2 TIMOTEO
TIMOTEOR PAYÏR QELLQAT CARTA

1 Naya Pablojja, Diosan munañapatwa Cristo Jesusan apostolopätjja, Diosajj Cristo Jesús taypiw jakäwi churañ arsüna, ukanak yatiyañatak uttʼayatätwa.+ 2 Nayasti juma Timoteo munat wawajaruw qellqansma:+

Dios Awkina ukhamaraki Cristo Jesús Tatitusan jachʼa munasiñapasa, wali khuyapayasiñapasa, sumankañapasa jumampïpan.

3 Diosarojj walpun nayajj yuspärta, kunjamtï nayra awkinakajajj servipkänjja ukhamarakiw nayajj qʼoma concienciampi Diosar serviskta. Nayajj uruy aruma oracionan ruwtʼaskasajja, jumat amtasipuntwa. 4 Jachaqtʼasitanakamat amtaskta ukhajja, nayajj wal jumar uñjañ munsma, ukhamat kusisiñajataki. 5 Kunjamsa jumajj Diosar confiyasajj* cheqa chuymampi sarnaqerïta uk nayajj amtapuntwa,+ nayraqatajj Loida awichamampi Eunice mamamampiw ukham chuymanïpjjänjja, jichhas jumajj ukham chuymanïskakpachätawa, uka toqet janiw payachaskti.

6 Ukatwa nayajj jumar amtayansma, kuntï Diosat katoqkta ukjja ninar uñtat jukʼamp aqtayañamataki, ukjja kunapachatï nayajj amparamp loqjjatksma ukhaw katoqtajja.+ 7 Diosajj churkistu uka espíritu santojja, janiw ajjsarir jaqer tukuykistuti,*+ jan ukasti chʼamani,+ munasiñani, suma amuytʼasiri jaqëñasatakiw yanaptʼistu. 8 Ukhamajj jan jumajj Tatitusat yatiyañ phenqʼasimti,+ janirak nayatsa phenqʼasimti, nayajj Tatit laykuw carcelan llawintatäskta. Antisas jumajj suma yatiyäwinak laykojja, Diosan chʼamapar+ confiyasajj tʼaqesiskakim.+ 9 Jupaw jiwasarojj salvistu, juparakiw santo jaqëñasatakejj jawsistu,+ ukampis janiw luratanakas laykojj jawskistuti, jan ukasti amtanakap layku ukhamarak wali khuyapayasiñap laykuw jawsistu.+ Jupajj nayra tiempotpachwa Cristo Jesús taypejj wali khuyapayasiñamp uñjistäna. 10 Jichhajj jiwasar Salviri Cristo Jesusan+ uñstanitapatwa Diosan wali khuyapayasirïtapajj wali qhan amuyasjje. Cristow jiwañ chhaqtayjje,+ juparakiw suma yatiyäwinak+ taypejj kunjamatsa jakañsa+ jan tukuskir jakañsa+ katoqsna uk qhanañchistu. 11 Nayajj mä yatiyirjama, mä apostoljama, mä yatichirjam uttʼayatätwa, ukhamat uka suma yatiyäwinak yatiyañajataki.+

12 Ukatwa nayajj tʼaqesiskta,+ ukampis janiw phenqʼaskti.+ Khitirutejj nayajj creykta uka Diosarojj uñtʼtwa, kuntï nayajj jupar katuykta ukjja juicio urkamaw imaskani, janiw ukat payachaskti.+ 13 Kuna cheqa* yatichäwinaktï+ nayat katoqkta uka yatichäwinakjja arkaskakim. Cristo Jesusamp mayakïtam laykojja, uka cheqa yatichäwinakarojj Diosar confiyasa* munasiñamp sarnaqasa arkaskakim. 14 Kunatï jumar katuyatäki ukjja, espíritu santon yanaptʼapampi sum cuidam, uka espíritu santojj jiwasampïskiwa.+

15 Asia+ provinciankir taqe jaqenakaw nayat jitheqtjjapjje uk jumajj sum yatisktajja. Figelo, Hermógenes uka jilatanakamppachaw nayat jitheqtjjapjje. 16 Tatitusti Onesíforo+ jilatan utapankirinakat khuyaptʼayaspan. Jupajj walja kutiw nayarojj chʼamañchtʼitäna, janirakiw cadenanakampi chinuntatätaj laykojj phenqʼaskänti. 17 Antisas jupajj Roma markankaskäna ukhajja, katuñkamaw nayarojj wal thaqetäna. 18 Juicio urunjja Jehová* Tatitojj Onesíforo jilatat khuyaptʼayaspan. Taqe kunanakantï jupajj Éfeso markan naya layku lurkäna uksa jumajj sum yatiraktajja.

