1 JUAN
JUANAN NAYRÏR QELLQAT CARTAPA

1 Khititï jakañ churir aru+ apanki uka toqetwa qellqanipjjsma. Jupajj qalltatpachwa utjäna, nanakajj jupa toqetwa istʼapjjta, nayranakajampiw jupar uñjapjjta, sum uñkatapjjarakta, amparanakajampiw llamktʼapjjarakta. 2 (Jïsa, wiñay jakañajj qhana uñachtʼayatänwa, nanakajj uñjapjjtwa, uka toqetwa nanakajj qhanañchapjjta,+ jumanakarus yatiyapjjaraksma. Uka wiñay jakañajja+ Dios Awkitwa juti, nanakaruw uk qhan uñachtʼayapjjarakitu). 3 Kuntï nanakajj uñjapkta, istʼapkarakta ukanakwa jumanakarojj yatiyapjjsma,+ ukhamat jumanakajj nanakampi mayakïpjjañamataki, kunjamtï jiwasajj Awkimpisa Jesucristo Yoqapampis mayakïktan ukhama.+ 4 Ukanakjja kusisiñasajj phoqatäñapatakiw qellqanipjjsma.

5 Cristot istʼasaw nanakajj akanak yatiyanipjjsma: Diosajj qhanawa,+ janipuniw kuna chʼamakas jupan utjkiti. 6 Jiwasatejj “jupampejj mayakïtanwa” sasin sisstan, ukampis chʼamakan sarnaqaskakstan ukhajja kʼarisisktanwa, janiw kunatï cheqäki ukarjam sarnaqktanti.+ 7 Ukampis jiwasatejj qhanan sarnaqaskstan ukhajja, kunjamtï Diosajj qhanankki ukhamjja, jiwaskamajj mayakïtanwa, Jesús Yoqapan wilapas taqe juchanakasatwa qʼomachistu.+

8 Jiwasatejj “janiw juchanïktanti” sasin sisstan ukhajja, jiwas pachpaw engañjasisktanjja,+ janirakiw cheqa yatichäwinaksa creyktanti. 9 Diosajj janiw jaytanukusirïkiti, cheqapar uñjirirakiwa. Ukhamajj jiwasatejj juchanakas arsusiñänejja, juchanakas perdonistaniwa, taqe jan wali luräwinakatsa qʼomacharakistaniwa.+ 10 Jiwasatejj “janiw juch lurktanti” sasin sisstan ukhajja, Diosarojj kʼariruw tukuyasktanjja, janirakiw arunakapajj chuymasankkiti.

2 Munat wawanakaja, jan juchar purtʼasipjjañamatakiw akanak qellqanipjjsma. Maynitejj juchar purini ukhajja, jiwasajj mä yanapirinïtanwa,* jupajj Awkimp chikäki uka Jesucristowa,+ jupajj cheqapar uñjiriwa.+ 2 Jupajj Diosampi sumankthapiñasatakiw juchanakas laykojj+ mä sacrificior uñtat loqtasïna.+ Janiw juchanakas laykukejja, jan ukasti aka mundonkir jaqenak laykus loqtasirakïnwa.+ 3 Jiwasatejj mandamientonakap phoqaskakiñäni ukhajja, jupar uñtʼatasajj wali qhanäniwa. 4 Maynitejj “nayajj juparojj uñtʼtwa” sasin sischi, ukampis mandamientonakap jan phoqkchi ukhajja, uka jaqejj kʼariwa, janirakiw kunatï cheqäki uk parlkiti. 5 Ukampis maynitejj Criston arup phoqchi ukhajja, Diosar cheqpachapuni munasitapajj wali qhanaw amuyasi.+ Jiwasatejj arunakap phoqstan ukhajja, jupamp mayakïtaswa uñachtʼaytanjja.+ 6 Maynitejj jupamp mayakïtwa sischejja, kunjamtï Jesusajj sarnaqkäna ukham sarnaqañatak obligatarakiwa.+

