Joseyaw jilanakapar yantʼi

JILANAKAPAX nayrjam jan sinttʼasiri, qala chuymäsipkakpachati uk yatiñwa Joseyax munäna. Ukatwa akham säna: ‘Jumanakax uñaqanakäpxtawa, kawkjatcha markajax aynachtʼayañjamaski uk uñaqiriw jutapxtaxa’ sasa.

‘Janiw uñaqäpkti. Chiqa jaqinakäpxtwa. Nanakax mä sapa awkinikïpxtwa. Tunkapayanipxayätwa. Maynisti janiw nanakampïxarakiti, sullkïristi awkijampiw utankaski’ sapxänwa.

Kʼarisipxtaw sasaw Joseyax säna. Simeón sata jilaparuw carcelar katuntayäna, ukat mayninakarux manqʼanakas aptʼasitwa utar khitxäna. Ukampis akham sawayänwa: ‘Kuttʼanipxäta ukhaxa, jumanakamp chika sullkïriruw irpanipxäta’ sasa.

Canaanar kuttʼxasaxa, Jacob awkiparuw kunatï paskatayna uk yatiyapxäna. Jacob tatax wal llakisïna. ‘Joseyax janiw jiwasampïxiti, Simeonas ukhamaraki’ sasaw jachäna. ‘Benjamín sullk sullka wawajax janiw jumanakampi sarkaniti’ sänwa. Ukampis manqʼax pistʼxän ukhaxa, Egiptot manqʼa alaniñapatakixa, Jacob tatax Benjaminar jilanakapampi khitxakïnwa.

Ukat Joseyax jilanakapar jutaskir uñjäna. Benjamín sullkap uñjasax wal kusisïna. Jïsa, janipï khitisa uka aytat jaqix Joseyätap yatkäntixa. Ukat Joseyax 10 jilanakaparuw yantʼäna.

Yanapirinakapampiw Joseyax jilanakapan qʼipinakapar manqʼa phuqantayäna. Ukat jan yatiyasaw Benjaminan qʼipiparuxa mä yanapiripamp qullqit lurat copapa asantayäna. Ukatxa, Egiptot jay sarxapxäna ukhaw Joseyax yanapirinakapampi jilanakapar khitxatäna. Ukat akham sapxänwa: ‘¿Kunatsa uywirijan qullqit lurat copapa lunthatsunipxista?’ sasa.

‘Janiw nanakax kuna copsa lunthatasiniwayapkti,’ sapxänwa. ‘Khitin qʼipipattï katjapkäta ukarux jiwayapxam’ sapxiwa.

Ukatwa Joseyan yanapirinakapax taqinin qʼipinakap thaqsupxäna, ukat Benjaminan qʼipipatwa cop apsupxäna, kunjamtï akan uñaski ukhama. Ukat akham sapxänwa: ‘Jumanakax sarxapxasmawa, ukampis Benjaminax nanakampi kuttʼañapawa’ sasa. ¿Jichhax kamachtʼapxakinisa 10 jilanakapaxa?

Taqiniw Joseyan utaparu kuttʼanipxäna. Joseyax akham sänwa: ‘Taqiniw utamar kuttʼxapxasma, ukampis Benjaminaxa akan qhiparañapawa, uywatajjamaw akan irnaqani’ sasa.

Ukat Judá jilapaw akham sarakïna: ‘Nayatï jan sullkaj irptʼasita awkijan ukar sarxä ukhaxa, awkijax jiwaspawa, kunattix awkijan wali munatawa. Mirä amp suma, nayay akan uywatamjam irnaqä, sullkajarux khitxakimaya’ sasa.

Janiw jilanakapax nayrjamäxapxänti ukwa Joseyax uñjäna. Janiw nayrjam jan sinttʼasiri, qala chuymäxapxänti. Ukat Joseyax kamachänsa uk jichhax uñjañäni.