2 Ukhamasti munat wawaja,+ niyakejjay Diosajj Cristo Jesús taypejj wali khuyapayasiñampi uñjstamjja, jumajj chʼam katjjataskakim. 2 Kunanaktï nayar parlir istʼkista, walja testigonakas+ qhanañchapki ukanakjja, suma phoqeri chachanakar yaticham, ukhamatwa jupanakajj yaqhanakar yatichañatakejj suma wakichtʼatäpjjani. 3 Jumasti Cristo Jesusan mä suma soldadopjamajj+ tʼaqesiskakim.+ 4 Maynitejj soldadjam serviskchejja, janiw negocionak lurañar mitiskiti,* jan ukasti khititejj soldadjam katoqki ukar kusisiyañatakiw chʼamachasi. 5 Anatäwinakanjja ukhamarakiwa, mä tʼijuritejj reglamentorjam jan tʼijkchejja, janiw premio* katoqkaspati.+ 6 Mä yapuchiritejj wal trabajchejja, jupaw nayraqatajj yapupan achunakap manqʼasiñapa. 7 Kunanaktï nayajj sisksma ukanakat amuytʼapunim. Tatituw jumarojj taqe kunan amuytʼasiñamatakejj yanaptʼaskätam.

8 Amtasipunim, Jesucristojj jiwatanak taypit jaktayatänwa,+ Davidat jutir wawarakïnwa,+ uka suma yatiyäwinakwa nayajj yatiyaskta,+ 9 uka laykurakiw nayajj wal tʼaqesiskta, jan wali jaqëkiristsa ukhamaw carcelan llawintat uñjasirakta.+ Ukampis Diosan arunakapajj janiw cadenanakamp chinuntatäkiti.+ 10 Ukatwa nayajj ajllitanak laykojj taqe kunsa aguantaskakta,+ ukhamat jupanakajj Cristo Jesusampi mayakïpjjatap laykojj salvatäpjjañapataki, wiñay jachʼañchäwsa katoqapjjañapataki. 11 Aka arunakajj wali confiykañawa: cheqansa jiwasatejj jupamp chika jiwañänejja, jupamp chikarakiw jakañäni;+ 12 jiwasatejj aguantaskakiñänejja, jupamp chikarakiw reyinakjam apnaqañäni;+ jiwasatejj janiw jupar uñtʼkti sañänejja, jupajj janiw uñtʼapksmati sarakiniwa;+ 13 janisay jiwasajj kuntï Diosajj siski ukanak lurkchiñänejja, jupajj kuntï arski ukanakjja phoqapuniniwa, kuna laykutejj janiw jupajj amtap contrajj saytʼkaspati.

14 Taqe akanak amtayaskakim, Dios nayraqatansa yatichaskakim,* ukhamat arunakat jan jiskhisipjjañapataki, ukham jiskhisiñajj inamayakiwa, antisakiw ukanak istʼirinakarojj jan waltʼayi.* 15 Jumajj taqe chuym chʼamachasim, ukhamat Dios nayraqatan suma uñjatäñataki, jan kunat phenqʼasis trabajiñataki, Diosan arunakapsa* cheqaparjam apnaqañataki.+ 16 Diosar jiskʼachir inamay arunakjja maysar apanukum,+ uka arunakajj kunayman jan wali lurañanakaruw apani,* 17 uka jaqenakan arunakapajja gangrenar uñtataw saratatani. Himeneompi Filetompejj ukham arunak apnaqer jaqenakäpjjarakiwa.+ 18 Jupanakajj jiwatat jaktañajj pasjjewa sasaw cheqa yatichäwinakat saranukupjje,+ Diosar confiyañatsa* yaqhepanakarojj apaqapjjarakiwa. 19 Ukampis Diosan suma uttʼayata cimientopajj sayaskakiwa, ukanjja akham qellqatawa: “Jehová* Diosajja jupankirinakarojj uñtʼasiwa”,+ “taqe khitinakatejj Jehová* Diosan sutipat artʼasipki ukanakajja,+ jan walinak apanukupjjpan” sasa.

20 Jumanakajj yatipjjtawa, mä jachʼa utanjja, janiw qorita qollqeta lurat vasonakakejj utjkiti, jan ukasti maderata ñeqʼeta lurat vasonakaw utjaraki, yaqhepajja kunatï sumäki uk apnaqañatakiwa, yaqhepasti kunatï jan sumäki uk apnaqañatakiwa. 21 Ukhamasti maynitejj jan sumäki uk apnaqañ vasonakat jitheqtanejja, kunatï sumäki uk apnaqañatak vasor uñtatäniwa, santo jaqer tukuyatarakïniwa, dueñopatakis wali sumäniwa, taqe suma luräwinak lurañatakis wakichtʼatarakïniwa. 22 Ukhamajj kunanaktï maynejj waynäkasin munki ukanakat jumajj jitheqtam,* antisas cheqaparjam sarnaqañataki, Diosar confiyañataki,* munasirïñataki, sumankañataki chʼamachasim, Tatitur suma* chuymampi artʼasipki ukanakamp chika.

