SANTIAGO
SANTIAGON QELLQAT CARTAPA

1 Naya Santiagojj+ Diosana ukhamarak Jesucristo Tatitun esclavopätwa, taqe cheqankir 12 tribunakaruw nayajj aruntanipjjsma.

2 Munat jilanakaja, jumanakatejj kunayman jan waltʼäwinakan uñjasipjjätajja, kusisipjjam.+ 3 Jumanakajj yatipjjtawa, jan waltʼäwinkkasajj Diosar confiyasipkakta* ukhajja, aguantañwa yateqasipktajja.+ 4 Jumanakatejj aguantasipkakïtajja, jukʼamp suma wakichtʼat jaqëpjjätawa, ukhamatwa jumanakajj phoqatäpjjäta, taqe kunansa sanöpjjäta, janirakiw kunas faltapkätamti.+

5 Jumanakat maynirutejj yatiñanïñajj faltchejja, Diosar mayiskakpan,+ ukatsti katoqaniwa,+ jupajj taqenirus taqe chuyma walja chuririwa, khititejj maykani ukatakis janirakiw coleraskaniti.+ 6 Ukhamajj jan payachasis+ jupajj Diosar confiyas* mayisiskakpan,+ khititejj payachaski ukajja, kunjamtï lamar qotankir oladajj thayampi apnaqatäki, uksar aksar jaqnaqatäki ukhamawa. 7 Cheqansa uka jaqejj janiw Jehová* Diosat kun katoqañsa suyañapäkiti, 8 jupajj payachasiri,+ taqe sarnaqäwinakapansa may may amtir jaqewa.

9 Mä pobre jilatajja, Dios nayraqatan jachʼar aptatätap laykojj kusispan,*+ 10 qamir jilatasti jiskʼar tukutap laykojj kusispan,+ qamir jaqejj pampankir panqarar uñtataw chhaqtjjani. 11 Intejj mistunki ukhajja, nakhantir calorapampiw mä alirojj qʼal wañsuyi, panqarapas willirtjjewa, suma uñnaqapas tukusjjarakiwa. Mä qamir jaqejj ukhamarakiw qollqen qhepap saratap laykojj tukusini.+

12 Jan waltʼäwinakan uñjasisajj aguantaskaki uka jaqejj kusispan.+ Jupajj suma jaqet uñjatäni ukhajja, jakañ corona katoqani.+ Jehová* Diosajj khitinakatï jupar munasisipkaki ukanakar uk churañatakiw arsüna.+ 13 Jan waltʼäwin uñjasisajja, jan khitisa “Diosaw nayarojj yantʼitu” sasajj sispanti. Diosajj janiw jan walinakampejj yantʼatäkaspati, janirakiw jupajj khitirus yantʼkiti. 14 Antisas sapa mayniw munañapampi apayasisa munañapampi katuntayasisajj yantʼat uñjasi.+ 15 Kunapachatï munañajj chuyman jilti ukhajja, juchaw utj-jje,* juchajj luratäjje ukhajja, jiwañaw utj-jjaraki.+

16 Munat jilanakaja, jan jumanak pachpajj engañjasipjjamti.* 17 Taqe suma regalonakasa perfectöki taqe uka regalonakasa alajjpachatwa juti,+ mä arunjja alajjpachankki uka qhananakan Awkipatwa juti.+ Jupasti janiw chʼiwir uñtatajj mayjtʼirïkiti ni cambyirïkisa.+ 18 Diosajj amtaparjamaw cheqa arunakap taypejj jakañ churistu,+ ukhamat kunanaktï jupajj lurkäna ukanakat nayrïr ajllitäñasataki.+

19 Munat jilanakaja, nayajj ak yatipjjañamwa munta: sapa maynis istʼañatakejj jankʼakïñapawa,+ janiw jankʼak parlañapäkiti, janirakiw jankʼak colerasiñapäkisa.+ 20 Colerasir jaqejja janiw kunatï Dios nayraqatan cheqapäki ukarjamajj lurkiti.+ 21 Ukhamajj taqe kunatï qʼañüki, taqe kunatï jan walïki ukanakjja* apanukupjjam.+ Diosan arunakapjja llampʼu chuymampi* katoqasipjjam, chuymanakamar saphintarakpan, kuna laykutejj ukaw jumanakarojj salvapjjeristam.

