1 PEDRO
PEDRON NAYRÏR QELLQAT CARTAPA

1 Naya Pedrojj Jesucriston mä apostolopjamaw+ khitinakatejj Ponto, Galacia, Capadocia,+ Asia, Bitinia uksanakar sarjjasin ukjan akjan jakasipkta ukanakar qellqanipjjsma, jumanakajj akapachan mä jukʼa tiempotak jakirikïpjjtawa ukhamarak Diosan ajllitanakapäpjjtawa. 2 Jumanakajj kuntï Dios Awkejj lurañ amtkatayna ukarjam ajllitäpjjtawa.+ Jupaw jumanakar santo jaqer tukuyañatakejj espíritu santo churapjjtamjja,+ ukhamat jumanakajj jupar istʼapjjañamataki, Jesucriston wilapampis qʼomar tukupjjañamataki.+

Diosajj jumanakat wal khuyaptʼayaspan, jumanak taypin sumankañajj jukʼamp utjañapatak yanaptʼarakpan.

3 Jesucristo Tatitusan Diosapasa Awkipasa jachʼañchatäpan. Jupajj wali khuyapayasiñapatwa machaq nacimiento churistu,+ ukhamat wiñay suytʼäwinïñasataki.+ Jesucriston jaktayatätapatwa uka suytʼäwinïtanjja.+ 4 Diosajj jan tukuskiri, jan qʼañuchata, mä wiñay herencia churistu.+ Ukjja jupajj alajjpachanwa jumanakatak imaski,+ 5 khitinakatï Diosar confiyapjjatam* layku jupan chʼamapamp jarkʼaqatäsipkta ukanakataki, ukhamat salvatäpjjañamataki. Uka salvacionajja qhepa tiempon uñachtʼayasiñapatakejj niyaw wakichatäjje. 6 Ukatwa jumanakajj wali kusisitäpjjtajja, jichha tiemponjja, wakisiw mä qhawqha tiempo kunayman tʼaqesiñanakamp llakisiyat uñjasipjjañamajja,+ 7 ukhamat Diosar confiyapjjatanakamajj*+ yantʼatäñapataki. Ukham yantʼatäpjjatam laykuw Jesucristojj uñstankani ukhajj jachʼar aptatäpjjäta, kʼajtayatäpjjarakïta.+ Diosar confiyañajj* qorit sipansa jukʼamp valoraniwa, uka qorejj ninamp yantʼatäkchisa* tukusirikiwa. 8 Cristorojj janis kunapachas uñjapkstajja, juparojj munasipjjtawa. Janis jichhajj uñjapkstajja, juparojj confiyapjjtawa,* walpun kusisipjjaraktajja. 9 Jumanakajj Diosar confiyapjjatam* laykojja wali kusisitaw salvación katoqapjjäta.+

10 Uka salvacionatjja, Diosan jachʼa khuyapayasiñapat yatiyapkäna uka profetanakajj wal jiskjjatapjjäna, wal yatjjatapjjarakïna. Diosan uka jachʼa khuyapayasiñapajj jumanakar churatänwa.+ 11 Diosajj janïräkipanwa kunjamsa Cristojj tʼaqesiñapäna,+ kunjamsa jachʼañchatäñapäna uk espíritu santopampi yatiyjjäna. Ukatwa jupanakajj kunas Cristorojj pasañapäna, kunapachas+ ukajj pasañapäna uk yatjjatasipkakïna. 12 Kunanaktï profetanakajj servirinakjamajj qhanañchapkäna ukanakajj janiw jupanakatakïkänti, jan ukasti jumanakatakïnwa, ukwa Diosajj jupanakar amuytʼayäna. Jichhasti ukanakajj jumanakar qhanañchatäjjewa, khitinakatï suma yatiyäwinak jumanakar yatiyapkayätam ukanak toqew qhanañchatäjje. Alajjpachat jutir espíritu santon yanaptʼapampiw ukanak qhanañchapjjäna.+ Ukanak toqetjja angelanakas wal yatiñ munapjjaraki.

