1 TESALONICENSES
TESALÓNICA CONGREGACIONAR NAYRÏR QELLQAT CARTA

1 Naya Pablojja, Silvanompi*+ Timoteompi+ chikaw Tesalónica congregacionar qellqanipjjsma, khitinakatï Dios Awkimpi Tatit Jesucristompi mayakïpjjta ukanakaru:

Diosan wali khuyapayasiñapasa sumankañapasa jumanakampïpan.

2 Oración lurapkta ukhajja, taqe jumanakat amtasisajj Diosar yuspärapjjapuntwa.+ 3 Dios Awkis nayraqatanjja kunanaktï jupar confiyapjjatamatsa* munasiñatsa lurasipkta ukanak amtapjjapuntwa, Jesucristo Tatitusar suytʼapjjatamatjja kunanaktï aguantasipkta ukanaksa janiw armasipkti.+ 4 Diosan munat jilatanaka, nanakajj yatipjjtwa, Diosaw jumanakar ajllisipjjtamjja. 5 Nanakajj suma yatiyäwinak yatiyapjjayäsma ukhajja, janiw laka mayakejj parlapkayäsmati, jan ukasti wali chʼamampi, espíritu santon yanaptʼapampi, jan payachasisa ukhamaw yatiyapjjayäsmajja. Kunjamsa nanakajj jumanak layku sarnaqapjjta uksa yatipjjtawa. 6 Jumanakajj walja tʼaqesiñanakan+ uñjaskasasa espíritu santot jutki uka kusisiñampiw Diosan arunakap katoqapjjtajja, ukhamatwa jumanakajj nanakampita Tatitumpit yateqasipjjtajja.+ 7 Ukham lurasasti Macedoniankiri ukhamarak Acayankiri taqe creyentenakatakejj wali yateqaskayäpjjtawa.

8 Jumanakan yatiyapjjatamatjja, Jehová* Diosan arunakapajj janiw Macedonianaksa ni Acayanaksa istʼaskiti, jan ukasti taqe cheqanwa istʼasi. Diosar confiyapjjatamasa* taqe cheqanwa istʼasiraki.+ Ukhamajj janiw nanakan kun sañas utj-jjapjjetuti. 9 Kunjamsa jumanakajj nayrïr kutin katoqapjjesta, kunjamsa idolonakam+ jaytanukusajj jakkiri cheqpach Diosarojj esclavonakjam serviñatak kuttanjjapjjta ukanaksa jupanakajj yatiyasipkakiwa, 10 kunjamsa jumanakajj Diosan Yoqaparojj alajjpachat jutañap suyasipkta+ uksa yatiyasipkarakiwa. Diosaw Jesusarojj jiwatanak taypit jaktayi, jupaw Diosan jutaskiri colerasiñapat salvistani.+

2 Jilatanaka, jumanakajj sum yatipjjtajja, jumanakar visitir jutapjjatajajj janiw inamayäkänti.+ 2 Kunjamtï jumanakajj yatipktajja, Filipos+ markan wali tʼaqesiyata jan waltʼayata ukhamaw nanakajj uñjasipjjayäta, ukampis Diosaw jan ajjsarañatakejj yanaptʼapjjetäna, ukhamat nanak contra saytʼirinakajj utjkchïna ukhasa,* suma yatiyäwinak jumanakar yatiyapjjañajataki.+ 3 Kunanaktï nanakajj ewjjtʼapksma ukajj janiw pantjat amuyunakatsa ni jan wali amtanakatsa jutkiti, janirakiw kuna engañonakampis ewjjapksmati, 4 jan ukasti Diosajj suma yatiyäwinaka parlañatak uttʼayapkitu ukarjamaw nanakajj parlapjjsmajja. Nanakajj janiw jaqenakar kusisiyañ laykojj parlapksmati, jan ukasti khititejj chuymanakaj uñantki+ uka Diosar kusisiyañatakiw parlapjjsmajja.