22 Jumanakajj Diosan arunakap phoqapjjam,+ jan aleq ukhamak istʼapjjamti, janirak kʼari amuyunakamampejj jumanak pachpajj engañjayasipjjamti. 23 Maynitejj Diosan arunakap istʼasin jan phoqkchejja,+ kunjamtï mä jaqejj espejot ajanup uñkataskejja ukhamawa. 24 Uka jaqejj espejot uñkatasiwa, sarjjasasti jankʼakiw kunjam jaqes uk armtʼasjje. 25 Ukampis mä jaqetejj perfectöki, libre jakañ churirïki uka ley+ wali amuyumpi uñakipchi, taqe chuyma ley istʼaskakchi ukhajja, jupajj janiw aleq ukhamak istʼiri armasiri jaqëkiti, jan ukasti Diosan arunakap phoqeriwa, ukham luratapatjja jupajj kusisiniwa.+

26 Maynitejj Diosan adoriripjam* amuyaschi, ukampis janirak lajjrap controlaskchi ukhajja,*+ pachpa chuymaparuw jupajj engañjaski, Diosar adoratapas inamayakirakiwa. 27 Kunjam adorañatejj* Dios Awkis nayraqatan qʼomäki jan qʼañuchatäki ukajj akawa: wajchanakarus*+ viudanakarus+ jan waltʼäwinakapan+ yanaptʼaña, aka mundompis jan qʼañuchasiña.+

2 Jilatanaka, jumanakajj jachʼañchat Jesucristo Tatitusaru confiykasaw* mayninakar jachʼañchapjjtajja, yaqhanakarojj jiskʼachapjjaraktajja, ¿janich ukhamäki?+ 2 Kunapachatï mä jaqejj lukʼananakaparus qori anillonakan uchantata wali suma isini jumanakan tantachäwinakamar mantani, ukat qʼañu isini mä pobre jaqejj mantaniraki ukhajja, 3 wali suma isini jaqerojj “aka suma lugarar qontʼasim” sasaw sapjjtajja. Pobre jaqerusti, “jumajj uka cheqar saytʼasim” jan ukajj “oraqer qontʼasim” sasaw sapjjaraktajja.+ 4 Ukham lurasajja, maynirojj jachʼañchapjjtawa, maynirojj jiskʼachapjjaraktawa,+ jan wali amtampi juchañchir juezanakaruw tukupjjtajja, ¿janich ukhamäki?+

5 Munat jilanakaja, istʼapjjam. ¿Janit Diosajj khitinakatï aka mundotak pobrëpki ukanakar ajlliskänjja? Jïsa, Diosaw jupanakarojj ajllïna, ukhamat Diosar confiyañan* qamirïpjjañapataki+ ukhamarak jupar munasipki ukanakar arskäna uka Reino* mä herenciar uñtat katoqapjjañapataki.+ 6 Ukampis jumanakajj pobrerojj jiskʼachapjjtawa. ¿Janit qamir jaqenakajj tʼaqesiyapktamjja,+ tribunalanakarus qatatipktamjja? 7 ¿Janit jupanakajj kawkïr suma suttejj jumanakajj apapkta uka suma suti contrajj jan wal parlapki? 8 Reyin jachʼa leyipasti qellqatarjamajj akham siwa: “Jaqe masimarojj juma kikparjam munasiñamawa”+ sasa, jumanakatï uk phoqapjjstajja sum lurasipktajja. 9 Jumanakatï mayninakar jachʼañchapjjsta, yaqhanakarojj jiskʼachapjjaraksta ukhajja,+ juchwa lurasipktajja, leyejja jucha luririnakjamaw juchañchapjjtamjja.+

10 Maynitejj taqpach Ley phoqaskchi, ukampis Leyin mä mandamientop phoqañan pantjaschi ukhajja, taqpach Ley pʼakintaski.+ 11 Khititejj “janiw adulterio jucha lurätati”+ siskäna ukajja, “janiw jaqe masimar jiwayätati”+ sasaw sarakïnjja. Ukhamajj jumatï adulterio jucha jan lurksta, ukampis jaqe masimar jiwaysta ukhajja, Ley pʼakintasktajja. 12 Jumanakajj libre sarnaqer markäpjjtawa, jumanakatak utjki uka leyirjam*+ juzgatäpjjätawa, ukhamajj ukarjam sarnaqapjjam, ukarjam parlapjjarakim. 13 Khititejj jan khuyaptʼayasirïki ukajja, jan khuyaptʼayasis juzgatarakïniwa.+ Cheqpachansa juzgañat sipansa khuyapayasiñaw jilanki.