13 Amuyunakamjja wal trabajiñatak wakichtʼasipjjam.+ Taqe kunsa wali amuyump lurapjjam.+ Jesucristojj uñstankani ukhajja, jumanakajj wali khuyapayasiñamp uñjatäpjjätawa, uksti taqe chuyma suytʼapjjam. 14 Jumanakajj jichhajj Diosar istʼir wawanakapäpjjtawa, ukhamajj jan wali munañanakarjamajj jan sarnaqjjapjjamti, kunjamtï Diosar jan uñtʼkasajj sarnaqapkayäta ukhama. 15 Antisas jawsapktam uka Santo Diosjam taqe sarnaqäwinakaman santöpjjam.+ 16 Qellqatanjja siwa: “Nayajj Santo Diosätwa, jumanakajj santo jaqëpjjañamarakiwa”+ sasa.

17 Jumanakatï jan khitir yaqhachas juzguiri+ ukhamarak sapa maynir lurataparjam juzguir Dios Awkir artʼasipjjsta ukhajja, akapachan mä qhawqha tiempo jakkasinjja Diosar ajjsartʼas sarnaqapjjam.+ 18 Jumanakajj yatipjjtawa, nayra awkinakamat* katoqapkta uka inamay jakäwinakamatjja janiw tukusir qollqempisa ni qorimpisa salvatäpktati.+ 19 Jan ukasti Criston wali suma wilapampi+ salvatäpjjtawa,+ uka wilajj jan kamachtʼata qʼoma corderon wilapjamawa.+ 20 Diosaw Cristorojj janïr aka mundojj qalltkäna*+ ukhajj ajllisïna, jumanak laykuw tukuy tiemponakan uñstayatäjjarakïna.+ 21 Jumanakajj jupa taypiw Diosar creyipjjtajja,+ Diosaw jiwatanak taypit jupar jaktayäna,+ jachʼañcharakïna,+ ukhamat jumanakajj Diosar confiyapjjañamataki,* jupar suytʼapjjañamataki.

22 Jumanakajj kunatï cheqäki ukar istʼapjjatam laykuw qʼomachatäjjapjjtajja, uka laykurakiw jumanakajj jilapurjam cheqa chuymampi munasipjjtajja,+ ukhamajj chuymatpach maynit maynikam wal munasipjjam.+ 23 Jumanakajj machaq nacimiento katoqapjjtajja,+ janiw tukusir jathatjja, jan ukasti jan jiwir jathatwa nasipjjtajja,+ wiñay jakkir Diosan arunakap taypiw nasipjjtajja.+ 24 “Taqe jaqenakajj chʼojjña pastor uñtatawa, jachʼañchäwinakapas camponkir panqaranakar uñtatarakiwa. Chʼojjña pastojj wañsjjakiwa, panqaras willirtjjakiwa, 25 ukampis Jehová* Diosan arunakapajj wiñayatakiwa”.+ Uka “arunakajj” jumanakar qhanañchaskäna uka suma yatiyäwinakawa.+

2 Ukhamajj taqe jan wali luräwsa, engañjasiñsa, kʼari chuymanïñsa,* envidiasiñsa, usuchjir arunak parlañsa apanukupjjam.+ 2 Jichhak nasit wawanakjamajj+ Diosan arupat jutki uka jan kunamp yaptʼat leche wal munapjjañamatak chʼamachasipjjam, ukhamat uka lechempi jilsusin salvatäpjjañamataki,+ 3 Tatitojj khuyapayasirïtap sum yatipjjatam* layku.

