2 TESALONICENSES
TESALÓNICA CONGREGACIONAR PAYÏR QELLQAT CARTA

1 Naya Pablojja, Silvanompi* Timoteompi+ chikaw Tesalónica congregacionar qellqanipjjsma, khitinakatï Dios Awkisampi Tatit Jesucristompejj mayakïpjjta ukanakaru:

2 Dios Awkina ukhamaraki Tatit Jesucriston wali khuyapayasiñapasa sumankañapasa jumanakampïpan.

3 Jilatanaka, jumanakatjja Diosar yuspärapjjapuntwa, uk lurañatakejj obligatäpjjtwa. Jumanakan Diosar confiyapjjatamajj* jukʼampiw jiltaski, maynit maynikam munasiñanakamas ukhamarakiw jukʼamp jiljjattaski,+ ukatwa ukham lurañajj wakisi. 4 Ukatwa nanakajj Diosan congregacionanakapan jumanakat jachʼañchasipjjta.+ Jumanakajja jan waltʼayatäñatak arknaqatasa jan waltʼäwinakan* tʼaqeskasasa aguantasipktawa,+ Diosarus confiyasipkaraktawa,* ukanakwa jupanakar yatiyapjjta. 5 Taqe ukanakajja, Diosajj cheqapar uñjirïtapwa uñachtʼayi, taqe ukanak laykurakiw jumanakajj Diosan Reinop* katoqañatakejj suma jaqet uñjatäpjjtajja, uka Reino laykuw jumanakajj tʼaqesisipktajja.+

6 Diosajj cheqapar uñjirïtap laykojja, khitinakatï jumanakar tʼaqesiyapktam ukanakarojj castiganiwa.+ 7 Tatit Jesusajj wali chʼaman angelanakapampi+ aqkir ninampi alajjpachat uñstankani+ ukapachajja, khitinakatï tʼaqesipkta ukanakajja, nanakamp chik salvatäpjjätawa. 8 Ukapachaw jupajj Diosar jan uñtʼirinakarusa, Jesús Tatitusat parlki uka suma yatiyäwinakar jan istʼirinakarus castigani.+ 9 Jupanakajj juchañchataw uñjasipjjani, Tatit nayraqatansa jan mayampitak tʼunjatäpjjaniwa,+ janirakiw jupan kʼajkir chʼamapsa uñj-jjapjjaniti. 10 Tatitojj santo servirinakapamp chik jachʼañchatäñataki jutkani ukhaw ukajj pasani. Uka urunsti taqe khitinakatï jupar confiyapki* ukanakajja, jupar uñjasajj wal musparapjjani, ukhamarakiw jumanakas kuntï yatiyapksma ukar creyipjjatam laykojja, jupar uñjasajj wal musparapjjäta.

11 Ukatwa nanakajj jumanakatak oración lurarapipjjapunsma, ukhamat kunatakitejj jawsatäpkta ukarjam jakapjjatamatjja Diosasajj jumanakar sum uñjañapataki,+ taqe kunanaktï jupajj chʼamapampi lurañ munki ukanak lurañapataki ukhamaraki kunanaktï jupar confiyapjjatamat* lurasipkta uk phoqachañapataki. 12 Ukhamatwa Jesús Tatitusan sutipajj jumanak taypi jachʼañchatäni. Jumanakajj jupamp mayakïpjjatamatjja jachʼañchatäpjjarakïtawa, ukhamatwa Diosasana ukhamaraki Tatit Jesucriston wali khuyapayasiñapajj qhan uñjasini.

2 Jilatanaka, Jesucristo Tatitusan kuttʼaniñap tiempotsa,*+ jiwasanakajj jupampi chikäjjañäni uka toqetsa,+ nanakajj mayipjjsmawa, 2 jan jumanakajj amuyunakam jankʼaki mayjtʼayasipjjañamataki.+ Jehová* Diosan urupajj+ purinjjewa sasin parlapki uka arunakajj Diosan arunakapjamäskpasa, khitin yatiyäwipjamäskpasa, jan ukajj nanakan qellqanit cartjamäskpasa jan sustjasipjjamti.

