaq luratapawa.+ Kunanakatï nayrajj utjkäna ukanakajja pasjjewa, jichhajj kunanakatï machaqäki ukanakaw utj-jjaraki. 18 Taqe kunas Diosatwa juti, jupaw Cristo taypejj jupampi sumankthapiyistu,+ juparakiw yaqhanakar jupamp sumankthapiñ yanaptʼañasatakejj khitistu,+ 19 mä arunjja Diosaw Cristo taypejj aka mundor jupampi sumankthapiyaskäna,+ juchanakapsa ukhamak pasayäna.+ Juparakiw sumankthapiyiri yatiyäwi yatiyañasatakejj confiyistu.+

20 Ukhamajj Cristo lanti saytʼiri+ embajadoranakäpjjtanwa,*+ jiwasanak taypis Diosajj jaqenakar ruwtʼkaspa ukhama. Cristo lanti saytʼirinakjamajja akham sasaw ruwtʼasktanjja: “Diosampi sumankthapipjjam” sasa. 21 Jan juchachaskäna ukarojja,+ juchanakas laykuw Diosajj sacrificiot churäna, ukhamat jupa taypejj Dios nayraqatan cheqapar sarnaqer jaqet uñjatäñasataki.+

6 Diosamp chika trabajisajja,+ nanakajj ukhamarakiw chʼamañchtʼanipjjsma: Diosan wali khuyapayasiñap katoqasajja jan ina chʼusar uk tukuyapjjamti.+ 2 Diosajj akham siwa: “Mä suma tiemponwa istʼsma, salvasiñ urunwa yanaptʼsma”+ sasa. Jichhapï uka suma wakiskir tiempojja. Jichhapï uka salvasiñ urojja.

3 Janipuniw nanakajj kunatï yaqhanakar lanktʼasiykaspa ukanak lurapkti, ukhamat Diosar servitanakajat jan khitis jan wal parlañapataki.+ 4 Antisas kunaymanitwa nanakajj Diosan servirinakapjam uñtʼayasipjjta,+ walja yantʼanak aguantasa, tʼaqesiñanakana, awisajj pistʼayasiñanakana, jan waltʼañanakana,+ 5 nuwjat uñjasisa, carcelanakana,+ chʼajjwañanakana, chʼama tukuñ trabajonakana, arumanakas jan ikita, awisajj jan manqʼata,+ 6 qʼom jakasa, kunatï cheqäki uk uñtʼasa, paciencianïsa,+ suma chuymanïsa,+ jakäwinakasansa espíritu santompi irpayasisa, mayninakarus taqe chuyma munasisa,+ 7 cheq parlasa, Diosan chʼamapar confiyasa,+ kupi ampararusa* chʼeqa ampararusa* kunatï cheqapäki uka armanakas aptʼasita,+ 8 awisajj jachʼañchata, awisajj jiskʼachata. Awisajj jaqenakajj sumwa nanakjjat parlapjje, awisajj jan waliraki. Engañjir jaqenakarjamaw uñjapjjetu, ukampis nanakajj cheq parlapjjta; 9 jan uñtʼatanakarjamaw uñjapjjetu, ukampis suma uñtʼatäpjjtwa; niya jiwañampiskir jaqenakarjamaw uñjapjjetu,* ukampis nanakajj jakasipktwa;+ castigata* jaqenakarjamaw uñjapjjetu, ukampis janiw jiwañar katuyatäpkti;+ 10 llakitanakarjamaw uñjapjjetu, ukampis wali kusisitäpjjtwa; pobre jaqenakarjamaw uñjapjjetu, ukampis waljaniruw qamiriptayapjjta; janis kunanïpkiristsa ukham uñjapjjetu, ukampis nanakajj taqe kunanïpjjtwa.+

11 Corintonkirinaka, jumanakarojj qhanwa nanakajj parlapjjsma, chuymanakajsa wali jachʼwa jumanakatakejj jistʼarapjjta. 12 Chuymanakajanjja jumanakar munasiñatakejj mä lugarajj utjiwa,+ ukampis jumanakan chuymanakamanjja janiw nanakar munasiñatakejj mä lugar jaytapktati. 13 Wawanakajarjamaw nayajj jumanakar parlapjjsma, kunjamtï jumanakar munasipksmajja ukhamarakiy nanakar munasipjjeta, chuymanakamjja wali jachʼa jistʼarapjjam.+

14 Jan creyentëpki ukanakampejj jan mä yukurojj chʼulla chʼulla yapintatäpjjamti.*+ ¿Kunjamaraki cheqapampi jan walimpejj mayachasispasti?+ Jan ukajj ¿kunjamaraki qhanampi chʼamakampejj mayakïpjjaspasti?+ 15 Ukhamarus ¿kunjamaraki Cristompi Belialampejj* mä amuyunikïpjjaspasti?+ Jan ukajj ¿kunjamaraki mä creyentempi mä jan creyentempejj mä amtanikïpjjaspasti?+ 16 ¿Kunjamaraki idolonakajj Diosan templopankaspasti?+ Jiwasajj jakkir Diosan templopätanwa,+ kunjamtï Diosajj siskänjja ukhama, jupasti sänwa: “Nayajj jupanak taypinwa jakäjja,+ jupanak taypinwa sarnaqarakëjja, jupanakan Diosapäyäwa, jupanakajj nayan markajarakïniwa”+ sasa. 17 Jehová* Diosajj akham siwa: “‘Jupanak taypit mistjjapjjam, jitheqtjjapjjam, jan jukʼampi uka qʼañunak llamktʼapjjamti,+ nayajj katoqasipjjämawa’+ sasa”. 18 Taqe Chʼamani Jehová* Diosajj akham sarakiwa: “‘Nayaw jumanakan awkimäyäjja,+ jumanakasti nayan wawanakajäpjjätawa’*+ sasa”.