4 Jaqenakajja jakkir qalarojj apanukupjjewa,+ ukampis Diosaw juparojj ajllisi, wali sum uñjaraki.+ Jumanakajj jupar jakʼachasipjjta ukhajja, 5 jakkir qalanakjamaw espíritu santon yanaptʼapampejj mä utar utachatäsipktajja,+ ukhamat santo sacerdotëpjjañamataki ukhamarak sacrificionak loqtapjjañamataki,+ uka sacrificionakjja espíritu santon yanaptʼapampiw loqtapjjtajja, ukanakjja Jesucristo taypiw Diosajj katoqaraki.+ 6 Qellqatanakanjja mä cheqan akham siwa: “Nayajj Sionaruw mä ajllit qala uchaskta, ukajj wali valorani cimiento esquin qalawa, khititejj ukar confiyki* ukajja, janiw chuyma pʼakintat uñjaskaniti”+ sasa.

7 Creyentëpjjatam laykojja jumanakatakejj jupajj wali valoraniwa, jan creyipki ukanakatakejj janiw ukhamäkiti, qellqatanjja siwa: “Uta luririnakan rechazat qalajja,+ esquin jachʼa qalaruw tuku”+ 8 ukhamarak “lanktʼayir qalaru, tinkuyir mä qarqaruw* tuku”+ sasa. Jupanakajj Diosan arupar jan istʼapjjatap laykuw lanktʼasisipki, ukatak señalatäpjjarakiwa. 9 Ukampis jumanakajj “ajllit markäpjjtawa, sacerdotenakjam servir reyinakäpjjtawa, sagrado markäpjjtawa,+ Diosan ajllit markapäpjjaraktawa,+ ukhamat Diosan khuyapayasiñapat taqe cheqan yatiyapjjañamataki”,+ jupaw jumanakarojj chʼamak taypit wali suma qhanapar jawsapjjtamjja.+ 10 Mä tiemponjja jumanakajj janiw Diosan markapäpkayätati, jichhajj markapäjjapjjtawa.+ Mä tiemponjja janiw Diosan khuyapayasiñap katoqapkayätati, jichhasti khuyapayasiñap katoqjjapjjtawa.+

11 Munat jilatanaka, extranjeronakarjama ukhamarak akapachan mä jukʼa tiempotaki jakirinakarjamaw nayajj ewjjtʼanipjjsma,+ ukhamat jañchin munañanakap jan lurapjjañamataki,+ ukanakajj jumanak contraw nuwasiski.+ 12 Akapachankir jaqenak taypinjja, sum sarnaqasipkakim,+ ukhamat jumanakar jan wali jaqenakat tumpantapkätam ukhajja, jupanakajj suma luratanakam uñjapjjañapataki,+ ukhamatwa Diosajj uñjir jutkani uka urunjja jupar jachʼañchapjjani.

13 Tatitun munañap phoqasajj taqpach autoridadanakar istʼapjjam:+ reyirojj jilïrïtap layku,+ 14 gobernadoranakarojj reyin uttʼayatätap layku. Jupanakajj jan wali jaqenakar castigañataki, aski luririnakar jachʼañchañatak uttʼayatäpjjewa.+ 15 Kunatï walïki uk lurapjjañamwa Diosajj muni, ukhamat jan yatkasin parlapki uka jan amuytʼasir jaqenakar amuktʼayapjjañamataki.*+ 16 Jumanakajj libre jaqenakäpjjtawa,+ ukampis librëpjjatam laykojj kunanakatï jan walïki ukanak jan lurapjjamti,+ jan ukasti Diosan esclavonakapjam jakapjjam.+ 17 Taqe kasta jaqenakar respetapjjam,+ taqpach creyente masinakamar munasipjjam,+ Diosar ajjsarapjjam,+ reyirojj respetapjjarakim.+

18 Sirvientenakajj patronanakapar wali respetompi istʼapjjpan,+ janiw amuytʼir suma jaqenakarukejj ukham istʼapjjañapäkiti, jan ukasti chuymapar jan purtʼañjamäki ukanakarus ukhamarakiw istʼapjjañapa. 19 Maynejj Dios nayraqatan suma conciencianïñatak+ jan waltʼäwinak* aguanti, jan juchanïkasas tʼaqesi ukhajja, Diosatakejj wali kusiskañawa. 20 Jumanakatejj juchachasipjjatam layku nuwjatas aguantasipkstajja, ¿kuna walirakisti?+ Ukampis jumanakatejj kunatï walïki uk lurapjjatam layku tʼaqesisipkstajja, Diosatakejj wali kusiskañawa.+