3 Jan jumanakajj khitimpis engañjayasipjjamti. Uka uru janïr purinkipanjja, Dios contra saytʼañaw*+ nayraqatajj jutañapa, ley contra saytʼir jaqejja,*+ mä arunjja tʼunjatäkani uka jaqejja qhanstañaparakiwa.+ 4 Uka jaqesti contra saytʼiriwa, diosjamäpki ukanakjjarusa, jaqenakajj adorapki* ukanakjjarusa, jupajj jachʼañchasirakiwa, ukhamatwa jupajj Diosan templopanjja mä diosäkaspas ukhama taqenin uñjkatajj qontʼasi. 5 Jumanakampïskayäta ukhaw nayajj taqe ukanak sapjjayäsmajja, ¿janit uk amtasipkta?

6 Khitis ley contra saytʼir jaqerojj* jarkʼaski uk jichhajj yatjjapjjtawa, jupan jarkʼaskatap laykojja ley contra saytʼir jaqejj tiempoparuw qhanstaskani. 7 Cheqpachansa ley contra saytʼir jaqejja,* niyaw jan walinak jamasan luraski,+ ukampis khititejj jarkʼaski ukajj jan akankjjani ukhakamakiw ukanak jamasan lurani. 8 Ukjjarojj ley contra saytʼir jaqejj* qhanstjjaniwa. Jesusajj kuttʼankani uka tiempojj* qhan amuyasjjani+ ukhajja, lakapat misturi chʼamapampiw Tatit Jesusajj ley contra saytʼir jaqerojj chhaqtayani.+ 9 Ley contra saytʼir jaqejj* Supayan*+ chʼamapampiw uñstani, ukatsti kunayman milagronaka, engañjir señalanaka, musparkañanakwa lurani,+ 10 tukjatäpkani ukanakatakejj ukhamarakiw kunayman jan walinaka, engañonak lurani.+ Jupanakajja kunatï cheqäki uk janiw katoqasipkänti ni munasipkänsa, ukatwa tukjatäpjjani. Jupanakatï uk lurapjjaspäna ukhajja salvasipjjaspänwa. 11 Ukatpï Diosajj kʼari yatichäwinakampi engañjatäpjjañapatakejj jupanakar jaytejja, ukhamat kʼari arunak creyipjjañapataki,+ 12 ukhamat taqe jupanakajj juchañchatäpjjañapataki, kunatï cheqäki ukar creyiñat sipansa jan walinakan kusisipjjatap layku.

13 Jehová* Diosan munat jilatanaka, Diosaw jumanakarojj salvatäpjjañamatakejj qalltatpach ajllisipjjtamjja,+ ukatwa nanakajj Diosar jumanakat yuspärapjjapunta, uk lurañatakejj obligatäpjjtwa. Diosajj kunatï cheqäki ukar creyipjjatamatwa jumanakarojj espíritu santopampi santor tukuyasajj+ ajllisipjjtamjja. 14 Kuna suma yatiyäwinaktï nanakajj yatiyapkta uka taypiw jupajj salvatäpjjañamatak jawsapjjtamjja, ukhamat jumanakajj Jesucristo Tatitjam jachʼanchatäpjjañamataki.+ 15 Ukhamajj jilatanaka, jumanakajj suma saytʼatäpjjam,+ kuna costumbrenaktï yatichapktam ukanak jan apanukupjjamti,+ ukanak aru toqesa jan ukajj nanakan qellqanit carta toqes katoqapjjstajja jan apanukupjjamti. 16 Dios Awkisajj wal munasistu,+ wali khuyapayasirïtapatwa wiñayatak chuymachistu, mä suma suytʼaña+ churarakistu. Nanakajj oración lurapjjtwa, ukhamat Dios Awkisasa Jesucristo Tatitusasa 17 jumanakar chuymachañapataki, chʼamañchañapatakiraki,* ukhamat kunatejj sumäki uk lurapjjañamataki, kunatejj sumäki uk arsupjjañamataki.