7 Ukhamajj munat jilatanaka, niyakejjay Diosajj uka promesanak jiwasatak lurchejja,+ kunanakatï cuerporusa amuyurusa qʼañuchki ukanakat qʼomachasipjjañäni,+ ukhamat Diosar ajjsarasajj jukʼamp santöñasataki.

2 Munasiñampiy chuymanakamar katoqtʼasipjjeta.+ Nanakajj janiw khitirus kuna jan wals lurapkti, janiw khitirus maysar saranukuyapkti, janirakiw khititsa aprovechasipkti.+ 3 Janiw jumanakar juchañchañatakejj uk sapksmati. Kunjamtï nayrajj sapkayäsmajja, qhawqsa nanakajj munasipjjsma ukjja janiw jiwañasa ni jakañas mayjtʼaykaspati. 4 Nayajj wali qhan jumanakar sapjjsma. Jumanakatjja wal jachʼañchasta, wali chʼamañchtʼatarakïtwa. Kuna llakinakantï nanakajj uñjasipkta taqe ukanakansa, nayajj wal kusisirakta.+

5 Macedoniar+ purinipjjta ukhajja, janiw samartʼañajj nanakatak utjkänti, jan ukasti tʼaqesiñajj kunayman toqet utjaskakïnwa. Jaqenakajj nanak contraw saytʼapjjäna, congregacionanakatsa wal llakisipjjarakiyäta. 6 Ukampis llakitanakar chuymachtʼir Diosaw+ nanakarojj Titon visitapamp chuymachtʼapjjetu, 7 janiw jupan visitapampikejja, jan ukasti jupar chuymachtʼapjjatamaw nanakarojj chuymachtʼapjjarakitu. Qhawqsa nayar uñjañ munapjjesta, kunja llakitäpjjtasa, qhawqsa nayat llakisipjjta ukanakwa Titojj yatiyapjjetu, ukanak yatisajj jukʼampiw nayajj kusista.

8 Nayatejj cartajampi llakisiyapjjchiyäsmajja,+ janiw ukat arrepentiskti. Cartajajj jumanakar llakisiyatapatjja, qalltan mä jukʼa arrepentisiyätwa, ukampis mä jukʼa tiempokiw llakisiyapjjtamjja. 9 Jichhajj wal kusista, ukampis janiw llakisipjjatam laykojj kusiskti, jan ukasti llakisipjjatamajj arrepentisiñatakiw yanaptʼapjjtamjja. Kunjamtï Diosajj munki ukarjamaw jumanakajj llakisipjjtajja, ukhamajj janiw arunakajajj kuna jan walsa jumanakar lurapktamti. 10 Kunjamtï Diosajj munki ukarjam llakisiñajja arrepentisiñampiru salvasiñampiruw api, uka toqetjja janiw khitis arrepentiskaspati.+ Ukampis aka mundonkir jaqenakjam llakisiñajj jiwañaruw api. 11 Kunjamtï Diosajj munki ukarjam llakisipjjatamajja wal chʼamachasiñatakiw yanaptʼapjjtamjja. Jïsa, qʼomachasiñataki, juchar uñisiñataki, Diosar ajjsarañataki, taqe chuyma arrepentisiñataki, jankʼaki jan walinak askichañatakiw yanaptʼapjjtamjja.+ Taqe ukanakanjja cheqaparuw lurapjjtajja. 12 Nayajj kuntï qellqanipkayäsma ukjja, janiw jan wal lurkäna uka jaqe laykusa, ni jan waltʼayatäkäna uka jaqe laykusa qellqanipkayäsmati,+ jan ukasti nanakar jankʼaki istʼapjjatamajj jumanak taypinsa Dios nayraqatansa qhan amuyasiñapatakiw nayajj qellqanipjjayäsma. 13 Ukaw nanakarojj chuymachtʼapjjetu.

Ukampis Titor kusisita uñjasajj jukʼampiw kusisipjjta, taqe jumanakajj jupan chuymap qhanartayapjjatamata. 14 Kunapachatï Titorojj jumanakat wali sum nayajj parlayäta ukhajja, janiw chuyma pʼakintat uñjaskayätti. Taqe kunanaktï nanakajj jumanakar sapkayäsma ukajj cheqänwa, jumanakat Titor sum parlkayäta ukajj cheqarakïnwa. 15 Titojj kunjamsa jupar wali respetompi katoqapjjta uk amtasasa taqe kunan istʼasirïpjjatam amtasasa jukʼampiw jumanakar munasipjjtamjja.+ 16 Nayajj taqe kunanwa jumanakar confiyapjjsma* ukatwa wal kusista.