7 Munat jilatanaka, janiw nayajj mä machaq mandamiento qellqanipksmati, jan ukasti qalltatpach utjapkayätam uka nayra mandamientwa qellqanipjjsma.+ Uka nayra mandamientojj istʼapkayäta uka arunakawa. 8 Mayampiw nayajj mä machaq mandamientökaspas ukham qellqanipjjsma, uka mandamientorjamaw jupajj sarnaqäna, jumanakas ukarjamarakiw sarnaqapjjayätajja, chʼamakajj pasaskiwa, cheqpach qhanajj qhantjjarakiwa.+

9 Maynitejj nayajj qhananktwa sischi, ukampis jilaparojj uñisirakchi ukhajja,+ jupajj chʼamakankaskiwa.+ 10 Maynitejj jilapar munaschi ukhajja, jupajj qhanankaskiwa,+ janirakiw kunas jupar lanktʼasiykaspati.* 11 Ukampis khititejj jilapar uñiski ukajja, chʼamakankaskiwa, chʼamakanwa sarnaqaskaraki,+ janirakiw kawkir saratapsa yatkiti,+ kuna laykutejj chʼamakaw juparojj juykhuptayi.

12 Munat wawanaka, jumanakan juchanakamajj jupan sutip laykuw perdonatäjje,+ ukatwa nayajj qellqanipjjsma. 13 Awkinaka, khititejj qalltatpach utjkäna ukar uñtʼapjjatamatwa qellqanipjjsma. Waynanaka, Supayar+ atipjapjjatamatwa qellqanipjjsma. Wawanaka, Dios Awkisar+ uñtʼapjjatamatwa qellqanipjjsma. 14 Awkinaka, khititejj qalltatpach utjkäna ukar uñtʼapjjatamatwa qellqanipjjsma. Waynanaka, jumanakajj chʼamanïpjjtawa,+ Diosan arupas chuymanakamankiwa,+ Supayarus atipjapjjaraktawa,+ ukatwa qellqanipjjsma.

15 Jan aka mundor munapjjamti, janirak kunanakatï aka mundon utjki ukanakarus munapjjamti.+ Maynitejj aka mundor munaschejja, Awkin munasiñapajj janiw jupan utjkiti.+ 16 Taqe kunatï aka mundon utjki, mä arunjja jañchin munañanakapasa,+ nayran munañanakapasa,+ kunanakatï maynin utjki ukanakat jachʼañchasiñanakasa janiw Awkit jutkiti, jan ukasti aka mundotwa juti. 17 Aka mundosa munañanakapasa tukusiskiwa,+ ukampis khititejj Diosan munañap lurki ukajja wiñayatakiw jakani.+

18 Munat wawanaka, qhepa horasäjjewa. Jumanakajj anticriston* jutañapat istʼapjjtawa.+ Jichhajj walja anticristonakaw uñstanipjje,+ ukhamatwa jiwasajj qhepa horasankjjatas yattanjja. 19 Jupanakajj jiwasanak taypitwa mistupjje, ukampis jupanakajj janiw jiwas kastäpkänti.+ Jupanakatejj jiwas kastäpjjaspäna ukhajja, jiwasamp chikäsipkaspänwa. Ukampis janiw taqenejj jiwas kastäpkiti,+ uk qhan amuyasiñapatakiw jupanakajj mistupjje. 20 Jumanakajj Santo Diosan ajllitäpjjtawa,+ taqe jumanakajj kunatï cheqäki ukanaksa uñtʼapjjaraktawa. 21 Janiw nayajj kunatï cheqäki uk jan uñtʼapjjatamat+ qellqanipksmati, jan ukasti kunatï cheqäki uk uñtʼapjjatamatwa qellqanipjjsmajja, kunatï kʼarïki ukajja janiw kunatï cheqäki ukat jutkiti.+

22 ¿Khitis kʼarejja, janit Jesusan Cristötap jan creyki ukäki?+ Khititejj Awkirus Yoqarus jan creyki ukaw anticristojja.*+ 23 Taqe khititejj Yoqar jan creyki ukajja, janiw Awkimp suma uñjatäkiti.+ Ukampis taqe khititejj Yoqar creyki ukajja,+ Awkin wali suma uñjatawa.+ 24 Ukhamajj kunanaktï jumanakajj qalltatpach istʼapkta ukanakjja, chuymanakamarojj imasipkakiñamawa.+ Jumanakatejj qalltatpach istʼapkta ukanak chuymanakaman imasipkakïta ukhajja, Yoqampis Awkimpis mayakïpjjätawa. 25 Ukhamarus jupajj jiwasar wiñay jakañ+ churañatakiw mä promesa luräna.