14 Jilatanaka, maynitejj Diosaruw nayajj confiyta* sasin saspa, ukampis luratanakapajj janirak utjkaspa ukhajja, ¿kuna walirakïspasti?+ Ukham confiyatapajj* janiw jupar salvkaspati, ¿janich ukhamäki?+ 15 Mä jilatatï jan ukajj mä kullakatï jan isinïkchi, janirak mä urutakis manqʼañapajj utjkchi, 16 ukampis jumanakat maynitï jupar “sumak sarjjam, juntʼukïskam, sum manqtʼasirakim” sasin sischi, janirak kunatï cuerpopatak wakiski ukanaksa churkchi ukhajja, ¿kunjamarak ukajj yanaptʼaspasti?+ 17 Ukhamarakiwa, janitejj luratanakajj utjkchejja, Diosar confiyañajj* jiwatawa.+

18 Ukampis maynejj akham saspawa: “Jumajj Diosar confiyirïtawa,* nayajj luräwinak luririrakïtwa. ¿Kunjamaraki jumajj jan suma luräwinak lurasajj Diosar confiyatam* uñachtʼayitasmasti? Nayajj luratanakajampiw Diosar confiyataj* uñachtʼayäma” sasa. 19 Jumajj mä sapa Diosan utjatap creytawa, ¿janich ukhamäki? Ukajj walikiwa. Demonionakas uk creyipjjarakiwa, jupar ajjsarañatsa khatatipjjarakiwa.+ 20 Jan amuytʼasir jaqe, maynintejj jan kuna luräwinakapas utjkchejja, Diosar confiyatapajj* inamayakiwa, ¿uka toqet jukʼamp yatiñti munta? 21 Abrahán awkisajj Isaac yoqaparuw altaran sacrificiot loqtäna, ukatwa jupajj luräwinakap toqejj cheqapar sarnaqer jaqet uñjatänjja, ¿janich ukhamäki?+ 22 Jumajj yattawa, Abrahanan Diosar confiyatapajj* luräwinakapanwa qhan uñjasïna, Diosar confiyatapajj* luräwinakap taypirakiw perfector tukuyatäna.+ 23 Ukatjja aka qellqataw phoqasirakïna: “Abrahanajj Jehová* Diosaruw confiyäna,* ukatwa jupajj cheqapar sarnaqer jaqet uñjatäna”.+ Jupasti Jehová* Diosan amigopa satarakïnwa.+

24 Jumanakajj amuyapjjtawa, mä jaqejja janiw Diosar confiyatap* laykukejj cheqapar sarnaqerit uñjatäkaniti, jan ukasti luräwinakap toqew cheqapar sarnaqer jaqet uñjatäni. 25 Kunapachatï Rahab prostituta warmejj uñaqerinakar* sum katoqtʼasajj* yaqha thaknam khitjjäna uka qhepatjja, jupajj luräwinakap toqew cheqapar sarnaqerit uñjatänjja, ¿janich ukhamäki?+ 26 Cheqpachansa kunjamtï mä cuerpojj jan samananejj* jiwatäjjejja,+ ukhamarakiw Diosar confiyañajj* jan luräwinakanïki ukhajj jiwatäjje.+

3 Jilatanaka, janiw jumanakat taqeni yatichirïpjjañamajj wakiskiti.* Jumanakajj yatipjjtawa, mayninakat sipansa yatichirinakajj jukʼamp juzgataw uñjasipjjäjja.+ 2 Kuna laykutejj taqeniw walja kuti pantjastanjja.*+ Maynitejj arsutapan jan pantjaskchejja, perfecto jaqewa, taqpach cuerpopsa sumwa apnaqaraki.* 3 Caballonakampi istʼayasiñatakejj frenompiw lakapat uchtanjja, ukampiw taqpach cuerpop apnaqaraktanjja. 4 Barconakar uñtapjjarakim, wali jachʼanakäpkchisa, jachʼa thayanakampi apnaqatäpkchisa, mä jiskʼa timonampi apnaqatakïpjjewa, kawkirutejj barco apnaqerejj apañ munki ukar apatäpjjarakiwa.

