FILIPENSES
FILIPOS CONGREGACIONAR QELLQAT CARTA

1 Naya Pablosa Timoteosa Cristo Jesusan esclavonakapäpjjtwa. Nanakaw Cristo Jesusan taqe santo discipulonakapar qellqanipjjsma ukhamarak ancianonakarusa* siervo ministerialanakarusa,*+ khitinakatejj Filipos+ markankapkta ukanakaru.

2 Dios Awkisana ukhamaraki Tatit Jesucriston wali khuyapayasiñapasa sumankañapasa jumanakampïpan.

3 Jumanakat amtasisajj Diosajar yuspärapuntwa. 4 Sapa kuti mayiskasajja, nayajj taqe chuymaw jumanakatakejj wali kusisita mayirapipjjsma,+ 5 kuna laykutejj suma yatiyäwinak istʼapkta ukhat jichhakamaw uka suma yatiyäwinak yatiyasiñapatakejj yanaptʼapjjtajja. 6 Kuntï Diosajj jumanak taypin qalltki uka suma luräwi tukuyañatakejja, jupa pachpaw Cristo Jesusan urupkamajj+ yanaptʼapjjätam, uka toqet janiw nayajj payachaskti.+ 7 Niyakejjay chuymajankapjjstajja, jumanakat ukham amuyañajj nayatak walikiwa. Jumanakajj carcelan+ wal yanaptʼapjjestajja, suma yatiyäwinak yatiyasiñapatakejj leyinakarjam arjjatañsa sum uttʼayañsa+ walrak yanaptʼapjjestajja, ukhamatwa jumanakasa nayasa Diosan wali khuyapayasiñap katoqtanjja.

8 Kunjamtï Cristo Jesusajj jumanakar munasipktamjja, ukhamarakiw nayajj wal munasipjjsma, ukatpï nayajj taqe jumanakarojj wal uñjañ munapjjsmajja, Diosaw uk sum yatiski. 9 Oracionanakajanjja akwa nayajj mayiskakta: jumanakan munasiñanakamajj jukʼamp jukʼampi jiltañapataki,+ ukamp chikajj Diosan munañap sum uñtʼapjjañamataki+ ukhamarak sum amuytʼapjjañamataki,+ 10 kunanakatejj jukʼamp importantëki ukanak amuyapjjañamataki.+ Ukhamat wali qʼoma jakasipjjañamataki, Criston urupkamajj janirak khitirus lanktʼasiyapjjañamataki,+ 11 Jesucriston yanaptʼapampejj kunatï cheqapäki ukanak jukʼamp lurapjjañamataki,*+ ukhamat Diosajj jachʼañchatäñapataki ukhamarak adoratäñapataki.*

12 Jilatanaka, ak yatipjjañamwa nayajj munta, kunanakatï nayar paskitu ukanakajj suma yatiyäwinakan jukʼamp yatiyasiñapatakiw yanaptʼawayi. 13 Roma marka apnaqeri reyin guardianakapasa mayni jaqenakasa taqeniw Cristo layku cadenanakampi+ chinuntat uñjasitajat yatipjje.+ 14 Tatitur serviri jilatanakatjja, waljaniw nayan cadenanakampi chinuntatätaj laykojj chʼam katjjatapjje, Diosan arunakapsa jan ajjsartʼasaw jukʼamp yatiyasipkaraki.