8 Jilatanaka, kuntï Macedonia+ congregacionankirinakajj Diosan wali khuyapayasiñap katoqasajj lurapkäna uk yatipjjañamwa nanakajj munapjjta. 2 Jupanakajj mä jachʼa jan waltʼäwin uñjasisajja, wali llakitäpjjänwa, ukampis wali pobrëkasinsa kunatï jupanakan utjkäna ukanakat kusisitaw churapjjäna. Ukanwa taqe chuyma wajjtʼasirïpjjatapajj qhan amuyasïna. 3 Qhawqhatï jupanakan utjkäna ukarjamaw churapjjäna,+ qhawqhatï jupanakan utjkäna ukat sipansa jukʼamp churapjjäna, naya pachpaw uk sum yatiskta.+ 4 Jupanak pachpaw chuymanakapat churañatakejj kutin kutin wal ruwtʼapjjetäna, ukhamat santo jilatanakar yanaptʼañataki.*+ 5 Janiw kuntï nanakajj suyapkayäta ukak lurapkänti, jan ukasti Tatitur serviñatakejj taqe chuymaw chʼamachasipjjäna, nanakarus yanaptʼapjjetänwa, ukanakjja Diosan munañaparjamaw lurapjjäna. 6 Ukatwa kuna lurañtï Titojj jumanak taypin qalltkäna uk tukuyañapataki chʼamañchtʼapjjta,+ kunanaktï jumanakajj churapkta ukanak apthapiñapataki. 7 Jumanakajj taqe kunsa sum lurapjjtajja, taqe chuymaw Diosar confiyapjjaraktajja,* parlañatakis suma wakichatäpjjtawa, suma yatjjatatäpjjtawa, taqe kunansa wal chʼamachasipjjaraktajja. Kunjamtï nanakajj jumanakar munasipksmajja, ukhamarakiw yaqhanakarus munasipjjtajja. Ukhamajj kunatï utjapktam ukjja taqe chuyma churasipkakim.+

8 Ukampis uk sasajja, janiw ukhampun lurapjjam sañ munapksmati, jan ukasti kunjamsa yaqhanakajj wal chʼamachasipjje uk yatipjjañamwa nayajj munta, taqe chuyma munasirïpjjatamsa uñjañwa munarakta. 9 Jumanakajja Jesucristo Tatitusan wali khuyapayasiñapat yatipjjtawa. Jupajj qamirïkchïnsa jumanak laykuw pobreptäna,+ ukhamat jumanakajj jupan pobrëtap laykojj qamirïpjjañamataki.

10 Uka toqetjja nayajj akham siristwa:+ uka yanaptʼanak apthapiñajja jumanakan askimatakiwa, apthapiñ qalltapkayäta ukhat jichhakamajj maraw pasjje, ukhamarus walrak ukanak apthapiñ munapjjayätajja. 11 Ukhamajj kuntï lurañ qalltapkta uk tukuyapjjam, ukhamat utjapktam ukarjam churapjjatamajj taqe chuyma churañ munapjjatam uñachtʼayani. 12 Taqe chuyma churktan ukaw Diosarojj wal kusisiyi. Diosajj janiw kuntï maynejj jan churirjamäki uk suykiti,+ jan ukasti qhawqhatï maynin utjki ukarjam churañapwa jupajj suyi. 13 Janiw nayajj yaqhanakatakejj facilakïñap munkti, janirakiw jumanakarus chʼam tukuyañ munapksmati. 14 Kunatï jumanakan jiltʼki ukajja, jupanakan faltki ukar phoqachpan. Kunatï jupanakan jiltʼki ukasti, jumanakan faltki ukar phoqacharakpan. Ukhamat taqeninsa mä igualak utjañapataki. 15 Qellqatanjja akham siwa: “Kawkïr jaqetejj waljanïkäna ukarojj janiw jiltʼkänti, kawkïr jaqetejj jukʼanïkäna ukarojj janiw faltkänti”+ sasa.

16 Titojj nanakjamarakiw jumanakat wal llakisi, ukatwa Diosarojj wal yuspärapjjta.+ 17 Kuntï nanakajj jupar sapjjta ukjja istʼapjjetuwa, kuntï mayipkta uksa wal phoqañ munäna. Ukatwa jichhajj voluntadapat jumanakar visitir jutani. 18 Nanakajj mä jilataruw Titomp chikajj khitanipjjarakta, kunanaktï suma yatiyäwinak laykojj lurki ukanakatjja taqe congregacionanakanwa uka jilatat wali sum parlapjje. 19 Ukhamarusa taqe congregacionanakaw juparojj nanakamp chik viajiñapatakisa kunanakatï apthapiski ukanak lakirañapatakis uttʼayapjje, ukhamat Tatitur jachʼañchasiñapataki ukhamarak yaqhanakar wal yanaptʼañ munapjjatajas qhanäñapataki. 20 Ukhamatwa kunanaktï jumanakajj taqe chuyma churapkta ukanak lakirapjjatajat jan khitis nanakat jan wal parlkaniti.+ 21 Kuna laykutejj ‘nanakajj taqe kunsa jan khitir engañjasaw lurapjjta, janiw Jehová* Dios nayraqatanak ukham lurapkti, jan ukasti jaqenak nayraqatansa ukhamarakwa lurapjjta’.+

22 Jupanakamp chikajj yaqha jilatasaruw khitanipjjarakta, walja kutiw uka jilatarojj yantʼapjjta, walja lurañanakanwa jupajj wali suma trabajtʼirïtap uñachtʼayi. Ukampis jumanakar wal confiyatap laykojja jichhajj jukʼamp sumwa trabajtʼani. 23 Titot payachasiñatï utjchejja, jan payachasiñajj utjpanti, jupajj compañerojawa, jumanakar yanaptʼañatakiw nayamp chik trabajiski. Jan ukajj mayni jilatanakat payachasiñatejj utjchejja, jan payachasiñajj utjpanti, jupanakajj congregacionanakan apostolonakapäpjjewa, Cristoruw jachʼañchapjjaraki. 24 Ukhamajj qhawqsa jupanakar munasipjjta uk uñachtʼayapjjam,+ kunatsa nanakajj jumanakat jachʼañchasipjjta uksa congregacionanakajj uñjapjjarakpan.

