2 PEDRO
PEDRON PAYÏR QELLQAT CARTAPA

1 Naya Simón Pedrojja Jesucriston esclavopätwa apostoloparakïtwa. Khitinakatejj nanakjam suma cheqa yatichäwinak katoqapkta ukanakaruw qellqanipjjsma. Diosasa jiwasar Salvir Jesucristosa cheqapar uñjirïpjjewa, ukatwa taqe jiwasajj ukanak katoqtanjja.

2 Diosan wali khuyapayasiñapasa sumankañapasa jumanak taypinjja jukʼampïpan, ukatakejj Diosarusa Jesús Tatitusarus sum uñtʼasipkakim.+ 3 Jiwasanakajj Diosan jachʼa chʼamap taypiw taqe kunanakatï jakäwir yanaptʼki ukhamarak Dios chuymäñatak yanaptʼki ukanak katoqtanjja.* Jiwasar jawskistu uka Diosar sum uñtʼatasatwa ukanak katoqtanjja, jupajj wali jachʼätap layku ukhamarak suma Diosätap laykuw jiwasar jawsistu.+ 4 Ukham Diosätap laykurakiw wali valoranïki wali sumäki uka promesanakap katoqtanjja,*+ ukhamat jumanakajj jan wali munañanakampi phoqantat mundot escapjjasajja, Diosjam espiritur tukupjjañamataki.+

5 Ukhamajj Diosar confiyasajja* kunatï walïki ukanak lurañatak chʼamachasipjjam,+ kunatï walïki uk lurasajja sum yatiñatak chʼamachasipjjam,+ 6 yatjjasajja munañanakamamp jan apnaqayasiñatak chʼamachasipjjam, munañanakamamp jan apnaqayasisajja+ aguantañatak chʼamachasipjjam, aguantasajja Dios chuymäñatak chʼamachasipjjam,+ 7 Dios chuymäsajja jilapurjam munasiñatak chʼamachasipjjam, jilapurjam munasisajja taqenir munasiñatak chʼamachasipjjam.+ 8 Taqe ukanakatejj jumanakan utjchi ukhamarak jiljjattaskakchi ukhajja, Jesucristo Tatitusar sum uñtʼktan ukarjam sarnaqasajj mä qoqar* uñtasitaw achunak achoqapjjäta, janirakiw jayrasiñarus puripkätati.+

9 Taqe ukanakatejj maynin jan utjkchi ukhajja, jupajj juykhuwa, kuna laykutejj qhanatakiw jupajj nayranakap chʼirmthapi,*+ nayra juchanakapat qʼomachatäjjatapsa+ armtʼasjjarakiwa. 10 Ukhamajj jilatanaka, jawsatäpjjatamsa ajllitäpjjatamsa jan aptʼasiñatak jukʼampi chʼamachasipjjam.+ Jumanakatejj taqe ukanak lurapjjäta ukhajja, janipuniw tinkupkätati.+ 11 Cheqpachansa ukhamatwa jumanakajj jachʼa bendición katoqapjjäta, mä arunjja Salviri Jesucristo Tatitusan+ wiñay Reinoparuw*+ mantapjjäta.

12 Ukatwa nayajj taqe ukanak amtayañ munapjjapunsma, jumanakajj taqe ukanak yatipksta ukhasa, yateqapkta uka cheqa yatichäwinakjjar suma uttʼayatäpksta ukhasa. 13 Nayatakejja aka tabernaculonkkasajj*+ taqe ukanak jumanakar amtayañajj wakisipuniwa,+ 14 nayajj niyaw aka tabernáculo jaytjjäjja, kunjamtï Jesucristo Tatitusajj yatiykarakitu ukhama.+ 15 Nayajj chʼamachasiskakïwa, ukhamat nayajj sarjjä uka qhepat taqe ukanak amtasipkakiñamataki.*

16 Nanakajj Jesucristo Tatitusan kuttʼaniñ tiempopata* chʼamapata yatiyapksma ukhajja, janiw jumanakarojj jaqenakan uñstayat falso cuentonakjam parlapksmati, jan ukasti jupajj kunja jachʼäkitejj uk nanak pachpa uñjasaw parlapjjsmajja.+ 17 Jupajj Dios Awkitwa jachʼañchäwi katoqäna, ukjja kunapachatï jachʼañchäwi churir Diosajj jupar akham siskäna ukhaw katoqäna, Diosasti sänwa: “Jupajj wali munat Wawajawa, nayajj wal jupat kusista”+ sasa. 18 Jïsa, nanakajj jupamp chika Diosan ajllita qollunkasipkayäta ukhaw alajjpachat jutir uka arunak istʼapjjta.