15 Cheqas yaqhepanakajj envidiasiñata ukhamarak nayamp atipasiñ laykukiw Cristot parlapjje, ukampis yaqhepanakajj suma amtampiw yatiyapjjaraki. 16 Suma amtanïpki ukanakajja, suma yatiyäwinak arjjatañatak+ uttʼayatätaj yatipjjewa, ukatwa munasiñ laykojj Cristjjat yatiyasipki. 17 Ukampis khitinakatejj chʼajjwañ layku jan wali amtampi Cristot parlapki ukanakajja, carcelan wal tʼaqesiñajwa munapjje. 18 Ukampejj ¿kunas utjawayi? Suma amtampisa jan wali amtampis yatiyasiskchejja, kunayman toqetwa Cristot yatiyasiski, ukaw nayarojj wal kusisiyitu, jutïrinsa kusisiskakïwa. 19 Nayajj yattwa, jumanakan Diosar ruwtʼasitanakamasa+ Jesucristojj churki uka espíritu santon yanaptʼapasa+ nayan salvasiñajatakïniwa. 20 Nayajj janiw kunatsa phenqʼachat uñjaskäti, ukwa suyta, janirakiw uka toqet payachaskti. Niyakejjay jan ajjsartʼas parlstjja, Cristoruw jichhajj jachʼañchäjja, kunjamtï nayrajj jachʼañchkayäta ukhama, nayajj* jakkasas jiwatäjjasas jachʼañchaskakïwa.+

21 Nayatï jakaskakëjja, Cristotakiw jakäjja;+ nayatejj jiwjjäjja, ukajj mä gananciäniwa.+ 22 Nayatejj jakaskakëjja, jukʼampinakwa jupatak luräjja, ukampis kawkïrsa nayajj ajllirista ukjja janiw yatiykiristti. 23 Uka payat janiw kawkïrsa ajllirjamäkti, ukampis salvatäñsa Cristomp chikäñsa nayajj wal munta,+ ukaw cheqans jukʼamp sumajja.+ 24 Ukampis jumanak layku nayan jakaskakiñajajja wali wakiskiriwa, 25 uka toqet janiw payachaskti. Nayajj yattwa, janïraw jiwkäti, jumanakamp chikäskakïwa, ukhamat jumanakajj nayrar sartapjjañamataki, Diosar confiyapjjatamatsa* kusisitäpjjañamataki. 26 Ukhamat jumanakan ukar kuttʼankä ukhajja, Cristo Jesusan arkirinakapäpjjatam laykojj jukʼamp kusisipjjañamataki.

27 Cristot yatiyaski uka suma yatiyäwinakarjam sum sarnaqapjjam,+ ukhamatwa jumanakan ukar jutkä ukhasa jan jutkä ukhasa jumanakajj mä amtaki, suma saytʼata, mayachtʼata* sarnaqapjjäta.+ Suma yatiyäwinakar confiyapjjatamatsa* taqenis juntukiw chʼamachasipjjäta, 28 janirakiw enemigonakamarus ajjsarapkätati. Taqe ukanakajja, jupanakan tʼunjatäpjjañapataki+ ukhamarak jumanakan salvatäpjjañamataki+ mä señalawa, uka señalajj Diosatwa juti. 29 Diosajj janiw Cristor creyiñak churapktamti, jan ukasti Cristo layku tʼaqesiñsa churapjjaraktamwa.+ 30 Kunjamsa nayajj chʼamachasta uk jumanakajj uñjapjjtawa, jan waltʼäwinkasas ukhamarakiw jumanakajj chʼamachasisipktajja, jumanakajj yatipjjtawa,+ jichhakamas nayajj chʼamachasiskaktwa.

2 Cristomp mayakïpjjatam laykutejj jumanak taypin maynit maynikam chʼamachtʼasiñasa, munasiñat chuymachtʼasiñasa, mayninakat llakisiñasa, munasiñasa, sinttʼasiñas utjchi ukhajja, 2 ukarjam sarnaqasipkakim, mä amuyunikïpjjam, mä pachpa munasiñanikïpjjam, mayachtʼat sarnaqapjjam, mä pachpa amtanikïpjjam,+ ukhamatwa nayar wal kusisiyapjjetäta. 3 Jan kunsa jumanakajj jiskhisiñ laykusa+ ni wali wal tukuñ laykus+ lurapjjamti, jan ukasti mayninakarojj humilde chuymamp uñjapjjam, jumanakat sipansa jilankapkaspas ukhama.+ 4 Jan jumanak pachpatak llakisipjjamti,+ jan ukasti mayninakat llakisipjjarakim.+