9 Santo jilatanakar yanaptʼañatjja,+ janiw nayatakejj jumanakar qellqaniñajj wakiskiti. 2 Kunjamsa jumanakajj wal yanaptʼañ munapjjta uk nayajj yattwa, ukatwa Macedonia markankirinakarojj jumanakat wali sum parltjja, Acayankirinakajj maraw yanaptʼañatakejj listöjjapjje sasaw jupanakar sista. Jumanakan taqe chuyma yanaptʼasirïpjjatamajja, jupanakat waljaniruw chʼamañchtʼaraki. 3 Jichhajj jilatanakaruw nayajj khitanta, ukhamat kuntï jumanakjjat sum parlapkayäta ukajja jan inamayäñapataki, yanaptʼañatakisa wakichtʼatäpjjañamataki, kunjamtï nayajj siskayäta ukhama. 4 Macedonia markankirinakatï nayamp chika jumanakan ukar jutapjjaspa, yanaptʼañatakis jan wakichtʼat katjapjjeristam ukhajja, jumanakar confiyapjjataj laykojj nanakaw phenqʼachat uñjasipjjerista, jumanakas ukhamaraki. 5 Ukatwa jumanakan ukar nayraqat jutapjjañapatakisa kuntï jumanakajj churañ munapkayäta uk janïräkipan apthapipjjañapatakis jupanakar chʼamañchtʼayäta. Ukhamat kuntï churapkäta ukajja, jan nanakas obligapkirisma ukham churasiñapataki, jan ukasti taqe chuyma churasiñapataki, ukhamatwa nanakajj purinipkä ukhajja wakichtʼatäjjani.

6 Ak amtapjjam, khititejj jukʼaki phawki ukajja, jukʼakirak apthapini, khititejj walj phawki ukasti, waljaraki apthapini.+ 7 Sapa maynejj kunjamtï chuymapan amtki ukarjam churpan, janiw pä chuymajj* churañapäkiti, ni obligatas churañapäkiti,+ Diosasti kusisit chuymampi churirirojj munasiwa.+

8 Diosajj jumanakat walpun khuyaptʼayasi, ukhamat kunanakatï munaski ukanakajj janipun jumanakar faltañapataki, taqe suma luräwinak lurañatakejj kunanakatï wakiski ukanakajj jumanakan walja utjañapataki.+ 9 (Kunjamtï qellqatan siskejja: “Jupajj waljwa lakiräna, pobrenakaruw churarakïna. Cheqapar uñjirïtapas wiñayatakiwa”.+ 10 Ukhamajj khititï yapuchirirojj walja jatha churki, tʼantʼsa manqʼañatak churkaraki uka Diosaw phawapjjañamatakejj jatha churapjjätam, uksti waljaptayarakiniwa, juparakiw cheqapar luratanakamatjja cosecham jiljjattayani). 11 Taqe kunan wajjtʼasirïpjjañamatakiw Diosajj taqe kunan bendisipjjtamjja. Kuntï jumanakajj churapkta ukanak yaqhanakaru churapjjataj laykojja, Diosaruw jaqenakajj yuspärapjjani. 12 Kunanakatï yaqhanakar yanaptʼañatak luraski ukajja, janiw pisinkir santo jilatanakarukejj yanaptʼkaniti,+ jan ukasti uka yanaptʼanak churasitap laykojja walja jaqenakaw Diosar yuspärapjjarakini. 13 Kuntï jumanakajj yanaptʼañatak lurapkta ukanwa kunjam jaqëpjjtasa ukajj qhan amuyasi. Jumanakajj Criston suma yatiyäwinakapar taqe chuym sujetasisaw* sarnaqapjjtajja, kunjamtï jumanakajj yatichapkayätajj ukhama. Jupanakar yanaptʼañatakisa taqenir yanaptʼañatakisa taqe chuymaw walj churapjjaraktajja, ukatwa jupanakajj Diosar jachʼañchapjjani.+ 14 Diosajj jumanakat wal khuyaptʼayasitap laykojja, jupanakajj munasipjjätamwa, Diosaruw jumanakatak ruwtʼapjjarakini.

15 Wali musparkañ regalo* churatapatjja Diosar yuspärapjjañäni.

10 Naya Pablojj kuntï sapkäma ukarjam lurapjjañamwa munta. Llampʼu chuymani,* suma chuymani Cristot yateqasisaw nayajj jumanakar parlapjjsma.+ Ukampis jumanakat yaqhepanakajja, janis jumanak taypin kunäkiristsa,+ cartanak toqekisa jan ajjsaras qhan parlapkirisma ukham amuyapjjtajja.+ 2 Akapachankir jaqenakan amuyuparjamas nanakajj sarnaqapkirista ukham amuyirinakarojja, janiw nayajj jumanakan ukar purinisajj cheqañchañ munkti. 3 Nanakajj mayni jaqenakjamas jakapkstjja, janiw akapachankir jaqenakan amuyunakaparjamajj nuwasipkti. 4 Nanakan nuwasiñ armanakajajj janiw jaqenakat jutkiti,+ jan ukasti Diosatwa juti.+ Uka armanakasti torrenakar uñtat wali suma saytʼayatäki ukanak allthapiñatakejj wali chʼamaniwa. 5 Nanakajj pantjat taqe amuyunaksa Diosar jan uñtʼañasatak jarkʼki taqe ukanaksa tukjapjjtwa,+ jaqenakan amuyunakapsa mä presorjam katuntasaw Cristor istʼañapatakejj irpapjjarakta. 6 Taqe jan istʼasirinakar castigañatakejj wakichatäpjjtwa,+ ukampis taqe kunan istʼasirïpjjäta ukhakiw uk lurapjjäjja.