5 Lajjrampejj ukhamarakiwa, lajjrajj wali jiskʼakïkchis cuerponjja, wali jachʼañchasiriwa. Mä jiskʼa ninampikiw mä jachʼa montejj* nakhantaspa, ¿janich ukhamäki? 6 Lajjrajj ninar uñtasitarakiwa.+ Cuerposan taqpach partenakapatjja, lajjrajj jan walinakamp phoqantatawa, taqpach cuerposaruw qʼañuchi,+ maynin taqpach jakäwipsa ninampiw qʼal tukji, Gehenan* ninapampiw nakhantayaraki. 7 Jaqenakajja jan jakʼachaskañ taqe kasta animalanakaru, jamachʼinakaru, asirunakaru,* jararankhunakaru,* lamar qotan jakir animalanakaruw mansoptayapjjaspa, cheqansa jaqenakajj mansoptayapjjewa. 8 Ukampis lajjrarojj janiw khiti jaqes mansoptaykaspati. Lajjrajj jan apnaqañjamawa, jan waltʼayirirakiwa, jiwayir venenompi phoqantatarakiwa.+ 9 Ukampiw Jehová* Dios Awkisarojj jachʼañchtanjja, ukampirakiw “Diosar uñtata”+ luratäpki uka jaqenakarojj maldistanjja. 10 Pachpa lakatwa bendicionas maldicionas mistu.

Jilatanaka, janiw ukanakajj utjañapäkiti.+ 11 Mä pachpa uma jalsutjja janiw suma umampi kʼaskʼa umampejj jalsunkaspati, ¿janich ukhamäki? 12 Jilatanaka, mä higos qoqajj* janiw aceitunanak achuykaspati, janirakiw uvas alejj higosanak achuykaspati, ¿janich ukhamäki?+ Ni jayukʼar uma jalsutsa suma umajj jalskaspati.

13 ¿Yatiñani amuytʼasiri jaqejj jumanak taypin utjiti? Utjchi ukhajja, jakäwipan sum sarnaqasaw uk uñachtʼayañapa, cheqpach yatiñat jutki uka llampʼu chuymampiw* taqe kunsa lurañapa. 14 Ukampis jumanakan chuymanakamantejj envidiasiñanakasa+ jiskhisiñanakasa+ utjchejja, jan jachʼañchasipjjamti,+ janirak kunatï cheqäki uka contras kʼarinak parlapjjamti. 15 Uka kasta yatiñajj janiw alajjpachat jutkiti, jan ukasti akapachan yatiñapawa,+ animalanakana demonionakan yatiñapawa. 16 Kawkintejj envidiasiñanakasa jiskhisiñanakasa utjki ukanjja, jan waltʼäwinakampi kunayman jan wali luräwinakampiw utjani.+

17 Ukampis alajjpachat jutki uka yatiña katoqer jaqejja, nayraqatajj qʼomawa,+ sumankiriwa,+ amuytʼiriwa,+ istʼañatakis jankʼakiwa, khuyapayasiñampi phoqantatawa, suma achunakanirakiwa,+ janiw yaqhachirïkiti,+ janirakiw kʼari chuymani* jaqëkisa.+ 18 Ukhamarus cheqapar sarnaqañ achojja, sumankañajj utjki uka tiempon phawatawa,+ ukajj sumankañ utjayirinakataki* phawatarakiwa.+

4 Jumanak taypin utjki uka jan waltʼayasiñanakasa chʼajjwañanakasa ¿kawkitsa juti? ¿Janit jumanakar wal apnaqañ munapktam uka jañchin munañanakapat jutki?+ 2 Jumanakajj walsa munapjjstajja, janiw katoqapktati. Jumanakajj maynit maynikamajj wal uñisisipjjtajja,* mayninkirinaksa wal munapjjaraktajja, ukampis janiw kuns jikjjatapktati. Jumanakajj jiskhisisipkaktawa, guerrankapkasmas ukhamaw chʼajjwapjjtajja.+ Jan mayipjjatamatjja jan kunaniw uñjasipjjaraktajja. 3 Mayipksta ukhasa, jañchin munañapataki jan wali amtampi mayipjjatam laykojj janiw katoqapktati.