5 Kunjam amuyunïkäntejj Cristo Jesusajj uka pachpa amuyunïpjjarakim.+ 6 Jupajj Diosar uñtasitäkchïnsa,+ janipuniw ni mä jukʼas Diosjamäñ munañajj amuyupan utjkänti.+ 7 Jan ukasti taqe kunanakapatï utjkäna ukanak apanukusaw jupajj mä esclavor tuküna,+ jaqeruw tukurakïna.+ 8 Jaqer tukusin jutkäna ukhajja, humillasïnwa, jiwañkamarakiw Diosarojj istʼäna,+ jïsa, jupajj mä tʼaqesiñ lawanwa* jiwäna.+ 9 Ukatwa Diosajj jukʼamp jilankki uka puesto churäna,+ munasiñatwa taqe sutinakat sipansa jukʼamp suma suti churäna,+ 10 ukhamat alajjpachankirinakasa, oraqenkirinakasa, oraq manqhankirinakasa,* taqeni Jesusan sutipjjar qonqortʼasipjjañapataki,+ 11 taqenisa* Jesucristojj Tatitütap qhan reconosipjjañapataki,+ ukhamat Dios Awkir jachʼañchasiñapataki.

12 Munat jilatanaka, nayajj jumanakamp chikäkta ukhajja, Diosarojj istʼapjjapuntawa, jan jumanakamp chikäkta ukhasa, jukʼampiw Diosarojj istʼapjjtajja, ukhamajj salvasiñatakejj ajjsartʼasa khatattʼasa jukʼamp chʼamachasisipkakim. 13 Diosaw jumanakarojj kunjamtï munki ukarjam chʼamañchapjjtamjja, juparakiw munañap lurañ munapjjañamatakisa phoqapjjañamatakisa chʼam churapjjtamjja. 14 Jumanakajj taqe kunsa jan arusisa+ jan chʼajjwas+ lurasipkakim, 15 ukhamat qʼoma jan kuna juchani sarnaqapjjañamataki, jan wali jaqenak taypinsa, jan cheqapar sarnaqer jaqenak taypin jakkasasa, jan kuna juchani+ Diosan wawanakapjam+ sarnaqapjjañamataki. Uka jaqenak taypinjja jumanakajj mä qhanar uñtataw aka mundon qhanasipktajja,+ 16 jakañ churir arunakatsa taqe chʼamampiw katjjarusipjjtajja.+ Ukatwa Criston urupan nayajj wal kusisëjja, nayan tʼijutajasa chʼama tukutajas jan inamayätap layku. 17 Ukampis nayatejj jumanakan sacrificionakamjjarusa+ Diosar serviñatak chʼamachasitanakamjjarusa vino ofrendar uñtat warjjatatästjja,+ nayajj wal kusista, taqe jumanakamp chikaw kusisirakta. Diosar confiyapjjatam* laykuw ukanak lurapjjtajja. 18 Jumanakajj kusisipjjarakim, nayamp chik kusisipjjam.

19 Tatit Jesusan munañapächejja, akat mä jukʼa urunakatjja Timoteoruw+ jumanakan ukar khitaniñ muntjja, ukhamat jumanakat yatisajj chʼamañchtʼatäñajataki. 20 Nayatakejj janiw khitis jupjamajj utjkiti, jupajj cheqpachapuniw jumanakat llakisi. 21 Mayninakajj taqeniw kunanaktï munapki ukanakak thaqasipki, janiw kuntï Jesucristojj munki uk thaqapkiti. 22 Jumanakajja kunjam suma chuymanis Timoteojj uk yatipjjtawa. Kunjamtï mä yoqajj+ awkipampi trabajkejja, ukhamarakiw jupajj nayamp chikajj suma yatiyäwinak jukʼamp yatiyasiñapatakejj mä esclavjam serviwayi. 23 Kunay nayar paschitani uk yatjjä ukhajja, jankʼakiw juparojj khitanëjja. 24 Tatitun munañapächejja, nayas akat mä qhawqha urunakat jumanakan ukar jutarakïwa.+