26 Yaqhepanakajj engañjañwa jumanakar munapjjtamjja, ukatwa nayajj akanak qellqanipjjsma. 27 Jumanakarojj Diosaw espíritu santompi ajllisipjjtamjja,+ uka espíritu santow jumanakampïskaraki, ukhamajj janiw khitin jumanakar yatichañapajj wakiskiti. Antisas Diosaw ajllisajj taqe kunanakat yatichapjjtamjja,+ ukanakajj cheqawa, janiw kʼarïkiti. Kunjamtï jupajj yatichapktamjja, ukarjam jumanakajj jupamp mayakïsipkakim.+ 28 Ukhamajj munat wawanaka, jupampejj mayakïsipkakim, ukhamat kunapachatï jupajj kuttʼankani uka tiemponjja,* jan ajjsartʼas qhan parlañasataki,+ jupajj jutkani ukhajja phenqʼasiñat jupat jan jitheqtañasataki. 29 Jumanakatejj jupan cheqapätap yatipjjsta ukhajja, taqe khititejj cheqapar sarnaqki ukajj jupan wawapätap yatipjjaraktawa.+

3 ¡Qhawqsa Awkejj munasistu uk uñjapjjam,+ jiwasajj Diosan wawanakapa satäpjjtanwa!+ Cheqpachansa Diosan wawanakapätanwa. Ukatwa aka mundonkir jaqenakajj jan uñtʼapkistuti,+ kuna laykutejj janiw Diosarojj uñtʼapkiti.+ 2 Munat jilatanaka, jichhajj Diosan wawanakapätanwa,+ jutïrin kunjamänis jakäwisajj uka toqetjja janïraw qhanañchapkistuti.+ Ukampis jiwasanakajj yattanwa, jupajj uñachtʼayaskani ukhajja, jupjamäñäniwa, kuna laykutejj kunjamäkitejj jupajj ukwa uñjañäni. 3 Taqe khititejj jupar suytʼaski ukajja, jupa pachpaw qʼomachasi,+ kuna laykutejj jupajj qʼomawa.

4 Taqe khititejj juchan sarnaqki ukajja, leyinakwa pʼakintaski, cheqansa juchajj leyinak pʼakintañawa. 5 Jumanakajj yatipjjaraktawa, juchanakas apaqañatakiw jupajj jutäna,*+ jupanjja janiw kuna juchas utjkiti. 6 Taqe khititejj jupamp mayakïki ukajja, janiw juchan sarnaqkiti.+ Khititejj juchan sarnaqki ukajja, janiw jupar uñjkiti ni uñtʼkarakisa. 7 Munat wawanaka, jan khitimpis engañjayasipjjamti, khititejj cheqapar sarnaqki ukajja, cheqapar sarnaqer jaqewa, kunjamtï Jesusajj cheqapäki ukhama. 8 Khititejj juchan sarnaqki ukajja, Diablotwa juti, Diablojj qalltatpachwa* juch luraski.+ Ukatwa Diosan Yoqapajj Diablon luratanakap tʼunjañatak juti.+

9 Taqe khititejj Diosan wawapäki ukajja, espíritu santojj* jupjjankatap laykojj janiw juchan sarnaqkiti.+ Diosan wawapätap laykojja janiw juchan sarnaqkaspati.+ 10 Diosan wawanakapasa Diablon wawanakapasa akanwa qhan amuyasi: khititejj cheqapar jan sarnaqki, khititejj jilaparus jan munaski ukajja, janiw Diosat jutkiti.+ 11 Aka arunakwa jumanakajj qalltatpach istʼapjjtajja: jiwasanakajj maynit maynikam munasiñasawa.+ 12 Janiw Cainar uñtasitäñasäkiti, jupajj Supayatwa jutäna, jilaparojj jan sinttʼasisaw jiwayarakïna.+ ¿Kunatsa jiwayänjja? Jupan luräwinakapajj jan walipunïnwa,+ jilapan luräwinakapasti cheqapänwa.+