4 Adulterio jucha lurir jaqenaka,* aka mundon amigopäñajj Diosan enemigopar tukuñampi sasiwa, ¿janit uk yatipkta? Ukhamajj khititï aka mundon amigopäñ munki ukajja, Diosan enemigoparuw tukuski.+ 5 Jan ukajj ¿kuntï aka qellqatajj siski ukajj inamayakiw sasach amuyapjjta? Ukanjja siwa: “Envidiasiñar apir chuymasaw* kunaymaninak wal munayistu”+ sasa. 6 Ukampis uka envidiasiñat sipansa, Diosajj churki uka wali khuyapayasiñaw jukʼamp jachʼajja. Ukatwa qellqatan akham saraki: “Diosajj jachʼa jachʼa tukurinak contrawa,+ ukampis humilde chuymaninakarojj jachʼa khuyapayasiñampiw uñji”+ sasa.

7 Ukhamajj Diosar istʼapjjam;+ ukampis Diablo contra saytʼasipjjam,+ jupajj jumanakat jaltjjaniwa.*+ 8 Diosar jakʼachasipjjam, jupajj jumanakar jakʼachasirakiniwa.+ Jucharar jaqenaka, amparanakam qʼomachasipjjam,+ payachasir jaqenaka, chuymanakamsa qʼomachasipjjarakim.+ 9 Wal llakisipjjam, jachapjjam, wararipjjarakim.+ Janiw larupjjañamajj walïkiti, jan ukasti jachapjjañamawa, janiw kusisipjjañamajj walïkiti, jan ukasti llakisipjjañamawa. 10 Jehová* Dios nayraqatanjja humillasipjjam,+ jupasti jachʼaruw aptapjjätam.+

11 Jilatanaka, jumanak taypinjja mayni contra parlañajj jan jukʼamp utjpanti.+ Khititejj jilatap contra parlki jan ukajj jilatapar juchañchki ukajja, ley contraw parlaski, leyiruw juchañcharaki. Jumatejj leyir juchañchstajja, janiw ley phoqktati, jan ukasti juezaruw tukusktajja. 12 Maynikiw Ley Churirejj utji, mä sapa Juezakiw utjaraki,+ jupakiw salvaspa, jupakirakiw tʼunjaspa.+ Ukampis ¿khitirakït jumasti jaqe masimar juchañchañatakisti?+

13 Jichhajj istʼapjjeta, jumanakat yaqhepajj akham sapjjtawa: “Jichhürus jan ukajj qharürus uka markaruw viajiñäni, ukanjja maraw qamañäni, negocio lurañäni, qollqe ganarakiñäni”+ sasa. 14 Kunas qharürojj jakäwinakaman pasani ukjja janiw yatipktati.+ Jumanakajj urpur uñtasitäpjjtawa, urpojj mä jukʼa tiempotakiw uñsti, ukatjja chhaqtjjakiwa.+ 15 Ukat sipansa akham sapjjañamawa: “Jehová* Diosatejj munanejja,+ jakaskañäniwa, ukhamarakiw ukanaksa akanaksa lurañäni” sasa. 16 Ukampis jichhajja jachʼa jachʼa tukupjjatamatwa jachʼañchasipjjtajja. Ukham jachʼañchasiñanakajj jan walipuniwa. 17 Ukhamajj maynitejj kunatï cheqapäki uk lurañ yatchi, ukampis janirak uk lurkchi ukhajja, jupajj juchwa luraski.+