25 Jichhajj Epafrodito jilataruw jumanakan ukar khitaniñ amtta, jupar khitaniñajj nayatak wali wakiskiriwa. Jupajj nayan jilajawa, nayamp chik trabajiriwa, jupajj Criston soldadoparakiwa, nayar yanaptʼañapatakiw jupar khitanipjjaraktajja.+ 26 Jupajj jumanakar wal uñjañ munapjjtamjja, jupan usuntatap yatipjjatamatsa wal llakisiraki. 27 Cheqas jupajj walpun usuntäna, niyapuniw jiwarakïna. Ukampis Diosaw jupat wal khuyaptʼayasi, janiw jupa sapatakjja, jan ukasti nayatsa khuyaptʼayasirakituwa, ukhamat nayajj llakinkkasajj jan yaqha llakin uñjasiñajataki. 28 Ukatwa juparojj jumanakan ukar jankʼak khitasinkta, ukhamat jupar uñjasajj wasitat kusisipjjañamataki, nayas jan sinti llakisjjañajataki. 29 Ukhamajj kunjamtï Tatitun arkirinakapar katoqtʼapjjerïktajja, ukhamarak juparojj wali kusisit katoqtʼapjjam, ukham jilatanakarojj wali munasiñamp uñjasipkakim.+ 30 Jupajj niyapuniw Cristor* servitap laykojj jiwi, jumanak lanti nayar yanaptʼir jutasajj niyapuniw vidapsa aptʼasiraki.+

3 Munat jilatanaka, Tatitumpi mayakïpjjatam laykojj kusisitäsipkakim.+ Kuntï qellqanipkayäsma uka toqet mayampi qellqaniñajj janiw nayatakejj kuna chʼamäkisa, nayajj jumanakar jan walinakat jarkʼaqañatakiw qellqanipjjsma.

2 Anunakat amuyasipjjam, mayninakar jan walinak luririnakatsa, circuncidañ munirinakatsa* amuyasipjjarakim.+ 3 Jiwasaw cheqpach circuncisión katoqtanjja.+ Jiwasajj espíritu santon yanaptʼapampiw Diosar servisktanjja, Cristo Jesusan luratanakapatwa jachʼañchasiraktanjja,+ janiw jiwasajj jañchir confiyktanti. 4 Maynitejj jañchir confiyatap laykojj jachʼañchasiñ munchejja, nayaw jupat sipansa jukʼamp jachʼañchasiristjja: 5 nayajj kimsaqallq urunak saraqataru circuncidatätwa,+ Israel markatarakïtwa, Benjaminan tribupat jutirïtwa, nayajj hebreötwa, awk taykajas hebreöpjjarakïnwa,+ leyirjam sarnaqer mä fariseorakïtwa,+ 6 nayajj taqe chʼamajampiw cristiano congregacionar jan waltʼayañatakejj arknaqayäta,+ kunatï leyirjamajj cheqapäki ukarjamaw sum phoqayäta. 7 Ukampis kunanaktï jikjjatkayäta ukanakjja, Cristo laykojj inamayäkaspas ukham uñjta.*+ 8 Cristo Jesús Tatitujat yatiñajj wali valoranïtap laykojja, taqe kunas nayatakejj inamayakiwa. Jupa laykuw nayajj taqe kunsa apanukta, montontʼat basuräkaspas* ukhamwa taqe ukanak uñjarakta, ukhamat Cristomp sumankañajataki, 9 arkiripjamas uñjatäñajataki. Nayajj janiw Ley phoqataj laykojj cheqapar sarnaqer jaqëtwa sasajj siskti, jan ukasti Cristor+ confiyatajatwa*+ cheqapar sarnaqer jaqet uñjatätjja. Cheqansa khitinakatejj Cristor confiyapki* ukanakaruw Diosajj cheqapar sarnaqerit uñji.+ 10 Nayan amtajajj akawa: nayajj Cristoruw uñtʼañ munta, jupar jiwatat jaktayki uka chʼam uñtʼañwa munarakta.+ Nayajj jupjam tʼaqesiña+ jupjam jiwañwa+ munarakta. 11 Nayajj taqe chuymaw chʼamachasiskta, ukhamat khitinakatejj jiwatanak taypit nayraqat jaktapkani ukanakamp chika jaktañajataki.+