3 Ukhamajj jilatanaka, nanakatakejj oración lurarapipjjapunita,+ ukhamat Jehová* Diosan arunakapajj jankʼaki taqe cheqan yatiyasiskakiñapataki+ ukhamaraki jachʼañchasiskakiñapataki, kunjamtï jumanak taypin jachʼañchasiski ukhama. 2 Sinti jan wali jaqenakat salvasipjjañajatakejj mayirapipjjarakita,+ kuna laykutejj janiw taqe jaqenakajj creyentëpkiti.+ 3 Tatitusti arunakapar phoqeriwa, jupaw jumanakarojj chʼamañchtʼapjjätam, Supayatsa jarkʼaqapjjarakïtam. 4 Ukhamarus nanakajj Tatitun arkirinakapjamajj jumanakar wal confiyapjjsma, nanakajj yatichapksma ukanakjja phoqasipktawa, cheqas phoqasipkakïtawa. 5 Tatitojj jumanakar yanaptʼaskakpan, ukhamat Diosar munasipjjañamataki,+ Cristo laykus aguantasipkakiñamataki.+

6 Jilatanaka, Jesucristo Tatitusan sutipjjaruw jichhajj ewjjtʼanipjjsma: kawkïr jilatatejj jan wal sarnaqki,+ jumanakajj nanakat katoqapkta* uka costumbrenaksa* jan phoqkaraki ukatjja jitheqtapjjam.+ 7 Kunjamsa nanakat yateqasipjjañama ukjja jumanakajj yatipjjtawa,+ nanakajj janiw jumanak taypin jan wal sarnaqapkti, 8 janirakiw khitin manqʼapsa gratisak manqʼapkti.+ Antisas uruy arumaw wal trabajipjjta wal chʼamachasipjjarakta, ukhamat jan jumanakat khitirus llakimp apjjatañataki.+ 9 Nanakajj jumanakar kun mayiñatakis derechonïpjjtwa,*+ ukampis nanakat yateqasipjjañamatakejj janiw kuns mayipksmati.+ 10 Nanakajj jumanakampïsipkayäta ukhajja, akham sasaw sapjjayäsma: “Maynitejj jan trabajiñ munkchejja, janirak manqʼpanti”+ sasa. 11 Nanakajj istʼapjjaraktwa, jumanak taypinjja yaqhepajj janiw sum sarnaqapkiti,+ janirakiw kunansa trabajipkiti, antisas kunatï jupanakar jan waktʼki ukanakaruw mitisipjje.+ 12 Ukham jaqenakarusti Tatit Jesucriston sutipjjaruw nanakajj mayipjjta, ewjjtʼapjjarakta, yaqhanakan luräwinakapar jan mitisis trabajipjjañapataki, chʼamapampi jikjjatat manqʼa manqʼapjjañapataki.+

13 Jilatanaka, janipun suma luräwinak lurañ apanukupjjamti. 14 Ukampis maynitejj aka cartan qellqat arunakar jan istʼkanejja, jupat amuyasipjjam,* janiraki jupampejj chikachasipjjamti,+ ukhamat phenqʼasiñapataki. 15 Ukampis jan juparojj mä enemigorjam uñjapjjamti, jan ukajj mä jilarjam ewjjtʼasipkakim.+

16 Sumankañ churir Tatitojja sumankañap jumanakar taqe kunan churaskakpan.+ Tatitojj taqe jumanakampïpan.

17 Naya Pablojj pachpa amparajamp qellqtʼasaw aruntaj apayanipjjsma.+ Ukham qellqanisaw taqpach cartanakajanjja nayan qellqanitaj uñachtʼayta. Nayajj ukham qellqerïtwa.

18 Jesucristo Tatitusan wali khuyapayasiñapajj taqe jumanakampïpan.