13 Jilatanaka, aka mundotejj jumanakar uñisipjjstamjja, jan musparapjjamti.+ 14 Jiwasanakajj yattanwa, jilatanakar munasitasatjja+ jiwañat jakañaruw pasjjtanjja.+ Khititejj jilatanakar jan munaski ukajja, jiwañankaskiwa.+ 15 Taqe khititejj jilapar uñiski ukajja, jaqe jiwayiriwa.+ Jumanakajj yatipjjtawa, janiw khiti jaqe jiwayiris wiñay jakañ katoqkaniti.+ 16 Cristow jiwasanak laykojj jiwäna,*+ ukhamatwa jiwasanakajj munasiñ uñtʼtanjja. Ukhamajj jilatanakas layku jiwañatakejj* obligatätanwa.+ 17 Maynitejj aka mundon utjirinïchi, ukampis jilatapar jan kunani uñjkasas jan jupat khuyaptʼaskchejja,* ¿kunjamarak jupajj Diosar munasispasti?+ 18 Munat wawanaka, janiw arumpikisa ni lakampikisa munasiñasäkiti,+ jan ukasti luratasampi+ cheqapampi munasiñasawa.+

19 Ukhamatwa kunatï cheqäki ukat jutatasjja yatiñäni, qhawqsa Diosajj munasistu ukatsa jan payachaskañäniti.* 20 Chuymasatejj juchañchchistu ukhajja, ak amtañasawa: Diosajj chuymasat sipansa jukʼamp jachʼawa, taqe kunwa yatiraki.+ 21 Munat jilatanaka, chuymasatejj jan juchañchkchistu ukhajja, Diosarojj jan ajjsarasaw qhan parlsna.+ 22 Jiwasajj mandamientonakap phoqasktanwa, kunatï jupa nayraqatan walïki uksa luraskaraktanwa, ukatwa kuntï jupar mayktan ukjja jupat katoqaraktanjja.+ 23 Cheqpachansa akaw jupan mandamientopajja: Jesucristo Yoqapan sutiparojj confiyañasawa,*+ maynit maynikamas munasiñasarakiwa,+ kunjamtï jupajj mandamiento churkistu ukhama. 24 Ukhamarus khititejj jupan mandamientonakap phoqki ukajja, Diosampejj mayakiwa, Diosasti jupampejj mayakirakiwa.+ Diosajj churkistu uka espíritu santo taypiw jupajj jiwasamp mayakïtap yattanjja.+

4 Munat jilatanaka, walja falso profetanakaw aka mundon uñstapjje,+ ukhamajj jan jumanakajj taqe yatiyäwejj* Diosatsa jutkaspa ukham creyipjjamti,+ jan ukasti uka yatiyäwinakajj* Diosatti juti janicha ukjja yantʼapjjam.+

2 Mä yatiyäwejj Diosankiti janicha ukjja, akhamatwa jumanakajj yatipjjasma: kawkïr yatiyäwitejj mä jaqjamaw Jesucristojj aka oraqer juti sasin qhanañchchi ukajja, Diosatwa juti.+ 3 Ukampis mä yatiyäwitejj Jesusajj janiw mä jaqjam jutkiti sasin sischi ukajja, janiw Diosat jutkiti.+ Uka yatiyäwejj anticriston* yatiyäwipawa, kunanaktï jupajj parlañapäkäna ukanakjja, jumanakajj istʼapjjayätawa,+ ukanakwa jichhas aka mundon parlasipki.+