5 Jumanakajj yatipjjtawa, janipuniw nanakajj suma arunakamp engañjapksmati, janirakiw kun katoqañ laykukis suma jaqer tukupkti.+ ¡Diosaw uk sum yatiski! 6 Janipuniw nanakajj jaqenakan jachʼañchatäñ thaqapkti, janirakiw jumanakan jachʼañchatäñsa ni yaqhanakan jachʼañchatäñsa thaqapkti. Criston apostolonakapjamajja, nanakajj qollqemp yanaptʼapjjeta sasaw mayipjjerismänjja.+ 7 Ukham lurañat sipansa jumanak taypinkkasajj wali munasiñampiw uñjapjjayäsmajja, kunjamtï mä taykajj wawapar ñuñtʼayki, wali munasiñamp uñjkaraki ukhama. 8 Jumanakar wal munasipjjataj laykojja, janiw Diosan suma yatiyäwinakap yatiyañak amtapkayätti, jan ukasti jumanakar yanaptʼañatakejj vidanakaj churañsa amtapjjarakiyätwa,+ jumanakar wal munasipjjataj layku.+

9 Jilatanaka, kunjamsa nanakajj wal trabajipjjta, wal chʼamachasipjjarakta ukanak amtasipkpachätawa. Diosan suma yatiyäwinakap yatiyapjjsma ukhajja, jumanakar qollqe jan mayiñatakejj uruy arumaw nanakajj trabajipjjta.+ 10 Jumanakasa Diosas nanakan testigonakajäpjjtawa, jumanak creyentenakar yanapkasajja, qʼoma chuymampiw sarnaqapjjta, taqe kunsa cheqaparuw lurapjjarakta, janirakiw kuna jan walsa lurapkti. 11 Jumanakajj yatipjjaraktawa, kunjamtï mä awkejj+ wawanakapamp lurkejja, ukhamarakiw nanakajj sapa maynir ewjjtʼapjjsma, chuymachtʼapjjsma, chʼamañchtʼapjjaraksma,+ 12 ukhamat jumanakajj Diosatakjam sarnaqasipkakiñamataki.+ Jupaw Reinopar* mantapjjañamatakisa+ jachʼañchatäpjjañamatakisa+ jawsapjjtamjja.

13 Ukatwa nanakajj sapa kuti Diosar yuspärapjjta.+ Jumanakajj Diosan arunakapa nanakat katoqapkta ukhajja, janiw jaqenakan arunakapjam katoqapktati, jan ukasti Diosan arunakapjam katoqapjjtajja, cheqas Diosan arunakapäskapuniwa, ukarakiw jumanak creyentenakarojj wal yanaptʼasipktamjja. 14 Jilatanaka, jumanakajj Judeankir congregacionanakat yateqasisaw sarnaqasipktajja, jupanakajj Diosan congregacionanakapäpjjewa, Cristo Jesusampis mayakïpjjarakiwa. Kunjamtï jupanakajj judionakan tʼaqesiyat uñjasisipkejja, ukhamarakiw jumanakajj marka masinakaman tʼaqesiyat uñjasipjjayätajja.+ 15 Uka judionakaw Tatit Jesusarusa+ profetanakarus jiwayapjjäna, nanakarus jan waltʼayañatakiw arknaqapjjetäna.+ Ukhamarus jupanakajj janiw Diosar kusisiyapkiti, antisas kunatejj taqe jaqenakar yanaptʼkaspa uka contraw saytʼasipjje. 16 Nanakajj yaqha markankirinakarojj salvasipjjañapatak yatiyapkta ukhajja, jupanakajj jarkʼañwa munapjjarakitu.+ Ukhamatwa juchanakap jukʼamp yapjjatasipjje, ukampis Diosan colerasiñapajj niyaw jupanakjjar jutaski.+

17 Jilatanaka, nanakajj jumanakat mä qhawqha tiempo jayankapjjayäta ukhajja, janis uñjapkchiyäsmajja, chuymanakajanjja amtasipjjapuniyäsmawa. Jumanakarojj walpun uñjañ munapjjayäsma, ukatwa jumanakan ukar jutañatakejj* wal chʼamachasipjjayäta. 18 Ukatwa jumanakan ukar jutañ wal munapjjayäta. Naya Pablojj janiw mä kutik jutañ munkayätti, jan ukasti pä kutiw jutañ munayäta. Ukampis Supayaw* thak jarkʼantapjjetu. 19 Jesús Tatitusajj kuttʼanjjani uka tiemponjja,* ¿jupa nayraqatan khitinakänis nanakan suytʼañanakajasa, kusisiñanakajasa, jan ukajj kusiskañ coronanakajasa? ¿Janit jumanakäpkta?+ 20 Jïsa, jumanakäpjjtawa nanakan jachʼañchasiñanakajasa, kusisiñanakajasa.