12 Janïraw nayajj premio katoqkti, ni perfectökaraktsa, jan ukasti nayrar sartañatakiw chʼamachasiskakta,+ ukhamat kunatakitejj Cristo Jesusajj ajlliskitu uk katoqañajataki.+ 13 Jilatanaka, niyas premio katoqkirista ukham janiw nayajj amuyaskti. Ukampis janiw akat payachaskti: kunanakatï qhepankki ukanak nayajj armanuktwa,+ kunanakatï nayrankki ukanak katoqañatakiw chʼamachasiskta,+ 14 kawkirutï puriñäki ukar puriñkamaw tʼijuskakta, ukhamat Diosajj Cristo Jesús taypi alajjpachar sarañatak jawski+ uka premio+ katoqañataki. 15 Ukhamajja khitinakatï Diosar serviñan suma saytʼatäpktan ukanakajja,+ kuntï nayajj sapksma ukarjam mä amuyunikïpjjañäni. Jumanakatejj jan ukham amuyunïpkätajja, Diosaw ukham amuyunïpjjañamatakejj yanaptʼapjjätam. 16 Ukhamarus kawkjakamajjay Diosar serviñan jiltawaystan uka thaknam sum sarnaqaskakiñäni.

17 Jilatanaka, taqenis nayat yateqasipjjeta,+ khitinakatejj nanakat yateqasis sarnaqapki ukanakatsa yateqasipjjarakim. 18 Waljaniw Cristojj tʼaqesiñ lawan* jiwkäna ukarojj jiskʼachapjje. Nayajj sapa kutiw uka toqet parlapjjsma, jichhas ukhamarakiw jachtʼasis uka toqet jumanakar parlanipjjsma. 19 Jupanakajj jiwañaruw sarasipki, jupanakan diosapajj purakapawa, kunanakattejj phenqʼasipjjañapäki ukanakatwa jachʼañchasipjje, kunatejj akapachan utjki ukanakatwa llakisipjjaraki.+ 20 Ukampis jiwasajj alajjpachankirïtanwa,+ taqe chuymarakiw alajjpachankir mä salvir suytʼasktanjja, jupajj Jesucristo Tatituwa,+ 21 jupajj taqe kun apnaqañatakiw chʼam katoqe,+ uka chʼamampirakiw aka aynachtʼat cuerponakasjja jupan kʼajkir cuerpopar+ uñtat tukuyani.

4 Munat jilatanakaja, nayajj jumanakar munasipjjsmawa, wal uñjañ munapjjaraksma. Jumanakajj wal kusisiyapjjestajja, nayatakejj mä coronäpkasmas+ ukhamäpjjtawa. Kunjamtï sapksmajja, jumanakajj Tatitun arkirinakapjamajj suma saytʼatäpjjam.+

2 Evodia kullakarusa Síntique kullakarusa, Tatitur servisajj mä pachpa amuyunikïpjjañapatakiw nayajj chʼamañchtʼanta.+ 3 Jumarus ukhamarakiw ruwtʼansma, nayamp chika taqe chuyma servir jilata, uka kullakanakasarojj* yanaptʼaskakim. Jupanakajj nayamp chikaw suma yatiyäwinak laykojj wal chʼamachasiwayapjje,* Clemente jilatasa, nayamp chika mayni servirinakasa ukhamarakiw chʼamachasiwayapjje.* Jupanakan sutinakapajj jakañ libron qellqantatawa.+

4 Tatitur servipjjatam laykojj kusisipjjapunim.* Mayamp sapjjäma: ¡kusisipjjam!+ 5 Jumanakan amuytʼirïpjjatam+ taqeni yatipjjpan. Tatitojj jakʼankiwa. 6 Jan jumanakajj kunatsa llakisipjjamti,+ jan ukasti taqe llakinakamjja Diosaru oracionan yatiyapjjam, taqe chuym ruwtʼasisa yuspärasa jupar oración lurapjjam.+ 7 Diosaw sumankañapjja+ churapjjätam, uka sumankañapasti kuntï jaqejj amuyki ukat sipansa jukʼampiwa. Uka sumankañaw chuymanakamsa amuyunakamsa Cristo Jesús taypejj jarkʼaqapjjätam.*+