21 Cristo pachpaw jumanak laykojj tʼaqesïna,+ ukatwa Diosajj aka thaki arkapjjañamatakejj jumanakar jawsapjjtamjja. Cristow jumanakarojj mä ejemplo churapjjtamjja, ukhamat jumanakajj wali amuyumpi kayup arkapjjañamataki.+ 22 Jupajj janiw kuna juchsa lurkänti,+ janirakiw lakapan kuna engaños utjkänti.+ 23 Insultapkäna ukhajja,+ janiw jupajj insultkarakïnti.+ Tʼaqesiskäna ukhasa,+ jupar tʼaqesiyirinakarojj janiw amenazkänti, jan ukasti cheqapar uñjiri Juezaruw confiyäna.+ 24 Jupajj lawan* chʼakkatatäkäna*+ ukhaw juchanakas apasjjäna,+ ukhamat juchanakasata salvatäñasataki ukhamarak cheqapar sarnaqas jakañasataki. “Jupan usuchnoqat uñjasitap laykuw jumanakajj qollatäjjapjjtajja”.+ 25 Jumanakajj maysar saranukut ovejanakjamäpjjayätawa,+ ukampis jichhajja almanakam* awatirïki+ uñjirïkaraki jupan ukaruw kuttʼanjjapjjtajja.

3 Casarat warminaka, chachanakamar ukhamarakiw istʼapjjañama,+ jupanakatejj Diosan arunakaparjam jan sarnaqapkchi ukhajja, jan mä aru arsusakiw suma sarnaqatanakamampi creyenter tukupjjañapatak yanaptʼapjjasma,+ 2 jupanakajj pachpa nayranakapampiw jumanakan sum* sarnaqapjjatamsa+ wali respetasirïpjjatamsa uñjapjjani. 3 Jumanakan kʼachachtʼasitanakamajj jan patjjatakïpanti, mä arunjja ñikʼutanakam jan sinti jiljañampi* kʼachachasipjjamti, janirak qorit lurat adornonaksa+ ni jila alani isinaksa uchasipjjamti. 4 Antisas kunjamäpjjtas chuymanakaman uk paciencianïñampi llampʼu chuymanïñamp* sum kʼachachtʼasipjjam,+ ukham kʼachachtʼasipjjatamajj janiw tukuskaniti, Diosatakis wali valoraniwa. 5 Nayra tiemponjja Diosar suytʼiri santa warminakajj ukhamaw kʼachachtʼasipjjerïna, chachanakapar istʼasina, 6 kunjamtï Sara warmejj Abrahán chachapar istʼirïkäna ukhama, jupajj tatay sasaw chachaparojj sirïna.+ Jumanakatejj kunatï walïki uk lurasipksta, janirak kunarus ajjsarapksta+ ukhajja, jumanakajj Sara warmin wawanakapäpjjtawa.

7 Casarat chachanaka, warminakamarojj ukhamarakiw sum uñtʼapjjañama,* ukhamat jupanakampejj suma amuyumpi jakapjjañamataki. Jupanakarojj respetompi uñjapjjam,*+ jumanakat sipansa warminakajj jukʼamp pʼakisir vasor uñtatäpjjewa, jupanakamp chikarakiw Diosan wali khuyapayasiñapat jakäwsa katoqapjjtajja.+ Janitï ukham lurapkätajja, Diosajj janiw oracionanakam istʼkaniti.

8 Ukjjarusti taqe jumanakajj mä amtanikïpjjam,*+ llakisirinakampis llakisipjjam,+ jilapurjam munasipjjam, wali sinttʼasirïpjjam, humilde chuymanïpjjarakim.+ 9 Jan wal luratajja, jan jumanakajj jan walimpi kuttʼayapjjamti,+ insultatajj janirak insultapjjamti.+ Antisas jupanakarojj bendisipjjam,+ Diosaw jumanakarojj yaqhanakar bendisipjjañamatak jawsapjjtamjja, ukhamatwa bendición katoqapjjarakïta.