19 Jiwasanakajj profecía arunakarojj jukʼampiw confiytanjja. Jumanakajja walikpun uka arunakarojj wali amuyump uñjasipktajja, kunjamtï lamparajj+ mä chʼamak cheqan qhantkejja, ukhamarak uka arunakajj chuymanakaman qhantpan, kunapachatï qhanjtanjjani, alwa warawaras+ mistunjjani ukhakama. 20 Jumanakajj yatipjjtawa, Qellqatankki uka profecía arunakajja, janiw ni mayas jaqen amuyunakapat jutkiti. 21 Profecía arunakajja, janiw kunapachas jaqen munañapat parlatäkänti,+ jan ukasti espíritu santon yanaptʼapampiw* jaqenakajj Diosat parlapjjäna.+

2 Israel markanjja falso profetanakaw utjäna, ukhamarakiw jumanak taypinjja falso yatichirinakajj utjani,+ jupanakajj amukiw tʼunjir sectanak uñstayapjjani, jupanakar alaski uka Jesusarus* apanukupjjarakiniwa,+ ukham lurapjjatapatjja jankʼak tʼunjatäpjjaniwa. 2 Ukhamarus jupanakan jan phenqʼani jucha luratanakaparojj* waljaniw arkapjjani.+ Jupanak kawsasti jaqenakajj jan walinakwa cheqa thakit parlapjjani.+ 3 Jupanakajj kʼari arunakampiw kunatï jupanakatakik walïki uk thaqasajj jumanakar engañjapjjätam. Ukampis nayratpach jupanakatak amtatäkäna+ uka juchañchäwejj janiw qheptʼankaniti, jupanakajj cheqpachapuniw tʼunjatäpjjani.+

4 Diosajj juchachasir angelanakarus castigänwa,+ jupanakarojj Tartaroruw*+ jaqontäna, wali chʼamak lugararuw cadenanakamp ñachʼantäna,* jupanakajj juzgatäñkamaw ukankapjjani.+ 5 Jupajj nayra mundorojj ukhamarakiw castigäna,+ ukampis kunatï cheqapäki uk yatiyiri+ Noé chacharojj salvänwa. Diosajj jan wali jaqenakamp phoqantat nayra mundor+ uma juicio apankäna ukhajja, paqallqo jaqenakampiruw salväna.+ 6 Jupajj Sodoma ukat Gomorra markanakarojj ukhamarakiw castigäna,+ uka markanakarojj qhellaruw tukuyäna, ukhamatwa kunanakas jan wali jaqenakarojj pasani uk uñachtʼayäna.+ 7 Diosajj cheqapar sarnaqer Lot chacharojj salvarakïnwa,+ jan wali jaqenakan* jan phenqʼani jucha luratanakapajj* walpun Lot chacharojj llakisiyäna. 8 Cheqapar sarnaqer uka jaqejja, jan wali jaqenak taypin jakkasajja, kunjamsa jupanakajj jakapjjäna uk uñjasasa kunanaksa parlapjjäna ukanak istʼasasa, sapüruw wal llakisïna. 9 Ukhamajj Jehová* Diosajja, yantʼan uñjasipki uka Dios chuyma jaqenakarojj kunjam salvañsa yatiwa,+ jan wali jaqenakar imañsa yatirakiwa, ukhamat juicio urun tʼunjatäpjjañapataki.+ 10 Yamas khitinakatï mayninakan cuerpop qʼañuchañ munapki,+ pʼeqtʼirinakarus jiskʼachapki ukanakar+ tʼunjañatak imañsa yatirakiwa.