5 Qamirinaka, jichhajj istʼapjjam, jumanakjjar jutkani uka llakisiñanakat jachapjjam, wararipjjarakim.+ 2 Kunanakatï utjapktam ukanakajj ñusantatäjjewa, isinakamas thuthantatäjjarakiwa.+ 3 Qorimas qollqemas saruntatäjjewa, uka saruw jumanak contrajj parlani, jañchinakamsa tukjarakini. Kunanaktï jumanakajj imkatapkta ukanakajja, qhepa urunakanjja ninar uñtatäniwa.+ 4 Oraqenakaman yapunak apthapirinakajja, jan pagapjjatamat arnaqasisipkakiwa. Yapunak apthapirinakan yanaptʼa mayitanakapjja, ejercitonakan Jehová* Diosapajj istʼarakiwa.+ 5 Aka oraqenjja jumanakajj wali suman jakapjjtajja, jañchin munañaparjam kusisisaw sarnaqapjjtajja. Chuymanakamsa khariñ urutakiw likʼintayapjjtajja.+ 6 Jumanakajj cheqapar sarnaqer jaqerojj juchañchapjjtawa, jiwayapjjaraktawa. ¿Janit jupajj jumanak contra saytʼaski?

7 Ukhamajj jilatanaka, Tatitojj kuttʼankani uka tiempokamajj* wali paciencianïpjjam.+ Uñtapjjam, yapuchirejj qallta jalluna qhepa jalluna puriniñapkamaw oraqen suma achunakapjja wali pacienciamp suyaski.+ 8 Jumanakajj ukhamarak wali paciencianïpjjam,+ chuymanakamsa chʼamañchapjjam, Tatitojj kuttʼankani uka tiempojj* jakʼankjjewa.+

9 Jilatanaka, jumanak taypinjja mayni contra quejasiñajj jan utjpanti, ukhamat jan juchañchatäpjjañamataki.+ Uñtapjjam, Juezajj punku nayraqatan saytʼatäskiwa. 10 Jilatanaka, Jehová* Diosan sutipjjar parlir profetanakat yateqasipjjam,+ jupanakajj kunayman jan walinakanwa tʼaqesipjjäna,+ wali pacienciampiw aguantapjjarakïna.+ 11 Aguantirinakarojj “kusisitäpjjewa”* sasaw sistanjja.+ Kunjamsa Job chachajj aguantäna ukjja jumanakajj istʼapjjtawa,+ kunjamsa Jehová* Diosajj bendisïna uksa yatipjjaraktawa,+ Jehová* Diosajj wali munasir chuymaniwa,* wali khuyaptʼayasirirakiwa.+

12 Jilatanaka, ukanakat sipansa, jan jukʼampejj alajjpach aytasisasa ni aka oraq aytasisas juramento lurjjapjjamti, janirak yaqha juramentsa jukʼamp lurjjapjjamti. Jumanakatejj “jïsa” sapjjsta ukhajj phoqapjjam; “janiwa” sapjjsta ukhasti janiraki,+ ukhamat Diosajj jumanakar jan juchañchañapataki.

13 Maynitejj jumanak taypit tʼaqesiskchi ukhajja, oración luraskakpan.+ Maynitejj kusisitächi ukhajja, salmonak cantpan.+ 14 Maynitejj jumanak taypin usutächi ukhajja, congregacionankir ancianonakar* jawspan,+ ukhamatwa jupanakajj Jehová* Diosan sutipjjaru aceitempi uchtʼasinjja jupatak oración lurapjjani.+ 15 Oracionajj Diosar confiyasa* lurasini ukhajja, usutarojj* waliptayaniwa, Jehová* Diosajj sartayaniwa, juchanak lurchi ukhasa perdonarakiniwa.

16 Ukhamasti juchanakamjja jumanakkam arsusipjjam,+ maynit maynikam oración lurapjjarakim, ukhamat qollatäpjjañamataki. Cheqapar sarnaqer jaqen ruwtʼasitapajj wali chʼamaniwa.+ 17 Elías chachajj jiwasjam jaqekirakïnwa, jupajj jan jallu puriñapatak taqe chuyma oración luräna ukhajja, kimsa mara chikataniw jallojj oraqjjar jan purjjänti.+ 18 Jupajj mayamp oración luräna ukhajja, jallojj purintänwa, achunakajj oraqen achjjarakïnwa.+

19 Jilatanaka, maynitejj jumanak taypit cheqa yatichäwinakat saranukchi, ukampis yaqhajj jupar kuttʼayanchi ukhajja, 20 ak yatipjjam, khititejj mä jucharar jaqer pantjat thakipat kuttʼayanki ukajja,+ juparojj* jiwañatwa salvaski, walja juchanakapat perdonatäñatakiw yanaptʼaskaraki.+