4 Munat wawanaka, jumanakajj Diosat jutirïpjjtawa, falso profetanakarojj atipjapjjaraktawa,+ kuna laykutejj khititï jumanakamp mayakïki ukajja,+ khititï aka mundompi mayakïki ukat sipansa jukʼamp chʼamaniwa.+ 5 Uka falso profetanakajj aka mundot jutirïpjjewa,+ ukatwa kunatejj aka mundot jutirïki ukanak parlapjje, ukatarakwa aka mundos jupanakar istʼaraki.+ 6 Jiwasajj Diosat jutirïtanwa. Khititejj Diosar uñtʼki ukajja istʼistuwa.+ Khititejj Diosat jan jutirïki ukajja janiw istʼkistuti.+ Ukhamatwa jiwasajj kawkïris cheqa yatiyäwejja, kawkïris kʼari yatiyäwejja uk amuytanjja.+

7 Munat jilatanaka, maynit maynikam munasisipkakiñäni.+ Munasiñajj Diosatwa juti, taqe khititejj munasirïki ukajj Diosan wawapawa, Diosarus uñtʼarakiwa.+ 8 Khititejj jan munasirïki ukajj janiw Diosarojj uñtʼkiti, kuna laykutejj Diosajj munasiñawa.*+ 9 Diosajj mä sapa Yoqaparuw+ aka mundor khitanïna, ukhamat jupa taypi wiñay jakañ katoqañasataki,+ ukhamatwa Diosajj jiwasar munasitap uñachtʼayistu. 10 Diosaw Yoqaparojj juchanakas laykojj+ mä sacrificior uñtat khitanïna, ukhamat jupampi sumankthapiñasataki.+ Janiw jiwasan juparu munasitas laykojj uk lurkänti, jan ukasti jiwasar munasitap laykuw uk luräna.

11 Munat jilatanaka, niyakejjay Diosajj ukham munaschistojja, jiwasanakajj maynit maynikam munasiñatak obligatätanwa.+ 12 Janipuniw khitis Diosarojj kunapachas uñjkiti.+ Jiwasatejj maynit maynikam munasiskakiñänejja, Diosajj jiwasampïskakiwa, munasiñapajj jiwas taypin perfectoruw tukuraki.+ 13 Diosaw espiritup churistu, ukhamatwa jupampi mayakïtassa jupajj jiwasampi mayakïtapsa yattanjja. 14 Ukhamarus alajjpachankir Awkiw Yoqaparojj aka mundon salviripat khitani, nanak pachpaw uk uñjapjjta, uka toqetwa qhanañchasipkarakta.+ 15 Khititejj “Jesusajj Diosan Yoqapawa” sasin taqe chuyma siski ukajja,+ Diosajj jupamp mayakiwa, jupas Diosampejj mayakirakiwa.+ 16 Qhawqsa Diosajj munasistu uk jiwasajj yattanwa, creyiraktanwa.+

Diosajj munasiñawa,+ khititejj munasirïki ukajja, Diosampejj mayakiwa, Diosasti jupampejj mayakirakiwa.+ 17 Ukhamatwa munasiñajj jiwas taypin perfector tuku, ukhamat jiwasajj juicio urun jan ajjsartʼas qhan parlañasataki.+ Aka mundonjja jiwasajj kunjamäkitejj Jesucristojj ukhamarakïtanwa. 18 Munasiñanjja janiw ajjsarañajj utjkiti.+ Khitinakatï perfecto munasiñanïpki ukanakajja janiw ajjsarapkiti, ajjsarañajj walja lurañanakatwa jarkʼistu. Cheqpachansa maynitejj ajjsarchejja, munasiñapajj janiw perfectökiti.+ 19 Diosaw nayraqat munasistu, ukatwa jiwasajj munasiñ yatiraktanjja.+

20 Maynitejj “nayajj Diosar munastwa” sasin sischi, ukampis jilapar uñisiskchi ukhajja, jupajj kʼariwa.+ Maynitejj jilapar uñjkasas jan munaskchi ukhajja,+ janirakiw jan uñjkañ Diosarojj munaskaspati.+ 21 Jupajj aka mandamientwa jiwasar churistu: khititejj Diosar munaski ukajja, jilaparojj munasiñaparakiwa.+