Jupanakajj janiw kunarus ajjsarapkiti, jan istʼasir jaqenakäpjjarakiwa, khitinakarutejj Diosajj jachʼañchki ukanakatsa jan ajjsartʼasaw jan walinak parlapjje. 11 Angelanakajj jupanakat sipans jukʼamp chʼamanïpkchisa, Jehová* Diosar respetapjjatap laykojj* janiw uka falso yatichirinakarojj jan wali arunakamp juchañchapkiti.+ 12 Uka jaqenakajj jan amuytʼasir animalanakjamaw sarnaqapjje, katjatäñataki jiwayatäñatakiw nasipjje, kuntï jan yatipki ukanakjjatwa jan walinak parlapjje.+ Jupanakajj jan walinak lurapjjatap laykuw tʼunjat uñjasipjjani, 13 jan walinak lurapjjatap laykurakiw castigata uñjasipjjani.

Jupanakajj urüskchi ukasa jañchin munañaparjam jakañajj wali sumäkaspas ukham amuyapjje.+ Jupanakajj isin manchaparu, ajan mirkharu uñtatäpjjewa, jumanakamp chika kʼuchirtʼaskasajja, kʼari yatichäwinakapat wal kusisipjje.+ 14 Jupanakajj adulterio jucha lurañ wal munapjje,*+ janiw juchanakapsa jaytirjamäpkiti, jan suma saytʼatäpki uka creyentenakaruw engañjapjje. Chuymanakapajj taqe kun wal munañamp phoqantatawa.* Maldisit wawanakäpjjewa. 15 Jupanakajj cheqa thak jaytasajj chhaqañaruw saranukupjje. Beor chachan Balaam+ yoqapan thakipwa arkapjje, jupajj pago katoqañ wal munatap laykojj kunatï jan walïki ukwa luräna,+ 16 ukampis juchachasitapatjja cheqañchataw jupajj uñjasïna.+ Uka profetan loqhe amtap jan phoqasiñapatakejja, jan parlir mä khumuñ uywaw jaqjam parlasajj jarktʼäna.+

17 Uka jaqenakajj wañsut uma jalsunakäpjjewa, jachʼa thayan apnaqat qenayanakäpjjarakiwa, wali chʼamak mä lugaraw jupanakatakejj imatäski.+ 18 Jupanakajj jachʼa jachʼa tukusaw inamay arunak parlapjje. Jan wali luririnakat escapasipki uka jaqenakarojja,+ jañchin munañanakapampi+ jan phenqʼani jucha luratanakapampiw* engañjapjje. 19 Uka jan wali jaqenakajja librew jakasipjjäta sasaw jupanakar sapjje, ukampis jupanak pachpaw juchan esclavopäsipki.+ Mä jaqetejj maynin* apnaqatächi ukhajja, uka jaqejj apnaqeripan esclavopawa.+ 20 Jupanakajj Salviri Jesucristo Tatitur sum uñtʼasaw aka mundon qʼañu luräwinakapat salvasipjjäna,+ ukampis jichhajj mayampiw uka luräwinakarojj kuttʼapjje, mayampiw ukanakampejj apnaqayasipjjaraki, ukatwa jupanakajj cheqa yatichäwinak janïr uñtʼapkäna uka tiempot sipansa jichhajj jukʼamp jan walin uñjasipjje.+ 21 Diosat katoqapkäna uka mandamientot saranukuñat sipansa, jupanakatakejj jukʼamp walïspänwa cheqap thak jan phoqatpach uñtʼapjjañapajja.+ 22 Aka yatiñampi arsut arunakajj jupanakjjaruw phoqasi: “Anojj waqʼaqsutaparuw* mayamp kutjjatasi, jareqat khuchejj mayampiw ñeqʼer suntʼsuraki”.+

3 Munat jilatanaka, akampejj pä cartwa qellqanipjjsma, kunjamtï nayrïr cartan qellqanipksmajja ukhamarakiw jichhajj amtayanipjjsma, ukhamat qhan amuyasipkakiñamataki,+ 2 santo profetanakan nayra parlatanakapsa Salviri Tatitusan mandamiento arunakapsa amtasipjjañamataki, uka mandamientonakjja apostolonakatwa* istʼapjjtajja. 3 Nayraqatjja ak yatipjjañamawa: qhepa urunakanjja kunatï walïki ukanakat sawkasir jaqenakaw utjani, munañanakaparjamaw jan walinak lurapjjani,+ 4 jupanakajj sapjjaniwa: “Criston kuttʼaniñap tiempojj* ¿kawkinkarakisti?+ Nayra awkinakasajj jiwañan iktʼjjapjjäna ukhat jichhakamajja, taqe kunas pachpakïskiwa, jaqenakajj luratäkäna ukhatpachaw ukhamäski”+ sasa.