3 Jumanakat jayankkasajja nanakajj walpun jumanakat llakisipjjayäta, ukatwa Atenas+ markan quedasiñ amtapjjta, 2 Timoteo+ jilatasarus khitanipjjaraksmawa. Jupajj Diosan serviripjamaw* Cristjjat suma yatiyäwinak yatiyaski, juparakiw Diosar confiyañan* suma saytʼatäpjjañamatakisa* chuymachtʼatäpjjañamatakis yanaptʼapjjätam, 3 ukhamat uka tʼaqesiñanakan jan khitisa aynachtʼañapataki.* Uka tʼaqesiñanakatjja janiw jiwasanakajj salvasksnati,* uk jumanakajj yatipjjtawa.+ 4 Nanakajj jumanakampïsipkayäta ukhajja, tʼaqesiñanakan uñjasiñäni sasajj janïräkipanwa sapjjayäsma. Kunjamtï jumanakajj yatipktajja ukhamapuniw pasäna.+ 5 Nayajj jumanakat jayankkasajj wal llakisiyäta, ukatwa Timoteor khitanipjjsma, ukhamat qhawqsa Diosar confiyasipkta* uk yatiñataki.+ Diablotejj*+ yantʼar puriyapjjeristamjja, nanakan chʼamachasitanakajajj inamayäspawa.

6 Ukampis Timoteojj jumanakan ukat kuttʼanjjewa,+ jupajj qhawqsa jumanakajj Diosar confiyapjjta,* kunja munasirïpjjtasa, kunjamsa nanakat amtasipjjapunista, qhawqsa nanakar uñjañ munapjjesta, taqe uka suma yatiyäwinakwa nanakar yatiyapjjetu, nanakajj ukhamarakiw jumanakar uñjañ munapjjsma. 7 Jilatanaka, nanakajj kunayman llakisiñanakana tʼaqesiñanakan uñjasipkta ukhajja, jumanakat yatiñasa Diosar wal confiyapjjatam* yatiñasa walpun chuymachtʼapjjetu.+ 8 Jumanakajj Tatitun arkirinakapjam suma saytʼatäpjjatam yatiñajja, nanakarojj chʼamañchtʼapjjetuwa.* 9 Jumanakajj walpun nanakar kusisiyapjjestajja, ukatwa nanakajj jumanakat Diosar wal yuspärapjjta. 10 Nanakajj uruy arumaw Diosar taqe chuyma ruwtʼasipjjta, ukhamat jumanakar uñjañataki,* kunatejj Diosar jukʼampi confiyapjjañamatakejj* munaski ukan yanaptʼañataki.+

11 Dios Awkisasa Jesús Tatitusas mä thaki jistʼarañapatakiw nanakajj orapjjta, ukhamat jumanakan ukar jutañataki. 12 Tatitojj munasiñanakam jukʼampi jiltayaspa ukwa nanakajj munapjjarakta. Kunjamtï nanakajj jumanakar wal munasipksmajja, ukhamarak jumanakkamasa yaqhanakarus jukʼampi munasipjjasma ukwa munapjjta.+ 13 Ukhamat Jesús Tatitusajj+ santo servirinakapampi kuttʼankani uka tiemponjja,* Dios Awkis nayraqatan chuymanakamajj chʼamañchtʼatäñapataki, jan juchani, santo uñstapjjañamataki.+

4 Jilatanaka, kunjamtï nanakajj yatichapksmajja, ukarjamaw jumanakajj Diosar kusisiykir jakasipktajja.+ Ukampis ukarjam jukʼamp sum sarnaqasipkakiñamatakiw Tatit Jesusan sutipjjar mayipjjsma, ruwtʼanipjjaraksma. 2 Kunanaktï Jesús Tatitun sutipjjar yatichapksma* ukanakjja jumanakajj yatipjjtawa.