10 “Maynitejj jakañar wal munaschi, kusisita jakasiñ munarakchi ukhajja, lajjrapjja jan walinakat jarkʼaqañapawa,+ janirakiw engañjir arunaksa parlañapäkiti. 11 Kunatï jan walïki ukatjja jitheqtañapawa,+ kunatejj walïki ukwa lurañapa,+ sumankañwa thaqañapa, sumankañan qhepapwa sarañaparaki.+ 12 Jehová* Diosan nayranakapajja cheqapar sarnaqer jaqenakjjankiwa, jiñchunakapajj jupanakan ruwtʼasitanakaparuw istʼaskaraki.+ Ukampis Jehová* Diosajj jan wali luririnak contrawa”.+

13 Jumanakatejj kunatï walïki uk taqe chuyma lurapjjäta ukhajja, ¿khitirak jumanakar jan walinak lurapjjätamsti?+ 14 Cheqapar sarnaqapjjatam laykus tʼaqesiyat uñjasipjjchïtajja, kusisitäpjjätawa.+ Ukampis kunarutï jaqenakajj ajjsarapki ukarojj* jan ajjsarapjjamti, janirak sint llakisipjjamti.+ 15 Antisas chuymanakamanjja Cristorojj Tatiturjam jachʼañchapjjam, kuntï jumanakajj suytʼasipkta uk arjjatañatakejj wakichtʼatäpjjam, taqe khitinakatï uka toqet jisktʼapktam ukanak nayraqatana. Ukampis llampʼu chuymampi+ wali respetompi+ uk lurapjjam.

16 Suma conciencianïskakiñatak chʼamachasipjjam,+ ukhamat jumanak contra parlirinakajja, Criston arkirinakapjam sum sarnaqapjjatam laykojj+ phenqʼachata uñjasipjjañapataki.+ 17 Jan walinak lurapjjatam layku tʼaqesiñat sipansa,+ Diosan munañapächejja, kunatï walïki uk lurapjjatam layku tʼaqesiñaw jukʼamp sumajja.+ 18 Cristow juchanak laykojj mä kutiki jiwäna,+ mä arunjja cheqapar sarnaqer mä jaqew jan cheqapar sarnaqer jaqenak laykojj jiwäna,+ ukhamatwa jumanakarojj Diosampi sumankthapipjjañamatak yanaptʼapjjtamjja.+ Jupajj jañchi cuerponwa jiwäna,+ espíritu cuerponwa jaktayatarakïna.+ 19 Ukham cuerponïsaw jupajj llawintat angelanakarojj juchañchäwi arunak yatiyir saräna.+ 20 Noé chachan urunakapanjja+ uka angelanakajj janiw istʼasipkänti. Uka urunakanjja arcan lurasiñapkamajj+ wali pacienciampiw Diosajj suytʼaskäna. Uka arcanjja mä qhawqha jaqenakawa, mä arunjja kimsaqallqo almanakaw* uma taypi salvatäpjjäna.+

21 Kunatï paskäna ukajja, bautismor uñtasitawa. Jumanakajj uka bautismo taypiw jichhajj Jesucriston jaktatapat salvatäsipktajja. Bautismojj janiw kunatï jañchisan qʼañüki ukanak qʼomachañäkiti, jan ukasti mä suma conciencia Diosar mayiñawa.+ 22 Alajjpachar sarjjatap laykojja, Cristojj Diosan kupëjjapar qontʼatawa.+ Angelanakasa, autoridadanakasa, chʼamaninakasa jupar katuyatarakiwa.+