7 Jumanakajj taqe kunsa uñkatasakiw waliti janicha uk amuyapjjtajja. Maynitejj Criston arkiripätwa sasin jupa pachpa confiyaschejja, jupajj aka toqet sum amuytʼaspan: kunjamatejj jupajj Criston arkiripäkejja, ukhamarakiw nanakajj Criston arkiripäpjjta. 8 Nanakarojj Tatituw autoridad churapjjetu, ukhamat jumanakar yanaptʼañataki, janiw jumanakar tukjañatakejj uttʼayapkituti.+ Nayatï uka toqet mä jukʼsa jachʼañchasiristjja, janiw phenqʼachat uñjaskiristti. 9 Ukampis janiw nayajj cartanakajampis ajjsarayañ munapkirisma ukham amuyapjjañam munkti. 10 Jumanakat yaqhepajj akham sapjjtawa: “Cartanakapajj respetkañawa, wali chʼamanirakiwa, ukampis jupajj akankki ukhajj janiw yäqañjamäkiti, parlatapas janirakiw khusäkiti” sasa. 11 Khititejj ukham parlki ukajja ak yatiñapawa, kunanaktï cartanakajan qellqanipksmajja ukwa jumanakan ukar purinisajj lurapjjarakëjja.+ 12 Nanakajj janiw jachʼa jachʼa tukurinakjam uñtʼayasiñ munapkti, janirakiw jupanakjamäñ munapkti.+ Jupanakajj kunatï jupanakatak walïki ukarjamaw luratanakapajj walikïskiti janicha uk amuyapjje, ukhamatwa jan amuytʼasirïpjjatap uñachtʼayapjje.+

13 Nanakajj janiw kunatï jan waktʼapkitu ukanakatjja jachʼañchasipkäti, jan ukasti kawkikamatejj Diosajj nanakar churapkitu ukanakatakwa jachʼañchasipjjäjja. Jumanakajj kuntï Diosajj churapkitu uka taypinkapjjaraktawa.+ 14 Jumanakan ukar purinipkayäta ukhajja, janiw nanakajj qhawqchʼtejj Diosajj churapkitäna ukat jukʼamp lurapkayätti. Antisas nanakaw Cristjjat suma yatiyäwinak jumanakar nayraqat yatiyapjjayäsma.+ 15 Kunatï nanakar jan churatäki ukatjja janiw nanakajj jachʼañchasipkti, mä arunjja janiw yaqhan luratanakapat jachʼañchasipkti. Jan ukasti jumanakajj jukʼamp jukʼampi Diosar confiyasipkakisma* ukwa munapjjta, ukhamat kunanaktejj jumanak taypin lurapkta ukanakajj jukʼamp jiltañapataki. Ukhamatwa nanakajj jukʼamp lurapjjäjja. 16 Jumanakat jukʼamp jaya cheqanakaruw suma yatiyäwinak yatiyir sarapjjäjja, ukhamat yaqhanakan yatiyatäjje uka lugaranakat jan jachʼañchasipjjañajataki. 17 “Khititejj jachʼañchaski ukajj Jehová* Diosat jachʼañchaspan”.+ 18 Janiw khititejj jupa pachpat jachʼañchaski ukajj Diosan suma jaqet uñjatäkiti,+ jan ukasti khitirutejj Jehová* Diosajj jachʼañchki ukaw Diosan suma jaqet uñjatajja.+

11 Jan amuytʼasir jaqjamäkstsa, pacienciampi uñjapjjetasma ukwa nayajj munta. Cheqas jumanakajj ¡pacienciampiw uñjasipkistajja! 2 Kunjamtï Diosajj jan walinakat jarkʼaqañ munapktamjja, ukhamarakiw nayajj jan walinakat jarkʼaqañ munapjjsma. Naya pachpaw jumanakarojj mä esposompiki, mä arunjja Cristompiki casarasipjjañamatakejj uñtʼasiyapjjsma, ukhamat mä qʼoma solter* tawaqöpkasmas ukham Cristor katuyañajataki.+ 3 Ukampis nayajj wal ajjsarayasta, kunjamtï asirojj* kʼarinakampi Evar engañjkänjja,+ ukhamarakiw maynejj jumanakar engañjapjjeristam, amuyunakam mayjtʼayasaw Cristor taqe chuyma arkañatsa qʼoma jakañatsa apaqapjjeristam.+ 4 Nanakajj yatiyapksma uka Jesusat sipansa, yaqha Jesusat maynejj jutasin yatiyapjjtam ukhajja, katoqapjjaktawa. Jumanakajj Diosan chʼamap katoqapkta ukat sipansa yaqha amuyunakampejj irpayasipjjaktawa. Kuna suma yatiyäwinaktï jumanakajj katoqapkta ukat sipansa, yaqha yatiyäwinak maynejj apani ukhajja,+ juparojj katoqapjjakiraktawa. 5 “Suma sum tukuri apostolonakamat” sipansa, janiw nayajj kunansa minusäkti, ukjja nayajj uñachtʼaytwa.+ 6 Janis nayajj sum parlañ yatkstjja,+ Diosar uñtʼañanjja yatjjatatätwa. Uksti nanakajj kunaymanita, taqe kunanwa jumanakarojj uñachtʼayapjjsma.