3 Jumanakajj qʼoma jakasipjjam,+ qʼañu jucha* lurañatsa jitheqtapjjarakim,+ ukaw Diosan munañapajja. 4 Sapa mayni jumanakatjja cuerpopar* controlañ yatiñapawa,+ ukhamat qʼoma jakapjjañamataki,+ Diosampis katoqatäpjjañamataki.* 5 Jan jumanakajj Diosar jan uñtʼir yaqha markankir jaqenakjamäpjjamti,+ jupanakajj chacha jan ukajj warmi sinti munañampiw apayasipjje,+ ukjja wal munapjjaraki. 6 Uka toqenakatjja janiw khitis jilataparojj jan wal lurañapäkiti, janirakiw jupat aprovechasiñapäkiti. Jehová* Diosajj ukham luririnakarojj castiganiwa, kunjamtï nayrajj sapkayäsma ewjjtʼapkayäsma ukhama. 7 Diosajj janiw ajjtaskañanakan jakañasatakejj jawskistuti, jan ukasti santo jaqëñasatakiw jawsistu.+ 8 Ukhamajj uka yatichäwinakar rechazir jaqejja, janiw jaqer rechazkiti, jan ukasti Diosaruw rechazi,+ jupaw jumanakarojj espíritu santop churapjjtamjja.+

9 Familia taypin utjki uka munasiñ toqetjja+ janiw jumanakar qellqaniñajj wakiskiti, jumanakarojj Diosaw maynit maynikam munasiñ yatichasipktamjja.+ 10 Cheqansa Macedonia markankir taqe jilatanakarojj wali munasiñampiw uñjasipktajja. Ukampis jilatanaka, jukʼamp munasipjjañamatakiw chʼamañchtʼanipjjsma. 11 Jumanakajj sumankañan jakasiñatakisa,+ yaqhanakan luräwinakapar jan mitisiñatakisa,+ pachpa amparanakamampi trabajiñatakisa+ chʼamachasipjjam, kunjamtï nanakajj yatichapksma ukhama. 12 Ukhamat khitinakatï jan cristiano congregacionankapki uka jaqenakajj sum sarnaqapjjatam uñjapjjañapataki+ ukhamarak jan kuns faltayasipjjañamataki.

13 Ukhamarus jilatanaka, jiwañan iktʼasipki+ ukanakampejj kunas pasani ukjja sum yatipjjañamwa nanakajj munapjjta, ukhamat khitinakatï jan kuna suytʼañanïpki uka jaqenakjam jan llakisipjjañamataki.+ 14 Jiwasatï Jesusan jiwataparusa jaktataparusa+ confiystanjja,* Jesusan arkiripjam jiwañan iktʼasipki ukanakarojj Diosaw Jesusampïpjjañapatak jaktayani sasaw confiyaraktanjja.*+ 15 Nanakajj Jehová* Diosan arunakaparjamaw ak sapjjsma: Tatitojj kuttʼanjjani uka tiempon* khitinakatejj jakaskañäni ukanakajja, jiwañan iktʼasipki ukanakarojj janiw kunjamatsa nayrtʼkañäniti. 16 Pachpa Tatituw arcángel arupampi+ wali jachʼat artʼasisajj alajjpachat saraqanini, Diosan trompetapas aptʼata. Khitinakatï Cristomp mayakïsin jiwapki ukanakaw nayraqat jaktapjjani.+ 17 Khitinakatï jakaskañäni ukanakajja, jupanakamp chikäñataki ukhamaraki Tatitumpi jikisiñatakiw+ qenayanak taypi alayar aptatäñäni,+ ukhamatwa Tatitumpejj wiñayatak chikäjjañäni.+ 18 Ukhamajj uka arunakampejj maynit maynikam chuymachtʼasisipkakim.