4 Niyakejjay Cristojj jañchi cuerpon tʼaqeschïnjja,+ kunjamtï Cristojj amuyirïkäna ukham amuyunïñatak wakichasipjjarakim. Khititejj jañchin tʼaqeski ukajja, juchanakwa apanukjje,+ 2 ukhamat jañchi cuerpon jakkasajja, jaqenakan munañap jan jukʼampi lurañataki,+ jan ukasti Diosan munañap lurañataki.+ 3 Jumanakajj walja tiempow akapachankir jaqenakan munañanakap lurjjapjjtajja,+ jan phenqʼani jucha lurasa,* jan walinak wal munasa, jiljañamp machjasisa, jan wali loqhe fiestanakana, machjasiñ fiestanakan sarnaqasa ajjtaskañ idolonakar adorasa* ukhamaw nayrajj sarnaqapjjayätajja.+ 4 Kunatsa jumanakajj jupanakamp chikajj jan wali sarnaqäwinakapan jan sarnaqjjapjjta ukjja, janiw jupanakajj amuyapkiti, ukatwa jumanakjjat jan walinak parlapjje.+ 5 Ukampis uka jaqenakajja, khititejj jakirinakaru jiwatanakaru juzgañatak listokïki ukaruw cuenta churapjjani.+ 6 Ukatarakwa suma yatiyäwinakajj jiwatanakar* yatiyasïna,+ ukhamat jupanakajj kunjamtï jaqenakajj juzgatäpki ukham juzgatäkasas Diosan espiritupamp irpat jakapjjañapataki.

7 Taqe kunan tukusïwipaw jakʼachasinjje. Ukhamajj taqe kunsa sum amuytʼasis lurapjjam,+ oración lurañansa jan ikjapjjamti.*+ 8 Taqe kunat sipansa, maynit maynikam wal munasipjjam,+ khititejj munasirïki ukajja walja juchanakwa perdoni.+ 9 Maynit maynikam taqe chuyma katoqtʼasipjjam,* jan quejasisa.+ 10 Diosan wali khuyapayasiñap kunaymanit katoqer mayordomonakjamajja, kuntï sapa maynis Diosat katoqapkta ukarjam maynit maynikam yanaptʼasipjjam.*+ 11 Maynitejj parlchejja, Diosan arunakapsa parlkaspa ukham parlpan, mayninakar yanaptʼchejja, Diosajj churki uka chʼamampis yanaptʼkaspa ukham yanaptʼpan,+ ukhamat taqe kunansa Jesucristo taypejj Diosar jachʼañchasiñapataki.+ Jachʼañchäwisa chʼamasa wiñayans wiñayapatakiw Diosanki. Amén.

12 Munat jilatanaka, ninar uñtat yantʼanakan tʼaqesipjjatamat jan musparapjjamti,+ jan uñtʼata tʼaqesïwinsa uñjasipkasma ukhama. 13 Antisas Cristjam tʼaqesipjjatam+ laykojj kusisipjjam,+ ukhamat jupan kʼajtatapajj uñstankani ukhajja jukʼamp kusisipjjañamataki.+ 14 Jumanakarutejj Criston sutip layku insultasipkstamjja,* kusisitäpjjtawa,+ Diosan kʼajkir chʼamapajja, mä arunjja espiritupajj jumanakjjankatap layku.

15 Jan khitis jumanakat jaqe jiwayirjamajj tʼaqespanti, ni lunthatjamasa, ni jan wali jaqjamasa, ni jaqe masipan jakäwipar mitisirjamasa.+ 16 Maynitejj cristianötapat tʼaqeschi ukhajja, jan phenqʼaspanti,+ antisas cristianjam jakasajj Diosar jachʼañchaskakpan. 17 Juzgañatak tiempojj qalltjjewa, Diosan utapampiw nayraqat qalltani,+ ukampis jiwasampitejj nayraqat qalltani ukhajja,+ Diosan suma yatiyäwinakapar jan istʼirinakampejj ¿kunas pasani?+ 18 “Cheqap sarnaqer jaqetejj Diosamp salvatäñatak wal chʼamachasiñapächi ukhajja, jan wali jaqerusa jucharar jaqerusa ¿kunas pasani?”.+ 19 Ukhamajj Diosan munañap lurasin tʼaqesirinakajja, kunatejj walïki uk lurasipkakim, jakañanakamsa taqe kun Lurir Diosar confiyasisipkakim, jupajj confiykañawa.+