23 Jan kunatak serviri, inamaya jiskhisiñanakarojj jan mitisimti,+ ukanak kawsaw chʼajjwañanakajj utji, uk jumajj yattawa. 24 Tatitun esclavopajj janiw chʼajjwañapäkiti, antisas taqeniruw munasiñamp uñjañapa,+ yatichañatakis wakichatäñapawa, jan wal luratas pacienciampiw aguantañapa,+ 25 jan istʼañ munirinakarus llampʼu chuymampiw* yatichañapa.+ Kunatï cheqäki uk sum uñtʼapjjañapatakejja inas Diosajj jupanakar arrepentimiento churchini,*+ 26 ukhamat amuytatasipjjañapataki, Diablon trampapatsa escapapjjañapataki. Jupanakajj Diablon munañap lurañatak jakkirpach katuntatäpjjewa.+

3 Jumajj yatiñamarakiwa, qhepa urunakanjja+ chʼama tukuña jan wali tiemponakaw utjani. 2 Jaqenakajj akhamäpjjaniwa: jupanak pachpa munasirinaka, qollqe sinti munirinaka, pʼeqe waytat sarnaqerinaka, jachʼa jachʼa tukurinaka, Dios contra jaqe contra jan wal parlirinaka, awkiparus taykaparus jan istʼirinaka, jan yuspärasirinaka, jaqe masipar jaytanukurinaka,* 3 jan munasirinaka, jan kuna acuerdorus mantañ munirinaka,* kʼarintirinaka, munañapampi apnaqayasirinaka, qhorunaka,* kunatï walïki uk uñisirinaka, 4 traicioneronaka, jan amuytʼañ munirinaka, jachʼañchasirinaka, Diosar munasiñat sipansa pachpa munañapak thaqerinaka, 5 Dios chuymäpkaspas ukham tukurinaka, janirak ukarjam sarnaqerinaka.+ Jupanakat jumajj jitheqtam. 6 Ukham jaqenak taypitwa engañjir jaqenakajj sartapjje, jan amuykañakiw utanakarus mantapjje, ukatjja taqe kun creyiri, jucharara, kunayman munañanakampi apayasir warminakaruw engañjapjje, 7 jupanakajj sapa kutiw yatjjatasipki, ukampis janipuniw kunatï cheqäki uk sum uñtʼañ puedipkiti.

8 Kunjamtï Janes, Jambres jaqenakajj Moisés contra saytʼasipkänjja, ukhamarakiw uka jaqenakajj kunatï cheqäki uka contra saytʼasisipki. Jupanakan amuyunakapajj qʼala mayjtʼayatawa, kuna yatichäwinakarutï creyktan ukarjam jan sarnaqapjjatap laykojja janiw Diosan suma uñjatäpkiti. 9 Ukampis jupanakajj janiw nayrar sartapkaniti, antisas kunjamtï Janes, Jambres jaqenakampi paskänjja, ukhamarakiw taqenejj jan amuytʼasirïpjjatap qhan amuyapjjani.+ 10 Jumajj wali amuyumpiw yatichäwinakaj arktajja, sarnaqäwinakajsa,+ amtäwinakajsa, Diosar confiyatajsa,* paciencianïtajsa, munasirïtajsa, aguantatajsa wali amuyumpirakiw arktajja. 11 Kunjamsa nayajj Antioquía,+ Iconio,+ Listra+ uka markanakan jan waltʼayañatak arknaqata, tʼaqesiyata uñjasiyäta uksa sum yatiraktajja. Nayajj taqe uka tʼaqesiñanakwa aguantawayta, ukampis Tatituw taqe ukanakat salvitu.+ 12 Taqe khitinakatejj Cristo Jesusan arkiripjam jakañ munapki, Dios chuym jakañ munapkaraki ukanakajja, jan waltʼayañatak arknaqataw uñjasipjjarakini.+ 13 Ukampis jan wali jaqenakasa engañjir jaqenakasa jan walit jukʼampi jan waliruw sarapjjani, yaqhanakar engañjasa jupanakas engañjataraki.+

14 Kunanaktï jumajj yateqkta, taqe chuymas creykarakta ukanakjja arkaskakim,+ khitinakatsa jumajj ukanak yateqta uksa sum yatisktajja. 15 Jumajj wawatpachaw+ sagrado qellqatanak uñtʼtajja,+ ukanakaw jumarojj yatiñan jaqer tukuyätam, ukhamat Cristo Jesusar confiyatamat* salvasiñamataki.+ 16 Taqpach Qellqatajj Diosan amuytʼayatawa,+ sumarakiw yatichañataki,+ cheqañchañataki, kunatejj jan walïki ukanak askichañataki, kunatï walïki ukarjam yatichañataki,*+ 17 ukhamat Diosan serviripajj suma yatjjatatäñapataki, taqe suma luräwinak lurañatakis suma wakichtʼatäñapataki.

