Lot tatan warmipaw qhip uñtäna

ABRAHAMAX utjaskäna uka Canaán uraqinwa Lot chachax familiapampi jakasïna. Mä urux akham sasaw Abrahamax Lot sobrinoparux säna: ‘Akanxa janiw taqpach animalanakasatak uraqix utjxiti. Mirä amp suma, tʼaqjtxañäni. Jumatï alayaru sarätaxa nayax aynacharuw saräxa’ sasa.

Lot sobrinopax uks aksa uñtäna. Khurin wali suma uraqiw utjäna, umani, animalanakapatakis suma chʼuxña. Ukax Jordán tuqïnwa. Ukatwa, Lot tatax familiapampi animalanakas antʼata uksar sarxapxäna. Sodoma markanwa utachasipxäna.

Sodoman utjasirinakax jan wali jaqinakäpxänwa. Lot chachatakix ukax janiw walïkänti, kunattix jupax suma jaqïnwa. Diosatakis janirakiw walïkänti. Ukatwa Sodomasa Gomorra markasa chhaqtayatäniw sasa yatiyapxañapataki Diosax pä angelapa khitanïna.

‘¡Jankʼaki! ¡Warmimampi pä phuchamampi aka markat mistxapxma!’ sasaw angelanakax Lot tatar sapxäna. Ukampis Lot tatampi familiapampix janiw jankʼaki mistupkänti, ukatwa angelanakax uka markatxa amparat waysunïna. Ukat mä angelax akham sänwa: ‘¡Jan jiwapxañamatak tʼijtapxma! Jan qhipar uñtapxamti. Qullunakar tʼijkatapxam jan jiwapxañamataki’ sasa.

Lot tatampi phuchanakapampix iyaw sasaw Sodomat tʼijtxapxäna. Jan saytʼasa jan qhipar uñtasaw sarxapxäna. Ukampisa Lot tatan warmipaxa janiw istʼaskänti. Sodoma markat niya jay sarxasinxa, mayak saytʼasin qhiparu uñtxäna. Ukatwa jayu qalaru tuküna. ¿Akan uñjtati?

Aka sarnaqäwitxa, ¿kuns yatiqsna? Diosax istʼasirinakarux qhispiyiwa, ukampis jan jaysasirinakax jiwapxiwa.