5 Nayajj ancianorakïtwa,* Criston tʼaqesitanakapatsa testigorakïtwa, ajllitanakajj jachʼañchatäpkani ukhas nayajj jachʼañchatarakïyäwa,+ ukatwa jumanak taypinkki uka ancianonakar akham sasin ruwtʼanipjjsma:* 2 ancianonakjamajja* Diosan congregacionaparojj sum awatipjjam,+ jumanakar katuyatätap layku, ukampis jan obligatjamajja, jan ukasti Dios nayraqatan taqe chuyma uk lurapjjam;+ jan qollqe chuymäpjjamti, janirak kunatï jumanakatak walïki ukak thaqapjjamti,+ antisas taqe chuym yanaptʼañ munirïpjjam; 3 janirak Diosan herenciapäpki ukanakarojj patronäpkasmas ukham apnaqapjjamti,+ jan ukasti congregacionatakejj yateqaskayäpjjam.+ 4 Ukhamatwa kunapachatejj jilïr awatirejj+ uñstankani ukhajja, jumanakajj jan tukuskiri kʼajkir corona katoqapjjäta.+

5 Waynanaka, ukhamarak jumanakajj jilïrinakar* istʼapjjam.+ Taqenisa maynit maynikam humilde chuymampi uñjasipjjam. Diosajj jachʼa jachʼa tukurinak contrawa, humilde chuymaninakatjja jupajj wal khuyapayasi.+

6 Ukhamajj wali chʼamani Diosatakejj humillasipjjam,* ukhamat jupajj horasapar jumanakar jachʼar aptañapataki.+ 7 Ukañkamajj taqe llakinakam jupan amparapar katuyapjjam,+ jupajj jumanakat wal llakisi.+ 8 ¡Wali amuyumpi sarnaqapjjam, amuyasipjjarakim!+ Jumanakar uñisir Diablojja, mä leonar uñtataw warartʼasis muyuski, maynir manqʼantañwa thaqaskaraki.*+ 9 Ukampis jumanakajj Diablo contra saytʼasipjjam,+ Diosar confiyañansa* suma saytʼatäpjjam. Jumanakajj yatipjjtawa, kunjamtï jumanakajj tʼaqesisipktajja uka pachparakiw oraqpachan jilatanakamajj tʼaqesisipki.+ 10 Wali khuyapayasir Diosajja, mä arunjja Cristomp mayakïpjjañamataki jawsapktam uka Diosajja,+ mä jukʼa tiempo tʼaqesipjjäta uka qhepatjja jumanakar wakichañ tukuyjjaniwa. Jupaw sum saytʼayapjjätam,+ chʼamaniruw tukuyapjjarakïtam,+ suma cimientjjaruw uttʼayapjjarakïtam. 11 Jupajj wiñayatak chʼamanïpan. Amén.

12 Diosat jan jitheqtiri Silvano*+ jilatan yanaptʼapampiw aka cartjja mä qhawqha arunakamp jumanakar qellqanta, ukhamat jumanakar chʼamañchtʼañataki ukhamaraki Diosajj cheqpachapuni wali khuyapayasiñampi jumanakar uñjaskatap yatiyañataki. Jumanakajj janipun jachʼa khuyapayasiñapat jitheqtapjjamti. 13 Babiloniankir congregacionaw* aruntanipjjtam, jupajj jumanakjam ajllitarakiwa. Marcos+ jilatas aruntanipjjaraktamwa, jupajj wawajäkaspas ukhamawa. 14 Jumanakkamajj munasiñamp jampʼattʼasis aruntasipjjam.

Cristomp mayakïpjjatam laykojj jumanak taypin sumankañajj utjpan.