5 Ukhamajj jilatanaka, tiemponakatsa señalat urunakatsa janiw jumanakar kuna qellqaniñas wakiskiti. 2 Jumanakajj sum yatipjjtajja, kunjamtï mä lunthatajj arum jutkejja,+ ukhamarakiw Jehová* Diosan urupajj+ jutani. 3 Kunapachatï jaqenakajj “¡Suman jakasiñampi jan ajjsaras jakasiñampiw utj-jje!” sapkani ukhaw mä akatjamat jupanakjjar tʼunjäwejj jutani,+ kunjamtï mä usur warmirojj partojj waytki ukhama, uka tʼunjäwitjja jupanakajj janiw kunjamatsa escapapkaniti. 4 Ukampis jilatanaka, jumanakajj janiw chʼamakankapktati, ukhamat uka urumpi katjayasiñatakejja, kunjamtï lunthatanakajj urump katjayasipkaspa ukhama. 5 Taqe jumanakajj qhanampin urumpin wawanakapäpjjtawa.+ Jiwasajj janiw arumankirïktanti ni chʼamakankirïktansa.+

6 Ukhamajj jan mayninakjam ikipjjañäniti,+ jan ukasti uñnaqapjjapuniñäni,+ wali amuyumpirak sarnaqapjjañäni.+ 7 Ikirinakajj arumaw ikipjje, machirinakajj arumaw machantat sarnaqapjje.+ 8 Ukampis khitinakatejj urunkirïpktan ukanakajja, wali amuyumpi sarnaqapjjañäni. Diosar confiyañampi* munasiñampi uskuntasipjjañäni, kunjamtï mä soldadojj pecho jarkʼaqasiñ chalecompi uskuntaski ukhama. Salvación suytʼañampisti mä cascökaspas ukham usktʼasipjjarakiñäni.+ 9 Kuna laykutejj Diosajj janiw castigatäñasataki* ajlliskistuti, jan ukasti Jesucristo Tatitusan luratapampi salvatäñasatakiw ajllisistu.+ 10 Jupajj jiwasanak laykuw jiwäna,+ ukhamat uñnaqaskakiñänisa iktʼjjañänisa* jupamp chika jakañasataki.+ 11 Ukhamasti jumanakajj maynit maynikam chʼamañchtʼasisipkakim,* maynit maynikamas yanaptʼasisipkakim,+ kunjamtï lurasipkta ukhama.

12 Jilatanaka, khitinakatejj jumanak taypin wal trabajisipki, Tatitur serviñansa irpasipktam, ewjjtʼasipktam ukanakar respetomp uñjapjjañamatakiw nanakajj ruwtʼanipjjsma. 13 Luratanakapatjja wali munasiñampi suma chuymampi uñjapjjam.+ Maynit maynikamas sumankapjjarakim.+ 14 Maysa toqetjja, jilatanaka, ruwtʼapjjaraksmawa, jan wal sarnaqerinakarojj ewjjtʼapjjam,+ llakitanakarus* chuymachtʼapjjam, jan chʼamaninakarus yanaptʼapjjarakim, taqenirus pacienciampi uñjapjjam.+ 15 Amuyasipjjam, janirak khitis jan wal luratajj jan walimpi kuttʼaypanti,+ antisas maynit maynikamasa taqenimpisa kunatejj walïki uk lurañataki chʼamachasipjjam.+

16 Jumanakajj kusisitäpjjapunim.+ 17 Oración lurapjjapunim.+ 18 Taqe kunatsa yuspärapjjapunim.+ Ukaw Diosan munañapajj Cristo Jesusan arkirinakapatakejja. 19 Janirak espíritu santon ninapsa jiwarayapjjamti.+ 20 Janirak profecía arunakarojj jiskʼachapjjamti.+ 21 Taqe kunas ukhamapunïskiti janicha ukjja sum amuykiptʼapjjam,+ kunatejj walïki uk lurasipkakim. 22 Taqe jan walinakat jitheqtapjjam.+

23 Diosan sumankañapajj phoqatpach jumanakarojj santor tukuypan. Jesucristo Tatitusajj kuttʼankani uka tiempokamajja,* jumanakan suma amuyunakamasa, vidanakamasa,* cuerponakamas taqe kunas sanoki jan kuna juchani ukhamäskakpan.+ 24 Khititejj jawsapktam ukajja, arsutapar phoqeriwa, ukhamajj taqe ukanakjja phoqarakiniwa.

25 Jilatanaka, nanakatak orasipkakim.+

26 Taqpach jilatanakarojj jampʼattʼas* aruntapjjam.

27 Aka carta taqe jilatanakatak liytʼarapipjjañamatakiw nayajj Tatitun sutipjjar ruwtʼanipjjsma.+

28 Jesucristo Tatitusan wali khuyapayasiñapajj jumanakampïpan.