8 Ukhamajj jilatanaka, taqe kunatejj cheqäki, taqe kunatejj wakiskirïki, taqe kunatejj cheqapäki, taqe kunatejj qʼomäki, taqe kunatejj munkañäki, taqe kunatejj respetomp uñjatäki, taqe kunatejj sumäki, taqe kunatejj jachʼañchkañäki taqe ukanakat amuytʼasipkakim.*+ 9 Kunanaktï jumanakajj nayat yateqapkta, katoqapkta ukanak lurasipkakim, kuntï nayar parlir istʼapkista, kunanaktï lurir uñjapkista ukanaksa lurasipkakim,+ ukhamatwa Diosan sumankañapajj jumanakampïni.

10 Nayajj Tatitun serviripjamajja, mayampi nayat llakisipjjatam laykojj wali kusisitätwa.+ Jumanakajj nayat llakisipkchiyätasa, janiw nayat llakisipjjatam uñachtʼayañ puedipkayätati. 11 Janiw pistʼayasitaj laykojj ukham sapksmati, nayajj kunaymanin uñjaskasas kunatï utjkitu ukampik jakasiñjja* yateqjjtwa.+ 12 Jukʼanikïñsa waljanïñsa nayajj yattwa.+ Kunaymanin jakasiñwa nayajj yateqawayta, suma manqtʼat sarnaqañsa manqʼat awtjat sarnaqañsa, taqe kunanïñsa jan kunanïñsa yateqaraktwa, ukham jakasiñjja mä jukʼanikiw yatipjje. 13 Khititejj nayar chʼam churkitu ukan chʼamapampejja taqe kunatakiw nayajj chʼamanïta.+

14 Ukampis tʼaqesiñanakajan nayar yanaptʼapjjatamajj wali askiwa. 15 Jumanakajj sum yatisipktajja, Filipos markankir jilatanaka, kunapachatï jumanakajj suma yatiyäwinak nayraqat yateqapkayäta, nayajj Macedoniatsa sarjjayäta ukhajja, jumanakakiw yanaptʼapjjestajja, mayni congregacionanakajj janiw yanaptʼapkitänti, janirakiw yanaptʼajsa katoqapkänti.+ 16 Tesalónica markankkayäta ukhajja, kunatejj nayatak munaskäna ukanakwa apayanipjjestajja, janiw mä kutikejja, jan ukasti pä kutiw apayanipjjestajja. 17 Janiw nayajj regalonak katoqañ suykti, jan ukasti suma luräwinak lurapjjañamwa nayajj munta, ukhamat jumanakatak jukʼamp gananciajj utjañapataki. 18 Ukampis taqe kunanakatï nayatak munaski ukanakajj utjituwa, cheqas jukʼampiw utjitu. Kunanaktï Epafroditor+ apayanipkta ukanak katoqasajj janiw jichhajj kunas faltjjetuti, ukanakajj mä suma olorani,+ Diosan chuymapar purtʼkiri sacrificior uñtatawa. 19 Ukham lurapjjatamatjja, taqe kunani Diosaw Cristo Jesús taypejj kunanakatï jumanakatak munaski ukanak churapjjätamjja.+ 20 Dios Awkisajj wiñayans wiñayapataki jachʼañchatäpan. Amén.

21 Cristo Jesusan taqpach santo discipulonakapar aruntarapipjjeta. Nayamp chikäpki uka jilatanakas aruntanipjjaraktamwa. 22 Taqe santo jilatanakaw aruntanipjjtam, yamas Cesaran* utapankirinakajj+ jukʼampwa aruntanipjjtamjja.

23 Jumanakan suma chuymanïpjjatamatjja, Tatit Jesucriston wali khuyapayasiñapajj jumanakampïpan.