Wasitampiw wali kusisit jakasxañäni

DIOSAN apnaqäwipar kutkatasipxatapatxa, taqpacha jaqinakaw jan suyt’äwin uñjasiwayapxi, ukampis Diosax janiw jan suyt’äwin jupanakarux jaytawaykiti. Uka tuqitxa akham sasaw Bibliax qhanañchi: “Akapachasti juchañchatawa, ukasti janiwa jupan sapa munañap laykuti, jan ukasti Diosaw ukhamäñapataki wakichawayatayna. Ukampis uka suyt’añax utjapunïnwa, aka uraqix librëxañapataki tukusiña esclavöñata, Diosan wawanakapan qhispiyat jakäwipana” sasa (Romanos 8:20, 21). Chiqpachansa, Diosax awkinakapat katuqat juchampita ukat jiwañampit qhispiyasipxañapatakiw mä chiqpach suyt’äwi nayrïr chach warmin wawanakaparux churawayi. Ukhamax taqpach jaqinakaxa wasitampiw Jehová Diosamp wali sum apasipxaspa. ¿Kunjamatsa?

² Kunapachatï Adanamp Evampi juchachasipkän ukhaxa, aka Uraqin wiñayatak wali kusisit jakasiñatwa wawanakaparux jark’apxäna. Ukat kunatï walïki jan walïki uk jupanakkam amtawayasaxa, juchampir jiwañampiruw mä esclavokaspas ukham wawanakapar aljantawayapxäna. Jucharar awk taykat yurisinxa, wawanakapax maynin munañapar apnaqat t’aqhisiyat wali jaya islan katuntat esclavonakäkaspas ukhamäpxiwa. Chiqpachansa, jiwañax taqpach jaqinakaruw apnaqawayi, ukat jiwañax yaqha apnaqirimp apnaqatawa: ukasti juchawa (Romanos 5:14, 21). Amuyatatxa jaqinakatakix janis khiti qhispiyiris utjkaspa ukhamawa. Kunattix nayra awk taykanakapaw mä esclavjam aljantawayapxäna. Ukampis wali khuyapayasir mä jaqiw yuqapar khitani, ukat uka yuqapaw kuntï taqinir qhispiyañatakix mayiski taqi uk churaraki (Salmo 51:5; 146:4; Romanos 8:2).

³ Uka uñacht’äwinxa, esclavonakar qhispiyir chachaxa Jehová Diosamp sasiwa, ukat kuntï esclavonakar qhispiyañatak mayiski uka churir yuqaxa Jesucristomp sasirakiwa, jupaw janïr aka Uraqir jutkasax Diosan mä sapa Yuqapjam alaxpachan jakäna (Juan 3:16). Juparurakiw nayraqat Jehová Diosax luratayna, ukat taqi kunatï alaxpachansa Uraqinsa utjki ukanakaxa jupa tuqiw utjawayaraki (Colosenses 1:15, 16). Diosaw mä milagro lurasin Yuqapan kikpa jakäwipxa Marian purakaparu usküna ukhamat uka wawax jan juchan yuriñapataki, ukat kuntï qhispiyasiñatak munaskän ukxa jupaw Diosan mayitanakaparjam phuqañapäna (Lucas 1:26-31, 34, 35).

⁴ Ukat Jesusax 30 maranïkän ukhaw Jordán jawiran bautisasïna, ukat ukapacharakiw qullan ajayumpi jan ukax Diosan ch’amapampi ajllitäxäna. Ukhamatwa Cristor tukuwayäna, ukaxa “Ajllita” sañ muni (Lucas 3:21, 22). Ukat aka Uraqinxa kimsa mar chikataniwa Diosan arunakap yatiyäna ukapacharakiw arkirinakaparux “Diosan reinopat” kunayman tuqit yatichäna, mä arunxa uka apnaqäw tuqnamwa taqpach jaqinakax Jehová Diosampix wali sum apasipxarakini (Lucas 4:43; Mateo 4:17). Kunsa jaqinakax kusisita jakasiñataki munapxi ukxa Jesusax sumwa yatïna, ukatxa arkirinakaparus uka tuqitxa yaticharakïnwa. Mateo 5-7 jaljanakanwa Jesusan Wali Uñt’at Arst’äwipan yatichäwinakapax jikxatasi, ¿janit uk Bibliaman liyt’kasma?

⁵ Adán chachat sipansa, Jesusax taqi kunanwa Diosarux ist’äna; ukat “jupax janiw kuna juchsa lurkänti” (1 Pedro 2:22; Hebreos 7:26). Chiqpachansa, Jesusax munaspäna ukhax aka Uraqinxa wiñayatakiw jakasapäna, ukampis ‘jakañapwa churäna’, kuntï Adanax apt’awaykänxa uk Diosar kutt’ayxañatakiw Jesusax t’aqhisiñ lawar ch’akkatat jakañap apt’asiwayi (Juan 10:17; 19:17, 18, 28-30; Romanos 5:19, 21; Gálatas 3:13). Ukhamatwa kunatï jaqinakar juchampit jiwañampit qhispiyañataki munaskän uk churawayäna (Mateo 20:28). Wali t’aqhisiyata ukat mä esclavjamas irnaqaskasma ukham amuyt’añäni. Ukat maynix jumar esclavoñat qhispiyañataki juma layku jakäwip apt’asispa ukhaxa, ¿janit taqi chuym jupar yuspärkasma? Uka qhispiyäw tuqirakiw wasitamp jumax Diosan jach’a familiap taypinkasma ukat wali kusisit jakañs jikxatarakisma, juchampit jiwañampit esclavoñat qhispiyatarakïsmawa (2 Corintios 5:14, 15).

⁶ Ukat Jehová Diosan khuyapasiñapat yatiqañasa ukat wali munasiñamp uñjañasa, Biblian yatiñan aruparjam sarnaqañatakiw ch’amañchistu. Amuyt’añataki, Bibliankir aknïr yatichäwipar ist’añaxa wali ch’amawa: jaqi masisax chuym ust’aykistu ukhax jupar pantjasitanakap pampachañax wali ch’amawa. ¿Kuntï 2 yatichäwin Colosenses 3:12-14 jisk’a t’aqanakapat yatiqktan uk amtasktati? Uka jisk’a t’aqanakanxa kuna jan walt’ayasiñas utjani ukhaxa pampachañasawa sasaw ch’amañcht’awayistu. Ukat ukxaruxa kunats pampachañasäspa uka tuqitxa akham sarakiwa: “Kunjämtï jumanakarux [Jehová Diosax, NM] perdonapxtamxa, ukhamarak jumanakax perdonapxam” sasa. Ukat Jehová Diosampi ukat Jesucristompix jaqinak laykux walja askinakwa lurawayapxäna, uk yatiñax chuymamar purt’ätam ukhaxa, mayninakan juchap pampachañaxa janiw jumatakix ch’amäkaniti, juk’ampis arrepientischi ukat pampachit sas jumat mayischi ukhasa janirakiw ch’amäkaniti.