7 Taqe chuymaw jumanakarojj Diosan suma yatiyäwinakapat yatiyapjjsma, janiw nayajj kuna qollqsa mayipksmati. Jachʼañchatäpjjañamatakiw nayajj jiskʼar tukta. Ukham luratajajj ¿juchati?+ 8 Jumanakar yanaptʼañ laykojj yaqha congregacionanakatwa nayajj yanaptʼanak katoqta, ukham lurasajj jupanakatsa lunthatkirista ukhamawa.+ 9 Kunapachatï jumanakamp chikäkayäta, yanaps munkayäta ukhajja, janiw khitirus kuns maykti. Macedoniat jutir jilatanakaw kunatï nayatak munaskäna ukanak churapjjetu.+ Cheqas taqe kunanwa jumanakar jan kuns mayiñatak chʼamachasta, jichhas ukham luraskakïwa.+ 10 Nayajj Criston arkiripätwa, ukhamajj Acaya markpachanwa uka toqet jachʼañchasëjja,+ janiw kunas jarkʼkitaniti. 11 ¿Kunatsa ukham lurtjja? ¿Janit jumanakarojj munasipksma? Nayajj jumanakar munasipjjsmawa, Diosajj uk sum yati.

12 Yaqhepanakajj jachʼa jachʼaw tukupjje, nanakjam apostolöpkaspas ukham parlapjjaraki. Ukhamajj kuntï nayajj lurkta ukjja luraskakïwa,+ ukhamat jachʼa jachʼa tukurinakajj jan kunatsa jachʼañchasipjjañapataki. 13 Uka jaqenakajj falso apostolonakäpjjewa, yaqhanakar engañjir jaqenakäpjjewa, Criston apostolopäpkaspas ukhamaw tukupjjaraki.+ 14 Ukajj janiw kuna musparkañäkisa, Supay* pachpaw qhankir angelar tukojja.+ 15 Ukatpï Supayan servirinakapajj cheqapar sarnaqerinakäpkaspas ukham tukupjjarakejja, ukajj janiw nayatakejj kuna musparkañäkisa. Ukampis jupanakan tukuyäwipajja luratanakaparjamäniwa.+

16 Nayajj wasitat ak sapjjäma: jan amuytʼasir jaqëkiristsa ukham jan khitis amuypanti. Jumanakatejj jan amuytʼasir jaqerjam uñjapjjchistajja, ukhampach katoqtʼasipjjeta, ukhamat nayajj mä jukʼa jachʼañchasiñajataki. 17 Kuntï nayajj siskta ukjja, janiw Tatitut yateqasisajj parlkti, jan ukasti jan amuytʼasir jaqjamaw parlta, naya pachpar confiyasisas jachʼa jachʼa tukkirista ukhama. 18 Niyakejjay waljanejj kunanakatï akapachan utjki ukanakat jachʼañchasipjjchejja, nayajj jachʼañchasirakïwa. 19 Jumanakajj wali “amuytʼasirinakjamajja”, taqe chuymaw jan amuytʼasirinakarojj katoqapjjtajja, 20 esclavor tukuyapktam ukanakarusa, utjirinakam tukjirinakarusa, utjirinakam katuntasirinakarusa, jumanakjjar jachʼañchasirinakarusa, ajanut nuwapktam ukanakarus katoqapjjaktawa.

21 Nanak pachpa jiskʼachasiñatakiw ukham nayajj parlta, kuna laykutejj ajjsarayasisas kuns lurapkirista ukhamwa yaqhepanakajj amuyapjje.

Ukampis yaqhanakatejj jan ajjsaras kuns lurapjjchejja, nayajj jan ajjsarasaw kuns lurarakëjja, uk sasajj jan amuytʼasir jaqjamaw parlaskta. 22 ¿Jupanakajj hebreonakäpjjeti? Nayajj hebreorakïtwa.+ ¿Jupanakajj israelitanakäpjjeti? Nayajj israelitarakïtwa. ¿Jupanakajj Abrahanan wawanakapäpjjeti? Nayajj Abrahanan wawaparakïtwa.+ 23 ¿Jupanakajj Criston servirinakapäpjjeti? Nayaw taqet sipansa jukʼamp jilïrïtjja sasaw mä loqher uñtat sirista. Jupanakat sipansa jukʼampwa nayajj lurta,+ walja kutiw carcelar llawintapjjetu,+ walja kutiw jawqʼjat uñjasta, walja kutirakiw niy jiwarakta.+ 24 Judionakatjja phesqa kutiw kimsa tunka llätunkani asutʼinak katoqta,+ 25 kimsa kutiw lawamp jawqʼjapjjetu,+ mä kutejj qalampiw jaqjapjjetu,+ kimsa kutiw barcompejj lamar qotar jalantta,+ mä arumampi mä urumpiw lamar qota taypin uñjasta. 26 Walja kutiw nayajj viajirakta, jawiranakansa kunayman jan waltʼäwinakanwa uñjasta, lunthatanakampi marka masinakajampi+ yaqha markankir jaqenakampi+ jan waltʼayataw uñjasta, markansa wasaransa lamar qotansa jan waltʼäwinakanwa uñjasta, falso jilatanakampis jan waltʼayataw uñjasirakta,+ 27 jan samartʼasaw nayajj wal trabajta, wal chʼam tukta, arumanakas walja kutiw jan ikit qhantatta,+ manqʼat awtjata, umat pharjata* ukhamaw sarnaqta,+ walja kutirakiw jan kuna manqʼañani uñjasta, thayans thayjata, jan isini ukhamaw sarnaqta.+

28 Taqe ukanakat sipansa, sapüruw nayajj taqe congregacionanakat llakisirakta.+ 29 Maynitejj aynachtʼatächi ukhajja, nayajj wal llakista. Maynirutejj lanktʼasiyapjjchi ukhajja, nayajj wal colerasirakta.