5 Uka jaqenakajj yatkasinwa akanak jan amtañ munapkiti: alajjpachanakajj nayratpachaw utjäna, Diosan aruparjamaw oraqejj umat jaljtayatäna, uma taypin uchatarakïnwa.+ 6 Kunapachatï umajj aka oraqpachar phoqantkäna ukhajja, nayra tiempo jaqenakajj ukanakampi tukjatarakïnwa.+ 7 Ukampis Diosan uka pachpa aruparjamarakiw alajjpachanakasa aka oraqesa ninatak imatäski, ukanakajja juicio urojj purinkani ukürkama, kunapachatï jan wali jaqenakajj tʼunjatäkani ukürkam imatäsipkiwa.+

8 Munat jilatanaka, Jehová* Diosatakejj mä urojj waranqa maranakamp sasiwa, waranqa maranakajj mä urumpi sasirakiwa, janipun uk armasipjjamti.+ 9 Jehová* Diosajj promesap phoqañatakejj janiw qheptʼkiti,+ kunjamtï yaqhep jaqenakajj amuyapki ukhamjja, jan ukasti wali pacienciampiw jumanakar suyasipktamjja; janiw khitin jiwañapsa jupajj munkiti, jan ukasti taqenin arrepentisipjjañapwa muni.+ 10 Ukampis Jehová* Diosan urupajj+ mä lunthatar uñtataw jutani,+ uka urunjja suynasisaw alajjpachanakajj chhaqtjjani,+ kunanakatï alajjpachanakansa oraqensa utjki ukanakajja juntʼutatayatäsajj umatatayatäniwa, oraqesa kunanakatï ukan utjki ukanakasa qhanstayatäniwa.*+

11 Niyakejjay taqe ukanakajj umatatayatächinejja, jumanakajj kunjam jaqëpjjañamasa uk amuytʼasipjjam, jumanakajj qʼomaw sarnaqapjjañama, luratanakamampis Dios chuymäpjjatamwa uñachtʼayapjjañamaraki. 12 Jehová* Diosan urup+ puriniñapjja wali amuyump* suytʼasipkakim, janipun armasipjjamti, uka urunwa alajjpachanakajj ninampi tukjatäni,+ kunanakatï alajjpachanakansa oraqensa utjki ukanakajj umatatayatarakïniwa. 13 Ukampis Diosan promesaparjamajj machaq alajjpachanakampi machaq oraqempi suyasktanjja,+ ukanakanjja cheqapar sarnaqañaw utjani.+

14 Ukhamajj munat jilatanaka, niyakejjay ukanak suyasipkstajja, qhawqtï lurirjamäpkta ukarjamajj chʼamachasisipkakim, ukhamat Diosajj tukuyar jan kuna manchanïpjjatama, jan kuna kamachtʼatäpjjatama, sumankapjjatam+ uñjañapataki. 15 Tatitusan paciencianïtap laykuw salvasiñajj utji, uk amuyapjjam. Uka toqetarakwa Pablo munat jilatasajj Diosat yatiñ katoqasajj qellqanipjjayätamjja.+ 16 Cheqansa jupajj taqe cartanakapanwa uka toqenakat qellqanipjjayätamjja. Ukampis uka qellqatanakapan yaqhep cheqanak amuyañajj chʼamakiwa. Jan suma amuytʼasirïpki* uka jaqenakasa payachasirinakasa jupanak pachpa tukjatäñatakiw uka arunakjja qʼewjapjje, Qellqatanakankir yaqha arunakampis ukhamarakiw lurapjje.

17 Ukhamajj munat jilatanaka, taqe ukanak yatjjasajj wal amuyasipjjam, ukhamat jan wali jaqenakan* juchanakapampi jan apayasipjjañamataki, suma saytʼatäkasin jan tinkupjjañamataki.+ 18 Antisas jumanakajj Salviri Jesucristo Tatitusan wali khuyapayasiñapsa yatiñapsa jukʼamp katoqasipkakim. Jupajj jichhasa wiñayatakisa jachʼañchatäpan. Amén.