5 Taqe khititejj Jesusajj Cristötap creyki ukajja, Diosan wawapawa,+ taqe khititejj Awkir munaski ukajja, jupan wawanakaparojj munasirakiwa. 2 Kunapachatï jiwasajj Diosar munastan, mandamientonakapsa phoqaraktan ukhajja, Diosan wawanakapar munasitaswa yattanjja.+ 3 Jiwasatejj Diosar munasstan ukhajja, mandamientonakap phoqarakiñäniwa,+ mandamientonakap phoqañajj janiw chʼamäkiti.+ 4 Taqe khititejj Diosan wawapäki ukajja, aka mundorojj atipjiwa.+ Diosar confiyatasatwa* aka mundor atipjtanjja.+

5 ¿Khitis aka mundor atipjaspa?+ ¿Janit Jesusajj Diosan Yoqapätap creyki ukajj atipjkaspa?+ 6 Jesucristojj uma taypi ukhamarak wila taypiw jutäna, jupajj janiw umampikejj jutkänti,+ jan ukasti umamp wilampiw jutäna.+ Espíritu santow uk qhanañchaski,+ kuna laykutejj espiritojj cheqawa. 7 Kimsaniw qhanañchapjje: 8 espiritumpi+ umampi+ wilampi.+ Uka kimsanejj mayak qhanañchapjjaraki.

9 Jiwasajj jaqenakan qhanañchatap katoqtanwa, ukampis jaqenakan qhanañchatapat sipansa Diosan qhanañchatapaw jukʼamp jilankejja. Kuna laykutejj Dios pachpaw Yoqapat qhanañchaski. 10 Khititejj Diosan Yoqapar confiyki* ukajja, kuntï Diosajj jupar siski ukarojj chuymapan katoqarakiwa. Khititejj Diosar jan confiyki* ukasti, juparojj kʼariruw tukuyi,+ Yoqapjjat qhanañchatapar jan confiyatap* layku. 11 Uka qhanañchäwejj akawa: Diosaw wiñay jakañ churistu,+ uka jakañjja Yoqap taypiw katoqtanjja.+ 12 Khititejj Yoqan arkiripäki ukajja, wiñay jakañaniwa, khititejj Diosan Yoqapan jan arkiripäki ukasti, janiw wiñay jakañanïkiti.+

13 Diosan Yoqapan sutipar confiyirinaka,*+ jumanakajj wiñay jakañanïpjjtawa,+ uk yatipjjañamatakiw ukanak qellqanipjjsma. 14 Jiwasanakajj janiw jupat payachasktanti,*+ jiwasatï munañaparjam kunsa mayiñäni ukhajja, jupajj istʼistaniwa.+ 15 Jiwasajj yattanwa, kuntï jupar mayktan ukjja jupajj istʼistuwa. Jiwasajj yatiraktanwa, niyakejjay jupar maystanjja, kunanaktï jupar mayktan ukanakjja katoqarakiñäniwa.+

16 Maynitejj jilapar jan jiwañar apiri jucha luraskir uñjchejja, jupatakejj orarapiñapawa, Diosasti juparojj jakañwa churarakini.+ Khitinakatï jiwañar apir jucha jan lurapki ukanakatwa nayajj parlaskta. Ukampis jiwañar apir mä juchaw utji.+ Uka juchatjja janiw oración luram sasajj siskti. 17 Taqe jan wali luräwinakajj juchawa,+ ukampis jiwañar jan apiri mä juchaw utji.

18 Jiwasajj yattanwa, taqe khititejj Diosan wawapäki ukajja, janiw juchan sarnaqkiti, jan ukasti Diosan wawapäki* ukaw jupar uñjaski, Supayasti janiw juparojj kuns kamachkaspati.*+ 19 Jiwasanakajj Diosat jutatas yattanwa, ukampis mundpachajj Supayan munañapankiwa.+ 20 Diosan Yoqapajj aka oraqeruw juti uk jiwasajj yatiraktanwa,+ jupaw jiwasarojj suma amuyu churistu, ukhamat cheqpach Diosaru uñtʼañasataki. Jesucristo Yoqap taypiw jiwasanakajj jupampi mayakïtanjja.+ Jïsa, jupaw cheqpach Diosajja, juparakiw wiñay jakañasa.+ 21 Munat wawanaka, idolonakat jitheqtapjjam.+