30 Nayan jachʼañchasiñajatejj wakischi ukhajja, kunanakantï aynachtʼatajajj amuyaski ukanakatwa jachʼañchasirakëjja. 31 Khititejj wiñayatak jachʼañchatäñapäki, khititejj Tatit Jesusan Diosapäki, Awkipäkaraki ukaw nayajj jan kʼarisitaj sum yatiski. 32 Damasco markanjja, Aretas sat reyiru servir gobernadorajj nayar katuntañatakiw markan punkunakapar guardianak usküna, 33 ukampis murallan utjir mä ventanatwa nayarojj mä canastar* warkoqanipjjetäna,+ ukhamatwa jupanakat escapta.

12 Nayan jachʼañchasiñajajj wakisiwa. Janis nayatak walïkchejja, kuna visionanaktï+ Tatitojj uñjaykitu ukhamarak yatiykitu+ ukanakatwa jichhajj parläjja. 2 Nayajj Criston mä discipuloparuw uñtʼta, jupajj tunka pusini maranak nayraw kimsïr alajjpachar aptatäna, cuerpomppach aptatächïna jan ukajj jan cuerpomppach aptatächïna, janiw uk yatkti, Diosaw yati. 3 Jïsa, uka jaqerojj uñtʼtwa, jupajj paraisor aptatänwa, cuerpomppach aptatächïna jan ukajj jan cuerpomppach aptatächïna, janiw uk yatkti, Diosaw yati. 4 Paraisonkkäna ukhajja, jan parlañjamäki janirak khiti jaqes parlañapäki uka arunakwa istʼäna. 5 Ukhamajj uka jaqetwa nayajj jachʼañchasëjja, janiw naya pachpat jachʼañchaskäti, jan ukasti kunjam aynachtʼirïktejj ukatakwa jachʼañchasëjja. 6 Nayatejj jachʼañchasiñ muniristjja, kunatejj cheqäki ukak saskiristjja, janiw jan amuytʼañ munir jaqjamajj parlkiristti. Ukampis janiw nayajj jachʼañchasiñ munkti, ukhamat jan khitis lurataj uñjasinsa parlataj istʼasinsa nayajj jukʼampïkiristsa ukham amuyañapataki. 7 Musparkañ yatiyäwinak katoqatajatjja, janiw khitis nayajj jukʼampïkiristsa ukham amuyañapäkiti.

Jan añcha jachʼañchasiñajatakejja, mä chʼapiw jañchijan utji,+ ukajj Supayan* mä angelapäkaspas ukhamawa. Ukarakiw nayarojj wal tʼaqesiyaskitu, ukhamat jan sinti jachʼañchasiñajataki. 8 Uka chʼapi nayat apaqtʼañapatakejj kimsa kutiw nayajj Tatitur wal ruwtʼasta. 9 Ukampis jupajj akham situwa: “Nayajj wal jumat khuyaptʼayasta, ukakiw jumatakejj wakisi, kunapachatï jumajj aynachtʼatäkta ukhaw nayan chʼamajajj jukʼamp qhan amuyasi”+ sasa. Ukhamasti taqe chuymaw aynachtʼirïtajat nayajj jachʼañchasëjja, ukhamat Criston chʼamapajj mä carpar uñtat nayar jarkʼaqañapataki. 10 Kunapachatï Cristo laykojj débil, insultata, pistʼata, jan waltʼayañatak arknaqata, jan waltʼäwinakan uñjasta ukhajja, nayajj wal kusista. Kunapachatï nayajj debiläkta ukhajja wali chʼamanïtwa.+

11 Nayajj jan amuytʼasir jaqeruw tukta. Jumanakatejj nayat sum parlapjjasamänjja, janiw ukham jaqer tukuñatakejj obligat uñjaskiriskayätti. Janis kunäkstjja, “suma sum tukuri apostolonakamat” sipansa janiw nayajj kunansa minusäkti, ukajj qhanaw amuyasi.+ 12 Taqe kunwa nayajj aguantta,+ señalanaksa, milagronaksa,* musparkañanaksa luraraktwa,+ ukhamatwa nayan apostolötaj sum uñjapjjtajja. 13 Janiw jumanakarojj kuns mayipksmati, uka mayanakwa jumanakajj mayni congregacionanakat sipansa minusankapjjtajja. Ukham luratajajj ¿janit walïki?+ Nayatejj uka jan wal lurstjja, disculptʼapjjeta.

14 Nayajj jumanakar visitir sarañatakejj kimsa kutiw akampejj wakichasjjta, ukampis janiw kunsa jumanakar mayipkämati. Janiw nayajj utjirinakam thaqkti,+ jan ukasti jumanakaruw thaqapjjsma. Wawanakajj+ janiw awk taykatak imapjjañapäkiti, jan ukasti awk taykaw wawanakatak imapjjañapa. 15 Nayajj taqe chuymaw jumanak laykojj kunanakatï utjkitu ukanak churäjja, naya pachpaw qʼal merqʼsusëjja.+ Nayajj wal jumanakar munasipjjsmajja, jumanakajj ¿jukʼakti nayar munasipjjetäta? 16 Janiw nayajj jumanakar kuns mayipksmati.+ Ukhampachas jumanakajj sapjjestawa: “Jupajj engañjir jaqewa, kʼarimp kʼarimpiw engañjistu” sasa. 17 ¿Jumanakan ukar khitankta uka jilatanakampich kunsa apaqayapjjsmajja? 18 Nayaw Titor ruwtʼasajj mä jilatamp chik jumanakan ukar khitanta. ¿Titoch jumanakar kuns apaqapjjtamjja?+ ¿Janit nanakajj mä amuyuki sarnaqapktjja? ¿Janit mä thakinaki sarnaqapktjja?