4 Kunapachatï Cristo Jesusajj wali qhan uñstankani,+ Reyjam apnaqjjarakini+ ukhaw jakirinakarus jiwatanakarus juzgani,+ uka Cristo Jesús nayraqatana ukhamarak Dios nayraqatanwa nayajj ordensma: 2 Diosan arunakap yatiyam,+ suma tiemponsa jan wali tiemponsa jankʼak yatiyam, wali pacienciampi, mä suma yatichirjam+ cheqañcham,+ amuytʼayam, ewjjtʼarakim. 3 Mä tiemponjja jaqenakajj janiw cheqa* yatichäwinak istʼañ munjjapjjaniti,+ antisas kuntï jupanakajj istʼañ munapki ukanak yatichirinakarukiw munañaparjam thaqapjjani.+ 4 Kunatï cheqäki ukanak istʼañat sipansa falso cuentonakakwa istʼjjapjjani. 5 Jumasti taqe kunansa wali amuyump sarnaqaskakim, jan walinaksa aguantaskakim,+ kunanaktï suma yatiyäwinak yatiyirjamajj lurañamäki ukanaksa phoqaskakim,*+ Diosarus phoqatpach servirakim.

6 Nayajj niyarakiw vino ofrendar uñtatajj altarar warjjatatäskta,+ salvasiñ tiempojajj+ wali jakʼankjjarakiwa. 7 Suma nuwasïwinwa nayajj nuwasiwayta,+ tʼijuñansa tukuyañkamaw tʼijuwayta,+ kuna yatichäwinakarutejj nayajj creykta ukarjamaw* sarnaqawayarakta. 8 Jichhajj cheqapar sarnaqerinakan coronapaw nayatak imatäjje.+ Tatitojj cheqapar uñjiri juezawa,+ jupaw khä urunjja mä premior uñtat uka corona churitani,+ janiw naya saparukejj churkitaniti, jan ukasti taqe khitinakatï jupan uñstaniñap wal suyasipki ukanakarus churarakiniwa.

9 Nayan ukarojj jankʼakiy jutam. 10 Kuna laykutejj Demasajj+ akapachar* munatap laykuw nayar jaytanukusajj Tesalónica markar sarjje, Crescentejj Galaciaruw sari, Titojj Dalmaciaruw sararaki. 11 Lucasakiw nayamp chikäski. Jutkäta ukhajj Marcosaruw irpanïta, jupaw nayarojj Diosar serviñan wal yanaptʼitani. 12 Tiquicorojj+ Éfeso markaruw khitta. 13 Ukhamajj jutkäta ukhajja, abrigojampi rollonakampi apanirapitäta, pergaminonak* apaniñamjja jukʼampwa nayajj munta, abrigojasti Troas markana Carpon utapan jaytatäskiwa.

14 Cobrempi trabajir Alejandrojj sinti jan walinakpun luritu. Jehová* Diosaw juparojj luratanakaparjam kuttʼayani.+ 15 Jumas uka jaqet amuyasiñamarakiwa, kuntï nanakajj yatiyapkta ukanak contrajj añchapuniw jupajj saytʼasi.

16 Autoridadanak nayraqatan nayrïr kutin naya pachpat arjjataskayäta ukhajja, janiw khitis nayamp chikäkänti, jan ukasti taqeniw jaytanukupjjetäna. Janik Diosajj jupanakar cuenta mayispati. 17 Ukampis Tatituw nayamp chikäskänjja, juparakiw wal chʼamañchtʼitäna, ukhamat suma yatiyäwinakajj naya taypi phoqatpach yatiyasiñapataki, taqe markanakansa istʼasiñapataki.+ Juparakiw nayarojj leonan lakapat salvitu.+ 18 Tatituw taqe jan walinakat salvitani, alajjpachankir Reinopatakiw* salvarakitani.+ Jupajj wiñayans wiñayapatak jachʼañchatäpan. Amén.

19 Priscampiru* Aquilampir aruntarapita,+ Onesiforon utapankirinakarus ukhamaraki.+

20 Erastojj+ Corinto markaruw quedasi, Trofimorusti+ Mileto markanwa usuntat jaytaniwayta. 21 Janïr juyphipachäkipan puriniñatak chʼamachasinim.

Eubulo jilatajj aruntantamwa. Pudente jilatasa, Lino jilatasa, Claudia kullakasa, taqe jilatanakasa aruntanipjjaraktamwa.

22 Tatitojj wali suma chuymanïtam laykojj jumar bendispan. Jupan wali khuyapayasiñapas jumanakampïpan.