¿Aka folletojj kuna amtamp luratasa?

HOLANDA markankir Spinoza sat filósofo chachajja, “janiw jaqen luräwinakapat burlasiñsa, jiskʼachañsa ni uñisiñs munkti, jan ukasti jupanakar sum entiendiñwa munta” sasaw säna. Profesorjamajja, jumajj ukhamarakiw yateqerinakaman amuyunakapsa luräwinakapsa kunarutï creyipki ukanaks sum amuyañ munpachätajja, inas yaqhepajj Jehová Diosan Testigonakapan wawanakapäpjjchi. Awisajja, uka yateqerinakan amuyunakapasa sarnaqäwipas mayjäspawa. Ukhamächi ukhajja, jupanakar sum entiendiñaw wakisispa. Ukatakiw Jehová Diosan Testigonakapajj aka folleto lurawayapjjta. Ukhamasti, aka folleto wali amuyump liytʼañamatakiw chʼamañchtʼapjjsma.

Yaqhanakajj kunarus creyipjje uk amuyañajja, janiw ukar creyiña ukat arkaña sañ munkiti. Uka toqet yatiyañajj janiw mayninakar arkirinakapar tukuyaña sañs munkarakiti. Aka folletojja, janiw jumarusa yateqerinakamarus munkir jan munkir Testigor tukuyañ munkiti. Antisas kunsa Testigonakajj wawanakapar yatichapjje uk yatiñamatakikiwa, ukhamat uka yateqerinakar fácil entiendiñamataki ukat yanaptʼañamataki. Cheqas wawanakajj janiw kuntï yateqapki ukarjampun lurapkaspati, kunattejj sapa mayniw concienciaparjam sarnaqañ yateqasipki.

Jehová Diosan Testigonakapajj mayni awk taykanakjamarakiw wawanakapan escuelan sum yateqapjjañap munapjje. Ukatwa profesoranakapar istʼapjjañapatak yatichapjje. Maysa toqetjja, profesoranakajj wawanakapar entiendipjjaspa, respetomp uñjapjjaspa ukwa munapjjaraki.

Jehová Diosan Testigonakapajj taqe cheqan wali uñtʼatäpjjewa. Ukampis awisajj jan walinakwa jupanakat parlañ yatipjje. Aka folletojj Testigonakan wawanakapar sum uñtʼañatak yanaptʼiristam ukwa munapjjta. Jupanakajj jan mayninakjam amuyañatak derechonïpjjewa, uk amuyañatak aka folletojj yanaptʼarakirïstam ukwa munapjjarakta.