19 Inas jumanakajj nanak pachpatsa arjjatasipkirista ukham amuyapjjsta, ukajj janiw ukhamäkiti. Antisas Criston arkirinakapjamaw nanakajj Dios nayraqatan cheq parlasipkta. Munat jilatanaka, jumanakar chʼamañchtʼañatakiw taqe kuns lurapjjta. 20 Nayajj ajjsarayastwa, jumanakan ukar purinkä ukhajja, inas jan jumanakarojj kunjamtï munkta ukham jikjjatapkchïmati, janirak jumanakas nayarojj kunjamtï munapkta ukham jikjjatapkchitätati. Inas jumanak taypin chʼajjwañanaka, envidiasiñanaka, colerampi atipayasiñanaka, toqesiñanaka, mayninakat kʼarinak parlasiñanaka, arunak apnaqañanaka, jachʼa jachʼa tukuñanaka, kunayman jan waltʼäwinak utjchini. 21 Jumanakan ukar jutkä ukhajja, inas nayan Diosajajj jumanak nayraqatan jiskʼachchitani. Khitinakatejj nayrajj ajjtaskañanakana, qʼañu juchanakana,* jan phenqʼani jucha lurañanakan* sarnaqapkäna, janirak jichhakamas arrepentisipki taqe ukanakat inas llakisiñajächini.

13 Kimsa kutiw akampejj jumanakar visitir jutañatakejj wakichasjjta. Qellqatanjj akham siwa: “Paya jan ukajj kimsa testigonakan qhanañchatap istʼasinwa taqe kunas cheqati janicha ukajj yatisiñapa”.+ 2 Janis jichhajj jumanakamp chikäkstjja, payïr kutis jumanakamp chikäkirista ukham amuyasta. Nayasti juchachasipkäna ukanakarusa taqenirusa janïräkipanwa ewjjtʼanipjjsma: nayatï jutäjja, janiw khitis cheqañchäwi katoqañat salvaskaniti, 3 ukhamatwa Cristojj naya taypi parlaskatapjja qhan uñachtʼayapjjäma. Jupajj janiw jumanak taypinjja jan chʼamanïkiti, jan ukasti wali chʼamaniwa. 4 Cheqansa jan chʼamanïkäna ukhaw juparojj lawar chʼakkatas* jiwayapjjäna, ukampis jichhajj Diosan chʼamapampiw jupajj jakaski.+ Nanakajj jupjamarakiw jan chʼamani uñjasipjjta, ukampis Diosan chʼamapampiw nanakajj jupamp chik jakapjjarakëjja,+ uka chʼamarakiw jumanakampïski.+

5 Jumanakajj cristianjamat jakasipkta janicha ukjja amuykiptʼasisipkakim, kunjam jaqëpjjtasa uksa uñakiptʼasisipkakim.+ Jan ukajj ¿janich Jesucristojj jumanakamp mayakïtap amuyapkta? Diosamp jan suma jaqet uñjatäpkasma ukhakiw Cristojj jumanakamp jan mayakïkaspati. 6 Nanakajj Diosamp suma jaqet uñjatäpjjtwa, uk amuyapjjañamwa nayajj munta.

7 Nanakajj Diosatwa mayisipjjta, ukhamat jumanakajj kuna jan walsa jan lurapjjañamataki. Ukampis janiw yaqhanakampi suma jaqet uñjayasiñ laykojj uk lurapkti, jan ukasti kunatï walïki uk lurapjjañamatakiw oración lurarapipjjsma, janis jaqenakajj sum uñjapkitpan ukhasa. 8 Kunatï cheqäki uka contrajj janiw kunsa lurapkiristti, jan ukasti kunatï cheqäki uka laykukiw kuns lurapjjeristjja. 9 Kunapachatï nanakajj aynachtʼatäpkta, ukampis jumanakajj chʼamanïpkta ukhajja, nanakajj wal kusisipjjta. Amuyunakam cheqañchasipjjañamatakiw nanakajj Diosat mayirapipjjsma. 10 Ukatwa nayajj jan jumanakamp chikäkasajj akanak qellqanta, ukhamat jutasajj jan jumanakar jan sinttʼasis cheqañchañajataki. Tatitojj janiw jumanakar aynachtʼayañatakejj autoridad churkituti,+ jan ukasti jumanakar chʼamañchtʼañatakiw autoridad churitu.

11 Ukhamajj jilatanaka, kusisitäsipkakim, amuyunakamsa cheqañchasisipkakim, chuymachäwi arunaksa katoqtʼasisipkakim,+ mä amtanikïñatakisa+ sumaki jakasiñatakisa+ chʼamachasisipkakim. Ukhamatwa wali munasiri, sumankañ churiri Diosajj+ jumanakampïni. 12 Maynit maynikam jampʼattʼasis* aruntasipjjam. 13 Taqpach santo jilatanakaw aruntanakap apayanipjjtam.

14 Tatit Jesucriston wali khuyapayasiñapasa, Diosan munasiñapasa, Diosajj churapktam uka espíritu santosa taqe jumanakampïpan.