Prólogo

Munat jilat kullakanaka:

¿Jiwasajj Diosar jakʼachassnati? Janiw Diosar jakʼachasksnati sasaw waljanejj sapjje, yaqhepanakajj Diosat wali jayankapkaspas ukhamwa amuyasipjje, yaqhepanakasti Diosar jakʼachasiñatakejj janiw suma jaqëkti sasaw sapjjaraki. Ukampis Bibliajj akham sistuwa: “Diosar jakʼachasipjjam, jupajj jumanakar jakʼachasirakiniwa” sasa (Santiago 4:8). Ukatjja akham sarakistuwa: “Naya Jehová Diosamaw kupi amparam katjjasiskta, nayaw jumarojj akham sissma: ‘Jan ajjsaramti. Nayaw yanaptʼaskäma’ sasa” (Isaías 41:13).

Diosar jakʼachasiñatakisa amigopäñatakisa, ¿kunanaksa lurañasa? Mä suma amigonïñatakejja, nayraqatajj sumwa jupar uñtʼañasa, mä arun kunjam chuymanisa, kunanakas jupar gusti, kunjamas jikjjatasi ukanak sumwa yatiñasa. Khitinakatï amigosäpki ukanakarojj wal munastanjja, kunjam chuymanïpjjesa uks valoranitwa uñjaraktanjja. Jehová Diosan amigopäñatakejj ukhamarakwa lurañasa, mä arun Bibliat wali sumwa yatjjatañasa, ukhamatwa Diosajj kunjam chuymanisa, kunanakas jupar gusti, kunjamas jikjjatasi uk sum amuyañäni. Jiwasatï Diosan cualidadanakapata, Jesusajj kunjamsa Diosjam chuymanïtap uñachtʼayäna, jiwasajj kunjamsa uñachtʼayaraksna ukanakat lupʼiñäni ukhajja, jukʼampiw Taqe Kunjjar Munañani Jehová Diosar jakʼachasiñäni. Jupajj taqe chʼamani, taqe kuns cheqapar uñjiri, wali yatiñani ukat wali munasir Diosawa. Ukatjja mä awkjamarakiw wali sum cuidistu, janipuniw apanukkistaniti.

Aka librojj Jehová Diosar jukʼamp jakʼachasipjjañamatak luratawa, ukhamatwa jichhasa jutïrinsa Diosar jachʼañchasipkakïta. ¡Jumanakajj Jehová Diosamp jukʼamp suma amigor tukusipkakim!